《瞬間看地球》Stranger's Blog: 2024.11.02 西班牙 (Madrid)、葡萄牙 (Lisboa) (歐洲第八天)

今日行程：
【Madrid】 → 【Lisboa】Ourives Petisqueira(Lunch) → Miradouro das Portas do Sol → Miradouro de Santa Luzia → Arco da rua Augusta → Praça do Comércio → Elevador de Santa Justa → Mundo Fantástico Da Sardinha Portuguesa → Estação de Rossio → El-Rei Dom Frango(Dinner) → Mouraria Lisbon Soul Apartment(Accommodation)

今日一早就要出門口，因為要搭 10:30 飛機過 Lisboa~
所有人都好合作，個個晨咁早就起身，我好係最遲嗰個......

搭 metro 去機場，一定要記得買機場線附加費，否則就可能會被罰錢，五個人肯定好金~

我哋個 gate 喺 T1，好鬼遠，行到懷疑人生，係咪可以行到去 Lisboa？

班機係 10:30 起飛，11:00 到 Lisboa，但 duration 就寫 1hr30mins，我先知道，西班牙同葡萄牙係喺唔同時區，有一個鐘嘅時差~

班機 delay 15 分鐘~

到差唔多可以上機，就有兩個牌楝咗出嚟，一個係 C43，一個係 C44，兩個都係同一班機~
咁 C43 近我哋多啲，就排 C43 啦，排咗一陣佢先有廣播，座位幾多至幾多就排 C43，幾多至幾多就排 C44~
我呢啲二揀一通常都揀錯嘅，今次當然都唔外，揀錯咗啦......

Lisboa 嘅住宿，以我哋五個人嚟講，要喺價錢地點同評價之間取得平衡，選擇極少~
最初我嘅行程，要喺 Lisboa 住三晚，就咁 search 三晚房，選擇唔多，但總算揀到~
到後來我改咗行程，只住兩晚，想喺系統度改兩晚但唔成功~
於是我哋就 message 個 host，佢話佢 set 咗最少要 book 三晚，所以我哋改唔到兩晚~
佢繼續話，佢而家改個 setting，我哋而家再改兩晚，結果就成功改到~
好彩佢肯咋，如果唔係又要揀過另一間，真係冇咩好選擇~

呢間旅館，係自助式 check-in，用密碼開大門，不過我哋試咗好多次都開唔到度門~
試到樓上有個大叔嗌唔好再撳喇~😂
佢笑笑口走落嚟睇吓我哋做乜，知道咩事後，佢聯絡個 host 嘗試解決~
喺未解決到之前，佢放咗我哋入去~
原來呢個阿叔係幫個 host 做嘢嘅，清潔我哋間 apartment 都係佢做，佢就住喺隔籬~
之後佢話個密碼 set 返啱，可以用~

我哋上去放好行李，就準備出去~
個大叔好熱情，好似幾好人，我哋就問佢水喉水係咪可以飲用~
點知佢走入自己間屋，拎咗樽可能係 5 公升嗰啲樽裝水出嚟，熱情地斟滿我哋嘅水樽~
我哋初時覺得唔好，呢啲人哋俾錢買嘅，我哋點可以要？
不過大叔英文一般，大家溝通上有少少困難，但又盛情難卻，所以就由佢斟啦~
佢仲話 no english，咁我就回佢 Obrigado，阿大叔即時開心大笑~

喺 Lisboa 嘅行程，要重新執過晒，因為要就住天氣行事~
今日天氣好，聽日陰天或者有雨，後日預報大部份時間落雨~
其實都冇咩話點執，都係見步行步~

Lisboa 舊城區係一個山城，有唔少觀景台，我就揀咗兩個可觀性比較高嘅去~
不過問心，咁多個觀景台，冇一個係令我覺得好驚嘆，咁點都要揀啲去吓嘅，話晒呢個係喺 Lisboa 必做嘅項目嚟~

呢兩個觀景台，本來計劃好後日去，不過觀景台嘅嘢，梗係趁好天去啦，所我決定首先去觀景台先~
不過去之前，要食飯先，行程改咗，就去唔到本身諗住去嘅餐廳~
同樣，一路行一路睇，一路諗~

行經一條細街，被一個男人警告 no photo，喺歐洲都係第一次遇到~
我係影緊條冇人嘅街，唔係影到佢，因為佢係喺我後面行上嚟~

經過見到嘅餐廳，google 上面都係低分，冇揀到，直至見到一間 4.7⭐，二話不說，就呢間~

Ourives Petisqueira

Orange juice / Lemonale / Coffee

Puntilhitas com Molho Tártaro
(Fried squids)
唔算炸得好，但味道唔錯~

Gambas al Ajillo
(Garlic prawns)
食咗一隻，我已經下定決心，如果會再嚟 Lisboa，我一定會嚟返呢間餐廳，再點呢一道蝦~
係我喺西葡食過最好食嘅蝦！
非常有蝦嘅鮮味，亦有香濃嘅蒜味，新鮮爽口，堪稱完美！

Favas com entrecosto de porco
(Broad beans with pork ribs)
同想像嘅好唔同，味道唔錯，又夠稔，呢個有跟飯~

Rabo de boi com purê de batata
(Oxtail with mashed potatoes)
旅程中第二次食牛尾，呢度煮法係去骨同燉到稔晒，夾埋個薯蓉係幾好食~

Pao
(Bread)
個豬同牛都有好多汁，媽咪好鍾意食麵包，所以叫咗份俾佢蘸汁嚟食~

Mouse de Chocolate
(Chocolate mousse)
絕對係我食過最好食嘅朱古力慕絲！(其實我又唔係食過好多......)
非常香濃嘅朱古力味，質感係好 light，因為佢有好多空氣喺入面，最大敗筆(對我嚟講)係甜咗啲~

Pudim de leite doce
(Sweet milk pudding)
呢個有個 sweet 字眼，反而唔算好甜，淡淡嘅奶香，唔錯~

食完嘢，天氣仍然唔錯，就行去兩個幾乎雙連嘅觀景台~
所謂幾乎雙連，其實只係兩個觀景台之間嘅距離好近，只係角度有少少唔同，景觀都有啲唔同~

Miradouro das Portas do Sol(太陽門觀景台)

Miradouro de Santa Luzia(聖露西亞觀景台)

全時間喺度諗行程嘅我，到最後仍然冇一個好方案~
所以求其揀咗去火車站先~

餐廳附近有間手信店，啲磁石貼花多眼亂，不過我唔知點解想等去埋 Porto 先決定，所以都冇買到~

行經一個廣場 - Praça da Figueira，有個市集，不過市集可以天黑先行都得，所以而家就唔行住，但我會記低再安排時間過嚟~

沿途，阿珊見到個凱旋門，話想去~
我哋而家嘅位置，近火車站多過凱旋門，但如果我去火車站先，仲有周邊有啲地方可以行，咁就有排都去唔到凱旋門~
所以，都係順佢意，去凱旋門先，之後再算~

向住凱旋門行，實際上係行緊一條購物街 - Rua Augusta，我本身冇安排，因為實在冇時間~

行經見到有栗子車仔檔，咩都想試嘅媽咪，當然唔會放過~

又見到嚟葡萄牙必食嘅葡撻，媽咪問之後有冇機會食，我話安排咗嘅有兩次，當然隨心經過想食都可以買嚟試~
媽咪呢，有機會試就 OK，唔需要見到即刻試，所以就冇買到~

行經一間可以即時車名嘅嬰兒用品店，有位女士喺舖前向住大街車名，屎塔駐足觀賞~
車名嗰位女士，遞上已車好 Lisboa 喺紙上嘅成品俾屎塔，然後問屎塔叫咩名~
最後，就送咗呢兩個成品俾屎塔~

我哋睇住佢車，心入面充滿問號~
佢檯上面隻左手，幾乎係唔需要掂張紙，反而係用右手喺檯底下控制，究竟係點做到嘅呢？
其實係咪電腦？但睇返佢同一樣嘅字母，係有少少唔同，如果係電腦又唔會有唔同，好神奇~

由阿珊話見到凱旋門至行到呢張相嘅位置，已經行咗三份一，阿珊真係好眼力，咁遠已經見到凱旋門~

Arco da rua Augusta(奧古斯塔凱旋門)
1755 年里斯本大地震，為了紀念災後重建而興建，最初嘅想法只係鐘樓設計，最終成品則是細緻雕刻嘅凱旋門建築。

穿過凱旋門就嚟到一個大廣場~
Praça do Comércio(商業廣場)
這裡曾是皇宮嘅所在地，所以又稱為 Terreiro do Paço(宮殿廣場)，但皇宮已在 1755 年嘅里斯本大地震中被摧毀，亦沒有在原地重建。

岸邊有兩條柱叫做 Cais das Colunas，係大地震前嘅城市大門，無論係皇室返回皇宮或是有賓客來訪都會喺呢度上岸~

早前喺 Rua Augusta 購物大街，由於珊飛媽咪被太多嘢吸引住，以至我哋同佢哋係形成咗分開行嘅狀況，所以佢哋唔知道車名呢樣嘢~
阿珊話都想要，冇問題，反正我去下一個地方都會經過返嗰間嘢~

Elevador de Santa Justa(聖胡斯塔升降機)
開發目的係要解決居民來往高低處嘅交通，電梯係木造嘅，建於1900年，係艾菲爾鐵塔設計者嘅學生 Raul Mesnier de Ponsard 設計，大約有 10 層樓高，一開始是蒸汽動力，於 1907 年改為電力發電。

喺 Lisboa，有四部電梯，都係為咗解決居民來往高低處嘅交通而建~
除咗呢部，其餘三部都係纜車，係得呢部先係真正電梯，或者用 lift 比較清楚~
部 lift 超過 100 年歷史，長時間有人排隊乘搭~
我相信其中一個原因，係因為持有交通日票或其他旅遊 pass，就可以免費乘搭~
曾經睇過啲群組講過，排隊快則半小時，慢則兩小時~
為咗搭一部木造 lift 排兩個鐘，我係絕對唔會咁做，浪費人生~
非常幸運嘅係，團友中冇一個人真係好想搭~

可能已經到咗傍晚，人龍唔長，不過我哋都冇打算排，再講，我哋冇任何 pass 可以令我哋免費乘搭，更加唔會排~

咁唔搭 lift 上去，可以點上去呢？
就係行過對面，有間商場，對住大街有部 lift 上平台花園，到咗花園行少少樓梯再過條橋，就可以到達聖胡斯塔升降機嘅上層~

不過，行到去部 lift 時，貼咗告示話 out of service~
都唔緊要，我仲有後補方案，繞到建築物後面，係有樓梯上嘅~

行呢度上，就會經過 Convento do Carmo(卡爾莫修道院)~
呢間修道院喺 1755 年里斯本大地震時被震毀，至今一直保持著震毀後嘅樣貌~
而家實際上係一間博物館~

經過呢條橋，就可以到達聖胡斯塔升降機嘅上層~

傍晚時份，有啲暗~
景色其實好一般~

如果想要更開揚嘅景觀，沒有圍欄嘅阻礙，可以俾錢上多一層，無論有冇 pass 都一樣要俾錢~
佢個邏輯係咁嘅，持有交通卡類嘅 pass，搭呢部 lift 係當搭交通工具，但上一層就係觀光，所以搭 lift 就交通卡包埋，觀光就要俾錢~

團友們都不感興趣，行完呢層就打算走人~
我喺人哋嘅 blog 度睇到，上要俾錢(如果冇交通卡)，但落唔駛，但又怕資訊未必真確，反正大家興趣都冇乜，就無謂搏，費事落到去先話要收錢~

完咗呢度，就同佢哋去行一間觀光式嘅商店~

Mundo Fantástico Da Sardinha Portuguesa(葡國沙甸的奇妙世界)
商店設計成馬戲團般嘅模樣，天花板有宇宙星系，門口有摩天輪跟旋轉木馬，商店主要係售賣魚罐頭，或因為浮誇嘅裝修，店內嘅魚罐頭比同公司嘅其他分店貴。

喺葡萄牙，魚觀頭係其中一樣比較標誌性同幾受歡迎嘅手信~
我就搵咗幾間商店，各有特式~
一間係上面提過嘅觀光式商店~
一間係同上面同公司但冇特別裝潢嘅商店，售賣貨品可能係 100% 一樣，但會比上面嗰間平少少~
一間係包裝比較樸實，三間中最平嘅一間~

所以呢，要買都唔會喺呢間觀光式商店度買，我之後會帶佢哋佢其餘兩間度買~

而家就去返本來想去嘅火車站，不過就由日景變夜景~

Estação de Rossio(羅西歐火車站)
建於 1887 年，曾是里斯本中央火車站，外觀為葡萄牙建築師 Jose Luis Monteiro 設計。

內部係好普通嘅火車站~

Book 咗 19:00 晚餐，仲有大把時間，珊飛話想去行足球 club shop，於是我哋又分頭行~
而家我哋就去行返今朝見到嗰個 Praça da Figueira 市集~
個市集冇咩睇，高速行完~
喺附近搵咗個位坐低等佢哋~

佢哋行完 club shop，就去行市集~
行完市集就同我哋匯合，一齊等到差唔多時間就行去食飯~

El-Rei Dom Frango