Oberammergau (上阿瑪高)
Landsberg am Lech (蘭茨貝格)
Dachau (達豪)
KZ-Gedenkstätte Dachau (達豪集中營遺址)
München (慕尼黑)
今日第一站 Oberammergau (上阿瑪高)
一個壁畫小鎮~
有間教堂~
感覺上冇之前行過嘅壁畫小鎮咁靚~
下一站 Landsberg am Lech (蘭茨貝格)
一個值得順路經過而停一停嘅地方~
沿途風景~
泊咗喺啲兩小時免費嘅車位，泊好車仲要行一段路先到我想去嘅地方~
沿途風景~
差唔多到時，見到另一個可以停車嘅地方，呢個就近好多，不過只有一小時免費，過後要返嚟續~
咁我諗陣間夠鐘返去攞車時，可能揸過嚟呢度泊~
呢條河叫 Lech (萊希河)，而上面有一個叫 Lechwehr 呢物體~
經過 Google 大神嘅解釋，Lechwehr 即係「萊希河的堰」~
我唔知呢舊嘢有咩作用，我淨係知好靚~
實景比相片更漂亮~
之後就行去附近一個廣場 - Hauptplatz~
個廣場都幾靚~
附近有間教堂，內部幾靚~
跟住就向住部車嘅方向周圍行吓~
去到部車度，就開車去返之前話有一小時免費泊車嗰度~
咁就可以喺河邊食個午餐~
喺河邊求其搵咗間餐廳~
Pizza - mit Salami, Zwiebeln und Tomaten
with Salami, Onion and Tomato
用烘麵包作為薄餅底，都幾好喎，整體味道不錯~
Lasagne al forno
Baked Lasagne
千層麵，正常味道，不錯~
呢邊環境都幾唔錯~
返去攞車時經過又忍唔住望多兩眼~
下一站 KZ-Gedenkstätte Dachau (達豪集中營遺址)
集中營開放至 17:00，我本來預計到達時間為 15:00，預兩小時遊覽~
不過我遲咗半個鐘嚟到，就只剩下 90 分鐘遊覽時間~
去租 audio guide 時，對方同我哋講，只剩 90 分鐘，唔夠時間行，最多只可以參觀到最主要部份，個心即時涼咗一截~
不過我哋人又到咗，停車場又要俾錢，早 90 分鐘到 München (慕尼黑) 亦唔覺可以做啲咩，所以都冇咩考慮，照入~
集中營室外地方廣闊，相信有部份建築已經不復存在~
而博物館內，可以睇嘅資訊絕對係海量，就算我冇遲嚟，足兩小時俾我遊覽都絕對唔夠時間~
Arbeit Macht Frei (Work sets you free)，真的嗎？
集中營，我絕對係有好大興趣去參觀，去了解~
不過，呢 90 分鐘對我嚟講，好似冇存在過咁~
我發現自己完全冇心機去睇，初時我都唔知點解，就歸咎於可能因為太少時間，可能只睇到百份一千份一而冇心機~
無論我點努力去睇，都集中唔到精神，所以都冇乜點影相~
經過 90 分鐘後，只有沉重嘅心情，但睇過啲咩，完全冇印象~
不過切切實實嚟過集中營，都算係開吓眼界~
(後記：真正集中唔到精神嘅原因，係我作病，但我當時仲未知道)
下一站 München (慕尼黑)
首先去還車，之後閒逛同食晚餐~
還車過程一切順利，而家就拖住個篋去旅館先~
講起呢間旅館，其實都有啲驚~
旅館就屎塔負責嘅，佢同我講 München 嘅住宿唔知點解特別貴~
嗰時仲有好多時間，就諗住遲吓睇吓點先，因為我哋都遇過有啲旅館要近返啲時間先有返啲正常價~
不過後來我知道點解 München 啲住宿咁貴喇......
原來撞啱我哋去嗰時係啤酒節！
由於我哋都唔飲啤酒，又討厭熱鬧，所以都冇留意啤酒節嘅資訊~
點知原來撞到正一正！梗係貴啦！
最後揀無可揀，就揀咗呢間，呢間嘢叫 Hotel Daheim，都要成 HKD$2000 一晚！
睇相已經覺得麻麻地，但都冇辦法，book 到已經算好，同價嘅已經冇得揀，三四五千嗰啲都九成滿晒~
我最原來個計劃係住兩晚，但見到咁嘅情況，即刻改行程，住一晚好喇~
我哋經過火車站行去旅館，對 München 嘅感覺，同德國其他地方好唔同~
呢十幾日內，去過德國唔同地方，好放心，感覺上治安非常好，但 München 就唔同~
München 一街都係人，感覺非常雜亂，而且個感覺係隨便噏一個國籍嘅人都可以喺度搵到~
我哋警覺性即時提升到最高級別，就好似喺意大利法國西班牙咁~
安全行到去旅館，比相片睇到嘅殘舊~
房間喺二樓，一開 lift 門就有個西人撲出嚟嚇我哋！
其實我係極之討厭反對鄙視呢啲行為！
我好細個已經對呢啲行為反感，點解要嚇人？好好玩咩？
遇著個有心臟病嘅，俾你嚇一嚇隨時命都冇！
就算係識嘅，你都唔知佢係咪有隱性心臟病啦！
做嘢唔諗後果嘅白痴仔！
一開房門，嘩，頂，想即刻閂返度門！
勁臭煙味，好似啱啱有十個人一齊喺入面食煙咁！
出面有白痴仔，入面有臭煙味，點呀！
其實都冇得揀啦，入啦！
間房呢，唔講煙味，係殘舊嘅，但又冇想像中咁差，係二樓向街比較嘈~
不過如果遇到有曱甴真係一啲都唔出奇囉~
唉，二千蚊住間咁嘅房，真係痴鬼線，真係從來未住過咁差嘅旅館！
放低晒嘢，本來想盡快離開間房嘅，不過門外好嘈，喺門嘅探視孔度望出去，有三個西人，隊住啤酒勁大聲喺度吹水，睇佢哋都醉醉地咁~
而家咁樣行出去實在唔係一個適當嘅時候，唯有等吓~
都等咗好耐，等到冇聲，望出去，人仲喺度，唯有再等~
一直等，等到房啲煙味俾我哋吸晒，再聞唔到嘞(其實係臭覺疲勞)，等咗成個鐘，走廊終於都冇人~
天都黑晒，冇咩好行，不過一場嚟到啤酒節舉辦嘅城市，不如去朝聖吓~
途中竟然遇到有個小童(大約十歲)，走過嚟向我哋兜售廚房用嘅刀！
一個小童隨街揸刀兜售，呢件事真係好痴線！
行到去會場外圍喇，不過喺恐襲嘅陰霾下，唔係好敢/想入去喇，影張相就算，反正都興趣不大~
咁好喇，無無謂謂咁走咗過嚟，叫做嚟過~
而家就去搵嘢食，食完快啲返旅館，真係留多陣都唔想~
同埋我開始感到自己有啲唔妥，應該係作病......
好彩係旅程嘅尾聲~
行返轉頭，諗住一路行一路搵嘢食，不過真係唔敢停低~
沿路，隨街都有人醉咗大嗌、瞓喺街、腳步浮浮，下一秒有咩事發生真係冇人知~
所以沿途嘅餐廳我哋望都冇望過，要盡快離開呢個鬼域~
唔知係因為極冇安全感定因為病病地冇乜心情，一張街景相都冇影過~
最後行咗去火車站，求其揀咗間亞洲快餐~
Bo Luc Lac
Roastbeef aromatisiert mit mildem chili, Knoblauch, Zitronengras, Paprika und Röstzwiebeln
(leicht scharf)
Chicken Yaki
Hähnchenfleisch gebraten mit verschiedenem Gemüse
冇期望之下，又唔錯喎，又唔油膩，算幾好，唔怪得咁好生意~
食完嘢就行返旅館，希望嗰幾個西人出咗去玩啦~
上到二樓，走廊冇人，所有房門都係關閉嘅，咁就好囉~
不過一開自己度房門，嗆喉嘅煙味即刻攻出嚟，好難頂！
沖完涼冷靜落嚟，其實諗返條街啲人，同意大利法國西班牙嘅情況唔同~
意大利法國西班牙嗰啲，係明顯有人周圍望，好似搵緊獵物咁~
而呢度，又唔覺有啲咁嘅人，只係比較多人種，感覺比較雜，同多醉酒人士，但完全唔覺有人心懷不軌咁~
起碼有人揸住把刀埋嚟唔係打劫先......
越夜個人就越唔舒服，喉嚨已經明顯發炎，同埋腫晒~
好彩有帶定啲成藥嚟，食咗藥早啲瞓，希望聽日好啲~
沒有留言:
發佈留言