今日行程：
【Consuegra】Molinos de Viento de Consuegra → 【Segovia】Acueducto de Segovia → Plaza de San Martín → Plaza Mayor → Alcázar de Segovia → Catedral de Segovia → Restaurante José María(Dinner) → Hostal Don Jaime(Accommodation)
旅館本身備有唔同種類嘅早餐，基本上可以滿足多數人~
再加上噚日午餐食唔晒嘅 Teruel 腸，可謂應有盡有~
不過嗰幾條 Teruel 腸，最後都只係食咗少少，剩返嗰啲，勉強冇幸福，分手吧~
今日第一站：
Molinos de Viento de Consuegra(白色風車村)
此地常有強風，四百多年前，當地人在此起了風車，藉著強風推動風車，帶動機械碾磨小麥以及壓榨橄欖油。
同場仲有一座城堡~
Castillo de Consuegra(孔蘇埃格拉城堡)
原來要收費，官網冇提過，最後冇入到~
完咗風車村，就返旅館攞返行李，直飛下一個小鎮~
(後記：旅館收咗我 €5 鎖匙按金，話 check-out 交還鎖匙後會退回，由於係碌卡收嘅，要等一段時間先收得返，不過我到寫 blog 呢日先記起，查返係冇收返呢 €5，如果，我只係話如果，佢係故意唔退嘅，其實咁樣真係呃咗唔少人，相信好多人都未必記得~)
據說風車村有 12 座風車，全部保存完好，喺行車途中就可以見到整整 12 座風車~
Segovia(塞哥維亞)
※舊城區及水道橋被列入世界文化遺產
Segovia，得名於凱爾特伊比利語「勝利之城」的意思，是西班牙一處重要歷史名城。老城區雄踞於狹長的山岩上，建於公元 80 年的羅馬時期。
車程約兩個鐘，阿飛揸晒全程，間有驚險場面，但未到會出事，還好~
去到旅館，得知停車場不在旅館範圍，雖然喺附近，但又因為單程路嘅關係，係要兜圈先去到~
咁就我自己去泊車，佢哋拎行李上房先~
今日係屎塔生日，我喺 Segovia 呢度，搵到間 5⭐ 蛋糕店，訂咗個蛋糕，泊完車就行去攞蛋糕，再拎返上房~
本來計劃唔係咁，不過時間上已經遲咗好多，唯有食蛋糕當午餐~
我兜咗兩個圈都搵唔到個停車場喺邊......
到兜第三個圈，終於搵到~
停車場入面啲位好窄，又勁暗，要搵指定嘅泊車位，我揸住部少少大嘅車，有啲難度~
搵到車位後，由於入面唔夠位俾我部車泊，我係需要倒車出返主路，掉頭再用尾入先泊到~
(如果我一早知個位喺入面，我一開始係唔會用頭入，只係因為搵緊位先至會用頭入~)
喺我想倒返出主路時，有部車想入嚟，我已經倒緊車，倒車燈當然著咗，想入嚟部車就停咗喺入口唔郁~
佢不停用手指住個停車位，我相信佢係想示意佢要泊嗰個位~
個死人樣態度又差，好似怪我唔讓佢咁~
真係唔該用個腦思考吓，入面咁少位，想我點讓？
佢部車細，應該可以用頭入再倒車，但我部車唔得，用頭入再倒車係唔夠位入，我係一定要倒返出主路再用尾入先得~
我就算隊返入去，佢都一樣泊唔到，因為我部車會佔用晒整個空間，佢係冇可能泊到車~
呢啲真係好簡單，一睇就知道，我真係唔明點解佢睇唔明個情況~
我正打算落車同佢講嘅時候，有個大叔走埋嚟做指揮~
呢個大叔，我認得佢，我到旅館時，佢正在喺車搬緊啲水入旅館~
而家佢又喺呢度出現，可能佢喺旅館做嘅，甚至係老闆都唔定~
阿老闆(當佢係)就正常得多，佢叫嗰部車倒返出去，再到我倒車，再叫嗰部車入返去泊，我掉完頭就倒車用尾入就泊到~
計劃永遠趕不上變化~
喺混亂中途，屎塔出現咗喺我視線......
即係我冇得泊完車靜靜雞走去攞蛋糕~
屎塔話見我兜咗兩個圈，所以諗住出嚟幫吓手~
係，行過去好近，揸車就要兜圈，同埋有個路口一啲都唔似通道，似係通向某建築物嘅停車場，原來就係行嗰條路先啱~
泊好車，冇得瞞啦，唯有同佢講，我要去攞蛋糕，叫佢返旅館等~
Dulces Vuelos
間蛋糕店喺 google 有 89 個評分，總評分係 5⭐，實係好嘢啦~
送咗兩包甜嘢~
Passion fruit cake，個蛋糕睇落好簡潔，我哋加咗啲甜嘢上去，成個唔同晒~
大家食完之後都冇講過好食，其實我自己都唔覺得好食，文化差異吧~
Segovia 其中一個地標係水道橋，我本來安排咗聽朝先去，不過而家天氣唔錯，決定而家去咗先~
Acueducto de Segovia(塞哥維亞水道橋)
※世界文化遺產
從羅馬時期建造至今，高 28 公尺，由大約 170 個拱門組成，運作咗接近 2000 年。
屎塔話佢冇印象上次嚟有上過個平台，我就有印象~
Segovia 冇太多嘢睇，唔計比較細嘅教堂，就水道橋、兩個廣場、主教座堂同埋城堡~
所以而家就向住城堡進發，途中會經過晒上面提到嘅景點~
Plaza de San Martín(聖馬丁廣場)
我對呢個廣場相當有印象，一來環境唔錯；二來，好記得當年嚟呢度嘅故事~
以下係我當時寫 blog 時記低嘅：
「喺呢個廣場度，見到有個兩歲到嘅小朋友放盡喉嚨喺度大叫大喊，坐喺一邊嘅媽媽只係望住佢，但唔理佢，有途人可能見個小朋友喊得咁淒涼，走埋去安撫吓佢，阿媽媽笑笑口講咗幾句嘢，個途人又笑笑口咁離開~
段估都係同個途人講由得佢，唔可以縱壞佢卦~
個媽媽忍耐力真係高強，我哋喺廣場度都起碼有 15 分鐘，阿媽媽真係 15 分鐘都唔理個細路由佢喊，最後個細路都冇符，收聲走返埋媽媽度，呢個時候阿媽媽先將佢嘅母愛顯露出嚟，錫返個小朋友，好嘢！」
Plaza Mayor(主廣場)
主廣場冇乜特別，就廣場一個~
Catedral de Segovia(塞哥維亞主教座堂)
始建於 1525 年，直到 1768 年先正式落成，採用晚期哥德式風格，為西班牙建造嘅最後一座哥德式大教堂，鐘樓高達 88 公尺，係西班牙最高嘅鐘樓。
呢座教堂最特別係外型成座沙雕咁~
Book 咗指定時間入城堡，冇時間入教堂，不過其實唔可惜，我同屎塔上次嚟嘅時候入過，佢哋......我唔覺得佢哋對教堂有咩興趣~
Alcázar de Segovia(塞哥維亞城堡)
初建於古羅馬時期只係一個堡壘，多年來經過不斷修建，融入了羅馬式、哥德式、穆德哈爾式和文藝復興式等元素，但在 1862 年發生火災，大部份建築被燒毀，如今所見為 1890 年修復完成的浪漫中世紀城堡，據說係迪士尼白雪公主城堡嘅靈感來源。
上次嚟冇入到，當時睇啲人話冇咩睇，唔值得入~
今次二次探訪 Segovia，同埋都想帶團友入去睇吓，所以今次就選擇入去~
個噴水池......😂
呢幅畫有啲似恐怖片劇照......
城堡入口原來咁深~
入城堡可選擇加埋上塔頂，我睇過晒，風景真係一般，不過一場嚟到，又想俾多啲嘢團友睇，所以都有加埋上塔頂環節~
今晚 book 咗間餐廳，要 19:30 先開始有晚餐供應，完咗城堡時間為 17:30，有咩做好呢？
咦，主教座堂閂 18:30，不如就去行吓啦~
我哋行另一條路去教堂，基本上就係沿住城牆~
Catedral de Segovia(塞哥維亞主教座堂)
入場買飛時，獲告知畫廊就快閂門，俾晒指示我哋點樣行過去~
上次嚟呢間教堂，係唔俾影相嘅，今次就可以~
睇完教堂，仲有時間剩，團友們想行街，但屎塔唔係太想，所以我哋就分兩隊，當然係我同屎塔自己一隊~
Segovia 真係冇咩行，加上天色已暗，頂多行吓啲商店，不過我哋對商店就麻麻~
佢哋真係超行得，體力我可以，但精神唔太得~
或者，終日扮演照顧者嘅我哋，係想個腦可以休息吓~
約返個時間喺餐廳集合~
呢段時間做咩好呢？
可以坐喺廣場等夠鐘，不過未等到夠鐘，可能已經凍死咗~
可以漫步街頭，享受吓 me time，係，喺呢個情況下，兩個人都可以好 me time~
我哋首先行去餐廳探吓路先，其實都冇咩好探，不過叫做搵啲嘢做吓，就當驗證吓佢係咪開咗都好~
之後就真係周圍行吓~
好意外哋，Segovia 呢啲歷史旅遊區會有 Decathlon~
好意外哋，屎塔會走入 Decathlon~
好意外哋，屎塔喺 Decathlon 買咗對拖鞋，因為佢帶嚟嗰對酒店拖鞋已經爛爛哋~
行到差唔多夠鐘就行去餐廳~
Segovia 有兩間特別出名食烤乳豬嘅餐廳，當年去咗其中一間，豬普通，服務差~
今次當然會試另一間~
Restaurante José María
間餐廳有兩部份，入口嗰部份係飲酒食 tapas，再行入啲先係餐廳~
不過餐廳未夠 19:30 係唔開放~
所有團友匯合後，等到 19:30 就可以入座~
一開波每人一份麵包同一小杯湯~
Fanta Lemon / Sangría
Saludable de verduras segovianas a la plancha con oliva virgen
(Healthy segovian vegetables grilled with virgin olive oil)
估唔到咁大兜，就係烤過嘅菜，有啲橄欖油，冇特別~
Gambas blancas de Huelva elegidas para la plancha con sal Maldon
(Grilled white prawns from Huelva with Maldon salt)
蝦好新鮮，香氣十足，好好食~
El pulpo asado al pimentón de la Vera con oliva virgen y puré de patata
(Grilled octopus with paprika from La Vera, olive oil and mashed potatoes)
超稔，直情覺得稔過頭，八爪魚唔應該係咁嘅質感，係我食過最稔嘅八爪魚，但味道好~
Cochinillo asado de nuestra corte y hornada. D. Marca de Garantía «Cochinillo de Segovia»
(Cochinillo: milk-fed suckling pig, roasted in a traditional oven. A certified regional product with the «Cochinillo de Segovia» guarantee)
主角烤乳豬~
初頭唔識，諗住叫一隻，不過佢話一隻係六份，餐牌上個價錢係一份價錢~
從佢謙卑嘅態度，我感受到佢最主要係想講，六人份對我哋嚟講太多，同價錢無關~
最後我哋點咗三人份~
準備上檯時，佢要搬一張檯仔喺我哋隔籬，因為一整隻豬，要同隔籬檯分，每檯三份~
戲劇性嘅部份，係佢哋會用碟代替刀嚟切，以證明隻豬皮夠脆肉夠稔~
隻豬超嫩又勁香，豬皮夠晒脆，一定要配埋個湯一齊食，絕配！
出發前，阿珊份工失而復得，話趁屎塔生日慶祝吓，佢請食飯，叫我搵間名貴嘅~
我話，唔駛刻意搵，本身嗰日食嗰餐都唔係平(以我會去食嘅餐廳嚟講)~
呢餐埋單 €215，多謝阿珊~
埋單之後，有人送嚟三隻豬仔~
究竟係每位女士一隻，定係叫一份豬就送一隻呢？
今晚，有人話，今日咁高興，一齊飲 Sangría 啦~
屎塔堅拒，因為佢知佢一飲就醉，同埋會好辛苦~
我呢，知道 Sangría 好少嘢，所以就一齊飲啦，其實酒類我真心麻麻地~
叫嘢食嘅時候，諗住叫埋 hake，不過嗰個我幾欣賞嘅哥哥仔話太多，驚我哋食唔晒，所以冇叫到~
事實證明，佢啱~👍
嗰兜菜，如果我哋五個人要分嚟食，係要切開先分到~
問個哥哥仔攞刀叉，佢先嚟俾咗一把刀，發覺拎漏咗叉，返去再攞，但又係拎咗把刀~
到佢發現拎咗兩把都係刀，又走去換過隻叉~
最令我哋意外嘅係，佢拎住隻叉返嚟，親手幫我哋切嗰盤菜~
佢嘅表現，就好似初出茅廬嘅打工仔咁，謙卑地盡心盡力，非常欣賞佢~
食完飯，就走去食雪糕~
今日唔單止係屎塔生日，仲係萬聖節~
有人入餐廳問攞糖果~
有人玩 cosplay~
有小朋友入雪糕店問攞糖果俾職員喝走~
就係我哋去嗰間雪糕店......
班小朋友勁冇癮~
Segovia 隨影~
沒有留言:
發佈留言