今日行程：
【Hluboká nad Vltavou】Státní Zámek Hluboká(Hluboka Castle) → Church of St. Jan Nepomucky(Kostel svatého Jana Nepomuckého) → 【Český Krumlov】Zámecká Zahrada(Castle Garden) → Viewpoint → Plášťový Most(Cloak Bridge) → Seminární Zahrada(Seminar Garden) → Kostel Sv. Víta(Church of St. Vitus) → 閒逛 Český Krumlov → Egon Schiele Art Centru(Egon Schiele Art Centrum) → Babylon Gastro(Dinner) → Pension Tiffany(Accommodation)
今朝起身時望吓窗外，好大霧，遠少少都睇唔到~
食早餐嘅地方，要行過去另一邊，喺咁大霧嘅情況下出街，其實都有種幾正嘅感覺~
早餐繼續係普通西式早餐，不過選擇較少，味道又一般~
食完早餐，上房拎行李時，再望向窗外，霧已經散咗好多，原來遠方環境係咁~
今日第一站 Státní Zámek Hluboká(Hluboka Castle)
Hluboká Castle 被譽為是捷克最美麗的城堡之一。城堡始建於13世紀後半葉，19世紀時，城堡模仿英國溫莎堡進行了重修。城堡頂部有炮門垛口、景觀花園，內部有會客室、餐廳、藏書室等等。
嚟咗捷克幾日，狗就見得多，貓就第一次見~
嚟到城堡時，嚴重背光~
有時真係冇計，邊有得就到成個行程都順路又就到時間又就到光線~
遊覽完離開前睇吓會唔會好啲啦~
參觀城堡內部，要跟 tour 入，跟得 tour 就通常係限時限刻，而家去買飛先~
去到售票處時，時間為 09:05，螢幕上有兩個時段，09:30 及 10:00，兩個團都係捷克語~
唔理喇，就 09:30 啦~
仲有 25 分鐘先夠鐘，就喺城堡嘅室外地方行吓~
行完就等夠鐘參加 tour~
等等吓，心血來潮，走去售票處八卦吓~
我問售票小姐，最早幾點有團，同埋係咩語言~
佢話最早可以係 09:00，視乎人數再決定開唔開團~
至於語言，都係視乎參加者而定~
其實，俾佢咁樣講一講，越聽就越唔明~
咁，幾多人先決定開團呢？如果我哋一早到，09:00 兩個人又開唔開團呢？
語言方面，係咪第一個報團嘅，決定語言？例如我哋第一個報，咁個團就係英文？
如果最後成團有十個人，其他八個都係捷克人，咁最後個團會係咩語言呢？
又，我哋去買飛時，09:30 同 10:00 都已經顯示係捷克語，其實係一早設定好，定真係我哋 09:05 去買飛時，已經有捷克人嚟到買咗 10:00 飛？
我哋行上嚟時，由頭到尾，喺視線範圍內，早過我哋嘅，得一位女士，我哋買完飛周圍行時亦見到唔其他人~
我就唔係幾信我哋買飛前已經有人嚟到但買 10:00 嘅飛~
不過算啦，無謂捉住人打爛沙盤問到篤~
等到 09:30 tour 開始，導遊俾咗份英文簡介我哋~
成團有六個人，三個能聽會說捷克語，另一個係睇法文簡介，仲有兩個就係我哋~
室內環境有別於睇過嘅城堡，不過同樣有非常高嘅可觀性，漂亮非常~
可惜室內禁止攝影，連官網同維基百科都冇乜內部嘅相~
參觀完城堡內部，就去花園行吓~
不過個花園好細，而且平面咁望埋去，冇乜好睇~
城堡嘅背光情況好似好啲，只係好啲......
地面冇咩好行就上 Zámecká věž(Chateau tower)~
上到塔頂，我試吓垂直咁望吓下面，嘩，即刻腳軟，仲覺得個人有啲離心力......
呢刻我唔敢再望，背靠身後高嘅牆身，心裡面同自己講，其實呢度好安全，自己唔爬出去又點會有事？
我十分清楚無啦啦唔會有咩事，但呢刻真係腳軟~
我都唔係第一次上高塔，但從未試過驚到唔敢望~
不過我就算有啲畏高都好，只要我知道係安全嘅，我係會迫自己望~
何況，咁正嘅景，唔望就真係蝕晒~
上完塔落返嚟，太陽方位又唔同咗，又影嚟睇吓~
睇完前面，我哋繞到側面，再走到後面，另有一番風景~
Hluboka Castle 隨影~
下一站 Church of St. Jan Nepomucky(Kostel svatého Jana Nepomuckého)
呢間教堂個配色幾特別~
不過入唔到去~
教堂附近隨影~
下一站 Český Krumlov 小鎮
呢個可以話係世界知名嘅美麗小鎮~
開始小鎮行程之前，我會去一去小鎮嘅 P2 停車場，泊好車，行過去城堡，買定聽日遊覽城堡嘅飛先~
去到城堡售票處，佢話只售即日嘅飛......
不過呢，初時係怕太多人，所以諗住買定，而家嚟到，原來冇乜人......
一個舉世知名嘅小鎮，竟然空蕩蕩咁冇乜人氣，都唔知應該感到高興定應該嘆息......
P2 停車場，40 分鐘內離開係免費嘅，而家咁好太陽，唔好浪費，有限度行吓~
Zámecká Věž(Castle Tower)，又名彩繪塔~
熊公園~
之後就去 Zámecká Zahrada(Castle Garden) 行吓，順便食午餐~
城堡公園側面有個空地，google map 街景見到有車停泊，所以我就諗住泊喺度~
差唔多到嘅時候，俾個阿姐攔途截停，友善及禮貌地問我哋係唔係泊車，如果係就 Kč50(約 HKD$17)/2hrs~
雖然我原以為唔駛錢，不過以呢個價錢嚟講，即俾，抵泊~
花園冇乜特別~
行到一半，諗諗吓，不如睇吓間餐廳(Krčma Markéta)多唔多人先，多嘅就去排隊先，雖然就應該唔多嘅~
去到間餐廳，冇開門......
其實我比較相信佢唔單止係冇開門，應該係疫情期間冇乜客，暫停營業，甚至已經結業......
呢頭係冇其他餐廳，屎塔話佢唔肚餓，唔食飯都冇所謂，同時亦冇興趣再行個花園，不如趁好太陽，去啲影相位影吓相~
我覺得都係個幾好嘅主意，就咁話~
沿途隨影~
到咗個熱門拍照地點，人唔多，景觀非常正！
可惜天氣開始差，時陰時晴，影相要等太陽喺雲隙走出嚟先好啲~
遠方黑雲開始飄近，唔捨得走都唔可以再逗留，趁未落雨，行吓其他地方~
行前少少，向 Plášťový Most(Cloak Bridge) 方向行去~
Plášťový Most(Cloak Bridge)，又名斗篷橋，個景再開揚啲，不過我都係鐘意頭先嗰度多啲~
睇夠就返去攞車~
收停車場錢個阿姐份工認真唔易做，咁樣曝曬住開工......
而家去旅館 check-in 先~
沿途隨影~
呢間旅館，我係用 asia miles 換嘅，係我第一次用 asia miles 換嘅旅館，希望冇問題啦~
呢間旅館，如果要加早餐，係要加錢嘅，我喺 book 嘅時候，已經講埋要一個車位同二人早餐，亦有講明大約幾點到達~
去到旅館，拍門冇人應，門口有車位，有編號的，我都唔知泊邊格先啱~
門口有電話留低，話如果 check-in 冇人應就打俾佢啦~
喂，打長途電話要錢咖喎，既然有人 book 咗，你唔係應該要準備定咩？
喺無計可施嘅情況下，唯有打俾佢~
對方有接電話，說明來意後，對方問我哋俾咗錢未......
即係佢唔知有 booking 啦！
第一次經 asia miles book 旅館就奶嘢......
經過幾次一來一回嘅對答，佢就俾咗個密碼我哋，開咗門口個箱，就攞到鎖匙~
仲問埋佢泊車應該泊邊個位，佢話 3 號~
但係 3 號位俾部貨 van 泊咗，即時同佢反映啦~
佢問吓部車係咩車同車牌，不過佢話唔識，唔知係邊個嘅~
由於係貨 van，佢就叫我哋問吓附近做嘢嘅人，好大機會係佢哋嘅~
我哋走去轉角，有個單位真係好大工程咁裝修緊，捉咗個男人嚟問~
不過對方唔識英文，溝通有困難~
其時有另一個男人走過，本身個男人係咁指住行過嘅男人，又拉住佢，俾我哋感覺係話部車係佢嘅~
不過呢個男人都係唔識英文，係一啲都唔識，溝通過程，個男人係咁舉起姆指(歐洲人慣常表達 1 嘅手勢)，都唔知佢想講乜......
我哋叫個男人等一等，再次打俾旅館方，希望佢可以代為溝通~
溝通過後，原來部車唔係嗰個男人嘅~
其實，想表達唔係你嘅，語言上溝通唔到，用身體語言表達都唔係咁難啫......
咁我哋知道誤會咗人，雖然我哋絕對沒有怪責嘅語氣，但為免有咩誤會，我哋同個男人道咗歉~
咁就繼續同旅館方傾，睇吓點解決~
對方話一係幫我哋報警，不過佢話其實報警都冇用，但如果我哋想佢可以代為報警~
既然佢咁講，就無謂報警啦，盞搞~
佢都好無奈咁話佢都冇計~
係，我知你冇計，你當然唔能夠變走部車，我仲覺得你可能唔喺旅館附近，否則你應該會過嚟......卦~
但係我覺得呢個係你責任，你變唔走部車，一係我泊第二度，你俾返泊車錢我~
因為我預你有位泊車先會揀你，否則幾平都唔會揀，呢樣係我落 booking 時，見到你能提供嘅服務~
係，佢可能都有機會係受害者，佢冇被通知呢日有住客，而且有要求車位~
但係做生意，正路應該幫個客解決一啲係你責任嘅問題~
至於點解你冇收到通知，你就同有關方便再理解吓~
而家一句冇辦法就唔理，唉~
咁而家點算好呢？
我哋見 4 號位係喺隔籬旅館門口嘅，又冇車泊喺度，諗吓，如果佢同我哋呢間旅館嘅人熟，說明來意，會唔會咁啱佢又冇客要泊位，可以借嚟泊吓呢？
但其實真係好鬼難開口......
再唔係都只有一個方法，俾錢泊第二度，但地點就可能冇咁方便~
我哋躊躇緊應該點做好嘅時候，曙光出現了~
喺我哋間旅館對面，有個垃圾斗，我哋一直好一箱情願咁以為係轉角裝修嗰度嘅，因為佢封咗兩層嚟裝修，要用垃圾斗裝嘢好理所當然~
點知，對面間屋有人開門，一望，原來對面都裝修緊，只係外面冇痕跡，所以我哋都唔知道~
即刻捉住個人嚟問吓部車係咪佢嘅~
不過好失望，佢話唔係~
再問佢知唔知部車係邊個嘅，佢話係佢同事......
我頂吖，真係問一句答一句，佢話部車唔係佢，佢又冇錯，吹佢唔脹！
咁就梗係即刻請佢通知佢同事啦~
佢同事出到嚟，黑晒面老大不願意咁走去開走部車~
一天都光晒！
我哋慢慢處理行李事宜，其實係等佢返嚟同佢講聲唔該，希望佢條氣順啲啦~
搞掂晒啲嘢，又醒起，咦，仲有早餐未同旅館方傾喎！
不過算鬼數啦，有 booking 又唔知，冇車位又由我哋自己解決，打電話俾佢又要俾長途電話費，咪嘞~
反正個早餐未俾錢嘅，當冇事發生~
(後記：我用緊嘅手機計劃包少量國際漫遊，初時以為由自己地方打出去先係包，原來喺捷克打咗呢兩次電話都包，即係唔駛額外俾錢，但就用咗佢包嘅分鐘~)
可以開始去行吓個鎮嘞~
我哋去 Seminární Zahrada(Seminar Garden) 先~
呢個花園，如果唔係有目標咁去，係好容易一行過就錯過~
之後經過 Kostel Sv. Víta(Church of St. Vitus)~
趁仲有太陽，我想行咗過對岸先~
主要因為鎮中心嘅內街，冇太陽個影響相對冇咁大，而且如果晏啲落大雨，喺鎮中心要搵地方避都容易啲~
經過見到呢間舖頭，幾特別~
對岸嗰條街叫 Rybářská，沿路向斗篷橋方向行就有橋可以行返入鎮中心~
斗篷橋~
城堡外牆~
呢張相有啲好似睇魔法或者靈異電影，快要被吞噬嘅感覺~
過咗橋，就去到鎮中心，漫遊(亂行)時間開始~
期間喺 Cafe Zapa 買咗杯 gelato 雪糕，好食到不得了，非常濃郁嘅朱古力味，非常喜歡 gelato 個質感~
食完真係想買多杯，不過呢啲嘢，翻食就冇咁滋味，而家咁樣回味著，反而仲好~
行到嚟 Náměstí Svornosti(The Square of Concord)，鎮中心廣場~
而家下午五點未夠，唔係朝早五點喎，少人到得人驚！
一個全球知名嘅美麗小鎮，我相信正常春夏秋冬都應該水洩不通，而家遊客量可能只有正常 1%，好誇張~
而且，見到嘅人，仲唔一定係遊客~
廣場呢度有間 Museum Tortury，屎塔又有興趣睇......
其實噚日先睇完個非常好睇嘅，而且來嚟來去都係嗰啲展品，都唔明佢點解咁有興趣......
仲有呀，過幾日返去布拉格，又有個同類展館要去，真係有鋪咁嘅癮......
呢間嘢，做功課時我係有留意到嘅，但官網已經死咗，仲以為結咗業添~
最後，睇完價錢，再加上其實仲有 Egon Schiele 嘅展覽可以睇，就決定唔睇了~
Egon Schiele Art Centru(Egon Schiele Art Centrum)
嚟到先知呢度唔止 Egon Schiele 嘅展品，仲有其他~
我哋得一個鐘，都唔知夠唔夠時間，不過唔緊要啦，最緊要睇 Egon Schiele，其他隨緣~
Egon Schiele 係奧地利畫家，曾經住過喺呢個小鎮，所以喺呢度有佢嘅畫展~
不過佢嘅展品唔多~
(有關 Egon Schiele 人體與性嘅展品，禁止攝影，而且比較露骨，俾影都唔敢貼出嚟~)
Egon Schiele 外嘅其他展品~
呢個作品好大，要喺二樓影落去~
入面一間間屋同建築物，應該就係 CK 小鎮~
展覽館嘅後園~
今日都行到夠晒皮，雖則未必每個角落都行過晒，但都應該有 90% 以上了~
係時候去食晚餐~
下一站 Babylon Gastro(Dinner)
餐廳就在河邊~
不過我哋都係鍾意室內多啲~
雖然而家唔係好凍，不過有個火爐，有點暖意總是好的~
Homemade Lemonade
Garlic Soup
湯略鹹，但都 OK~
Roasted pork ribs, mustard and horseradish, pickles, bread
佢啲 ribs 有啲短有啲長，短嘅好嫩好好味；長嘅就乾啲，味道都唔錯~
呢度菜連麵包的~
Chicken steak with bacon and Niva cheese
雞扒本身有少少乾，不過個汁好好味，總括嚟講相當不錯~
今日真係有啲運，咁大舊黑雲飄過嚟，但係到而家都冇落過雨，多謝個天~
今晚嘅住宿，Pension Tiffany，真係要記錄一吓~
間房都細得幾別緻吓~
佢個熱水壺有半壼水喺度，係貼心嘅服務？但佢又唔知今日有人住，咁啲水係......？
個窗簾拖晒地咁想點？
同埋佢個窗簾係完全遮蓋住個暖氣，拉開佢，就冇私隱；拉埋就冇暖氣~
不過窗簾遮蓋暖氣嘅問題，我哋唔駛掙扎，唔需要二選一~
因為個暖氣只有僅僅分辨到佢開咗同閂咗嘅溫度，簡單啲講，開咗都只有微溫~
咁我哋試吓開 hall 嗰個暖爐啦，連微溫都冇......
(一小時後開始有微溫，不過都係僅此而已~)
我係貪平嘅，屎塔有部份 asia miles 就到期，就搵間啱啱用得著，評分又唔會太低嘅旅館嚟用咗佢~
所以啱啱提到嘅問題，以一分錢一分貨嚟講，其實就完全唔係問題，只係怪怪的想記錄吓~
沒有留言:
發佈留言