嚟緊要考英文試，自己住緊嘅地方冇得考，最近一係 Edinburgh，一係 Glasgow~
上面兩個地方都去過，所以今次揀除以上兩個地方，最近嘅 Newcastle，去考試順便行吓未去過嘅地方~
旅遊嚟講，我哋對英國嘅地方真係唔算有好大興趣，所以兩日一夜就算~
Book 咗考試之後，就睇吓 Newcastle 有咩好做有咩好睇~
屎塔唔知喺邊度睇到離 Newcastle 半小時車程外有個博物館，好似幾好睇，我睇完片都想去~
而 Newcastle 本身，就真係冇咩令我哋覺得吸引~
由屋企揸車到 Newcastle 要 5 個鐘，考試 book 咗 15:30 同 15:50，半小時前要到，咁即係 15:00 前到就得~
安全啲，07:00 開車，預多啲時間，始終未必可以順順利利真係用 5 個鐘就到~
到埗後，泊好車再食個午餐就行去考試~
考試後，晚餐前仲有啲時間，附近有市集，有大教堂，又有城堡，仲有條河，可以周圍行吓~
由於 Newcastle 真係冇咩睇，第二日食完早餐就揸車到屎塔搵到嗰間博物館，之後向北行睇吓有咩地方可以去吓~
但我發現，算叫有啲興趣想去嘅地方，距 Newcastle 最少都一個鐘車程，而家秋末開始早天黑，行完博物館再開車去，去到就算未天黑都冇乜幾多時間~
反正個博物館都幾大，慢慢行就當玩一日，玩完就揸車返屋企~
自從西葡之後，而家出去玩都想放慢腳步，睇嚟嗰次西葡之旅，確實帶俾我一啲後遺症，不過我覺得係好嘅轉變~
希望我倆考試合格，出發！
沒有留言:
發佈留言