《瞬間看地球》Stranger's Blog: 2025.05.11 馬爾他 (Malta) (歐洲第六天)

今日行程：
【Malta】Marsaxlokk Fish Market → Santwarju tal‑Madonna ta' Pompei → St. Peter's Pool → Għar Dalam Cave → eeetwell(Lunch) → Blue Grotto Panoramic View Point → Blue Grotto → Sliema → Trattoria del Marer(Dinner) → The Central guesthouse(Accommodation)

早餐旅館包埋，好普通嘅西式早餐~

Marsaxlokk Fish Market(馬沙什洛克漁市場)
一個非常有名嘅傳統市集，位於馬爾他東南部嘅漁村 Marsaxlokk，呢度最出名嘅就係每逢星期日早上開市，有好多本地漁民賣啱啱捕捉返嚟嘅新鮮海產。
港口沿海亦泊滿傳統《luzzu》彩色漁船。

到咗市集停車場時，我哋俾人搶咗個車位~
故事係咁嘅~
我哋啱啱到停車場時，睇住「主角」俾人遲嚟先上岸進佔咗個車位~

見下圖，主角(紅箭)右邊部黑色車，啱啱喺我右前方離開，我前面部白色車夠運，即刻順勢泊咗入去~
其實主角已經打咗右燈同入咗後波~呢啲嘢好難話邊個啱邊個錯，最終都係講邊個夠運~

之後佢繼續倒車，唔知佢想點，我就唔郁住，同埋我右邊有車上，基本上我想郁都冇得郁~

咁好啦，之後我就跟住扒咗我頭嗰部車兜，點知就俾佢喺前面搵到個位泊，蝕咗~
我講嘅「我哋俾人搶咗個車位」同佢冇關，佢只係好運過我哋，並唔算搶~
真正搶嘅，係上面提到嘅「主角」~

我一路繼續兜，俾我哋見到好似有車走~
由於我後面冇車跟，我一直都係慢駛搵車位中，車速相當慢~
亦由於呢度係單程路，即係話，前面部車離開後，個位必然係屬於我哋嘅~
我喺呢刻都冇留意到阿主角喺我前方不遠處~

喺呢個時候，阿主角竟然逆線駛入我哋前面，再扭軚頂住我哋，頂到貼一貼~

我性格一向唔鍾意同人爭，亦都唔想發生任何交通意外，所以當刻完全冇加速頂返住佢嘅反應~
車位已經輸晒，佢亦擺明無恥地搶，個車位無論如何都唔會屬於我~
同佢理論嘈交係唔會有任何意義，只會令自己激氣~
我唯有用我高 EQ 嚟化解呢場無可奈何嘅境況，我仲笑得出，因為無恥到咁嘅人都有，我覺得好精彩~
話分兩頭，佢手車係幾唔錯，快狠準~

20 秒後，我已經有位泊，今日算黑仔定好運呢？

其實我唔知點解要去漁市場，朝聖心態卦，話晒係好受歡迎嘅市場~
呢度原來好大，漁市場只佔好一小部份~
呢度咩都有，有平常嘅生活用品，衫褲鞋襪，更多嘅係遊客嘢，但檔檔都有啲唔同，唔係一式一樣，好多嘢睇~
我要買磁石貼，好多檔款式都唔同，不過啲款式麻麻地，我只睇中一款，其他都睇唔上眼，咁仲好，唔駛取捨~

唔知枱上賣緊嘅蝦同地下個盒有冇關係呢？

除咗個市集，呢度附近環境相當唔錯~

期間有個英式口音嘅阿姐主動幫我哋影相，又同我哋傾咗兩句~
佢話佢喺度住咗一星期，今日特別多船，同個市集大好多，平時只有四分一~
唔傾開都唔知，原來個市集唔係星期日先有，只不過星期日特別大同埋星期日先有漁市場~

行到尾見到有人搬運魚獲~

附近有間教堂，又走入去睇吓~
Santwarju tal‑Madonna ta' Pompei(馬沙什洛克龐貝聖母教堂)
教堂建於 1890 年，1900 年代初擴建為拉丁十字結構，1920 年代重整正面立面與雙塔外觀，呈現新巴洛克風格。

我做功課時搵咗個觀景點，喺係另一個角度望返過市集~
行到一半先知原來可以揸車過嚟，蠢咗~

之前行市集發現突然多咗好多人，原來有咁多架旅遊巴到咗~

行完市集就去泳池，但我哋唔係去游水~

St. Peter's Pool(聖彼得泳池)
馬爾他南部一個天然礁岩泳池，由海水侵蝕白色石灰岩所形成，四周係平坦岩石平台。
海水澄澈透明，顏色呈現藍綠漸層，非常適合浮潛、游泳，水中魚類清晰可見。

呢啲字唔知係咩意思~

期間有個猛男跳水~

呢個猛男喺同一位置跳咗幾次水，就游去另一邊冇陸路可安全到達嘅崖邊再跳~

喺曬太陽嘅人士當中，有一位女士無上裝咁曬太陽，真心佩服佢不理世俗眼光嘅勇氣~

回程穿過(必經之路)一間餐廳~

訊息量好大~

喺啱啱嚟泊車嗰時，見到 €3 泊一次，但我明明查過係免費~
但來都來了，都要俾咖啦~
我哋唔會留得耐，所以覺得都幾貴~
會嚟游水曬太陽玩成日嘅就抵到爛~

不過一個咁熱門嘅景點，點解個停車場得幾部車？心中充滿好奇~
呢個景點被喻為秘境泳池，其實就一啲都唔秘，我冇乜點做功課都知佢嘅存在~
每個介紹馬爾他嘅旅遊網站同 blogger 都會提到佢，一啲都唔係秘境~
咁點解會咁少人嚟？心中一直充滿疑問~

咦？唔係喎，落到去又見到好多人，啲人係點嚟嘅呢？
抬頭一望，頂，喺另一邊有個大型停車場，唔通免費嘅就係呢個大型停車場？
上網一查，真係！唔做足功課就係咁，荷蘭銀行支票~

不得不讚吓收費停車場呢個場主~
我好相信佢係靠 google map 嚟做呢門生意~
因為用 google map 導航到 St. Peter's Pool，係唔會帶你去免費停車場嗰邊，而係帶你走另一條小路~
只要呢條小路有位落到 St. Peter's Pool，又有位做停車場，咁就好多人會信晒 google map 而去咗呢個停車場~
仲有，喺分岔路口有路牌指向 St. Peter's Pool 停車場，當然係指向呢個收費停車場啦~
分分鐘個停車場都係嗰間餐廳老闆嘅，因為由收費停車場落去 St. Peter's Pool，係必需穿過間餐廳~
真係一條龍嘅生意~

之後就去一個天然形成嘅洞穴~
途經有個牌寫住 viewpoint，又走去睇吓~
風景相當唔錯~

Għar Dalam Cave(達拉姆洞穴)
馬爾他最古老、最有考古價值嘅天然洞穴之一，長約 145 米，開放予公眾部分長約 50 米。
洞穴內發現大量動物骨骼化石，包括已滅絕嘅侏儒象、侏儒河馬、鹿同鳥類，部份年代可追溯至超過 50,000 年前。
上層出土人類使用過嘅陶器、石器，證明馬爾他早喺新石器時代已有人居住。
洞穴入口設有一座小型自然歷史博物館，展示動物化石、人類器物同洞穴發掘歷程。

去到洞穴停車場冇位泊車，好彩咁啱有一部車走~
喺馬爾他搵位泊車真係好講運氣~

我哋行咗個博物館先~

之後就入洞~
個洞唔大，入面有廿幾人，但其實係同一個團嚟~
聽得出佢哋講緊法文，有個導遊喺度講解緊~
呢刻我哋只有等，因為冇位行~
等到佢哋離開，就得返我哋兩個~

睇就其實真係冇乜好睇咖喇，不過諗吓佢係幾萬年前天然形成，感覺都幾神奇~

外圍仲有好大範圍，不過就唔開放嘅~

之後就去食午餐~
途經見到風景唔錯就停低~

搵車位搵到想放棄部車......
一街都係車位，數之不盡，但一個空位都冇~
咁最終當然都搵到啦~

餐廳對開係沙灘~

eeetwell

兩個人就叫兩份嘢食，本來都冇諗太多~
天氣太熱，所以呢一刻，杯嘢飲係重要過食物~
而啲飲品都係相對飽肚嘅飲品，以我哋而家嘅胃口，一人一杯飽肚飲品再加一人一整份午餐係一定食唔晒~
所以最後就叫兩杯飲品加一份午餐~
呢度係快餐形式，兩個人食一份係唔會有問題~

買完嘢，佢會俾一個好似喺 food court 買嘢食嗰種提示器，有聲又會震嘅~
等咗好耐，眼見前過我嘅嗰兩個人仲未出餐，想追都未輪到我追~
之後見佢哋都攞到餐時，個提示器又冇反應，就走過去睇吓~
原來我哋份餐已經喺檯面，但個提示器冇聲冇震~

屎塔飲嘅 Fruit loop
Fresh orange juice, pineapple, banana, strawberries, ice

我飲嘅 Purple warrior
Whey protein, milk, banana, oats, blueberries, coconut milk, dates, frozen yoghurt, ice
飲到淡淡嘅藍莓味，同埋好香濃嘅蕉味，正！

Asian umami bowl
Pulled beef, thai sauce, egg noodles, crispy onions, cherry tomatos, baby spinach, stir-fried vegetables, sesame seeds, peanuts
幾好食，主要係個 thai sauce 建功~

之後就去藍洞~

Blue Grotto Panoramic View Point(藍洞觀景台)
可從高處俯瞰寬廣的藍洞主拱門、峭壁與碧海，景色壯觀絕佳。

嚟到觀景台，有個避車處咁嘅地方，google map 標示為「免費停車場」，但原來係巴士站，亦劃有雙黃線~
雖然一睇就知道唔係可以泊車嘅地方，但依然有好多車泊咗喺度~
咁有時見大家都咁做，可能係慣例或者容許咁做？我又唔會泊得耐，就跟住泊埋一份~
泊好車，屎塔仲瞓緊覺，咁我就一動不如一靜，等吓先~
大約 5 分鐘後，有人嚟抄牌！
咁我梗係即刻開車走人啦，今次屎塔瞓得好，令我避過一劫~
附近真係冇位可以泊車，所以我就開車去藍洞先，景觀台就遲啲再算~

Blue Grotto(藍洞)
由天然石灰岩海蝕洞穴組成，其中主洞擁有高約 30 公尺嘅天然石拱門，因為陽光照射進海水時會反射出藍綠色光芒，形成壯觀嘅「藍色海底光影」，因此得名。

大停車場都滿滿哋，又好彩，兜咗一個圈俾我遇到有個空位~
不過呢種好彩其實係因為有人泊得衰而嚟嘅~
左右兩邊車都泊貼個空位，大部份車都唔夠位泊入去，泊到入去都落唔到車~
我哋部車仔要泊入去唔係問題，但如果我哋兩個大份啲，同樣都係泊到車但落唔到車~

今日算係幾大風，我都幾相信冇得坐船出海睇藍洞~
結果真係~

其實就算佢開船我哋都唔會坐，咁大浪太危險~
同埋又冇陽光，唔會睇到藍綠色嘅洞，去嚟都冇意思，睇吓遲啲補唔補得返~
而家就周圍行吓先~

之後就決定行上觀景台~
一路都係上斜，慢慢行的話要 20 分鐘~

開車離開停車場時，有個好有道友 feel 嘅男人走埋嚟收停車費~
佢身上掛住個牌，扮晒工作人員咁，我問佢幾錢，佢話我想俾幾多就俾幾多~
咁樣答就 100% 屈錢，不過開口問到，唔俾又好衰嘅，我散紙唔多，俾晒佢算數~

去到旅館又係超難搵車位，馬爾他真係超級多車~
今晚食晚餐嘅地方係要揸車去嘅，屎塔話食完返嚟又要搵位泊，不如喺附近食算，唔好郁車~
今晚會去間餐廳又係有 KOL 推介，雖然經驗話俾我知，西多過 like，但唔試過又唔知~
食都係其次，食我真係好閒，但餐廳位在嘅位置，係我哋今次旅程冇去過嘅，都想話到此一遊咁~
所以我決定都係去，為咗個車位唔去就有啲可惜，船到橋頭自然直，今晚返嚟再算~

今晚會去間餐廳位在 Sliema，唔駛講，又係兜咗好耐先搵到位~
喺 Sliema 嘅東邊，可以遙望首都古城 Valletta~

除此之外，都好似冇乜好行，就去食嘢~

Trattoria del Marer
原來佢冇室內咖，全部室外，我哋麻麻哋，不過一場嚟到，是旦啦~
佢分開咗兩邊，一邊有篷一邊冇，我哋係點都唔會去冇篷嗰邊，唔想有雀屎加料~

Ice tea peach, Banana juice
其實我哋係叫 Ice tea lemon，不過佢俾咗 peach~
Banana juice，menu 係寫 banana juice，但嚟到係 strawberry+banana juice~
如果佢 menu 係寫 strawberry+banana juice，我根本唔會叫~
佢個 strawberry 味太強，完全掩蓋咗 banana 嘅香味，唔係我想要嘅嘢囉~