今日行程：
【Lisboa】Mosteiro dos Jerónimos → Pastéis de Belém(Brunch) → Hippotrip → Conserveira de Lisboa → Manteigaria(Tea) → Pink Street → Elevador da Bica → Uma(Dinner) → Mouraria Lisbon Soul Apartment(Accommodation)
阿飛一早就同我講想去球場，我諗咗陣，就安排咗佢 Hippo Trip 之後去~
今日第一個項目，係搭電車 28E~
電車 28E 主要行走舊城區，而且都係用經典舊式電車，相當受遊客歡迎~
我最初嘅計劃係搭晒全程，再轉車過貝倫區，不過由於維修關係，後半段嘅路線暫停~
咁就唯有改做頭半段搭 28E，再轉 15E 過貝倫區~
今日要搭好幾程電車，所以買一日交通票會比較化算~
電車站旁有報紙檔，可以提供車票，不過我哋去到時，佢未開門~
冇車票就搭唔到車，唯有行去 metro 買~
現場有三個位都可能係 28E 電車車站，現場可能全部都係遊客，根本冇人知邊個先係啱，大家都係估估吓~
我同屎塔買完飛返嚟，團友話一架電車都冇出現過~
我開始覺得有問題，上官網睇吓，又冇講啲咩~
一路等，見到有架 28E 小巴出現，不以為意，咁啱有架同號碼小巴啫~
等咗大半個鐘，仍然一架電車都冇出現過~
直至見到第二架 28E 小巴，我忍唔住上去問吓司機~
司機話今日唔會有電車~
我查過 Lisboa 係冇 28E 小巴，即係話呢啲小巴係因應冇咗電車先出嚟代替電車~
真係想鬧爆啲小巴司機，你哋見到電車站成百人等緊車，你哋一定知道等緊嘅人多數都係遊客，唔會咁容易知道情況，你哋竟然冇諗過同啲等緊電車嘅人講聲？
乜嘢心態？係人唔係人？個個都話葡萄牙人好熱情好友善，真係俾你哋影衰晒！
我返去電車站大聲同現場嘅人講，小巴司機話今日唔會有電車~
大家都好表現得好疑惑，但我做咗我可以，我應該做嘅事，你哋點選擇，閣下自理~
我呢，而家就要帶我啲團友行去搭 15E 過貝倫區~
Mosteiro dos Jerónimos(熱羅尼莫斯修道院)
※世界文化遺產
※葡萄牙七大奇蹟
屬曼努埃爾式建築，融滙了哥德式、文藝復興和歐亞非建築元素，以及伊斯蘭和印度美學，在其他歐洲國家非常少見。另外，該修道院嘅修女發明咗葡式蛋塔，16-18 世紀時，修道院提供洗衣服務以及酒類嘅釀造，修女喺清洗衣服時使用蛋白，同時在釀酒嘅過程中亦需要使用大量蛋白，剩返大量蛋黃，有咩用呢？16-17 世紀，從巴西運回的甘蔗提供了甜品所需糖份，修女們嘗試用蛋黄配合蔗糖等材料調製出葡撻配方，就係咁，世界上第一件葡撻喺熱羅尼莫斯修道院誕生。
Mosteiro dos Jerónimos 係其中一個葡萄牙長期人龍熱點，當我哋到達時，係比我預期遲咗一個鐘，人龍長到......一時間都見唔到龍尾~
買飛時係要揀時間嘅，不過站在遊客嘅角度，根本上係冇意思，早到遲到準時到都係排同一條龍，揀時間入場嘅設定，可能只係為咗院方控制人流？
修道院隔籬有間教堂，Igreja de Santa Maria de Belém(聖瑪利亞教堂)，據講係免費入場，一樣係長期長龍~
我哋排隊時冇嘢做就走過去睇吓，冇人排隊喎，咁我哋分批入去參觀都得啦，修道院條龍，肯定要排最少一個鐘~
不過睇真啲，原來做緊彌撒，暫時不對外開放，14:00~17:00 先開放，咁我哋冇機會入去啦~
原定計劃係完咗修道院行程就去 Pastéis de Belém 食葡撻，不過反正有排都未排到，又比原定計劃遲咗好多好多，不如而家去買葡撻，索性將 lunch 變 brunch，堂食變外賣，好好利用排隊嘅時間，排住隊食，慳返堂食嘅時間~
Pastéis de Belém
始創於 1837 年，葡式蛋撻始創店(修女發明了葡撻，呢間係第一間以店舖形式售賣葡撻)，神秘古老配方不外傳，將近 200 年，食譜都沒有改過。
男士去買葡撻，女士繼續排修道院~
葡撻舖外分三條人龍，兩條外賣，一條堂食~
兩條外賣人龍分別通往兩處完全分離嘅售賣點，一開始都有少少迷糊，唔知排邊條先啱~
唔理咁多，排一條覺得快啲買到嘅~
排隊時見到有分一個或六個裝，我決定買兩份六個裝~
計劃行程時，一般都會睇人哋啲 blog，尤其台灣人嘅 blog，我睇過嘅 blog 都係話 Pastéis de Belém 嘅葡撻係最好食~
我喺葡萄牙第一次食，冇得比較~
就個撻嚟講，皮脆、蛋漿滑、好有蛋味、唔太甜，個人口味嚟講，再少啲甜會好啲~
總結係非常不錯~
傳統食法係落埋 cinnamon，買嗰時有跟埋 icing sugar 同 cinnamon~
Icing sugar 就唔駛試喇，本身已經夠甜~
我就唔係好鍾意 cinnamon，不過傳統食法嘛，都試吓啦~
又冇想像咁抗拒，都幾夾，不過都係原味好啲~
排咗一個鐘到，就嚟到我哋入場喇~
或者我個人比較膚淺，對歷史，看過就秒忘；對建築風格，從不深入研究觀賞~
所以，呢間修道院對我嚟講係冇乜驚喜，同類嘅嘢睇得太多(明明我喺簡介度講過「其他歐洲國家非常少見」)~
除咗圍住中庭嘅迴廊，冇乜嘢睇~
個迴廊係真係好靚，好多精緻雕刻，但排咁耐隊只係為咗呢個迴廊，值唔值得？我真係冇答案~
將來計劃行程，相信會幾掙扎，對於呢類型大景點，我絕對係陷入咗入又唔值得，唔入又唔抵得嘅局面~
修道院同教堂喺外部建築上係相連，網上有人話修道院有路可以通向教堂嘅二樓，不過我就唔見到有~
冇得入教堂，修道院又比預期少嘢睇，又唔駛去食午餐，下個項目又定時定候，冇得早去，要搵啲嘢做吓~
好彩附近有個市集，否則我都唔知有咩好做~
市集尾有座咁嘅建築~
市集附近有個大型噴水池~
行到差唔多時間就要搭電車去下個目的地~
Hippo Trip
水陸兩用車，既是巴士也是船，90 分鐘帶你遊遍里斯本的海與陸。
跟住 google map 行去電車站，原來係錯誤資訊，行咗唔少冤枉路~
落咗車之後，要行好一段路先去到 Hippo Trip，現場地形有啲混亂，跟住地圖行都有啲迷糊~
最後搞清楚，穿過隧道就可以去到碼頭~
條隧道有好多壁畫~
去到 office，登記好，就等開車/船~
未上得車就喺附近坐低等~
差唔多夠鐘就行過去部車度~
座位係由對方安排嘅，並非隨意坐~
左右排各有雙連座位，我哋五個人，被安排坐最後排~
左兩個右兩個，咁第五個坐邊呢？
最後排嘛，第五個就係坐中間，最後排係五連座位~
坐中間係最差嘅位，咩風景都睇唔到，影相更加唔駛諗~
呢個設計，對坐呢個位嘅人好唔公平，咁都冇辦法啦，我蝕底啲啦~
初段好悶，冇咩風景睇，不過導遊算幾識搞氣氛，幫返唔少~
好幸運冇落雨仲有啲太陽，否則會相當失色~
落水嗰吓有啲離心力，亦有啲水花濺入車廂~
之後導遊問有邊個濕咗，得五個人舉手~
導遊隨即攞起水樽，逐個逐個噴，最後變咗個個都有濕~
最令人驚喜嘅係，上返岸之後，導遊問有冇人想再落一次水~
講真，參加呢個 Hippo Trip，都係為落水嗰一吓，當然大家都想啦~
司機上咗岸後，u-turn 再衝落水，今次衝得勁啲，水花再勁啲，但反而冇乜離心力~
落水兩次，我係冇見人提過，但我又覺得點會剩係我哋呢團有呀~
船程中，會經過貝倫區其中兩個重點景點，船長(同一個人由司機變咗船長)會來回一圈，照顧左右排嘅需要~
(抱怨一吓，照顧了左右排嘅需要，咁我呢？)
Padrão dos Descobrimentos(發現者紀念碑)
於 1940 年的葡萄牙世博會首次展出，主要紀念 15-16 世紀大航海時代。紀念碑展現出當年亨利王子 Infante D Henrique 帶領一群國家精英展開大航海時代，展示葡萄牙過去的輝煌。
唔係從海上面睇，就只能睇到呢面~
喺海上面睇，就可以睇到呢面~
Torre de Belém(貝倫塔)
※世界文化遺產
※葡萄牙七大奇蹟
Torre de Belém 為貝倫港出海口上的五層防禦堡壘，建於 1514~1520 年間，主要係紀念葡萄牙著名航海探險家 Vasco da Gama(瓦斯科·達伽馬)成功航行世界一周，並作為守護防禦整個貝倫區的防禦要塞。
有一班車係開早我哋 5 分鐘，唔知點解有咁嘅安排，因為佢一日得好少班次，可能就係為咗可以喺旅程上相遇~
完咗 Hippo Trip，我嘅計劃係安排珊飛去球場，我就帶屎塔同媽咪近距離觀賞 Padrão dos Descobrimentos 同 Torre de Belém~
不過，珊飛話由呢度去球場非常轉折，而家都係唔去，可能聽日先去~
而家反而想去噚日喺市中心見到嘅一間日式拉麵店~
媽咪呢，就話可以唔去上述兩個景點都得，頭先喺船上叫做睇過，同埋反正都唔會入去~
關於上述兩個景點，好多人都話冇太多時間的話，可以唔駛入，唔可惜~
所以我本身都冇計劃入，只係諗住近距離到此一遊~
珊飛去食拉麵，咁我哋去邊好呢？
我提議去 Quake - Museu do Terramoto de Lisboa(地震博物館)，不過經過討論，覺得收費有點貴，唔太值得~
其實我自己一直都覺唔太值得，只係如果其他人感興趣嘅，就去囉~
最後我決定帶媽咪去買魚罐頭手信，因為買手信對媽咪嚟講好重要~
由於兩隊人都係去市中心，所以就一齊搭 15E 電車，只係分開站落~
本來有兩間魚罐頭店可以去，不過其中一間今日休息~
Conserveira de Lisboa(里斯本罐頭工坊)
包裝比較樸實，售價較平~
唯有去另一間，同觀光式嗰間同一間公司，不過會比觀光式嗰間平少少~
Silva and Feijoo
媽咪買嚟做手信，同埋佢個人都係鍾意啲靚嘢多，所以呢間會啱佢多啲，嗰間冇開買唔到都唔可惜嘅~
最後買咗八盒，承惠 €88.8，其實真係好貴！
見仲有時間，陣間又諗住去粉紅街，所以就揀咗一間喺粉紅街附近嘅葡撻連鎖店，等媽咪可以再試吓葡撻~
Time Out Market Lisboa
集結多家知名餐廳嘅美食廣場~
本來有計劃嚟咖，不過呢幾日行程大執位，變咗嚟唔到食正餐~
而家就同媽咪嚟食位於 Time Out Market Lisboa 嘅 Manteigaria，葡撻連鎖店~
個葡撻唔熱，又好甜，同 Pastéis de Belém 明顯有分別~
呢間葡撻店嘅員工，態度差到不得了~
因為係我去買嘅，屎塔同媽咪係唔會感受到~
不過個店員做咗一樣嘢，令到所有人都感受到了~
喺我哋啱啱食完嘅時候，個店員走埋嚟放低個金屬紙巾盒，佢係好用力咁放上檯，係「嘭」一聲！
唔知點解佢要咁做，我又唔覺得係為咗趕我哋走，一來我哋真係啱啱食完，二來絕非滿座~
其實呢啲氣，最終都係佢自己受返，我一啲都唔在乎~
(後記：我而家先為意，今日我哋只係食過葡撻，冇食過其他嘢~ 😵)
珊飛差唔多到匯合點，我哋就動身行過去~
Pink Street(粉紅街)
Rua Nova do Carvalho 曾經係里斯本紅燈區，後來當地餐廳酒吧老闆同政府合作，於 2011 年重新改造，將整條街重新油上粉紅色，變身成為新潮嘅酒吧街，後被稱為 Rua Cor de Rosa 粉紅街，亦都係現在里斯本知名嘅酒吧街。
趁住今日我哋有交通卡，就帶佢哋去搭 Elevador da Bica，唔駛再俾錢~
之前提過，Lisboa 有四部電梯，係為咗解決居民來往高低處嘅交通而建~
除咗噚日去過嗰部 lift，仲有三部電梯，其實所謂電梯，實則係纜車~
三部電梯當中，Elevador da Bica 係比較受歡迎嘅~
我哋入黑先去，就應該同日頭好唔同，不過，到此一遊啦~
Elevador da Bica(比卡電梯)
去到見到有十幾人排緊隊，要等到第二部先上到~
唔搭纜車，就要行呢條樓梯喇~
不過搭一程咁短就要 €4.10，我諗我都會選擇行多~
離開咗纜車站之後，兩旁都係可以行嘅~
其實夜晚都幾有味道~
影相期間，我見到有部私家車駛咗入路軌，我係唔知係咪正常可以嘅~
我淨係知道，部纜車夠鐘開車，但當然係唔可以開~
司機有打電話，唔知係通知公司定點啦~
之後就向住餐廳方向行，沿路會經個兩個地點，又係冇咩意義嘅到此一遊地點，不過真係順路經過，否則都唔會去~
Café A Brasileira(巴西人咖啡廳)
開業於 1905 年，是百年咖啡室，內部裝潢充滿復古風，金碧輝煌。
Livraria Bertrand
創於 1732 年，是葡萄牙最大也最是古老嘅連鎖書店，營業至今已近 300 個年頭，歷經過 1755 年里斯本大地震、19 世紀內戰、20 世紀革命及葡萄牙金融危機等等艱難時刻仍屹立不倒，是健力士世界紀錄認證「世界最老仍在營業書店」。
途經有間商場，外牆燈飾幾靚~
途經 Elevador de Santa Justa，都幾多人排隊~
沿途都行咗少少商店，反而令到到達餐廳時間啱啱好~
Book 咗 19:00，到達時間為 19:00~
門口有位伯伯，知道我哋 book 咗 19:00，佢話 book 咗都要等~
之後有個後生仔埋嚟，要我俾佢睇 book 檯證明，之後就即刻可以入座~
Uma
呢間餐廳，最出名係 Arroz de marisco(葡式海鮮飯)，冇第二樣嘢出名，因為佢哋主菜只有呢一樣~
Gingle ale / Ice tea / Aqua
Arroz de marisco(Seafood rice)
Order 係可以揀幾多人份，最後係會一兜過上~
之前聽過話，份量都算多，所以我哋五個人，就叫四人份算~
喺佢官網，自詡 "The best seafood rice in the world"~
我自己個感覺係，就算幾優秀都好，真係夠膽自詡全世界最好？
網上嘅評價係毀譽參半，有人覺得好好食，有人覺得不外如是~
我自己就覺得......啲海鮮係冇味嘅，但兜湯汁係濃味嘅~
如果唔係打正旗號話自己係全世界最好，就唔會有好高期望，最終令人失望~
湯汁味道上我會覺得算係幾唔錯，但其實都食唔到幾有海鮮味~
而啲海鮮係冇乜味，因為煮晒入啲湯汁度？
詆譭啲咁講，個感覺就好似，湯汁係罐頭，整熱咗再加啲唔同種類嘅海鮮落去，搞掂~
Gambas à guilho(Garlic shrimp)
蝦比較細隻，亦唔覺得新鮮，味道普通~
餐廳入面，全部都係亞洲人(不過排緊隊嘅有西方人)，唔計我哋，有一檯，相信係香港人~
純正香港式廣東話，高談闊論勁大聲，成間餐廳都係佢哋把聲，一個字，嘈！
食完嘢就去超市~
買咗甜品做宵夜；麵包做早餐~
行返旅館時，想經電梯返旅館，不過有啲人喺度徘徊，令到我哋唔敢行，唯有兜路，行遠啲，行樓梯~
Lisboa 想去嘅地方都去得七七八八，要諗吓聽日有咩做~
阿飛話想聽日去球場，其他時間又冇乜地方特別想去，或者想再去~
去球場，有啲難安排~
因為今日中午要租車，相信要阿飛在場，因為佢係其中一個司機~
如果佢一早去球場，一定趕唔到中午返嚟~
如果租咗車先去球場，情況係，下午兩個景點都已經買咗飛，同埋第二個景點相對遠~
唯一可揀嘅係，早啲去攞車，睇吓攞唔攞到；唔得嘅，留低証件俾我，睇吓租車公司接唔接受只有証件在但人不在~
如果得嘅，佢哋兩個可以即刻去場，時間上都勉強可以，只係會浪費下午第一個已買飛景點嘅門票~
如果都唔得，就真係未必安排到，就算佢哋唔介意浪費埋第二個景點門票，但因為我哋會去(第二景點)，同埋唔會再返 Lisboa，要喺第二個景點匯合，我都唔知點安排佢哋搭車~
聽日早啲去租車公司睇吓點先再算~
頭先行返嚟旅館時，見到 28E 小巴，即係仲未有電車~
我係諗住聽朝補返 28E 電車，睇嚟情況不太樂觀~
聽日再算~
Lisboa 隨影~
沒有留言:
發佈留言