今日行程：
今日食完早餐就搭火車過 Gent(Ghent)，喺 Gent 比較重點嘅景點有 Gravensteen(The Castle of the Counts) 及 Belfort Gent(Ghent Belfry)~
清晨六點幾，街外傳嚟汽車嘅響喉聲、接著嘅係輪胎嘅嘶叫聲、再之後係物件嘅撞擊聲、最後係人類嘅哀怨聲~
我哋喺房入面望唔到啲咩，屎塔走咗出走廊望，返嚟報告話只係望到部車嘅後半，但其實都唔知發生咩事~
跟住我又走出去望吓，但我連部車都望唔到，只係望到地上嘅胎痕~
梳洗好，食早餐前，我哋走去事發現場睇吓~
所謂胎痕原來唔係胎痕，好可能係垃圾車轉彎時漏出嘅水(以香港經驗)，總之係一路轉彎一路漏水而形成嘅彎狀水痕~
似乎嚟到現場都冇咩可以令我哋想像到究竟發生過咩事~
諗住離開時，我哋望到一個位，相信真相要大白了~
噚日先講完呢碌柱，睇片睇得多，第一次見實物，估唔到第二次見實物，就已經發生咗喺睇片時見到常見嘅事情~
呢種柱，喺紅燈時有車經過，條柱係會狠狠咁隊上嚟~
車速唔高嘅，就撞正面；車速高嘅，係會俾條柱隊車底至升高晾起~
現場呢條柱旁都係碎片，仲有一件碎片疑似 BMW 嘅鼻窿(鬼面罩)~
將今朝聽到嘅聲，再加埋呢個畫面，相信唔難去推測發生過咩事~
汽車嘅響喉聲 - 高速行駛中
輪胎嘅嘶叫聲 - 狠狠煞車導致輪胎鎖死
物件嘅撞擊聲 - 停唔切撞埋條柱度
人類嘅哀怨聲 - 唔知係因為身痛、心痛定還是因為做錯事而引致一定嘅後果而後悔中，其實可能係三者皆是
現場路面呈 V 字，假設柱位係左邊 V，我哋喺右邊 V 見到部撞過嘅車~
根據現場環境，我哋可以再進一步推斷，呢部就係啱啱撞咗嘅嗰部車~
因為呢部係 BMW，符合喺柱旁見到嘅 BMW 鼻窿~
從佢嘅損毀狀況嚟睇，明顯係撞上唔太高嘅圓形柱狀物~
至於路上嘅水痕，相信係車身損毀後，漏出嘅液體，喺部車被推到上址時而形成嘅~
此時有部的士駛至，我哋喺袋拎定包花生出嚟，睇吓有冇需要拆嚟食~
部的士喺柱前約五米處停下，等咗一陣，紅燈變黃燈(得兩盞燈，點解係黃唔係綠呢？)，喺變黃燈嘅時候，條柱係完全縮入地下，一啲都冇凸出路面的~
但的士司機唔敢行，佢選擇倒車走人，包花生可以收返埋了~
之後又有部私家車駛至，一樣喺條柱嘅五米前停下，等到轉咗黃燈，條柱縮入地下，司機開車前行~
喺行到條柱上方時，燈號變紅，但睇唔到呢刻條柱有冇凸返上嚟，而私家車順利通過後，條柱嘅狀態就係凸出少少~
八卦夠就行返旅館食早餐~
食完早餐就搭火車過 Gent，我喺 app 上面買車飛，由 Brussel 嘅 Chapelle 站搭到去 Gent 嘅 Dampoort 站~
我哋行到去 Chapelle 站，發現冇位上，亦覺得個站好似廢棄咗咁，但點都唔會就此放棄，我哋試吓搵路行過路軌嘅另一邊~
由於我拖住個大篋，現場仲係斜路，屎塔話佢行前啲睇吓先，咁我就原地等~
喺等緊嘅時候，我上咗 google map 睇街景，確認前面有條隧道可以穿過路軌另一邊，咁我唔等喇，向前行去條隧道~
途中見到幾個男人坐喺地下，似係無家者，另有一個女仔彎住腰同佢哋講嘢，唔通係社工？
喺我行過咗佢哋嘅時候，我發現個女仔喺我後面向住同我同一樣嘅方向行，難免令我覺得佢跟住我~
前方係一條隧道，如果個女仔要落手，好大機會會喺隧道落手~
於是，我差唔多到隧道就停低，扮嘢周圍望~
個女仔經過我身旁，但冇停低，佢行咗入隧道~
由於我知道屎塔喺前方，我亦不能怠慢，同個女仔保持距離咁向前行，我都進入咗隧道~
此時，屎塔喺隧道嘅另一邊，即係我同屎塔各自喺隧道嘅一端，個女仔就喺隧道向住屎塔行~
個女仔不時向後望，即係向我望~
我加快腳步，個女仔到達屎塔嘅位置，繞住屎塔行咗一圈，到咗屎塔身後，好快，我亦到咗屎塔身邊~
我同屎塔即時離開，行咗二三十米後，我向後望，已經有個男仔同個女仔匯合，即係個男仔喺個女仔過咗我之後開始向隧道方向行~
我之前實在太在意前方嘅女仔，忽略咗原來身後有個男仔喺我後面~
喺我離開咗隧道口二三十米後向後望，個女仔同個男仔係望住我哋，唔知佢哋諗咩，冇行動，冇向前亦冇向後行~
可能成件事係我諗多咗，可能對方完全冇惡意，但防人之心不可無~
但個女仔圍繞住屎塔行一圈之後冇再行，停喺身後，又所為何事？好難唔令我覺得佢係有企圖~
我大膽假設，我之前停咗喺隧道口冇行，個女仔知道我有戒心，知道打唔到我主意，但又冇可能我停佢又停，唯有焗住向前行~
佢一路行一路向後望，一來要注意我，一來想知道我身後嘅個男仔嘅位置，好讓佢判斷要點做~
佢行到屎塔身後，好想落手但佢冇機會落手，因為我望住佢，而我亦距離不遠，佢一個女仔搞唔掂~
但當佢等到個男仔到嚟，我同屎塔亦已遠去~
嚟到路軌嘅另一邊，我哋都幾肯定呢個係廢站，但又可以俾我哋喺個 app 作為起點買飛，真係荒謬！
初時仲諗住呢個站最近，而家冇啦，唯有返轉頭行返去 Brussel-Central 中央火車站~
好彩票價係一樣，咁就冇咁麻煩，俾人查票都相信冇問題，反正冇俾少到錢~
去到中央火車站，時間為 08:49，查吓點搭車，睇到最快開出嗰班車為 08:49......
有時啲車冇咁準時開，照落去月台睇吓有冇機會搭到~
沒有了，已經開走咗~
再查吓下一班車，係 09:53，要等成個鐘......嚴格嚟講係成個鐘有多......
Brussel 嘅 Central 站搭到去 Gent 嘅 Dampoort 站，係要喺 Gand-Saint-Pierre 轉車~
查吓啲轉車資訊，真係大開眼界，個轉車時間係冇可能做到，10:33 到 Gand-Saint-Pierre，轉車時間為 10:27~
唔通時光倒流已經好普遍？定係 10:27 呢班車係聽日甚至係之後日子嘅？
喺等車嘅呢段時間，無意中俾我發現咗啲嘢~
我喺 04 Jun 朝早未夠 07:00 買當日 08:53 出發嘅車飛，由於個 app 預設出發時間為 NOW，所以我冇郁過佢個時間，search 完等佢出咗 result，我就買 08:53 出發呢班車嘅飛~
而家我發現，我買嘅呢張飛係 05 Jun 08:53 出發！即係聽日先有效！
呢個 app 真係垃圾到難以致信！錯漏百出！
我發現錯日子嘅時候，距離 09:53 唔係好遠，如果上返去票務處搞，一定搭唔到呢班車，仲唔知有冇得搞~
我已經等咗一個鐘有多，我係絕對唔會再等！
我唔理咁多，一係搏冇人查飛，一係搏查飛但講得甩(有晒 book 旅館嘅證明，我哋冇可能會喺聽日由 Brussel 出發去 Gent)，最壞打算罰錢就罰錢，我已經俾個 app 搞到失晒理智！
到咗 Gand-Saint-Pierre，要去 platform 4 轉車，一路行一路留意指示牌，第一個見到嘅指示牌，指示 platform 1-10 向左行，但向左行係完全離開火車站範圍，視線範圍內亦唔覺得佢所指嘅方向有火車路軌，我哋冇跟，向前行住先~
行咗一陣，見到第二個指示牌，指示 platform 1-10 向右行，呢個可信得多，最後我哋亦順利到達 platform 4~
比利時呀比利時，你都係個好先進嘅國家吖，做乜搞成咁呀？
Gent-Dampoort 站外超多單車~
行去旅館都有一段路程~
沿途隨影~
去到旅館，見到有人清潔緊，不過佢話可以將行李放上房先~
我哋冇諗過咁早就可以入房，只係諗住寄存行李咋~
放好行李就出發去行吓 Gent~
嚟 Gent，主要都係周圍行吓，感受吓呢個曾經繁華嘅城市~
Sint-Baafskathedraal(St Bavo's Cathedral)
Belfort Gent(Ghent Belfry)
鐘樓始建於 1313 年，1380 年完成。當時不僅用於報時和警報，也曾用作瞭望塔。
我哋暫時唔上去住，可能晏啲，可能聽朝，睇情況~
Stadshal(City Pavilion)
Stadhuis Gent(Ghent Town Hall)
Sint-Niklaaskerk(St Nicholas' Church)
呢間 McDonald's 勁靚！
Voormalig Postgebouw(Former Post Office)
Sint-Michielskerk(St Michael's Church)
Korenlei & Graslei
左岸為 Korenlei；右岸為 Graslei
Gent 隨影~
據說嚟比利時，一定要食 waffle，我就揀咗間都有啲人推薦嘅嚟試吓~
啲人推薦嘅係一間叫 Himschoot 嘅 bakery，話長期排長龍的~
去到嘅時候，真係有人排緊隊，不過只係五六個人，唔算多~
同埋橫睇掂睇都唔覺佢有賣 waffle~
跟住我哋見到佢隔籬嗰間有賣窩夫，我哋覺得應該係呢間至啱，但又冇人排隊喎......
我哋行埋去，老闆話要等 10 分鐘，冇所謂，10 分鐘就 10 分鐘~
Waffle 係即叫即整~
本來我想要 cream + banana，老闆話兩樣今日都冇，又會咁嘅......
最後我叫咗 chocolate waffle；屎塔叫咗 strawberry waffle~
Chocolate waffle，初頭食就幾好食，個朱古力醬唔太甜，不過食到後部份就都係覺得甜~
Strawberry waffle，屎塔話好食~
重點真係喺個窩夫度，上面係咩真係唔重要，之後我叫咗個齋窩夫，好食！
食完嘢就行去 Gravensteen(The Castle of the Counts)~
Gravenstee 是位於 Gent 的一座中世紀城堡，現在的城堡可追溯至 1180 年，在 1353 年之前一直是 Counts of Flanders 的住所。隨後它被改造成法院、監獄、造幣廠及棉花工廠。它在 1893 年至 1903 年期間經過修復，現在是一座博物館和該市的主要地標。
呢個景點，被人形容為一票難求，但我由開始做功課到而家行緊去嘅呢一刻，見到官網仲有好多位剩~
大概疫情過後，全球都大傷元氣，有待復甦吧~
不過其實已經成個鎮都係遊客，疫情前可能係而家嘅兩三倍，諗吓都覺得迫......
我試過上官網買飛，但唔成功，唯有去到先買~
去到先買就買唔到最快入場嘅時段，要等 15 分鐘~
城堡就......唔算多嘢睇，叫做可以上個平台睇吓風景~
完咗城堡行程，本身計劃嘅行程已經完晒，而家先 14:30，要搵啲嘢做吓~
本來 canal cruise 係最好嘅安排，不過烈日下曝曬搞唔掂，一上咗船就焗住全程曬，都係咪搞~
行行吓，喺左岸 Korenlei 見到有處有得坐又冇被太陽曬住嘅位，就走埋去坐低休息吓~
呢度環境唔錯，喺度坐吓都係賞心樂事~
坐到咁上下，我決定去 Belfort Gent(Ghent Belfry)~
沿途隨影~
今朝去 Sint-Baafskathedraal(St Bavo's Cathedral) 時係背光，而家順光好睇好多~
Belfort Gent(Ghent Belfry)
鐘樓上風景唔錯~
上面通道好窄，基本上只限一人通過~
同埋上落唔同位，有啲人去到離開嘅位未想走住，就行返轉頭，遇到兩個比較瘦嘅人，一個向前貼，一個向後貼都仲有可能過得到嘅~
上完鐘樓，真係冇咩好做，我哋行咗去 Stadshal(City Pavilion) 坐低休息吓~
不過唔知做咩，坐低咗之後，越越嚟越多人，佢哋明顯係有目的嘅~
相信係準備遊行示威~
費事阻住人，都係離開~
我同屎塔講，其實我仲有個地方可以去，不過呢個地方，對我嚟講，用嚟攝時間都冇乜興趣，不過我知屎塔實話去，因為而家太得閒，一去無妨~
呢個地方就係 Graffiti Street，我喺 google map 睇過實景，覺得興趣不大~
睇完 graffiti，我哋行咗去 Gravensteen(The Castle of the Counts) 側面坐低休息~
今晚晚餐嘅地方，據說一位難求，所以我有 book 到位，我 book 咗 19:00，而家係 16:15......
休息咗大約一個鐘，我哋決定行去餐廳，諗住同佢講改早啲~
沿途經過今朝買窩夫嗰度，仍然係冇人排隊~
行到餐廳，原來佢開 18:00，咁我哋就喺佢對開間教堂再對開嘅草地附近搵個位休息~
差唔多時間就行返上去，見到遊行隊伍行緊返 Stadshal(City Pavilion)~
大家沿途聲勢浩大，一路行一路嗌 No Justice No Peace~
Amadeus Gent 2
呢間餐廳嘅噱頭就係，豬肋排無限添，即係俾一份價錢，無限添加豬肋排同薯蓉~
據講唔單止佢個豬肋排好食，連薯蓉都一樣出色~
行到埋去同佢講我哋 book 咗 19:00，想改 18:00，我哋諗住如果唔得就去第二度食，唔會再等一個鐘~
點知，基本上佢未聽完我哋講就話冇問題，又唔會問吓我哋用咩名 book......
講真，我哋最唔想係到 19:00 時 book 咗位但 no show~
不過，從佢嘅態度，可以睇得出，佢根本唔在意 book 位嘅事情，到時到候，有人認頭就俾位佢，冇人認頭都大把客~
18:00 嘅時候，其實冇乜人，大把位，上面張相係食完先影嘅~
不過未到 18:30，望落已經滿座，的確係夠晒人氣~
不過，無限添食，對我哋嚟講係冇意思，因為我哋都唔係大食，任食都食唔到幾多，仲要係肉排，太多肉都食唔到幾多~
所以，我哋決定叫唔同嘅嘢食，咁樣當然就冇得無限添食，不過冇所謂啦~
Fanta & Ice tea
叫杯 fanta 收我幾歐都仲要溝水上......
Spareribs
豬排夠嫩，唔會過鹹，味道唔錯~
其實咁樣已經好有驚喜，因為佢間餐廳座位都幾多吓，我幾敢肯定大部份人都會叫佢個豬肋排，一次過整咁多都可以有咁嘅水準，真係算有驚喜~
薯蓉亦真係幾唔錯，好食~
Grilled Prawns
蝦夠大隻，又夠新鮮，幾有蝦味，好食~
呢間嘢，打破咗有噱頭又有名氣，一般都唔會太優質嘅慣例~
(呢個慣例係我自己覺得啫~)
呢間嘢好成功，任食豬肋排同薯蓉，夠晒噱頭，但有幾多個大胃王吖，多數都食唔到幾多~
尤其我見啲人叫唔同嘢食，即係成檯都冇得任食~
又見到兩個女仔嚟，係就係兩個都叫豬肋排，但兩個都冇添食~
不過侍應嘅態度就真係麻麻地，唔係態度差，但好唔舒服囉~
食完飯就行返旅館~
沿途隨影~
沒有留言:
發佈留言