屎塔話想生日時搵啲地方去吓，去幾日嗰隻~
好快就諗到 Isle of Skye，住咁近(五個鐘頭車，但話晒都係蘇格蘭)，一定會去吓嘅，就今次去啦~
其實我覺得十一月頭去，唔係好合適，不過只係五個鐘頭車，今次唔滿意，隨時可以再去過~
臨出發前，天氣報告唔多好，不過屎塔話照去~
英國天氣多變，尤其北部，天氣報告準確性其實唔算高~
希望唔會太差啦~
今次行程，冇乜話計劃得好仔細，都係記低晒有咩地方可以去，再粗略估算所需時間，到時順住條路玩，因應天氣同時間，到時再決定~
由屋企去第一個景點，要四個多小時，所以一早七點幾就出門口~
行行吓屎塔話想食早餐，我先醒起，我都唔記得咗安排早餐~
途經見到麥記，就食麥記啦~
喺部機度買完嘢俾埋錢，但印唔到收據，都冇咩所謂，記住個號碼就得~
我拎住部電話，想話影低個號碼，當做證據又好，怕唔記得個號碼又好~
點知喺呢個時候，屎塔整走咗個畫面，冇咗個號碼......
都唔緊要，只要佢記得個號碼係咩，我覺得都唔會有咩問題，我用卡俾錢，有記錄咖嘛~
我問屎塔，記唔記得係咩號碼，佢話 37 號，咁 OK 啦~
離遠望住個螢幕，見到 37 號，咁就等~
等等吓，螢幕上唔見咗 37 號，我先留意到，本身螢幕上 37 號嘅位置，係已經可以攞得~
咁，一買完就即刻攞得，而且，喺我未攞嘅時候，就已經消失於螢幕上，最大可能，我哋個號碼，根本唔係 37 號......
其時，我聽到工作人員嗌 43 號，但我又唔知係咪自己個號碼，於是我走去部機度，諗住揀返自己叫咗啲咩，影張相再問工作人員~
就喺呢個時候，有位工作人員走埋嚟，問我哋咩號碼，我話唔記得，佢又問我哋叫咗啲咩，我再次話唔記得，但就諗住喺部機度撳返自己叫咗啲咩~
由於產品有異於香港，我哋又好少食，點完真係唔記得，但揀多次相信會記得返~
嗰位工作人員叫我哋跟佢過取餐處，俾張單我哋睇，係我哋叫嘅嘢嚟，呢張單就係 43 號......
我第二次答唔記得嘅時候，真係超尷尬，成個低能仔咁，乜都話唔記得......
多謝屎塔，旅程未正式開胎，就有咁深刻嘅經歷~
食完嘢就再上路，屎塔問我有冇帶現金，頂！真係唔記得帶！
雖然我幾相信冇乜大問題，但如果可以，最好都撳定啲啦~
上網搵到邊度有 ATM，就向嗰度進發，嗰度係間大超市嚟~
仲有十分鐘就到時，胎壓燈著咗，雨勢有點大，唔係好想停低搞~
反正揸落冇乜異樣，揸慢少少，捱到去超市個大停車場慢慢搞~
到咗停車場，雨勢一點都冇細到，亦唔覺得時間內會細啲，冇計，都要處理~
揼返胎氣之後，就去撳錢~
雖然日常生活比較少機會係必需用現金，但屎塔一向都會袋一張 £50 喺身，以備不時之需~
有一次唔記得咩事，要用佢嗰張 £50，之後佢就成日嘈，話冇咗張 £50......
今次佢咁落力搵邊度有 ATM，其實我唔覺得係為旅程擔心，主要係想要返張 £50~
可惜，好衰唔衰，撳 £100，佢出晒 £10 同 £20 紙幣~ XDDD
(後記：旅程完咗，屎塔都冇袋喺身~)
再上路，沿途秋色滿滿，非常漂亮，多謝屎塔決定呢個時候嚟，多謝佢堅持出發~
今日首先會去嘅，係 Eilean Donan Castle，可以話係去 Isle of Skye 嘅途中，必去嘅城堡~
Eilean Donan Castle 建於 13 世紀，建在一個小島上，用來防禦維京人。多年來經過轉手、被佔領、被奪回、被摧毀，最後，於 1919 年到 1932 年期間，城堡被人買下後重建，重建包括建造一座拱橋方便和陸地連結。
首先上高少少嘅地方欣賞吓呢座城堡~
落山時見到呢個景，相當不錯~
落到停車場，泊好車諗住俾錢時，見到個錶顯示：
Special Event On
Free Parking
No Payment Required
咦，正喎，不過睇埋第四行：
No Access To Castle
吓？唔入得？好彩叫做順路唧，係有啲可惜囉~
都唔緊要嘅，我都幾相信我哋會再嚟，下次先入內參觀~
咁而家只好喺外圍參觀吓~
今日天氣比較差，但已算幸運，因為呢刻冇乜雨~
就喺隔籬有間 Coffee Shoop 叫 Eilean Donan Coffee Shop，都係時候食啲嘢~
Steak & Ale
Hog Sausage Roll
Irn Bru
旅遊景點，預咗貴，但起碼佢冇交行貨，比預期好食~
食完嘢就去行吓 gift shop，見到呢隻洗澡小......鴨？牛？
走去攞車時，見到太陽出來了~
行車途中，見到有個地方，好似唔錯，又停低睇吓~
最近搵到嘅停車位置，原來可以望返過 Eilean Donan Castle~
沿途隨影~
本來想去一個叫 The Plock Viewpoint 嘅地方，不過行錯路去咗另一度，但風景都唔錯~
去返真正嗰個 The Plock Viewpoint，其實風景都係差唔多~
落山去到大路前，要自己手動去開閘同之後要閂返度閘，估計都係為咗防止動物走出馬路~
喺地圖睇到，離今晚旅館不遠處，有個尖啄位，反正冇乜地方去，就過去睇吓~
原來呢個位係推船落水嘅地方~
呢度大風到癲，推住個人行，完全唔敢跳起，否則應該會吹走咗~
風景都唔錯~
見到對岸有座咁嘅嘢，上網查吓，原來係一座建於 15 世紀，已然損毀嘅城堡，Caisteal Maol~
天氣開始昏暗，仲有一個攝時間景點，唔算太吸引，揸車要半個鐘，冇懸念，唔去~
而家就去旅館 check-in 休息吓先~
間旅館幾有大宅 feel~
不過幸運地，我哋被按排住喺行入少少嘅另一個地方~
點解係幸運？因為我哋入過去大嗰間(地面嗰層係公共空間)，入面有四五個小朋友係咁奔跑同大嗌，感恩我哋唔係住呢間~
休息到 18:00 就出去食晚餐~
旅館有介紹幾間餐廳，說實在，呢頭其實就係得幾間餐廳，基本上冇乜選擇~
我哋求其揀咗一間，叫 Saucy Mary Restaurant~
Menu 同官網有啲出入，有啲本來想叫嘅嘢，現場份 menu 係冇~
焗叫咗兩樣都係魚~
Gingle Ale x 2
Fresh Salmon
served with Wholegrain Mustard Mash, Seasonal Vegetables & a Lemon Butter Sauce
三文魚明顯煎燶晒，為咗掩飾，仲將魚皮掉轉放，魚皮向底，魚肉向上~
其實上檯時已經聞到有少少燶味，翻轉一睇就更加睇到係燶嘅~
佢又唔係話成塊魚皮燶晒，我諗 30% 啦~
煎得好嘅三文魚皮，應該係香脆，呢塊就燶味加韌~
啲肉就乾晒~
啲蘿蔔又幾過癮，連頭上，不過食落有種唔正常嘅甜味，唔知係咪浸過糖水嚟~
講真，冇人可以做每件事都係完美，廚師失手我相信唔係罕有事情~
但如果失手到都唔敢俾個食客見到，其實係咪煮過份好啲呢？成本有幾高呢？
為咗幾鎊成本，好意思將失敗如此嘅作品照樣上檯，你哋對自己嘅出品都好冇要求~
Duo of Smoked Fish (Smoked Salmon & Mackerel)
served on a bed of Mixed Dressed Salad & Bloomer Bread
煙三文魚就正正常常，唔過鹹已收貨~
鯖魚就又乾又硬~
我哋落單前仲睇過吓啲甜品，諗住食完飯仲有胃口就叫埋甜品~
食完嘢，仲有胃口呀，不過鑑於佢哋對自己出品冇乜要求，作罷~
返到旅館就沖涼，佢個水壓真係奇妙，熱水冇水壓，凍水強水壓~
即係要水壓就冇熱水；要熱水就冇水壓，吹脹~
沒有留言:
發佈留言