《瞬間看地球》Stranger's Blog: 2017.03.18 富士宮、本栖湖、精進湖、鳴沢、西湖、河口湖 (日本第四天)

今日行程：
富士山本宮浅間大社 → 音止の滝、白糸の滝 → 白糸ガーデン富士宮炒麵(早午餐) → 本栖湖(千円攝影地) → 精進湖 → 富岳風穴、鳴沢氷穴 → 西湖いやしの里根場 → 河口湖 → 河口湖オルゴールの森 → 冨士天ぷらいだ天(晚餐) → ふじざくらイン(富士櫻)(旅館)

今日行程都係圍繞住富士山而行，據講，富士山被雲層遮蓋嘅時間比清楚見到整個富士山要長，咁就真係好睇運氣了~

一早起身，天色唔算好好，但見到個咁清嘅富士山，夠晒好運~

今日第一站「富士山本宮浅間大社」
神社本身都有相當可觀性(可能因為我鍾意日本神社嗰種朱紅色)，仲有個湧玉池，再加上呢度可以睇到富士山(天氣好時)，係一個我幾想去嘅地方~

開車過去途中，見到整個好清楚嘅富士山，富士山個山形好靚，當然山頂有一定積雪就更靚啦，好似而家咁~

神社呢度風景相當優美，再配合埋富士山，一絕！
而湧玉池嘅池水，就係富士山山頂嘅積雪，溶咗之後流入山內，再滲透到地下流出至神社~
期間經過多次天然過濾，以至池水清澈見底~

好幸運好幸運，可以見到咁清咁靚嘅富士山，如果天色再好一點，那就完美了~

下一站「音止の滝、白糸の滝」
見到白糸の滝，屎塔以為我講輕井澤嗰個~
我都想呀，嗰個都好靚呀，不過超遠，今次旅程係絕對唔會去嗰邊，下次啦~

沿途風景~

見到停車場指示就走過去，泊好車後發現，官方停車場特別貴，附近仲有其他平啲嘅選擇......
都泊好咗就冇計啦，下次要醒少少......

入到園區，首先會去到「滝の上展望台」，喺呢度可以睇到音止の滝嘅源頭，不過可觀性一般~

現場共有三個觀賞音止の滝嘅位置：
觀景位 A，在音止の滝側邊，比較近~

觀景位 B，遠一點，但角度不算很好~
(如不是現場有工程，就可以靠近一點圍欄觀看，相信會好一點~)

觀景位 C，無視白糸の滝嘅指示繼續向前行，就會行到一片荒地般嘅地方~
呢個位景觀最好，但最不起眼~

音止の滝唔算係好靚嘅瀑布，但至少水量充足，還好吧~

跟住就行去白糸の滝~

仲見到彩虹~

要近啲睇就要行落去~

白糸の滝都幾靚~

白糸の滝，除咗面前嘅主瀑布，仲有側邊嘅細絲，唔知呢個瀑布係咪因為呢啲細絲而得名呢~

跟住就行咗上去「白糸の滝展望台」
不過好自然聚焦咗去富士山......

下一站「白糸ガーデン富士宮やきそば(早午餐)」
富士宮やきそば(炒麵)係富士宮名物，但我哋只有朝早先會喺度，所以未到午飯時間都照食~
原先計劃好去「つかさ富士宮やきそば」嘅，佢開 10:00，不過我哋見佢十點幾都未開門，就去音止の滝、白糸の滝入口處嘅呢一間「白糸ガーデン富士宮やきそば」食~

「つかさ富士宮やきそば」

「白糸ガーデン富士宮やきそば」

富士宮やきそば
又幾好食，好食過香港粥舖嗰啲炒麵好多！(我個人唔鍾意食粥舖嗰啲炒麵)

白糸そば(山菜)
幾清新，唔错~

富士宮隨影~
今日係我哋嘅富士山日，就盡情、氾濫、瘋狂地富士山吧~

下一站「本栖湖(千円攝影地)」
本栖湖係富士五湖之一，除咗睇湖睇富士山，仲有佢係一千円紙幣上面圖案嘅攝影地~

據聞千円攝影地係喺山腰某處，不過我哋都係貪得意，唔打算大費周章，只要角度相約，相信都唔會爭太遠~

下一站「精進湖」
精進湖係富士五湖之一~

去精進湖途中，行經一處深彎，彎後竟然係一片冰雪，雖然我冇乜雪地經驗，但我知道有一定危險，立刻慢慢減慢車速，以免跣胎~

精進湖~

下一站「富岳風穴、鳴沢氷穴」

進入富岳風穴，需要戴頭盔，由售票處到洞穴入口有一段路，喺呢一段路，個頭盔就發揮咗另一種功效~
因為不時有雪自樹上掉下，有時都唔知係雪定雀屎，乜都好，有個頭盔頂一頂好好多~
雖則話要戴頭盔，不過入咗場先見到絕大部份人都冇戴~

富岳風穴的官方介紹：
在青木原樹海豐富的綠意包圍之下的富岳風穴，進到洞內即使是夏天也會感覺涼爽，平均氣溫為3度。
到昭和初期為止是貯藏蠶蛹的天然冷藏庫，被指定為國家天然紀念物。
總長 201 公尺，高達 8.7 公尺的橫洞，不可思議的是在裡面不會產生回音，這是因為牆壁的玄武岩質具有吸收聲音的性質。
需時約15分鐘的參觀路線，可以參觀即使在夏天也不會融化的冰柱，溶岩棚，繩狀溶岩等。

洞穴入面有好多呢啲磚形嘅冰塊，唔知點解會形成咁嘅形狀~

入風穴呢，都係戴頭盔好啲，有一兩處真係要烏低身避岩石，其時係好易撞到個頭，輪盡嘅屎塔就狠狠咁撞咗嘢，幾驚佢撞爛人哋個頭盔......

參觀完富岳風穴，就行過去鳴沢氷穴~
我哋而家有四個選擇：

1. 自然步道，即係東海自然歩道中嘅青木ヶ原樹海一段，長度約 1.4 公里
2. 國道，即係馬路旁嘅行人路，長度約 0.8 公里
3. スイカー (呢個我查唔到係咩意思，佢話停車場有，唔通係穿梭巴士？)
4. 揸車過去

掙扎緊好唔好行青木ヶ原樹海過鳴沢氷穴，掙扎點係因為屎塔隻腳痛~
不過屎塔話既然嚟到就行吓，最多行慢啲~
行過去，即係陣間要行返返嚟，咁回程行國道囉，短啲又好行啲~

青木ヶ原樹海呢度，都好值得嚟行吓，不過有啲路被雪覆蓋咗，會有迷路危機~
喺呢度只要偏離主道路，冇 GPS 冇指南針的話，幾乎可以肯定會迷路~

行咗半小時多啲就行到冰穴~

去到售票處，一入眼瞼嘅係「Combination Ticket」，我喺風穴又唔覺有喎！
又咁講，如果話得呢邊可以買到，又或者係我睇漏眼，我又深信係後者嘅......

咁唔緊要啦，照問吓佢囉，得就好彩，唔得就正常~
佢話唔緊要，照會折俾我，真好彩！
原來佢只係折佢自己嗰邊(冰穴)，我都係蝕咗 100 円，哈哈，不過佢肯折俾我已經好好啦~

鳴沢氷穴的官方介紹：
鳴澤冰穴位於青木原樹海的東邊的入口處，一整年觀光客綿綿不絕，是富士五湖觀光的景點之一。
距離至今 1150 年以前，在貞觀 6 年(864)富士山的側火山長尾山噴火時，灼熱的岩漿流下舊寄生火山(青木原丸尾)，所以就形成了這兩個隧道形狀的洞穴。
於昭和 4 年(1929)被文部省指定為天然記念物，因而被全世界熟知，是地質學上極為貴重的存在。
而且鳴澤村的樹型溶岩群的溶岩水蒸氣噴氣孔的數目是世界上屈指可數的。

入冰穴，似乎比風穴危險，門口有塊告示牌，以好似立體書嘅形式話俾遊人知要注意嘅地方，有啲地方仲要邊蹲邊行，當然，冰穴係更加要戴頭盔~

感覺上冰穴同風穴差唔多，只係多啲冰~

彎住腰仲要斜住行，行得好辛苦~ XDDD
前面有個男人，係咁行吓停吓幫對小朋友影相，其實呢啲位，影一兩張就算啦，大佬呀，你一停，後面全部要保持住個咁辛苦嘅姿勢，明知你一影完又會郁，當然唔會走去蹲低等~

好多磚形冰~

萬年冰池~

今日洞內只有 0°C~

我哋由後門入嚟，補影返正門先~

行完冰穴，我叫屎塔留喺原地等我，我自己行去攞車再過嚟接佢，費時佢行咁多~
我自己行返去就梗係行國道啦，13 分鐘就行到返車~

接返佢時，見到佢自己一個嘆緊雪糕，冇預埋我囉......

下一站「西湖いやしの里根場」
西湖いやしの里根場就在富士五湖之一嘅西湖嘅西北邊~

本來呢，仲有個「西湖コウモリ穴(蝙蝠穴)」想去嘅，不過仲未過休業期，冇得去~

西湖いやしの里根場呢度多數都係大陸人，相信係咁啱有團團客嚟到~

睇就冇咩睇，不過影吓相都 OK 嘅~

無無聊聊就買咗串呢啲食吓~
有啲煙韌，甜甜地咁，都 OK~

跟住再買咗兩杯雪糕食~
呢種雪糕，之前只係食過雲尼拿味，奶味香濃，好好食，今次試埋朱古力味~
朱古力味雪糕從來都唔係屎塔杯茶，不過今次佢話好好味，仲好食過雲尼拿味！
而我呢個廢咗味覺嘅人，都覺得朱古力味勁好食！(咁究竟味覺有冇廢到？ XDDD)

望住個富士山食呢杯咁好味嘅雪糕，幸福~

開車後分別見有兩處地方風景不錯就停低車欣賞吓~
西湖範圍~

河口湖範圍~

下一站「河口湖」

原本嘅計劃係去河口湖オルゴールの森先，之後行去湖邊睇吓風景嘅~
不過呢刻諗諗吓，我哋去完河口湖オルゴールの森，都黃昏啦，冇咩好睇，所以就決定去湖邊先~

不過好衰唔衰，揸車時錯過咗一個路口，前面就係河口湖オルゴールの森，就不如泊好部車先行返返去湖邊，反正湖邊都未必有位泊車~

河口湖北岸湖邊~

下一站「河口湖オルゴールの森」
河口湖オルゴールの森就在富士五湖之一嘅河口湖嘅東南邊~
我會形容為將音樂同美術集於一身嘅藝術園區~

15:45 去到河口湖オルゴールの森，見到分別有兩對人入咗去都出返嚟，唔通閂咗？
咁我哋當然都會行入去睇吓咩事啦，原來 16:00 先入場減 1000 円~
原價 1500 円，減成 1000 円，超抵！
只差 15 分鐘，梗係等啦~

我哋喺外邊有張長椅度等，等到仲有兩分鐘就走過去，已經有十幾人排緊隊~
跟住有兩個遊人走入嚟，面露奇怪表情，我諗佢哋係覺得，呢啲鐘數實唔係等開門，排晒隊等咩呢~

園內環境不錯，悠閒咁行吓都幾好~