今日早餐，繼續食自己帶嚟嘅雜糧~
天氣呢，就冇噚日咁好彩咁好天，而家雨勢仲有點大~
等到冇咁大雨時就起程~
今日第一個會去嘅地方，係補返噚日去唔到嗰個~
不過呢個地方都要行少少路先去得到，唔知路況如何，有啲路，例如泥路，落雨的話真係取消算數~
不過都會揸車去到再睇吓點情況先再決定~
泊好車，落緊大雨，就喺車等吓先~
等咗陣，雨開始細就去視察吓環境~
幸運地，落咗車無奈就冇雨，而步道係碎石路，冇問題啦~
呢個地方叫 Fairy Glen，事前睇相就還好，可以一遊，不過嚟到現場，我就知點解叫 fairy~
呢度好多奇特嘅小山丘，帶點童話亦帶點夢幻，就好似走咗入一個精靈童話世界咁~
確實係有啲驚喜，可以話係今次旅程當中，第一個覺得幾鍾意嘅地方~
喺 Fairy Glen 入面，有個叫 Castle Ewen 嘅城堡，究竟係因為外型而被冠以城堡之稱，還是曾經真係城堡呢？因為就咁睇，真係唔似係真城堡~
個所謂城堡，中間有條路上，但就幾窄，雨後路面好跣，再加上高處幾大風，我哋就唔敢行上去，作罷~
好幸運好幸運，落車嗰陣細雨，之後好快就停咗雨，到遊歷完成個 Fairy Glen 都冇落過雨~
而因為雨後，到處都好濕，更加有一份深山精靈居住地嘅感覺~
唔知係因為季節定因為天氣，呢度冇乜遊客~
由我哋開始進入 Fairy Glen，見到有一對男女離開，到我哋離開時先遇到分別兩對人，即係我哋遊歷 Fairy Glen 時，係完全冇人，獨享整過精靈世界~
返停車場攞車時，見到一堆羊喺度食草~
其實佢哋係咪永遠唔會飽？見親啲羊，99% 都係食緊草......
繼續進發~
途中見到 WC 牌，就去個洗手間先，不過跟跟吓跟甩咗，停埋一邊再研究時，見到有隻貓~
隻貓完全唔怕人，仲主動走過嚟我哋度，即係代表佢喺度生活得好安心~
搵到洗手間，對開風景又幾好~
繼續進發~
而家去緊 Dunvegan Castle，呢個城堡，事前已知十月中已經唔開放，直至過咗冬天~
不過附近冇乜地方去，去外圍行吓都好~
嚟到之後，原來想靠近啲都唔得，好外圍已經係閘口，喺閘口外，連個城堡都見唔到......
我知道有個地方可以一窺城堡外圍，而家就過去~
到咗可以睇到城堡嘅地方，有啲失望，原來好鬼遠......
而且仲落緊大雨，等到細雨啲就落車，影唔夠兩張相又落大雨，即刻縮返上車閃人~
今日不斷落雨出太陽落雨出太陽，經常見到彩虹~
繼續進發~
途中見到有個位好似幾唔錯，又停低睇吓~
過咗一陣，又見到彩虹~
之後仲有雙彩虹~
繼續進發，沿途隨影~
Loch Mor~
繼續進發，去到 Neist Point Cliff~
不過真係太大雨，都等咗好一段時間先等到細雨啲~
呢度有條步道行落去，不過天氣太差，所有回程嘅人，都係滴住水咁行返嚟，所以我哋就冇行落去~
影咗幾張相，啲雨又大返，上返車走人算數~
繼續進發~
沿途隨影~
好想知道佢個視角係點樣，長期俾隻角擋住一半視線，點樣對焦......
而家去食嘢先，附近唯一選擇，Cafe Lephin~
基本上只提供 Bagel 同 Panini~
Cappuccino & Hot Chocolate
BLT (Streaky Smoked Bacon, Lettuce, Tomato, Mayo)
片煙肉好脆，勁香口，好唔健康，超邪惡！但好好食！
Tuna Melt (Tuna, Red Onion, Cheddar)
啲餡全部融為一體，係我食過最好食嘅 Tuna Panini！
本來只提供 Bagel 同 Panini，我只係懷住醫肚心態，點知都幾有驚喜！
繼續進發，嚟到 Fairy Pools~
又一個地方用 Fairy 呢個字眼，的確冇令人失望！
呢個係今次旅程，另一個我好鍾意嘅地方~
今日真係驚喜連連！呢刻唔止冇落雨，仲有啲太陽，幸運！
今次冇行到盡頭，因為開始多雲，冇太陽，怕落雨~
但我相信我哋會再嚟，到時天氣好的話，就行遠啲~
天色開始暗，我仲有兩個地方未去~
不過呢兩個地方，去唔到都唔算好可惜，反正順路，當然過去睇吓再算~
到咗目的地，雨有點大，又等咗一段時間，趁細雨就走出去~
Sligachan Old Bridge~
繼續進發，去最後一個想去嘅地方，Eas a'Bhradain~
呢個瀑布，好熟面口，好似似曾相識咁~
後記：返到屋企之後查吓，呢個瀑布咪就係噚日朝嚟過嗰個囉，我本身諗住回程先嚟，但噚日見到有個瀑布，就停低睇吓，原來係同一個嚟......
不過都好喎，呢個瀑布同附近環境都幾靚，如果噚日冇低停，以而家又暗又落雨嘅環境，基本上可觀賞性漸近零......
而家就真正回程喇~
本來我哋想喺 Inverness 搵間餐廳食晚餐嘅，不過諗諗吓，坐低喺餐廳食，假設去到就有位，都至少要用個半鐘時間~
其實我哋都有啲攰，都想早啲返屋企，所以決定，去 Inverness 嘅 KFC 就算~
期間差點見證一宗好有機會發生嘅交通意外~
事源一路跟住一部行得比較慢嘅車，比限速低 10mph 左右，我同呢部車中間仲有一部車~
我估我前面嗰部忍咗好耐，終於搵到機會(佢覺得)扒頭~
但其實呢個所謂嘅機會，係一個錯誤嘅時機嚟~
因為佢扒頭嘅位置係一個盲彎嚟，佢根本唔知道對面線有冇車嚟緊~
冇車就好彩，有車就炒埋一碟！
從下圖可見，佢扒頭時係有踩剎車，喺咩情況下扒頭唔係加速而係剎車？
我相信佢呢刻先意識到前方係盲彎，佢根本唔知道有冇車嚟緊~
但騎虎難下，只好硬住頭皮死衝~
就喺佢剛剛過完頭，入返本身條線，就有車迎面而嚟~
佢真係好彩，佢入線遲半秒的話，輕則全世界剎停部車，意外沒有發生~
重則迎頭相撞或因胡亂閃避而失控衝落山~
喺我少少嘅經驗入面，盲彎扒頭，台灣遇得最多，英國就冇遇過，今次係第一次~
盲彎扒頭係極之愚蠢嘅行為，我唔明點解會有人咁做，極為意外嘅係，喺台灣真係唔難遇到......
一路繼續行，途經見到有座城堡打咗燈，原來係我哋前日嚟過嘅 Eilean Donan Castle~
我哋決定走返上去高處影張相~
兩個幾鐘後，終於到咗 KFC~
食完嘢就繼續揸另外嘅兩個幾鐘返屋企~
呢次旅程總共行咗 549.4 英里，儘管有兩日天氣唔太好，但絕對係一個相當滿足嘅旅程~
沒有留言:
發佈留言