2025.11.07 Stanley、Edinburgh (United Kingdom Day 02)

 今日行程：
【Stanley】Beamish Museum → Alpine Coaster → McDonald's(Dinner)

六點幾，未瞓醒就俾屎塔拍醒，以為有咩事，原來佢話俾我知已經收到英文試嘅結果~
佢取得 AA 成績(兩部份，每部份都取得 A)，我即刻打開手機電郵睇吓我收到未~
我一路操作，一路諗，我英文都唔係差佢好多啫，咁我應該都合格~
極為意外地，我都係 AA！
我考試時表現真係好差，咁都 AA，足証 B1 要求係相當基本~
好囉，今日可以放鬆心情去玩~

今日只有一個行程，完全冇限制幾時出門口，玩幾耐，全日冇時間限制，玩到景點閂門先開車返屋企都冇問題~
所以今朝起身後係超 hea，只要唔太晏落去食早餐就可以了~

無意間，我睇到屎塔喺手機睇緊 Alpine Coaster，我問佢係咪想去，佢話睇吓囉，不過即日都未必買到飛啦~
其實呢，我之前計劃行程時係有提過去 Alpine Coaster，不過佢話難得嚟 Newcastle，應該花時間喺 Newcastle~
佢而家諗住去係有原因嘅，佢話博物館嗰度，晏晝可能落雨，所以諗定 Plan B，所以就睇吓好唔好去 Alpine Coaster~
佢睇完之後話仲有飛賣，可以諗吓喎~

但係如果唔去博物館，淨係去 Alpine Coaster 又太多時間剩~
佢話唔係，去完博物館再去 Alpine Coaster~
咁咪唔夠時間行博物館囉？但佢又想去喎~
不過咁，間博物館呢，年票嚟嘅，一年內可以無限次遊覽，將來再過嚟行都得嘅~
好啦，咁就買 Alpine Coaster 最遲嘅飛，即係 15:30，去完博物館再去 Alpine Coaster~
不過由博物館去 Alpine Coaster，車程要 3 小時，時間上要控制得好啲，突然間唔可以太 hea~

窗外風景都算唔錯~

早餐旅館包埋，一般西式早餐，但算多嘢揀，唔錯~

食完早餐就開車去博物館，南下開半個鐘車就到~
沿途隨影~

Beamish Museum
一個露天博物館，佔地廣闊，唔同地方設置唔同場景，由 1820 年至 1950 年嘅英國當代場景~

買完飛，對方就介紹可以坐巴士繞場一圈先~
咁又幾好喎~
出到去，原來有巴士有電車可選~
不過在場工作人員話呢部電車唔載客住，要搭另一部~

我哋最後揀搭呢部電車~

沿途隨影~
我刻意揀呢段時間嚟 Newcastle 考試，滿滿嘅秋色，相當漂亮~

時間關係，我哋只可以遊覽其中一個場景~
1900s Town

印刷部喺一樓，我哋上到去嘅時候，係冇參觀嘅人，得我哋兩個，而呢兩個人都喺度做緊嘢，到我哋離開都喺度做緊嘢，唔知佢哋有咩做呢？
如果只係重現當時情景，何解喺我哋未上到去已經係工作狀態呢？(因為佢哋唔係見到我哋先開始工作)

呢兩位女士又係，唔知佢哋喺度做咩呢？佢兩個完全冇望過過嚟，分分鐘有人喺門口都未必知，好明顯唔係見有人參觀先開始做嘢~

呢間糖果店係真係有人製作糖果中，而且又真係會出售嘅，因為我見到有人買~

好耐冇追過巴士，估唔到喺博物館入面要追巴士~

佢呢度每個可以俾人入嘅場景，都會有最少一個人喺度介紹吓，同埋回答遊人問題~
佢哋一啲都唔 hea，對遊人問嘅嘢，全部都識答，仲講得幾深入吓，全部都係歷史專員，相當有誠意~

未嚟之前，入場費 £33 一個人，覺得有啲貴，當知道係年票，就覺得有啲坑遊客，有幾多個遊客一年內會重臨？
嚟到行咗一個區域之後，£33 一啲都唔貴，因為呢度做得幾好，冇其他用詞想講，就一個誠意，好有誠意~
呢度請嘅員工人數非常多，唔好忘記，仲有兩部古董巴士同兩部古董電車，成本之高難以想像，£33 年票，我而家覺得有啲平添呀~

行完呢區，要離開喇，有啲後悔買咗 Alpine Coaster 嘅飛，因為呢刻天氣超好，地方亦冇想像中大，覺得唔駛花太多時間可以行得晒~
後記：寫遊記呢刻唔明白當時點解會有種好快行得晒嘅感覺，入面其實仲有好多嘢睇，應該要花多幾個鐘走唔甩~

之後就要揸三個鐘頭車去 Edinburgh 邊皮嘅 Alpine Coaster~

Alpine Coaster 呢度係有間 Cafe 嘅，我哋去到間 Cafe 嘅時候，睇一睇時間，坐低食又好似食得有啲趕，反正又唔係好肚餓，不如返車食啲乾糧算啦~

喺車食完乾糧就行上去 Ticket Office 換飛~
途中見到有部車泊得超衰，唔明佢係咩心態，點解要主動話俾人知佢質素有幾低~

1. 冇 Blue Badge 但泊傷健位
2. 泊到出晒格
3. 無故地佔據超過一半行人路

我仲啱啱見到個司機落車，我又試吓用呢幾年好多人都會用嘅句子~
「估吓係邊個國家嘅人？😏」
的確，我未能証實佢係邊個家嘅人，我又試吓用近排都見好多人用嘅句子~
「並不是每個該國的人都是如此，但是每次如此的人都是該國的人」
我承認我係有偏見，但睇得多佢哋啲行為，如果我還能保持絕對嘅客觀同持平，我會覺得自己偽善~

講返 Alpine Coaster，我哋買咗玩三次嘅 package，換飛時，佢會俾條紙手帶我哋，上面有 Run 1 2 3 咁嘅字眼，應該係玩完一次就劃一次咁去紀錄玩嘅次數~

排隊等上一輪完結都等咗幾耐，我哋前面有四五個亞洲人，後面又有四五個亞洲人，兩班人各自都大聲講嘢，煩到爆炸，又要再次用返嗰句句子，「估吓係邊個國家嘅人？😏」

喺等待期間，工作人員走埋嚟同所有等緊嘅人講點操作，撳低個手抦到底就完全冇 brake，放晒手就 full brake~
亦有講明期間禁止錄影，因為佢哋已經喺場地中執過好多部電話~
臨上車前亦有告示牌說明不可錄影，不過佢冇話唔可以影相😆(小學雞 mode 運行中)
之後有兩位女士玩完返站，一個手持類似 insta 360 嘅手提錄影機，一個手持電話，相信都係錄影中~
工作人員見狀，逐一訓話~
我唔係想做道德超人，想紀錄遊玩過程好正常，再加上 social media 盛行嘅世代，想錄低一切值得紀錄嘅事情真係無可厚非~
但可唔可以醒少少？人家講到明唔可以錄，你仲揸住錄影設備錄到底，錄到返到工作人員面前都仲唔放低，你咁樣兜口兜面唔尊重工作人員，人家亦無需尊重你，就兜口兜面XX你~
若要人不知，唔好太低 B，除非自我中心到不知廉恥，甚至超脫羞恥嘅界限，俾人話都冇所謂，又要再次用返嗰句句子，「估吓係邊個國家嘅人？😏」

我哋買咗玩三次嘅 package(其實都幾相信個個都係)，頭兩次就自己坐，第三次就二人一車，部車係咁嘅~

場地就如圖，由起點拉上山頂，一路衝返起點，過程係可以完全唔落 brake，即係全程撳低手抦死衝~

頭兩次玩都暢通無阻，第三次就唔同~
我哋被拉緊上山頂時，我見到有位女士喺下圖中 X 嘅位置自拍，由於佢雙手都冇撳低個手抦，咁樣係等於 full brake，佢部車當時嘅速度仲慢過人步行~
我同佢之間有幾部車，可以預計，輕則佢後面嘅所有車會被佢影響，重則佢會俾其他車撞上(如果冇電子控制車距)~
之後我睇住佢後面嘅車急煞避免撞車，之後仲有第二部衝緊落去，但就睇唔到佢有冇急煞，咁又冇理由冇嘅~
X 之前嘅路段係加速位，X 之後嘅路段係高潮位，佢喺 X 呢個位自拍，先唔講危險，淨係破壞晒人哋嘅興緻已經係自私到極點！
我哋去到 X 位時，我係見到前方有車，玩咁耐第一次見到有車喺我前方視線範圍，我唯有喺度煞少少車先，否則我怕一轉完個彎要急煞~

當我哋返到站頭，工作人員好唔客氣咁XX嗰個女仔，話佢雙手揸住部電話停喺度，頂住晒後面所有車，最後講句 Don't do this again，連 please 都冇~
又要再次用返嗰句句子，「估吓係邊個國家嘅人？😏」

短短一個鐘，已經可以用「估吓係邊個國家嘅人？😏」四次，足証「並不是每個該國的人都是如此，但是每次如此的人都是該國的人」
都係嗰句，我當然唔能夠証實每次都係該國的人，但憑佢哋嘅語言同口音，仲有衣著同埋整體散發出嚟嘅感覺，我都幾肯定係該國嘅人~

玩完就去食嘢，我哋喺 Edinburgh 邊皮，其實就唔係好想走入市區，見到附近有麥記，就食麥記啦~

去到麥記，個環境好熟，好似嚟過咁~
我記得喇，之前同屎塔個朋友阿朱嚟過~

食完麥記就開車返屋企~