《瞬間看地球》Stranger's Blog: 2023.06.07 荷蘭 (Rotterdam、Utrecht) (第七天)

今日行程：
今日朝早會去 Kinderdijk，晏晝就去 Miniworld Rotterdam，跟住就搭火車過 Utrecht~

今日朝早去 Kinderdijk(小孩堤防)，要搭水上巴士過去，但班次好疏~
由旅館去碼頭都要搭兩程車，如果想搭 08:35 呢班船，基本上食唔到旅館包嘅早餐，因為旅館早餐 07:30 先開始~

即係而家要二揀一，一係食旅館早餐，推遲 Kinderdijk 行程~
一係三扒兩撥，用 5 - 10 分鐘食早餐再趕去搭車~

其實正常都應該揀前者，所以我就揀咗前者~
喺揀咗前者之後，我決定唔研究搭車時間，慢慢食個早餐，再順其自然，正常速度咁去搭車~

早餐都係啲普通嘢，最特別係佢啲餐具，放到離行離迾，瑟縮一角咁，我就搵咗幾分鐘先搵到......
其實唔只我一個，我眼見有好幾個都好迷茫咁搵嘢，好似尋寶咁~
其中有一個同我有眼神交流，我即刻拎起把刀，示意係問佢係咪搵餐具，對方點頭，我就指咗俾佢睇喺邊~

今日嘅行程，會搭好幾程嘅地鐵同電車，所以要買市內嘅一日票，但如果要包埋水上巴士，就要買 tourist day ticket~
我哋去到地鐵售票機，諗住買兩張 tourist day ticket，發覺都唔係咁易搵，個介面麻麻地~
見後面有人等緊買飛，唔想阻人，讓咗俾人先~
到冇晒人又再研究吓~
研究咗一陣，終於買到~

搭完地鐵轉電車時，附近有個雕塑~
Kunstwerk 'Santa Claus' van Paul McCarthy(Artwork 'Santa Claus' by Paul McCarthy)

關於到 Kinderdijk 嘅交通，我花咗好多時間去研究~
其實啲資訊隨便搵都有，但就係因為啲資訊好奇怪，所以要花時間去求證~
睇人 blog，好多都講，夏季搭 202 號可直達；冬季搭 20 號再轉另一程水上巴士，跟人行就得~
我六月去，夏季嘞卦，但我喺官網輸入埋出發日期，佢只係教搭 20 號呢條線~
我明明睇到啲 blog 有埋 cap 圖，我出發嘅日子係可以搭 202 號，但偏偏官網就冇~
照正路，幾時都應該信官網多過其他人，因為理論上官網資訊係最新最準確~
但個個 blog 都話夏季可以搭 202 號直達，又冇理由唔信，人哋有晒 cap 圖喎！(我點搵都搵唔到佢個圖喺邊度嚟......)

再奇怪嘅事情係，我嚟到碼頭，係搵唔到 202 號......
但有另一條線，21 號，可以直達 Kinderdijk~
會唔會係 202 號改咗名叫 21 號呢？
如果係，點解官網冇呢？呢條 21 號線，都冇話只有夏季先有，所以係咪完全係由 202 號改名過嚟，我又好懷疑~
我唔單止去睇過 Kinderdijk 嘅官網，我仲去過水上巴士嘅官網，都冇教搭 21 號，一樣係教搭 20 號再轉船~
仲有，google map 都試過，一樣係教搭 20 號~
我呢啲資訊，呢幾個網，我出發前一星期都有再睇過，結果都係一樣~
呢條 21 號線有乜咁神秘呀？

而家 09:00 都未夠，嚟緊嘅 20 號係 09:30 開；21 號係 10:00 開，我諗住差唔多到 09:30，等有船埋岸就問吓啲工作人員~
當然，佢有得個咁嘅牌喺度，我都幾相信 21 號係直航去到嘅，不過保險啲問吓人就好啲囉~

而家冇咩做就周圍行吓~

呢條橋係有啲名氣嘅，叫 Erasmusbrug~
不過朝早啲光線......

送貨上樓，要用兩部車，一部運貨，一部雲梯，成本好高~
我都幾好奇，睇就應該係好重嘅嘢，因為淨睇箱都唔會輕，送到上上面點落地呢？

附近隨影~

09:25，有船埋岸，我哋就行定過去~
我再次走到個路線牌，其時，有個年輕男性華人走埋嚟，用國語問我係咪去小孩堤防~
我話係，佢話搭 21 號就啱，但要等，我又問返佢應該唔駛換乘？佢話唔駛~
聽佢嘅口音同用語，我覺得佢係台灣人嚟~

就係咁，我覺得我已經唔需要多問，21 號直達 Kinderdijk，應該都冇乜懸念~

09:48，又有船埋岸，等啲人落晒船，船上嘅工作人員就嗌 Kinderdijk，所有等船嘅人就陸續上船~

有人去旅行鍾意事前計劃好晒，有人鍾意隨遇而安，我尊重每個人有自己想法，但我自己就唔會係後者，因為其中一樣有機會發生嘅事就好似今朝咁，等咗個幾鐘~

搭船途中見到呢個類似挪亞方舟嘅物體~

Kinderdijk 坐落在 river Lek 與 river Noord 交匯處，為了排水，1740 年建立了一個由 19 座風車組成的系統，是荷蘭最大的風車系統。Kinderdijk 風車群已成為荷蘭最知名的景點之一，於 1997 年列入聯合國科教文組織世界遺產名錄。

最初這個村莊的名字是 Elshout，而 Kinderdijk 的得名，歷史有許多故事。
1. 最著名的故事上溯至 1421 年，St. Elizabeth 大洪水中，Grote Hollandse Waard 被洪水淹沒，而 Alblasserwaard 圩田則倖免於難。當最壞的風暴過去後，洪水消退時，有人去這兩個地區之間的堤防察看有甚麼東西可以搶救回來，他看見遠處有個木製的搖籃漂浮著，當它漂近堤防時，看見一隻貓在裡面跳來跳去試圖使它保持平衡，以防止有水進入搖籃內，於是釣起它，並發現裡面有一個熟睡中的嬰兒。
2. 另一個故事說，Kinderdijk 是因由童工修造而得名。
3. 還有一個故事說，過去有位 Jan 住在一個離這裏很近的大住宅，Jan 有許多孩子，所以被稱為「Jan der Kindere」(小孩的Jan)。後來，人們將他住過的這片地方稱為 Kinderdijk。
4. 又有一個解釋是該堤防比周圍其他的堤防要矮，這個較小的堤防就被稱作「小孩」了。

Kinderdijk，話就話係著名景點，但其實......都有啲悶~
真風車，冇理由唔嚟行吓，但環境真係一般，有點為到此一遊而到此一遊~

呢個雕塑，相信就係來自上面提到嘅其中一個傳說~

呢度有個模型，細心啲睇，其實有好多風車唔見過，唔知係咪有人拎返屋企留念呢~

臨走時見到有士多啤梨賣，賣呢個價真係好蝦人選擇......
買一盒好似好唔抵，買兩盒又食唔晒......
最後都係買咗一盒算，食唔晒的話，連嗰兩歐都蝕埋，仲要浪費食物~
味道唔甜唔酸，不過不失~

回程一樣搭返 21 號水上巴士~
返到碼頭，再次見到 Erasmusbrug 呢條橋，今次順光了~

而家去食午餐先~
今餐食日式拉麵~
Hinoki Noodle Soup - 檜

Ice tea & Sprite

Takoyaki - 八爪魚丸
超級勁油膩，成口都係油，油到都食唔出味道~

Tonkotsu Ramen - 檜豚骨(豬骨白湯)
麵唔錯，但湯底又係太油膩，亦唔覺濃厚豬骨味~

Tonkotsu Ramen Black-Special - 黑檜(黑蒜豬骨湯)
同樣，麵唔錯，但湯底又係太油膩，黑蒜味唔係太出~

食完午餐就去 Miniworld Rotterdam~
即係用模型做出微型世界~
呢個景點，我本身冇太大興趣，係屎塔話好想去，咁我當然會將佢加入行程~
多謝佢，一入去我已經覺得好正，地方夠大，好多模型睇，之前睇相睇唔到嗰種吸引力，係喺現場先感受到~
好多 Rotterdam 嘅建築物都可以喺度搵到，因為去過，會有種親切感~
多數火車(可能全部)都會郁，少部份貨車會郁~
而且，個館仲好有心思，間歇性會將燈光調整，大致令到整個場館經歷清晨、白晝、黃昏同深夜~
仲有仲有，喺某啲位置，會有個按鈕，撳吓佢，前方嘅小場景就會有效果，有時係燈光效果，有時係聲音效果，有時係物體移動效果~
單純模型都已經好正，加埋種種效果，好精彩~

呢個場景，撳吓個掣，就會播 PSY 嘅 Gangnam Style，同埋歡呼聲，仲有燈光效果，仲會播好耐，想佢停都停唔到......

呢個場景，撳吓個掣，就會有隻飛碟從天而降，停留一段時間，就飛走~
個概念帶點幽默，幾正~

建構中嘅新模型~

睇完模型，喺 Rotterdam 已經冇咩做~
而家只係 16:00，晏啲會搭火車過 Utrecht，但我之前買咗嘅火車飛係 off peak ticket，只可以搭 18:30 打後嘅火車，所以都唔可以早啲過 Utrecht~
而家冇咩做就返旅館休息吓先~

Rotterdam 隨影~

等到 17:30，出發去中央火車站~

去到火車站，諗住入閘等，點知唔俾入閘，我諗因為 off peak ticket 嘅關係，未夠 18:30 唔入得閘~
如果有班車係 18:31，但未夠 18:30 又唔俾入閘，咁就實趕唔切~
不過我哋唔係，我哋班車係 18:35，只係小趕，但相信冇問題~
到咗 18:30，好多人一齊行去閘口，原來現場咁多人，好多都係等 18:30 入閘~

屎塔聽晚約咗幾個朋友喺 Amsterdam 見面同埋會玩幾日，其中一個朋友今日去咗 Utrecht，佢而家仲喺 Utrecht，所以講好咗陣間我哋到嘅時候會見吓面~

出咗火車站就見到 Fion，Fion 話佢行咗成日，已經好熟 Utrecht，知道我哋想去睇 Ｍiffy 交通燈，佢話帶我哋去，地圖都唔駛睇~

跟住就要分手喇，Fion 搭火車過 Amsterdam，我哋就行去旅館~

呢間旅館，個窗唔開得嘅，亦冇冷氣，成間房好焗，今晚唔知點瞓......

本來計劃好今晚去 Sonmat 買晚餐，呢間係韓式外賣，冇堂食嘅~
本來諗住買返旅館食，不過屎塔話呢刻想搵間可以坐低食嘅，好，就去返火車站附近個商場睇吓有冇嘢啱食~
最後都係冇咩啱食，決定去返 Sonmat~

行到去 Sonmat 時，門口貼住搬遷告示，新店距現在位置約 0.3 mile，放棄啦~
喺呢個時候，留意到對面有間越南嘢，殺啦！

ANAN Saigon Streetfood