今日行程：
【Segovia】→ 【Madrid】Centauro Madrid Atocha → Plaza Mayor → Mercado de San Miguel → Casa Garcia(Lunch) → Puerta del Sol → Museo Nacional del Prado → Puerta del Sol → El Corte Inglés → Xentes(Dinner) → Ok Hostel Madrid(Accommodation)
珊本來想睇水道橋喺有太陽之下嘅倒影，不過今朝落雨，冇希望啦~
咁今日喺 Segovia 就再有地方去，直接去下個地方~
Madrid(馬德里)
馬德里係西班牙首都，亦都係境內最大城市。建城於 9 世紀，1561 年，西班牙國王腓力二世將首都從托雷多遷移於此，從此奠定馬德里的首都地位。
我去停車場，揸咗部車到旅館外，方便大家上行李~
阿飛話今日精神麻麻地，所以就我揸去 Madrid~
中途突然超大雨，中途唔緊要呀，Madrid 唔係咁就好~
去到旅館附近，有啲封路措施，google map 並唔知道，變咗要自己搵路~
附近一帶都係小路，仲要全部單程路，超難搵~
已經放棄車到旅館門口，只求有位停，大家行過去就算~
不過呢一帶交通都好繁忙，睇得出大家都喺度搵緊路，不停兜，不停兜~
全部都係單線單程，根本想搵地方停吓落行李都唔得~
最後都搵到個地方停，係堀頭巷嚟，所以停低都唔影響交通~
好彩冇落雨，佢哋拖住行李去旅館都冇咁狼狽~
落低咗佢哋，就分頭行事~
我去還車，佢哋去旅館寄存行李~
我去還車會俾佢哋用多啲時間，我安排咗屎塔寄存行李後帶佢哋去玩先~
我亦已安排好匯合點，可以一齊食午餐~
我去還車時都有啲阻滯，去到附近，見到門市，向住大街，我當然唔可以停喺大街，但又唔知佢個停車場喺邊，唯有周圍兜睇吓~
我兜去門市後面嘅細街，周圍都係車，啲街又窄，想搵個位停陣衝過去門市問吓停車場喺邊都唔得~
終於，俾我搵到個位，不過嗰個係傷健停車位，我係絕對唔應該泊嗰度，但我實在冇辦法，停一陣，速去速回，希望冇事~
當我泊好之後，衝出大街，我就見到租車公司個停車場！
原來就喺對面，不過我呢度係唔可以就咁過去對面，係要兜吓~
根據 google map，由我所在位置揸去停車場，要 10 分鐘......
係咪痴線咖，我呢度行過去都係頂多 20 秒，揸車要 10 分鐘？
我知 google map 有時信唔過，我自己研究吓個地圖，覺得有條路線係近好多，就跟呢條行~
本來呢，我信自己呢條路真係快好多，可能 4 分鐘都唔駛，不過去到最後燈位，前面有部車要泊位，條街窄，個車位又窄，佢泊咗好耐，耐到紅綠燈都轉咗三次先泊到~
其實過咗呢個燈位，一轉右十米到就到，本來就好快，而家就用咗超過 10 分鐘......
由於係買全保嘅關係，還車過程快速並且順利~
之後就搭 metro 同佢哋匯合~
佢哋呢，寄存行李後，我安排咗屎塔同佢哋去個廣場行吓先，呢個廣場我哋當年去過，所以我唔去都得~
之後就去市場一齊食午餐~
Plaza Mayor(主廣場)
Mercado de San Miguel(聖米格爾市場)
西班牙最古老的市場之一，是馬德里的著名美食市場。
我就係約咗佢哋喺呢度等，一齊食午餐~
入到去，嘗試搵佢哋，不過實在太多人，決定打俾佢哋~
佢哋話初時都仲唔算太多人，行咗一圈之後，已經多人到根本冇可能搵到位坐低，所去咗附近餐廳坐低算~
咁點解冇人通知我呢？原來兩姊妹都以為對方會通知......
附近勁多呢啲 tuk tuk~
Casa Garcia
Coke / Aqua
Mixta Paella - Arroz, Pollo, Marisco
(Mixed Paella - Rice, Chicken, Seafood)
就極為普通嘅一兜有味飯~
Smash Burger - Doble carne Angus, Queso cheddar fundido
(Smash Burger - Double meet Angus beef, Melted cheddar cheese)
牛肉有點乾，但牛加半溶芝士，點都唔會太差~
Chopitos
(Bay squid)
唔乾身，仲有啲稔，味道還可以~
Gambas Al Ajillo
(Garlic shrimp)
蝦嚟講，呢間可能係最差嗰間，得蒜味冇蝦味~
食完呢餐，大家又再分道揚鑣~
珊飛會去 Estadio Santiago Bernabéu(聖地牙哥·班拿貝球場)~
我哋同媽咪會去 Museo Nacional del Prado(普拉多博物館)~
由於佢哋啲飛係有指定時間，所以未埋單我就叫佢哋走先~
知道媽咪一直心思思想試吓頭先喺市場見到個包，就返轉頭買個俾佢食~
其實即係咖喱角嚟，仲好鬼鹹~
€5.4 一個，貴到不得了~
媽咪明顯感到失望，不過唔試過又唔知嘅，只係我唔明白何以對一個外表咁普通嘅包產生濃厚興趣，心思思咗超過一小時......
而家就經太陽門廣場去普拉多博物館~
Puerta del Sol(太陽門廣場)
Madrid 位於西班牙正中心，喺太陽門廣場上可以搵到西班牙公路網嘅起點正中心 Km.0 標示。
Museo Nacional del Prado(普拉多博物館)
與巴黎羅浮宮、倫敦大英博物館合稱世界三大美術館(網路上有三大、四大美術館嘅說法，冇話邊個啱定唔啱，只知道普拉多博物館一般都包含在內，就知道地位有多高)。普拉多美術館係西班牙最大嘅美術館，收藏以西元 14~19 世紀大師作品為主。
博物館對外環境相當不錯~
西葡某啲景點嘅入場票，對年過 65 歳嘅人士提供優惠，媽咪僅僅達到呢個門檻~
但咁耐以嚟都冇人查過媽咪 ID，今次係第一次，入場前要出示護照證明合乎資格以優惠價入場~
同過往行博物館一樣，我同屎塔會分開行，媽咪就當然係跟住屎塔~
場內唔可以影相，不過其實間中都有人影~
有人明目張膽，可能佢哋唔知唔可以影；有人擺明偷拍~
在場工作人員見到都會出手阻止~
博物館好大，勁多展品，我一般都唔會花太多時間休息，不過今次唔同~
我知道我唔會行得晒，但都諗住用有限時間，行到幾多就幾多~
行到某個時刻，仲有時間剩，我掙扎，繼續行好定休息吓好？
體力上，我冇問題，反而係心靈上唔想再行~
係我睇得太多同類型嘅博物館所以唔再感興趣？
係我想爭取時間放空一吓？
我冇答案~
休息到差唔多就打俾屎塔睇吓佢喺邊同咩情況~
原來佢都係休息緊，不意外~🙃
我同佢哋匯合好，再聯絡珊飛睇吓佢哋咩情況~
佢哋仲未行完，咁我哋就休息多陣先~
等到差唔多，就約好匯合地點同時間~
嚟緊嘅時間係買手信時間~
我做咗啲功課，俾佢哋睇吓有咩好買~
約咗佢哋喺 La Violeta 等，呢間係百年老店，紫羅蘭花糖嘅專門店～
不過今日冇開，反正佢哋又未到，就改匯合地點，約喺太陽門廣場等~
呢刻嘅太陽門廣場多人到不得了，咁大個廣場，想去某個位置都只能蠕行，多人過晏晝嗰時十倍人~
太陽門廣場有個西班牙公路網嘅起點正中心 Km.0 標示，匯合後，點都要合照一張記錄一吓到此一遊~
大部份嘅手信，都可以喺 El Corte Inglés 呢間百貨公司附屬嘅超級市場買到~
呢間百貨公司就喺廣場邊~
不過，珊飛查到附近有間足球 club shop，話想去行吓先~
所以，匯合後又即時分開，我俾晒百貨公司同晚餐餐廳嘅資料佢哋，晏啲喺餐廳再匯合~
咁我哋就去 El Corte Inglés 行吓先~
不過廣場邊嗰間，唔見有超市，但我知仲有另一間 El Corte Inglés 喺附近，就走過去睇吓~
另一間 El Corte Inglés 嘅地庫就係超市，係間大超市嚟，不過最後都係冇買到嘢~
最主要係我同屎塔都唔駛點買手信，媽咪呢，對買手信有啲條件，唔係咩高要求，只係因應買俾唔同人有唔同條件，但喺度就睇唔啱~
行完超市冇嘢做，今晚間餐廳又 book 咗 20:00，大家決定返旅館休息吓先~
20:00 前，我哋已經到餐廳，仲未開門~
等咗冇耐，珊飛都已經到咗餐廳~
一齊等 20:00 開門~
Xentes
揀呢間餐廳，有個好大嘅原因，想試吓紅蝦~
據講，紅蝦係蝦類當中最好食嘅蝦，我自己都幾鍾意食蝦，所以好想試吓~
喺呢度，溝通相當有難度，對方唔太講英文，亦聽唔明，當然我哋一啲西班牙文都唔識添~
Coke / Aqua
前菜~
最後，腸仔清晒，但冇一個人食過一粒橄欖，我哋真係唔鍾意食~
Carabinero a la plancha x 5
(Grilled red prawns x 5)
今晚嘅主角，真係勁有蝦味，蝦頭多膏，堅係正~
如果話佢係蝦類最好味嘅蝦，我算係認同~
但太貴，€15.5 一隻，可以叫幾多隻嚟食？
我哋一人叫一隻嚟試吓，食完一隻已經冇得再食......
當然，捨得俾錢，叫幾隻紅蝦嚟食都得，但，值得嗎？
如果要揀，我會寧願叫整得好味嘅蒜味蝦，我可以品嘗幾次，唔夠再叫都仲得，唔會有嗰種好快就食晒冇得再食嘅失落~
Espárragos trigueros a la plancha sobre láminas de tomate raf con queso parmesano
(Grilled asparagus on laminate raf tomato and parmesan)
第一口麻麻，第二口開始覺得好食，芝士夾埋番茄幾夾，露荀好味但太稔~
Bacalao confitado sobre lecho de pimientos y emulsión suave de ajo
(Confitted cod on a bed of peppers and mild garlic emulsion)
個汁夾個魚幾好味，不過鹹咗啲~
Solomillo de Ternera con patatas revolconas y pimientos de padrón
(Galician beef sirloin with "revolconas" potatoes and padron green peppers)
本來叫 medium，不過怕太生，改叫 medium well，不過嚟到係 medium，幾有牛味，肉質又好，正~
Arroz caldoso con bogavante x 2
(Soupy rice with lobster x 2)
本來係叫 spider crab，不過佢冇，改咗叫龍蝦~
同埋佢一定要我哋食晒上面叫嘅所有嘢先會上呢兜飯~
最少要叫二人份，好大兜，但龍蝦肉好少，亦冇乜龍蝦味，個飯好味嘅，係鹹咗啲~
今年年頭，我哋返香港時，珊飛讓咗間屋出嚟俾我哋住，佢哋去阿飛屋企度住，咁我哋就慳咗酒店錢~
我講過，我哋慳咗錢，一定會請佢哋食飯，只係喺香港時行程太緊密，冇機會請佢哋食飯，呢件事，我一直記喺心~
今晚食紅蝦，係我嘅個人要求，要迫佢哋食貴嘢，有啲對佢哋唔公平(雖然我相信佢哋都想試吓)，咁我就藉住呢餐少少貴，就今餐請返佢哋食飯~
埋單，€215，同噚晚阿珊請我哋食飯一樣價錢！又會咁鬼蹺！
食完飯，阿珊話反正返到去都要排隊沖涼，佢同阿飛去行陣先~
佢哋真係好嘢，勁行得，行極都唔厭，行極都唔攰，佩服！
今日喺 Madrid 一日遊，俾我最深嘅印象係，周圍都係尿同屎，咁好可能係動物嘅排泄物嚟嘅，唔會係人卦......
沒有留言:
發佈留言