富士急ハイランド(樂園) → 天上山公園 → 忍野八海 → 池本茶屋(午餐) → 山中湖 → 星の王子さまミュージアム(箱根小王子博物館) → 箱根パークス吉野(旅館)
原來喺旅館房就望到富士山~
今日仍然睇到好清嘅富士山~
停車場都睇到~
今日第一站「富士急ハイランド(樂園)」
我好多年前嚟過，玩過佢個鬼屋，可能因為當時係我第一次玩鬼屋，所以印象深刻~
而屎塔又咁鍾意玩，我已經同佢講過好多次，如果去開附近，一定要同佢嚟玩富士急嘅鬼屋~
所以今次入場首要任務係玩鬼屋，其他都唔重要~
去到富士急，仲未夠鐘開門，已經有車龍排緊隊入場~
泊好車就去入口買飛~
泊車 1500 円，入場每人 1400 円，有啲遊戲仲要另外俾錢先可以玩，例如鬼屋就要 500 円一個人~
我哋入場主要玩兩款遊戲，一係鬼屋，二係密室逃脫，只玩兩款遊戲，其實真係非常浪費！
不過冇計，過山車，我興趣係有嘅，但唔算好大，而屎塔就唔多喜歡~
同埋今日星期日，肯定超多人，咪搞~
入咗場，梗係去咗鬼屋先，我係因為鬼屋先嚟富士急，否則呢啲機動遊戲嘅樂園，基本上都唔會嚟~
鬼屋嘅場景，係一間已經荒廢咗嘅醫院~
我哋開門已經入場，第一個就嚟鬼屋，但前面已經有幾十人排緊隊......
排緊隊嘅時候，螢幕播緊入面嘅環境，喇叭不停播出尖叫聲，我估係醫院入面玩緊嘅人嘅叫聲嚟~ XDDD
我哋喺下圖嘅左邊排隊，玩完嘅人就喺右邊呢度門爆返出嚟~
我用爆返出嚟嚟形容，係因為每個出嚟嘅人都係跑出嚟的~ XDDD
入咗醫院，會一齊睇片，跟住就一組組人分開行，即係我同屎塔兩個一齊，其他唔識嘅人唔會一齊行~
醫院內嘅場景佈置相當不錯，氣氛好好~
每次同屎塔玩鬼屋，都係遛狗狀態，不停俾屎塔扯住走......
至於邊個係狗呢就......
玩後感，覺得冇當年咁好玩，不過屎塔話係佢玩過數一數二好玩嘅鬼屋，場景同氣氛都係一流~
咁就好嘞，如果唔係，講咗咁耐，覺得唔好玩就真係夠晒失望~
之後就諗住去玩密室逃脫，又係屎塔喜愛嘅遊戲，我都 OK~
呢個密室逃脫，據聞只有兩組本地人能在限時內成功逃脫~
咁真係好難喎，其實我有啲懷疑唔識日文玩唔玩到，不過唔理咁多啦~
去到密室逃脫，唔係好多人，諗住去排隊啦，但個牌寫住要排兩個鐘，點解呢？
諗諗吓，係喎，密室呢啲，同一時間只能容納好少人，仲要等前面玩完先到下一個，咁真係有排等，屎塔話唔等喇~
咁又係，等兩個鐘，唔值得~
咁就睇吓再玩啲咩啦，盡量都玩多樣先走，感覺上冇咁蝕嘛......
經過見到衝水道嗰啲，人唔太多，屎塔又想玩，就呢個啦~
玩之前，最緊要將唔濕得嘅嘢放入 locker，例如相機~
排緊隊時，見到個場面，嘩，冇雨衣一定由頭濕到落腳！
排隊沿途都有呢啲雨衣售賣機，100 円一件，即刻買兩件先~
不過件嘢薄到用力吹都吹得爛咁滯......
原來呢，入面呢度有免費 locker......又蝕咗！
排緊隊嘅時候，見到有個男人冇著雨衣，全身濕透，慘！
排咗半個鐘，到我哋喇~
玩完我有嘢唔明囉，件雨衣過頭笠式一件頭，有咩理由大脾內側濕晒，其他地方又冇乜濕......
(我必需講明，大脾內側濕晒嘅係水嚟......)
對鞋就真係濕晒，幸好唔係濕得好入，都冇大問題~
富士急除咗鬼屋出名，仲有佢嘅過山車，不過排隊動輒要以小時計，真係咪搞~
一個排兩個幾鐘，一個排三個半鐘，點排呀......
樂園隨影~
呢度個停車場好大，不過去攞車時，全個停車場滿晒，好誇張，真係想搵返自己部車都唔容易~
下一站「天上山公園」
喺呢個公園，可以以唔同視角望吓富士山，又可以望吓河口湖，順便搭吓纜車~
去到最近嘅停車場，爆晒，咁就要去個遠啲嘅~
睇嚟陣間都要排隊上山~
泊好車行去排隊，嘩，好多人！
我哋向前數約二三十人嗰度有個牌，由個牌開始計都要排 40 分鐘，咁我諗我哋要排一個鐘到啦~
其實今日個天有啲雲，又唔係好清，可以唔上嘅~
不過一場嚟到，都上去啦，一個鐘好快到~
等咗一個鐘，終於上纜車喇~
雖然唔係好清，不過個視角好唔同，都值得上嚟睇吓嘅~
再行上啲，都係差唔多~
喺度留咗一陣冇咩做就搭返纜車落山~
纜車頂有公仔做裝飾，好少見~
個湖景都唔錯~
下一站「忍野八海、池本茶屋(午餐)」
忍野區內嘅八個池，同噚日嘅湧至池一樣，都係來自富士山山頂嘅雪，不過唔知點解，有啲就好清，有啲就比較混濁~
忍野八海人多車多，好唔容易先搵到位泊車~
泊好車就去食嘢先~
去到「池本茶屋」，要等位，我哋排第四位，照等啦，現場周圍都係人，我諗去邊間都一樣~
叫咗乜嘢食就唔記得，只記得係兩個麵，一冷一熱，仲有天婦羅同一條烤魚~
味道普通，尤其個天婦羅，同噚晚間天婦羅專門店真係有明顯分別~
忍野八海呢度好多人，好多都係大陸人，都好正常嘅，呢度冇入場費，團客一定嚟~
我哋都冇點分咩池打咩池，隨意行吓就算，可能真係太多人，想快啲走~
呢個係鏡池，遇上天氣好，光線角度適合，冇雲，就可以好清楚咁喺池面見到逆富士~
今日就冇嘞~
睇返啲相先知，有位遊人，疑似用咗現場公家用嚟載水嘅用具，直接使用......
之後買咗兩個草餅，好食~
下一站「山中湖」
原本記低咗三個地點睇湖睇富士山嘅，不過今日比噚日多雲，而且要睇都睇夠喇，不過為咗完成富士五湖，就算到此一遊都會去其中一個觀景點~
下一站「星の王子さまミュージアム(箱根小王子博物館)」
喺呢度可以睇到《小王子》作者 Antoine de Saint-Exupéry 嘅生平同手稿等等，不過我哋對佢個場景佈置嘅興趣就大啲~
比預期遲咗嚟，天色開始暗，不過唔知係咪因為咁，所以冇乜人呢~
我哋都好鍾意呢度，人又少，好正！
睇完小王子，就開車去位於箱根嘅旅館~
旅館係溫泉旅館，一泊二食~
不過去旅館呢程車就慘喇，全程塞車，仲要係經常塞到停，我都幾肯定，停車嘅時間仲多過行車嘅時間......
照計星期日應該走嘅人多先係吖，唔通撞咗車？
咦，唔係喎，聽日係日本假期，多人去箱根都好正常~
其間有一小段郁得比較順暢，前面部私家車越行越偏，直至有三份二架車過咗對面線，對面有部旅遊巴嚟緊，我即刻響號提一提佢，佢先扭返入自己線~
差唔多到喇，除咗因假期而嚟嘅人潮，原來真係撞咗車，唔怪得塞得咁緊要~
到咗旅館，原本計劃浸一次溫泉先食飯，但因為塞車遲晒大到，上房放低啲嘢就要即刻落去食飯~
晚餐味道普通，有啲失望~
食完飯屎塔就去浸溫泉，我就自己喺房休息吓~
沒有留言:
發佈留言