《瞬間看地球》Stranger's Blog: 2017.03.17 川根本町、靜岡、富士 (日本第三天)

2017年5月18日星期四

2017.03.17 川根本町、靜岡、富士 (日本第三天)

今日行程：
寸又峡夢の吊橋、飛龍橋 → 久能山東照宮 → 三保松原 → ブロンコビリー(Bronco Billy)(晚餐) → 富士山 24 IN(旅館)

今日第一站「寸又峡夢の吊橋、飛龍橋」
完全唔順路，絕對係山長水又遠咁去呢個地方~
但係又好想去，唔理啦，想去就去~

開車去寸又峡，Google Maps 話要 1 小時 50 分，但車嘅導航話要 4 小時......
我出發前睇過 Google Maps 都係話要 1 小時 50 分，但以我自己嘅經驗，車嘅導航一向都幾準，不過點都好，我唔會相信要 4 個鐘~

沿途風景~

中途行錯咗幾次路，最後就落咗一條勁塞車嘅國道......
離開咗國道，就帶咗我行山路，全程單線雙程，唔怪得車嘅導航同 Google Maps 計嘅爭咁遠~
呢啲單線雙單，要計算行走時間真係可以好唔同，所以得出結果會有咁大分別~
最後用咗兩個幾鐘先到目的停車場，如果唔係行錯路，兩個鐘內到應該冇問題~

嚟呢一度，主要係想去「夢の吊橋」，「飛龍橋」呢，楓季先有嘢睇~
不過一場嚟到，又唔算太遠，就行埋過去睇吓~

屎塔隻腳都幾痛，要就住行，不過佢性格咁倔強，死頂都會行埋佢~

開始行~

行到分岔路~
去邊邊先好呢？
睇返現場地圖，連接「飛龍橋」同「夢の吊橋」之間嘅高低差，係靠樓梯，行樓梯，似乎落好過上，所以我哋就去飛龍橋先~
咁樣回程就行斜路上返嚟，似乎比較理想~

遠處嘅係飛龍橋~

夢の吊橋就在大間川嘅川河之上~

到咗飛龍橋，一如預期，冇乜嘢睇~

繼續行就行到去「寸又峽溪谷尾崎坂展望台」

雖則話係展望台，不過雜草叢生，乜都睇唔到~
反而見到有張長椅，屎塔終於頂唔住，要坐低休息吓~

休息夠就開始落樓梯~
中途見到池水係藍綠色嘅，好靚~

好彩去完飛龍橋先過嚟夢の吊橋，否則就要行樓梯上嚟，我諗屎塔應該應付唔到~

網上資訊顯示，呢度非常多人嚟，而且過橋人數有限，所以等過橋可能要等兩個鐘~
初時聽到咁都真係有啲驚，不過諗諗吓，我覺得只係楓季先會咁誇張，而家三月，應該唔會咁多人~

落到嚟，唔好話排隊，喺現場所有人加埋一齊行上條橋都唔會超過 11 人上限嘅規定，正！

藍綠色嘅川河，夠晒夢幻~
可惜今日多雲，太陽被雲遮擋嘅時間佔多數，不過做人要知足，唔落雨仲想點~
再講，有人嚟到話川河係灰色嘅，唔知會唔會係暴雨過後就會呈灰色呢？我哋算好好運了~

橋面好窄，僅夠一個人通行，遇上有對頭人，就要好小心咁互讓先可以順利通過~

大間ダム(堤壩)

橋嘅結構非常簡單，而且走在橋上，搖晃度相當高~

呢度好靚，人又少，勁正！

之後沿斜路上，有少少梯級，輕輕鬆鬆就上返去先前嘅分盆路~

回程經過見到另一條橋，呢條叫「猿並橋」，如果我冇誤會現場嘅解說，呢條橋係俾猿猴過對岸的~

本來計劃好去「魚がし鮨流れ鮨静岡鳥坂店」食午餐，不過時間比預期遲咗好多，呢間唔係好順路，就唔去~
我哋開車去住下一個景點先，沿路再睇吓有咩食，順路就好~

不過沿途選擇不多，可能因為唔肚餓，所以都冇衝動停低，一不小心，就到咗下一個景點~
既然唔肚餓，就繼續行程，一切隨心吧~

下一站「久能山東照宮」
要上久能山東照宮，可以喺海邊徒步經「久能山東照宮表参道」上，不過相當考腳骨力~
我哋選擇咗另一方便(懶)啲嘅方法，就係搭「日本平ロープウェイ(纜車)」，由日本平駅搭到久能山駅~

纜車係往下走嘅~

去到久能山駅就已經係東照宮，纜車本身好似就係東照宮嘅一部份咁~

國寶級嘅久能山東照宮佔地廣闊，環境清幽，建築漂亮，非常值得到此一遊~

參觀完畢，就搭返纜車上去日本平駅~
喺日本平駅買咗兩杯雪糕，再周圍行吓~

今次旅程好似冇影過部車，補返先~

下一站「三保松原」
本來計劃去三保松原係睇富士山，不過今日咁嘅天氣，預咗冇得睇，咁去睇吓松樹囉~

前面就係富士山，不過俾雲遮住咗......

望唔到富士山，望海囉~

嚟緊本來就係去「さった峠展望台」睇日落嘅，不過途中遇上塞車，趕唔切啦~
我哋呢，睇親日落都多雲，今日呢，東邊多雲，但西邊冇乜雲，只係煙霞多啲，勉強都睇到日落嘅~
我哋就喺塞車途中睇日落~

既然係咁，仲去唔去さった峠展望台呢？
去，因為夜景都靚，照去~

越行越唔對路，就到喇喎，但我哋仲喺高速公路~
直至導航話到咗，我哋都仲喺高速公路~
我知喇，さった峠展望台就喺高速公路外邊，行高速公路係去唔到，係處理導航資料嗰個人嘅疏忽，即係我呀~~~

咁算啦，唔去喇，繼續行住先，因為要停到車先可以再設定 GPS~
我哋一路向前行，直至見到休息站就停低~

咁啱喺呢個休息站有摩天輪，就上去坐吓~