Obersee (上湖)
Königssee (國王湖)
Kirche St. Bartholomä (聖巴多羅買教堂)
Berchtesgaden (貝希特斯加登)
Salzbergwerk (鹽礦場)
Wallfahrtskirche Maria Gern (教堂)
今日一早，未食早餐就走出湖邊行吓先~
嚟到碼頭附近，冇乜人，好似全世界得返我哋兩個咁~
仲有晨霧，仙境一樣~
之後就返旅館食早餐~
早餐旅館包埋，普通西式早餐，不錯~
今日第一站 Obersee (上湖)
Obersee 係熱門旅遊地點，早啲去，希望冇咁多人，可以寫意啲~
由旅館去 Obersee，首先要行去 Pier Königssee，再搭船到 Pier Salet，之後再行 1 公里就到~
不過，噚日買嘅 Combi-ticket，船嗰部份只係包 Pier Königssee 至到 Pier St. Bartholomä 來回，所以單單攞住呢張飛，係去唔到 Pier Salet~
咁就要喺上船之前補飛，就係補返 Pier St. Bartholomä 至 Pier Salet 來回呢一段~
去到碼頭，售票處未開，但等上船位置已經人頭湧湧等上船~
官網明明話船票只售即日票，售票處又未開，但咁多人有票等上船？
再等咗一陣，我忍唔住要搵個人問吓~
原來另有售票窗口喺另一邊......
上船~
而家時間尚早，太陽未照到，景色當然大打折扣，不過都唔緊要，回程時一定陽光充沛~
雖然呢程船坐滿人，但嚟到 Pier Salet 呢度，仍然有種人跡罕至嘅寧靜~
當然，過多兩至三小時，情況會完全唔同，應該變成人滿為患嘅喧鬧了~
一公里路程，好快到~
Obersee，一片人間淨土，完全與世隔絕嘅模樣~
之後就沿住右邊嘅路一路行到去湖嘅對面~
其間有啲路都幾難行~
行到對岸了，呢度真係正到不得了，其實我哋係咪已經到咗天堂？
我哋喺度都留咗一段時間，都顧不得本來計劃好嘅行程，總之要享受呢一刻~
不過，太慢活企定定在同一個地方，我哋都接受不了，但又唔捨得離開，好矛盾~
有辦法！我決定繼續向山嘅方向行~
做功課時，知道再向入面行會有兩個瀑布，不過呢兩個瀑布可觀性比較低，所以就冇諗住行入去~
不過而家唔同喇，想喺呢片淨土留耐少少，又唔想企定定冇嘢做，繼續行就最好~
行入去瀑布，單程約 1.5 公里，來回就最少 3 公里，而且相信路唔會好好行，好有機會純步行都超過一小時~
之後嘅行程......唔理喇，呢度咁鬼正，唔想咁快離開~
行到嚟呢個看似盡頭嘅地方，有種莫名嘅神聖感~
瀑布呢，就有兩條，左青龍，右白虎，不過就瘦削咗啲......
左邊呢條真係眼力差啲都睇唔到......
右邊呢條就易睇啲~
呢度看似盡頭，但其實向前行仲可以行好遠，仲會入埋森林，不過我哋唔行喇，回程~
回程時，見到入嚟嘅人係我哋今朝嚟時嘅十倍左右，其實都比想像中少~
下一站 Königssee (國王湖) 及 Kirche St. Bartholomä (聖巴多羅買教堂)
而家就搭船由 Pier Salet 到 Pier St. Bartholomä~
途中，有位男士好突然又好衝忙咁為部相機換鏡頭，換咗支長鏡~
跟住瞄準遠處不停影咗六七張相~
影完即刻展示俾佢身邊嘅女伴睇~
好奇之心就人皆有之，我認我八卦，而咁啱我嘅視線係好容易就睇到佢部相機個螢幕~
我喺好奇心驅使下望咗一眼，原來係一個天體沙灘嚟~
沿途至 Pier St. Bartholomä~
Kirche St. Bartholomä (聖巴多羅買教堂)，又名洋蔥教堂，因為教堂頂嘅造形而得名~
附近風景~
有人喺碼頭附近游水~
附近冇咩睇，餐廳人又多，求其買啲嘢食就算~
味道都過得去~
教堂向山嘅方向行入去，有個小冰洞，距離約 3 公里~
本來係諗住攝吓時間先會去，因為可觀性不高~
而家唔駛諗喇，一來今朝用多咗好多時間；
二來嚟到見到話建議有經驗嘅行山人士先好去，即係話條路一啲都唔好行，我哋又冇裝備，算吧~
食完嘢就搭船返返過 Pier Königssee~
此時此刻嘅 Pier Königssee，天氣咁好，一定多人啦~
下一站 Salzbergwerk (鹽礦場)
沿途風景~
嚟到 Salzbergwerk，我哋買咗 Combined-tickets，包 Salzbergwerk + Kehlsteinhaus (鷹巢別墅)~
參觀 Salzbergwerk，要跟 Guided Tour 入場，我哋預約咗 15:30，未夠鐘就周圍行吓~
入場前要換礦工服，好認真~
鹽礦場內禁止攝影，以下內部相片均來自官網~
內部地圖~
開始及結束都喺同一個地方，即係地圖嘅左上方~
行走路線，由最開始嘅地方，坐礦場小火車，途經地圖上嘅紅色箭頭(Slide 1)，一路走到右邊的綠色箭頭(Slide 2)，再走到藍色箭頭(Mirror Lake)，走上湖上平台過對岸，搭升降機後再坐礦場小火車到出口~
Guided Tour 當然係以鹽礦場內嘅歷史工具運作等等為主，除此以外，有兩處特別想講講~
1. 場內有兩條 Slide，可同時一至四人一齊瀡，幾得意嘅體驗~
2. 場內有個湖，有燈光 Show，都幾好睇，之後仲要走到湖上平台到對岸~
入場前會分發一個 audio guide，每到一個場景都會根據當前地方進行講解~
不過唔知點解有時會冇聲，係我同屎塔一齊冇聲~
講起 audio guide，有一段小插曲發生過~
參觀過程中，有位婦人對我怒目而視，我當時唔知發生咩事~
之後佢又無啦啦瞪眼望住我，轉面再向佢嘅同伴講嘢，並比劃出一個影相嘅手勢~
呢吓我明白晒喇，佢以為我影相！
點解我咁諗呢，因為部 audio guide 個金屬扣間中會同部機發生碰撞，而呢吓聲音有時都真係似相機嘅快門聲~
而佢係講德文嘅，可以聽得明導遊嘅說話，自然係唔需要用 audio guide，所以喺咁暗嘅環境下以為我手上揸住嘅係相機並發出快門嘅聲音~
唉，咁就真係無辜喇，最好你走嚟指責我，俾個機會我解釋吓啦，否則我都只可以無視你當睇唔到~
去到再下一個場景，呢度比較光啲，嗰位婦人再一次望我，再望一望我手上嘅 audio guide~
呢次係佢最後一次望我，我相信佢最後望到我嗰部係 audio guide，知道誤會咗我，所以餘下嘅行程都冇再望我~
咁都好，喺無需經歷當面對質嘅尷尬嘅倩況下釋除誤會~
本來下一站係去 Marktplatz (廣場)嘅，不過遠少少其實有間別緻小教堂，我教堂癮發作，臨時改去小教堂~
下一站 Wallfahrtskirche Maria Gern (教堂)
一間別緻小教堂~
下一站閒逛 Berchtesgaden (貝希特斯加登)
我將部車泊返去旅館先，之後就周圍行吓~
睇得出屎塔有啲攰，就唔行咁遠，行到火車站就折返搵嘢食~
見到間意大利餐廳就走入去~
Frurri di Mare
mit Tomaten, Mozzarella, Meeresfruchten und Knoblauch
with tomatoes, mozzarella, seafood and garlic
Pizza 夠晒足料，好有鮮味，好食！
Carbonara
mit Speck, Ei, Sahne und Parmesan
with bacon, egg, cream sauce and parmesan
意粉好重奶油香味，味道不錯~
不過成也奶油香，敗也奶油香，頭一兩啖係享受，之後就太膩口~
還好我哋一定係 share 嚟食，一人半份都還可以~
間餐廳得一個侍應，見佢超級忙，慘......
食完嘢就行返旅館，完結今日行程~
沒有留言:
發佈留言