今日行程：
【Sintra】Palácio Nacional da Pena → Chalet da Condessa d´Edla → Castelo dos Mouros → Mistea Mountain(Tea) → Romaria de Baco(Dinner) → Estação de Sintra → Sintra 23(Accommodation)
今日喺 Sintra 嘅景點，都係唔可以揸車嘅，因為通往各景點嘅道路都係有許可証先可以行~
所以今日我哋要搭巴士，都係一來一回兩程咁~
出門口時好大雨，不過根據天氣預告，短時間內天氣會冇咁差，咁都好啲~
由於第一個景點係預約好，官網仲話「No delay tolerance」，時間上係冇得等，大雨都要出發~
Sintra 呢度有兩條巴士線，可以話係為旅客而設嘅，一條係 434，一條係 435，遊走各大主要景點~
今日我哋要搭嘅係 434，上車時向售票小姐講要買單程，佢話：Crazy, with this weather!
其實我哋係要回程嘅，不過我想睇吓回程佢哋會唔會想搭 tuk tuk，唔想咪再買單程落山，單程 x 2 唔係比來回貴好多~
上山條路好窄，有啲位真係啱啱好夠部巴士過~
巴士司機真係車手嚟，揸得算快，仲追到前面部私家車~
睇部私家車嘅動態，明顯係唔識路，其實佢可能誤闖禁區~
Palácio Nacional da Pena(佩納宮)
※世界文化遺產
※葡萄牙七大奇蹟
原本係 13 世紀建成嘅小教堂，經歷重整成修道院，又因為地震變廢墟，直到 19 世紀，葡萄牙女王 Maria II，與丈夫 D. Fernando II 把它變成了如今的樣貌，作為皇室的避暑行宮。
最早可以 book 係 09:30，不過我哋就算搭頭班車都未必可以趕到，所以我就 book 10:00~
Book 嘅時間係計入室內時間，室外位置，只要有購票都可以進入~
未夠鐘入室內，就喺外面行吓先~
今日落雨，同埋山上好大霧，景觀就麻麻地~
時間差唔多就去排隊入室內~
不過個牌仲係寫住 09:30 條隊，所以我哋未可以排住，又周圍行吓先~
不過話時話，又話 no delay tolerance，我見佢仲放緊人入去......
之後返轉頭，個牌轉咗 10:00，已經有超過 30 人排緊隊~
不過，佢排隊個牌令我非常之迷茫~
排緊隊嘅人係喺晒右邊，咁即係點呀？
講真，唔理個牌，就梗係跟人排啦，隊頭寫住 10:00，又有咁多人排緊隊，唔會錯~
不過我都走上去問隊頭個工作人員，得到答案當然係排右邊~
我走上去問人嘅時候，隊入面嘅人係咁眼望望，其實有乜好望......
室內唔算大，好快行晒~
室外仲有地方未行，繼續行吓先~
入場票仲包場內另一個景點，不過呢個好少人會去，因為行過去要 30 分鐘~
而家雨唔算大，大家都覺得可以去，所以就一齊行過去~
不過啲指示真係差，成日唔知要點行，要睇手機 map 睇方向再估行邊條路~
沿途隨影~
期間見到呢個牌~
沿途間中都會見到呢種蜥蝪被壓扁嘅屍體~
行人一路行一路睇風景，其實真好難留意到，更加唔駛講司機......
Chalet da Condessa d´Edla(埃德拉伯爵夫人的小屋)
費爾南多二世國王(D. Fernando II)為埃德拉伯爵夫人建造的，建築充滿了該時代浪漫主義精神的氣氛，被壁畫所覆蓋，外部在門框、窗戶和窗上以軟木作為裝飾元素，典型的陽台從樓上環繞一周。內裝琳瑯滿目、做工精良。
我哋嚟到時，冇其他人，正~
行半個鐘過嚟我覺得都值得~
回程路上，行到同之前同一位置，之前仲見到山上嘅佩納宮，而家就太大霧，乜都見唔到了~
由於佩納宮出入口行去下個景點只需要行 10 分鐘，但呢度又冇餐廳，一係搭車返市中心食，再返嚟，一係就自備，而我就決定自備~
噚晚喺超市買咗啲麵包，芝士火腿咁，簡簡單單嘅一餐午餐~
我哋分別喺行過嚟小屋同行返去佩納宮出入口時都有食，仲有雨水做醬汁~
天氣報告呢，都係睇吓就算~
去到下個景點嘅售票處，有啲長椅可以坐吓，大家就喺度休息咗一陣~
Castelo dos Mouros(摩爾人城堡)
※世界文化遺產
阿拉伯帝國曾經喺中世紀佔領北非同埋伊比利半島南部，住喺度嘅穆斯林就係摩爾人，而摩爾人城堡係 10 世紀左右建造嘅防禦性建築。
呢度冇想像般大，但就好高，以前啲人係點樣攻上嚟？
完咗呢個景點，就搭車去市中心~
去市中心，一係搭巴士，一係搭 tuk tuk~
佢哋覺得 tuk tuk 危險，揀搭巴士~
我突然醒起一樣嘢，上嚟時，巴士上有專人賣飛，佢係冇跟車上嚟嘅，咁回程會唔會冇得賣飛？
因為啲人通常買來回，落去係唔需要買飛~
一直擔心到等到巴士嚟，原來司機都可以賣飛嘅，白擔心一場~
喺市中心都有個比較受歡迎嘅景點，Palácio Nacional de Sintra(辛特拉宮)，不過我嘅安排係到時睇吓佢哋想唔想去再算~
出發前已經覺得佢哋未必感興趣，出發後，經觀察就更加覺得佢哋唔會感興趣~
結果，大家都唔感興趣，作罷~
咁而家有咩做呢？我做功課前有研究過市中心有咩睇，發現係冇咩睇~
不過佢哋咁行得街，只要有商店嘅地方，都應該唔會悶親佢哋，最多悶親我啫......
搭緊巴士時，喺地圖上搵到個地方食嘢，大家個午餐咁簡單，有時間不如去食個下午茶~
Mistea Mountain
Pineapple Tea / Brown Sugar / Lotus Cookie / Cintra Sparkle
我飲 Lotus Cookie，出奇地唔太甜，啱我口味~
Bubble Waffle
我幾鍾意食雞蛋仔，都好耐冇食，呢個只可以話止吓咳~
唔熱唔脆(佢哋可能根本冇諗住整脆嘅)，但至少係雞蛋仔味道~
Folhado(Tuna)
外皮算脆，吞拿魚......都係咁嘅味啦，唔會好食到飛天~
入面有幅壁畫係佩納宮~
出面落緊雨，又冇乜特別地方去，就喺度坐耐啲~
坐到差唔多就出去行吓~
大家都唔感興趣嘅 Palácio Nacional de Sintra(辛特拉宮)~
Book 位最早 19:00，而家未夠鐘，但我哋已經行到冇嘢好行，就行過去餐廳睇吓~
Romaria de Baco
去到嘅時候係 18:30，見到已經開咗，入面仲有好多人~
去到說明來意，等咗 10 分鐘就可以入座~
入座時，檯面已經放好五份餐具~
Gunja de Obidos / Ginger Ale / Limonada / Laranja / Sagres
Caldo de camarão(Apenas durante o inverno) x 2
(Shrimp soup(Only in winter)) x 2
超濃郁嘅蝦湯，呢兜湯，就算湯入面冇咩料都冇投訴，實在太好味~
Cogumelos recheados(Cogumelos recheados, gratinado com queijo)
(Stuffed mushrooms(Stuffed mushrooms, gratin with cheese))
非常香嘅菇味，不過我寧願佢入面釀嘅唔係煙肉，因為有點過鹹，破壞咗菇嘅香味~
Fritada do mar(Lulinhas, calamares, choco e pescada)
(Fried mixed of sea(Mussels with onions, tomato and peppers))
炸得好好，除咗個魚塊之外，其他都好唔錯~
Bochechas de porto preto estufadas em vinho tinto c/ puré de batata
(Tender slow cooked black pork with smashed potato)
豬肉燉到好腍，豬肉味好濃，好食~
Caril de gambas(Caril acompanhado com arroz basmati)
Shrimp Curry with Basmati Rice
味道好豐富嘅印式咖喱，蝦又新鮮爽口，又係好食~
Morangos c/ Vinho do Porto e gelado de nata
(Strawberry with porto wine and ice cream)
酒精完全揮發晒，味道酸酸甜甜，加埋個雪糕，好特別~
Bolo Gelado de nata c/ cobertura de chocolate quente(Gelado caseiro com Natas frescas)
Ice cream cake with toasted almonds and hot chocolate
我自己幾鍾意食朱古力嘅甜品，呢個好食到想叫多一個自己食晒佢~
甜品呢度，本來想叫朱古力慕絲，不過今日冇，上次食過之後，念念不忘~
呢間餐廳好啱我胃口，樣樣都好食~
我哋對面張檯，座上疑似係一對父母，加個小朋友，佢哋埋單後，檯面剩返好多嘢食，侍應收嘢時覺得奇怪，試食咗一吓，從佢嘅表情，我估佢係覺得冇問題，再叫另一個人過嚟試吓，都似係覺得冇問題，可能客人咩都想試，又唔介意食剩，所以叫好多~
食完嘢就經火車站行返旅館~
聽朝珊飛會落樓下買麵包做早餐，所以今晚唔駛去超市~
Estação de Sintra(辛特拉火車站)
聽日行程都係要搭巴士，可以搭 435 或者 1253~
435 係遊客線，比較貴，所以我會揀搭 1253~
搭 1253，可以用返喺 Lisboa 買嘅交通卡，只需要將車飛增值入張卡度就可以用~
我喺火車站度試過，點都搵唔到點樣增值單程飛入張卡度~
呢度有 Information Centre，開 09:00，決定聽朝落嚟問吓，反正搭巴士都係喺火車站外~
沒有留言:
發佈留言