築地場外市場 - 築地虎杖 南店(早餐) → 湘南モノレール(單軌電車) → 鐮倉高校前駅(男兒當入樽場景) → 稲村ヶ崎 → 江ノ島 → 魚見亭(午餐) → Toyota Rent a Car(租車) → 磯丸水產(晚餐) → 富士山 24 IN(旅館)
今朝起身，對腳好好多，冇咁酸，但又未完全好晒~
屎塔就爭啲，佢話仲係好痛，希望晏啲會好啲啦~
今日第一站「築地場外市場 - 築地虎杖 南店(早餐)」
旅館本身有提供早餐的，不過我哋放棄旅館嘅早餐，去築地食~
去築地食早餐，當然聽過非常多嘅讚美，可能我哋對食唔係有好大要求，其實都冇話好想好想去~
我同意食到好食嘅嘢係有種幸福感，不過太刻意去做的話，我哋又唔係幾想~
咁當然啦，安排到嘅，就去潮聖吓~
本身計劃係行過去，只係 20 分鐘，穿過車站後見到有去築地嘅巴士，本能地走咗上去~
好快就到，現場交通極為繁忙，有好多特別車仔不停穿梭~
經過寿司大，至少 50 人排緊隊，放棄啦~
屎塔話網上面有人三點幾就嚟排隊......
個個人選擇唔同，我哋個人選擇係揀第二間~
就算寿司大好食到飛天都係咁話~
我哋事前都知道冇咩機會食到寿司大，所以都諗定後著~
我哋去咗「築地虎杖 南店」
呢間舖冇乜人，但網上評價係相當唔錯，可能啲人去晒寿司大~
我哋一人叫咗一個極丼~
碗嘢嚟嗰時，未食已經覺得幸福，即時垂延三尺~
食後感......天呀，點解又係咁呀，屎塔話好好食，好鮮甜，但我完全食唔到呀~
究竟發生咩事呀！
我真係未食過咁冇味道嘅海膽，未食過感覺咁新鮮但冇味道嘅蝦~
究竟發生咩事呀！
諗吓諗吓，我知喇！
我呢幾日有少少傷風，噚日開始食嘢冇味，屎塔樣樣都話好食，我又唔覺，相信係因為傷風而影響咗味覺~~
仲要係噚日到咗日本先開始，因為前晚喺機場食嘢都未有問題~
唉，碗海鮮丼咁正，但食唔出味道，真係嘥料！
睇嚟今次嘅旅程，將會食咩都冇味道......
本來下一站係去「本願寺」，不過屎塔話想早啲過「江ノ島」，行程係佢 plan 嘅，佢話事啦~
不過過去江ノ島之前，要返旅館攞返行李先~
攞咗行李，一出門口就跟住人潮走，完全冇諗係咪行啱路，兩條友發緊夢......
結果，越行越唔對路，原來啲人潮係由車站行過嚟，我哋跟住佢哋行只會越行越遠離車站......
遊覽江ノ島之前，我哋要處理咗件行李先~
我哋會將行李寄存喺車站，不過寄存喺邊個車站，的確係有花時間研究過~
不過結果真係算天意弄人，亦可以話錯有錯著~
由旅館去江ノ島，可以搭 JR 到大船站，再喺大船站轉湘南モノレール(單軌電車)，咁我哋就可以選擇將行李放喺「大船」或「江ノ島」站~
最好係可以放喺大船，咁樣條路係最理想，可以搭兩次湘南モノレール(單軌電車)~
不過，以上兩個站都唔係大站，未必有大 locker 放到我哋個篋，所以都不作考慮~
今日完咗江ノ島，我哋會去豐田租車，豐田間租車店喺藤沢，所以我哋決定，將個篋放喺「藤沢」站，如果冇大 locker，就睇吓豐田嗰度可唔可以俾我哋放低個篋，至少算係有個後著~
去到藤沢站搵到 locker，上網睇過尺寸係夠放個篋嘅，不過嚟到試過，點都係爭少少放唔入......
其實佢個內籠係夠大，只係入口矮咗一寸位，冇計！
咁唯有過去豐田先，睇吓佢俾唔俾我哋放低個篋~
去到豐田，俾晒資料佢，佢哋覺得有點奇怪，明明約咗下午六時，點解早咗咁多......
我哋說明來意，對方明白之後話可以放低行李先~
同時，我哋 book 咗車之後，改過行程，所以想改還車地點，不過唔知點解網上面改唔到，所以就諗住嚟到試吓改~
但係唔知咩原因，我哋目標嘅還車點唔可以用作還車，佢建議咗另一間俾我哋，我睇過地點都 OK，就咁決定~
其實成個過程溝通上有好大困難，用盡方法先可以互相明白對方，成件事處理好後，有份幫手嘅其中一個女仔即時拍手，我諗佢心裡面仲有歡呼~ XDDD
搞掂晒就搭返 JR 去大船站~
點知去到 JR 大船站，見到有個一定夠放我哋個篋嘅大 locker......
又點知，行過去湘南モノレール大船站，又見到有個一定夠放我哋個篋嘅大 locker......
激死！
下一站「湘南モノレール(單軌電車)」
我哋都好鍾意搭呢種懸吊式嘅單軌電車，可能因為罕有卦~
上次去德國搭過一次，原來日本都有~
我哋就由「大船」搭到「江ノ島」，總站到總站~
呢度嘅單軌電車比德國嘅快，只有一條軌(德國兩條，一來一回)，係埋站先分開兩條軌~
坐完有種莫明嘅滿足感~
到咗湘南モノレール江ノ島站，又見到放到我哋個篋嘅大 locker，哈~
下一站「鐮倉高校前駅(男兒當入樽場景)」
其實我哋自己就冇話好想嚟影呢個場景，不過，動畫又有睇過，而且都幾鍾意，又嚟開呢頭，冇理由唔嚟吖，所以就過嚟睇吓，不過預咗多人就真~
鐮倉高校前駅，係江ノ島電鉄嘅其中一個站，我哋就由湘南モノレール江ノ島站，電鉄搭過去鐮倉高校前站~
喺江ノ島電鉄江ノ島站，又見到放到我哋個篋嘅大 locker......
即係今日所有站都有足夠大嘅 locker，係得藤沢站冇，我哋就偏偏安排咗去藤沢站放個篋，真係天意弄人，吹脹~
好彩豐田容許我哋放低個篋，咁其實係最好，但本身就梗係唔想咁，咁樣就麻煩到人~
鐮倉高校前駅呢度係沿海地方，風景優美~
動畫入面個場景係咁嘅~
呢度就係男兒當入樽嘅場景，不過未有電鉄經過~
現場已經有大約二十人等緊影相，我覺得要好好咁影到一張似樣啲嘅相係不可能~
企得遠，前面會有好多人；企得近，又影唔到個效果~
純講影相，排隊影就最好，彼此都唔會影響到大家，不過，現實係冇可能嘅，一個鐘得幾班車，可能要排幾日先影到......
等咗好耐先有電車經過，求其影咗張相，叫做嚟過到過，對自己有個交待就算~
下一站「稲村ヶ崎」
去呢度係想睇富士山，不過條件係要冇雲冇霧，天朗氣清先睇到~
而今日，都幾多雲，肯定睇唔到，不過沿海景色優美，藉著搭電鉄去欣賞風景亦都係相當不錯嘅選擇~
落咗車就行去海邊，雖然冇真係走去稲村ヶ崎(因為鐵定看不到富士山)，就這樣喺海邊放空，已經好舒服~
下一站「江ノ島、魚見亭(午餐)」
江ノ島對我嚟講，係一個講唔出有咩想去但又想去嘅地方~
由車站行到江ノ島，超過 1 公里~
入口就係商店街~
江ノ島其中一樣名物，係即製嘅魷魚餅~
我哋喺商店街搵吓有冇，結果，舖頭就有嘅，不過冇開~
但佢話山頂嗰間有開~
繼續行就見到江島神社~
再上的話，可以行樓梯，可以俾錢搭電梯~
考慮咗一陣，決定搭電梯上~
其實行樓梯都唔算太辛苦，不過我同屎塔今日雙腳都有唔同位置及程度嘅痛楚，尤其屎塔，所以，可以減少步行時間都係好嘅~
一出電梯係「邊津宮」
之後有個花園~
再行就係「中津宮」
山頂風景~
喺山頂見到有即製嘅魷魚餅，不過好多人排隊~
正路咁多人排，我哋通常放棄，不過又好想試吓，排就排啦~
一排就大半個鐘，係好食至好......
我哋買咗「Octopus」同「Shell」
魷魚餅幾香口，帶子餅就一般，仲有少少咬唔開，食就其實唔算好好食......
食完嘢繼續行~
呢個係「江の島展望灯台」，不過上面風景唔算特別好，所以就冇乜興趣上去~
途經某角落~
之後就行到「奧津宮」
再嚟就係「龍宮」
再行到「龍恋の鐘」
終於行到嚟「魚見亭」
睇旅遊節目介紹，呢度有江ノ島名物，白飯魚刺身飯~
不過白飯魚賣晒，只剩 baby fish，都要啦，既然坐底咗，唔通起返身咩~
其實都預咗唔會係好食嘅嘢，不過一場嚟到就試吓，名物嘛~
結果呢，有啲腥，比想像中易入口，但絕對唔係美食囉......
另外叫咗個「江ノ島丼」，其實係螺肉親子丼~
味道不錯~
由魚見亭向外望，夠晒開揚~
食完午餐就繼續行~
一路行一路都見到其他餐廳有白飯魚刺身飯，我哋仲刻意走去魚見亭但又食唔到......
之後就行去「岩屋」
岩屋其實冇咩睇，但絕對係江ノ島內一個重要部份，所以都會去睇吓~
入口處每人獲派一支蠟燭，但其實入面本身有燈......
我仲好唔小心咁爭啲燒著自己條頸巾，好彩係爭啲，及時發現，冇事發生~
本來計劃去埋「稚児ヶ淵」睇日落，不過今日咁多雲，無望啦~
正路呢啲環境，我哋都會落去行吓嘅，不過屎塔隻腳都痛得好犀利，行路已經去到一拐一拐，所以我哋就冇行落去，其實都冇所謂嘅~
附近風景~
完咗江ノ島嘅行程，我哋就好慢好慢咁行去車站~
不過天色驟變，應該好快會落大雨~
行到去連接島嘅橋開始落雨，雨越落越大，幸好我哋距離車站唔算遠~
去到租車店附近見到藥店，買咗支藥油諗住今晚幫屎塔捽吓~
去到豐田租車，由於溝通困難，都搞咗幾耐~
不過豐田嘅服務真係好好，店員個個都耐性十足，態度極好~
我哋要寄存行李喺佢哋度已經唔好意思，佢哋仲幫我哋放埋上車......
今次租咗部混能車，未揸過，就試吓~
下一站「磯丸水產 - 小田原店(晚餐)」
藤沢一帶非常多車，每支燈都要轉幾次先過到~
好衰唔衰，ETC 有個未連接嘅訊號，我怕部車個 ETC 有咩問題，所以都係返轉頭俾人睇睇穩陣啲~
職員解釋只係藍芽未連接，並非 ETC~
哈，真係大鄉里......
再出發，由頭開始塞過......
磯丸水產 - 小田原店
呢度可能真係冇乜外地人，店員係一句英文都唔識，最後靠身體語言都算溝通到~
該位女店員雖然唔識英文，但佢真係好努力，好用心去做好佢嘅工作，好欣賞佢~
求其點咗幾樣嘢，主要係海鮮~
海鮮非常新鮮，屎塔話好好食，我味覺咁差都覺得好食~
叫咗個焗菜，但入面係通粉嚟，唔知係邊度出咗問題，可能係我哋一廂情願以為係菜也說不定~ XDDD
食完嘢就開車去旅館~
去到旅館，只剩一個車位，但就離入口有點遠，都冇計啦，得返一千零一個位，夜嚟係咁咖啦~
不過，遲過我哋嚟嘅，就安排泊喺好近入口嘅非泊車處......
臨瞓前我哋都捽咗藥酒，希望聽日好啲啦~
沒有留言:
發佈留言