今日行程：
【Lisboa】Miradouro da Graça → Igreja da Graça → Europcar → Caffè Ritazza(Lunch) → Palácio Nacional da Ajuda → 【Queluz】Palácio Nacional e Jardins de Queluz → 【Sintra】Metamorphosis(Dinner) → Sintra 23(Accommodation)
朝早落樓下就見到貓~
今日，試多次去搭 28E，睇吓有冇運仔~
噚日買嘅 day ticket 24 小時有效，而家仲可以用~
排隊時又有迷茫情況出現，究意排邊條隊先啱呢？
不過都唔重要了，我又見到 28E 小巴~
又上前問司機，答案都係話今日冇電車~
冇嘢做不如去租車度睇吓有冇可能早啲攞車~
沿路行到分岔路，我記得向山上行有間教堂同埋觀景台~
問咗團友，大家都覺得可以一去~
景唔算好靚，但攝時間嚟講，都算值得去嘅~
Miradouro da Graça(恩寵觀景台)
Igreja da Graça
始建於 13 世紀，巴洛克和曼努埃爾風格與牆壁和諧地融為一體，並收藏著 16、17 和 18 世紀精美瓷磚的寶庫，幸運地安然渡過 1755 年里斯本大地震。
官網寫明每日開 09:00，不過到咗 09:00 都未開~
而 google 就話開 10:00，唔通今次 google 啱？
決定等到 09:30 都未開就走人~
觀景台呢度有部纜車~
被人責備，點解唔坐纜車上嚟，搞到行咗咁多斜路上嚟~
呢個係後備景點，其實我都唔會清楚晒所有嘢......
再講，我個人係鍾意行多啲~
見有時間就圍住間教堂周圍行吓~
喺我哋唔為意嘅時候，我發現入口度門開咗，一啲聲都冇~
我對上次睇時間係 09:20，係未開嘅，而家亦未到 09:30，咁究竟係應該開幾點嘅呢？
教堂本身呢，就冇乜特别~
入教堂係免費，上天台就要收費，費用中包一杯飲品~
包飲品咁有趣？又幾新穎~
初時唔係好覺邊度上天台，搜索吓每一度門，冇一度門有開，最後搵到個牌，指住某度門係上天台，不過度門係鎖咗嘅~
我哋決定等到 10:00，都冇得上就走人~
等到差唔多 10:00，見到有個人喺嗰度門行出嚟，我行過去睇吓咩情況，個人已經消失咗~
度門就仲係閂嘅狀態，我手多走去拉吓，冇鎖喎！
於是我推門望吓，係可以入嘅，入面有個櫃檯，有三個人，我問咗佢，佢哋話係可以上天台，喺度買飛就得~
教堂大門差唔多 09:30 先門，天台度門差唔多 10:00 先開，究竟係隨意門定係有人遲開門？
買完飛，售票處嗰三位女士，講嘢勁大聲，單從語氣去判斷，相信係嗌緊交~
開門又唔準時，又喺教堂入面嗌交嗌到拆天咁，唔該尊重吓呢個神聖嘅地方啦~
門票除咗包上天台同飲品，仲包迴廊同展覽~
不過天色好差，隨時落雨，決定上天台先~
上天台中途，會有個飲品櫃台，有位小姐收門票同提供飲品~
有酒有果汁有咖啡~
教堂天台，有檯有凳，有吊籃，此時天台只有我哋，好不寫意~
天台圍住中庭都可以行，不過就冇咩睇~
穿過鐘樓側邊條小路就可以到達天台嘅觀景台~
觀景台唔大，一樣都有檯凳，可以飲住嘢喺度 hea~
觀景台風景~
天台環境同風景唔算特別出色，但論體驗，相當愉快~
小小觀景台，開始擠滿人，同時亦開始落雨，即刻走返落去參觀迴廊同展覽~
修補工作好似求其咗啲喎......
完咗教堂行程就行過去租車公司，睇吓有冇得早啲攞車~
沿途經過 Panteão Nacional(國家先賢祠)，有個向海嘅觀景台，本來想帶佢哋嚟，不過只有今日先就到行程，今日係星期一，佢逢星期一休息......
沿途多數落斜，濕地加呢種路面，我對硬底行山鞋，又發揮佢流冰嘅特性，一路跣到落底......
期間，媽咪發現個細袋仔俾人開咗，檢查過又冇咩唔見~
佢都記起有一男一女唔正常咁走近，手執地圖~
呢個年代仲手執地圖？冇話唔得，不過我會比較懷疑係用嚟遮住佢偷嘢嘅手~
我去過西班牙，小偷有幾瘋狂真係有晒心理準備，咁葡萄牙呢？
做功課時，網上言論大多話治安比西班牙好，不過，出發前見到有人報告俾人偷嘢嘅，全部係葡萄牙......
點都好，算係一次好好嘅經驗，可以令媽咪有深刻印象，又冇損失~
Europcar
租車公司喺火車站入面，都要搜索一輪先搵到~
講咗俾對方知，阿飛陣間唔方便搞租車手續，睇吓可唔可以而家攞車~
對方話唔可以，一定要喺預約好嘅時間先可以攞車~
不過就可以只出示証件，個人可以唔喺度~
咁得啦，阿飛留低啲証件俾我，可以走先，到時我搞~
珊飛而家就去球場，我哋呢？搵嘢食先~
距離租車時間大約仲有半個鐘，出面又落雨，喺火車站嚟個速食算~
Caffè Ritazza
租車手續大致順利，係俾卡佢做按金時，對方話正常嚟講唔可以用 debit card，不過佢係經理， 所以冇問題~
後記：雖然我都多謝佢冇拒絕我，亦唔知點解佢選擇接受唔應該接受嘅 debit card，但係如果佢當時拒絕我就好了~
高速公路費，係會喺還車後兩星期喺我張卡度扣數，但，我忘了放錢喺 debit card 個戶口，導致佢扣唔到數......
知道佢扣唔到數後，第二日即刻打電話過去還車嗰間門市，佢話 admin 部門會處理， 30 日內會有 email send 過嚟，跟住指示交就得~
如是者，30 日過咗去，仲未收到 email，今次我 email 過去，得到回覆係，等~
直至寫 blog 呢刻，已經整整兩個月，咩消息都冇......
經理教咗我哋出咗火車站之後點行去停車場，去到會有人接應~
停車場距離火車站唔係好遠，但因為落緊大雨，感覺特別遠......
我哋去到停車場，兜咗成個圈都唔見有人，我叫屎塔喺樹下避雨留守，我就返門市求助~
我返到門市，同個經理講我哋唔見有人，阿經理打咗個電話，跟住同我講，同事已經同一位女士傾緊~
喺呢個時候，屎塔打俾我，確認咗個情況之後，我就行返去~
同屎塔會面之後，佢話車場嗰個人講，要揚吓份嘢，佢就會知~
其實佢係咪有病？佢明知有人嚟攞車，見到兩條友，現場係得我哋兩條友喺度左望右望，擺明搵緊目標啦！
仲有，咁大雨，仲要我哋揚份紙嘅文件，係咪傻咗呀？揚完都濕晒啦！
佢匿喺車睇住人淋雨，好似 3D 影院咁，仲好意思話淋緊雨嘅客人唔啱，痴鬼線~
退一萬步，阿經理都冇話要揚住份嘢嚟搵人，邊Q個會咁做?!!!
車係 Peugeot 408，部車長過之前嗰部，但矮過之前嗰部~
最重要係尾箱，我發現尾箱都係成比例咁長過之前嗰部，又矮過之前嗰部~
希望放得晒啲行李~
攞咗車，就返旅館上行李~
部車明顯長咗，對我嚟講，唔算太難適應~
難適應嘅係葡萄牙嘅道路規劃~
亂到不得了，有時係睇住地圖都唔肯定點行......
旅館去部車度，要落一層樓梯，條樓梯仲要係比較窄嘅，屎塔唔會拎得到，所以我一個人要拎晒所有人嘅行李落地面~
跟住又要抬啲行李上尾箱玩倉庫番，拎上拎落，不停移位，體力透支~
所有人都係靠晒我，我點都要撐落去~
玩倉庫番都玩咗好耐，終於搞掂，仲要唔駛將後座推前就可以放得晒所有行李~
我而家嘅狀況，就好似下圖咁，我係黃色車，左右各有車停泊~
呢度係堀頭路，右則有度閘(圖中藍色位置)，大街係 one way，如紅箭咀方向~
要返出大街，要倒車經過兩個 90 度窄彎同窄巷出大街，有啲難度，但我相信自己~
雖然我相信自己，但最後我決定試吓掉咗頭先出大街，因為我評估過應該夠位做掉頭~
如果俾我再揀過，我會揀倒車......
部車真係比想像中長，試咗幾個方法掉頭都好似唔夠位咁，但已經係騎虎難下，進退兩難嘅狀態~
有屎塔幫我睇位，啲位可以攞得好盡，都仍然有相當大難度~
不過我未去到放棄，我係覺得做得到，只要啲位再攞盡啲，再再盡啲，再再再盡啲......
最後，終於成功，不過代價係用咗好多時間~
倉庫番加掉頭，用咗超過一個鐘......
嗱嗱聲繼續行程~
心係有啲急，一心急就出錯......
跟住導航行，入咗單程路，不過我係逆線......
唔係懶導航，百份百自己冇睇清楚路牌責任~
嗰度係斜路，幾架車推住我(其實冇跟好貼)倒車上斜，非常尷尬~
好彩嘅係，倒車一氣呵成，無需向前又向後，否則仲尷尬~
Palácio Nacional da Ajuda(阿茹達宮)
始建於 1795 年，是一座新古典主義建築，中間經歷了戰爭跟經費嘅問題，因此一直到 19 世紀中期才建好。
又係，可能睇得太多，有啲悶~
開始有啲擔心，我係咪已經冇咁鍾意去歐洲玩？
期間，知道珊飛喺球場嗰邊好大雨，當時我哋喺室內就唔太清楚，不過完咗行程，行返出室外就知道，呢邊都唔弱~
約咗佢哋喺呢邊匯合，再一齊去下一個景點~
我哋比佢哋早，又落緊大雨，於是就開始睇吓佢哋喺邊落車，我盡量停近佢哋落車地點~
真係好唔慣葡萄牙啲規劃，有個路口，轉左的話，要行最右線，我係錯過咗呢個路口嘅......
仲有其他唔同情況，我都一一錯過......
車個導航又廢，一係錯，一係唔清晰，仲有時 hang 機！
我都係用返 google 算~
Palácio Nacional e Jardins de Queluz(克盧什國家宮)
克盧什國家宮係一座 18 世紀的葡萄牙宮殿，仿照法國凡爾賽宮設計，係瑪利亞一世女王嘅宮殿。
到咗之後，完全唔知邊度係入口，要分頭搜索~
咁最後當然都搵到~
仿照法國凡爾賽宮？爭好遠好遠......
今日行程完晒，而家開車去位於 Sintra 嘅旅館~
旅館外有個停車場，唔大，有劃位嘅剩返一個~
部車太大部，要泊入去都唔易，一路後，有後鏡睇就可以泊盡啲~
泊到盡時，落車一睇，人哋啲車泊完都冇問題，係我哋呢部唔得，後面泊到盡，都成個頭凸出嚟阻住出入口~
另外有啲冇劃位嘅位，都有人泊，剩返一個空間，係角落頭位，但一定要倒車先入到~
現場又黑，個位又窄，有啲難泊，咁總會泊到嘅~
好多人都鍾意揸大部嘅車，我一啲都唔鍾意，好唔靈活，好多限制~
搞掂晒所有嘢就去食飯~
Metamorphosis
Antarctic Guarana / Ice Peach Tea / Light Beer / Nectar Compal
Pão
Pão fresco portugês
(Fresh Portuguese bread)
Ameijoa à bulhão pato
(Clams with garlic and olive oil)
麻麻地，冇乜鮮味，同埋少汁就冇味，多汁就鹹~
Bacalhau à metamorphosis
Bacalhau cozido em azeite com cebola, pimentão, tomate e coco
(Cod cooked in olive oil with onion , pepper, tomato and coconut)
勁大條，未試過雪魚係連骨上，好鹹~
Bife à casa
Bifa com molho de martini, bacon e ovo
(Steak with martini sauce, bacon and egg)
一啲都唔似食緊牛肉，唔單止冇牛肉味，連肉味都冇~
Secretos de porco preto
(Black pig secrets)
個汁好香，件豬都唔錯，幾好食~
Crepe de legumes
Crepe de legumes com molho de natas e cogumelos
(Vegetable crepe with cream and mushroom sauce)
唔知係咪食得肉太多，覺得呢個好好味~
聽日午餐要自備，所以而家就要去超市買啲嘢準備吓，同埋買早餐~
沒有留言:
發佈留言