2023.06.08 荷蘭 (Utrecht) (第八天)

今日行程：
先去 Haarzuilens(紅村)，再去 Kasteel De Haar(De Haar Castle)，之後就返 Utrecht 閒逛，最後搭火車去 Amsterdam，我自己搭飛機返屋企，屎塔留低喺 Amsterdam 同朋友見面玩幾日~

今日首先去 Haarzuilens(紅村)~
要到 Haarzuilens，就要先搭火車到 Vleuten，再轉 127 號巴士~

沿途隨影~

到咗 Vleuten，見到有部車，上面寫住 127，初時都唔係好敢上，因為佢只係部細貨車，但我見有人上就跟住上，原來係細貨車改裝而成嘅小巴士~

沿途勁多減速壆，司機都冇收得足夠慢，有啲彈~
但我體諒佢，日日咁揸，真係冇乜可能有咁嘅耐性個個減速壆都收到夠慢先過~

有乘客係直接去城堡，到咗站落咗車(要行 15 分鐘先到城堡)，跟住司機同我哋講去城堡喺度落車，其實我哋想去 Haarzuilens 先，不過其實而家已經喺 Haarzuilens 外圍，司機咁有心，費事解釋咁多，就喺度落車，其實對我哋冇乜影響~

司機比較 cool，冇乜表情，冷冰冰，但其實佢幾好人~
佢沿途經過先前落車嘅一對夫婦，可能見佢哋有啲迷茫，司機停喺佢哋側邊，教佢哋點行~

荷蘭有三條顏色村，分別係紅村、綠村同白村~
我唔知係外地人幫佢哋起嘅名定本起人起嘅~
我淨係知，我只係對綠村有多少少興趣~
今次去 Haarzuilens(紅村)，係因為閒日去城堡係冇直通車，點都係要搭車到 Haarzuilens，再行 15 分鐘過去，咁不如順道一遊啦~
如果有直通車，我真係未必會中途落車行 Haarzuilens~

Haarzuilens(紅村)
如果係順路經過，其實都幾值得到此一遊~

行完 Haarzuilens 就向城堡方向進發~
沿途隨影~

呢種樹，樹幹佈滿呢啲好似眼睛咁嘅紋，望落有啲鬼異~

Kasteel De Haar(De Haar Castle)
城堡的建造可以追溯到中世紀 13 世紀，但它在 18 至 19 世紀變得殘破不堪。 所以男爵邀請了著名的建築師 Pierre Cuypers 重建城堡。 重建工作從 1892 年持續到 1912 年完工。 Cuypers 的宏偉設計不僅包括城堡的建築，還包括室內設計，花園，小教堂，甚至包括城堡旁的 Haarzuilens 村。Kasteel De Haar 是荷蘭最大的城堡，亦有說是荷蘭最美城堡。

城堡花園開放時間為 09:00，城堡內部開放時間為 11:00，現在是 10:00，當然行吓個花園同城部外圍先~
花園有點大，但冇太大興趣行晒，只係行咗部份~
個花園同城堡的確係幾靚，好值得嚟~

相較花園同城堡外部，我覺得內部就冇令我覺得好靚或者好值得嚟嘅感覺~
而且城堡嚟講，內部真係算幾細，房係多嘅，但全部都係圍繞住中間大廳，缺乏空間感~

行完城堡內部，就行去花園嘅迷宮~

入到去，當然遇過好多次行到堀頭路，但其中一次嘅堀頭路，有幅簡單嘅天鵝畫喺度，唔知想表達啲咩~

行吓行吓，終於走出迷宮~
咦？點解同個入口咁似嘅？
經過我哋研究，我哋覺得出入口都係同一個，有冇完成呢個迷宮，關鍵在於期間有冇去到上面嗰幅天鵝畫~
咁我哋就當已經完成咗呢個迷宮~

行晒呢度，離開時，見到有部 Limousine~

本來午餐安排好返 Utrecht 嘅 Itoshii Osaka 食，不過 Fion 噚日食完，話麻麻地，所以我哋都唔會去喇~
加上我哋都肚餓，所以決定返到 Haarzuilens 食咗嘢先再搭車返 Utrecht~

't Wapen van Haarzuylen

Ginger ale & hot chocolate
杯朱古力勁甜~

Beef tenderloin steak
Gravy - herb butter - Bread
冇問要幾熟，但上檯我覺得係 medium~
真係奇怪，要求 medium 嘅，全部俾 well done，冇要求嘅反而係 medium......
塊扒幾好，有牛味，唔乾，medium 口感唔錯~

Fried eggs carpaccio
Bread - red onion - truffle mayo - pine nuts - parmesan cheese - capers
呢碟嘢，上檯時見到嗰三隻蛋覺得好怪異~
其實我唔知 carpaccio 係咩嚟，上網查完都冇一個好明白嘅概念~
我第一啖係冇連蛋食，味道好奇怪，啲嘢好似唔係好夾咁~
咁佢咁樣上，就試吓連蛋一齊食啦，嘩，完全唔同晒，好食好多！
底有麵包，中層有一片好薄嘅肉，當然仲有其他配料，面層係三隻蛋~
麵包、肉同蛋嘅面積係相約，原來真係有咁嘅需要~
初時覺得三隻蛋好奇怪，因為通常叫嘢食，都係一至兩隻蛋，真係好少係三隻~
但為咗每一口都可以連蛋食，兩隻蛋係唔夠，一定要三隻~
中間嗰片薄肉，唔知係咩肉嚟，望落食落就似牛肉，不過我就幾乎乜都食(梗係講緊正常嘅食材啦)，初時都覺得係咩都冇所謂，好食就得~
不過其實都有好奇心，因為片肉係生嘅，而且好薄，細問之下，佢話係 beef tenderloin~
呢碟嘢，個樣就麻麻，但食落幾有驚喜(因為未食過，當然容易有驚喜)，味道幾特別，幾好食~

見有排都未有車，就叫個甜品食吓~

Apple pie
個蘋果批幾香，唔過甜，非常好~

Homemade cheese cake
我比較少食甜品，唔太甜我已經覺得好食，呢個就可以話係好食~

食完嘢，等咗陣就有巴士到，今次呢個司機係後生仔嚟，揸得快，每到減速壆前急煞，同埋都唔算減得好慢，真係有啲擔心車上面嘅老人家......

返到 Utrecht，就閒逛吓，冇乜特別景點~

Domtoren(Dom Tower)
維修中～

Sint-Maartenskathedraal Domkerk(St. Martin's Cathedral Dom Church)

Anne Frank Standbeeld(Anne Frank Statue)

Nijntjepleintje(Miffy's Little Square)

Utrecht 隨影~

要行嘅都行晒，本來都係時候食晚餐，不過我哋一啲都唔肚餓，但都照行去定好咗食晚餐嘅地方，Saowapa~
去到睇吓 menu，其實啲嘢都啱食(泰菜餐廳，冇可能唔啱食)，但嗰一刻真係一啲興趣都冇，即係冇乜胃口食嘢，作罷~
反正屎塔今晚都應該會同啲朋友去食嘢~

行返返旅館攞返行李同休息咗陣就行去火車站，搭火車過 Amsterdam~

喺 Amsterdam 火車站行去旅館途中，屎塔唔小心向前仆低咗，係失平衡後向前跑咗幾步嗰種仆低，應該幾傷吓~
我當然第一個衝前去睇吓佢點，附近幾個人都即刻走埋嚟問有冇咩需要幫手~
人就應該冇乜事，因為即刻起得返身，相信冇咩大問題~
上次喺德國仆低整花咗個鏡頭保護蓋，同埋支鏡鬆咗，會自己伸長，今次好彩啲，相機冇事~
但手機就有少少傷，個螢幕保護貼爆咗，螢幕(手機螢幕，非保護貼)一角亦磨爛咗~
睇佢起返身後步行嘅姿勢，我相信佢應該冇乜大礙~
(後記：佢自己話當晚係見到有瘀傷，其餘都冇乜嘢)

佢哋五個女仔，book 咗一間 airbnb，一連三晚~
呢間 airbnb，喺大堂要登記護照，唔係住客係唔准上去，所以我自然唔可以上去~
唯有喺大堂爆篋整理，分返開有咩帶返屋企，有咩留低俾屎塔~

大堂接待處姐姐好好，佢主動同我講，如果需要去洗手間，可以使用地面呢層嘅洗手間~
我整理好行李，去埋個洗手間出嚟就見到屎塔嘅兩個朋友，阿朱同 Karen，佢哋兩個都係喺英國一齊搭飛機過嚟，啱啱先到 Amsterdam~

而噚日喺 Utrecht 見過面嘅 Fion，本身已經喺 airbnb，我哋到咗聯絡過佢攞大門密碼，可能佢見我哋咁耐都未上到去，所以佢就落咗嚟~
五位女仕，有四位已經喺度，仲爭 Gloria 未到~

不過我都係時間要走了，冇機會見到 Gloria~

我就今晚搭飛機自己飛返屋企，屎塔就四日後自己搭飛機飛返屋企~