今日行程：
【Kutná Hora】Kamenná Kašna(Stone Fountain) → Jezuitská kolej(Jesuit College) → Katedrála Sv. Barbory(St Barbara's Cathedral) → Kaple Božího Těla(Corpus Christi Chapel) → Vlašský Dvůr(Italian Court) → Viewpoint → Kostel Sv. Jakuba(St James' Church) → Phở Hà Nội(Lunch) → Chrám Nanebevzetí Panny Marie a Sv. Jana Křtitele(Cathedral of the Assumption of Our Lady and Saint John the Baptist) → Kostnice Sedlec(Ossuary Sedlec) → Supermarket Albert → 【Prague】Budget Car Rental → Museum of Torture → Gallery Of Steel Figures → U Maltézských Rytířů(Dinner) → Residence Thunovska(Accommodation)
今日早餐選擇少，又唔好食，所以都唔係食好多~
整咗杯機沖嘅熱朱古力，甜到不得了~
過甜嘅熱朱古力真係試唔少，但要數呢杯最最最甜~
食早餐時睇天氣預報，早上 10:00 開始至晚上 19:00，落雨機率係 60 - 70%~
咁今日個行程就要順天而行~
趁未落雨，周圍行吓先~
今日第一站，閒逛 Kutná Hora
呢個鎮都算靚，不過可能已經出現審美疲勞，冇乜感受~
天色還可以，而家身處位置又近 Katedrála Sv. Barbory(St Barbara's Cathedral)，就去教堂先~
行去教堂時，會經過 Jezuitská kolej(Jesuit College)~
學院向外望，風景不怎麼樣~
一路行到尾就係 Katedrála Sv. Barbory(St Barbara's Cathedral)，聖芭芭拉大教堂~
St Barbara's Cathedral 始建於1388年，但是工程幾度中斷。原來的設計是要建造一座規模更龐大的教堂，預估為今日建築的兩倍大，但是工程依賴於該鎮銀礦業的繁榮，在銀礦產量下降後則停工，直到1884年才進行重建。
教堂外圍及周邊~
入呢間教堂係要收費嘅，可以單獨買呢間教堂嘅參觀費用，亦可以三合一咁買埋另外兩間教堂嘅參觀費用，三合一嘅門票會平少少~
三合一門票包含嘅教堂分別係：
Katedrála Sv. Barbory(St Barbara's Cathedral)，聖芭芭拉大教堂
Chrám Nanebevzetí Panny Marie a Sv. Jana Křtitele(Cathedral of the Assumption of Our Lady and Saint John the Baptist)
Kostnice Sedlec(Ossuary Sedlec)，人骨教堂
嚟得 Kutná Hora 呢個城鎮，我個人認為，冇理由唔參觀聖芭芭拉大教堂及人骨教堂，所以我相信多數人都係買三合一門票的~
而 Chrám Nanebevzetí Panny Marie a Sv. Jana Křtitele(Cathedral of the Assumption of Our Lady and Saint John the Baptist) 呢間教堂，其實都相當美麗，只係名氣不及另外兩間~
買好三合一門票就進入教堂~
參觀完地下，仲可以上二樓~
二樓可以話係一個迷你博物館~
二樓有度門，可以行出去平台~
出咗平台先知，原來已經落緊雨~
返返入教堂入面，開始聽到嘈雜聲，原來有班學生入咗嚟，人數超過五十人，仲越嚟越嘈~
我印象中未試過喺教堂經歷過咁嘅嘈雜聲~
好彩我哋都行完呢度，希望之後兩間教堂唔好又遇到佢哋~
聖芭芭拉大教堂真係堪稱傑作，好靚好靚~
喺聖芭芭拉大教堂隔籬，有間 Kaple Božího Těla(Corpus Christi Chapel)~
離開教堂，雨唔算大但又唔係細，雨褸要出動了~
既然落雨，轉戰室內，去 Vlašský Dvůr(Italian Court)，意大利宮~
睇睇時間，去到意大利宮應該未夠 10:30，但其實我唔知佢幾點有團，網頁完全冇相關資料的~
咁團嘅嘢，15 分鐘一團？30 分鐘一團？60 分鐘一團？咁 10:30 有團嘅機會都高咖，希望實情如此啦~
沿途隨影~
途經 České Muzeum Stříbra(Czech Museum of Silver)，銀礦博物館~
係 Kutná Hora 內其中一個好受歡迎嘅博物館，因為可以深入礦洞參觀~
不過我哋興趣不大，就冇打算入了~
Vlašský Dvůr(Italian Court)，意大利宮~
Italian Court 原為中央造幣廠，得名於義大利鑄造專家。在許多世紀中，義大利宮曾是國家經濟中心，它包含了皇家造幣廠。1770年大火後，皇家造幣廠遷走，市政廳遷入義大利宮。
我哋應該喺錯嘅入口入咗意大利宮，而家要搵吓售票處喺邊~
行吓行吓，去到一條走廊~
喺地下見到呢堆嘢~
即刻開啟搵貓模式！
好容易就搵到佢~
玩完貓繼續搵，入咗間房~
過埋呢間房就到售票處~
睇吓啲團嘅時間，嚟緊係 10:30 同 11:30，再睇吓而家時間，10:38......
掛住玩貓，過晒鐘都唔知......
而家有成 50 分鐘，又落緊雨，唉~
咁都冇計啦，周圍行吓~
要行嘅都行晒，就返去等吓~
返到去嘅時候，見到有 20 至 30 位老人家，似係等緊個團開始~
睇嚟我哋都係 join 埋佢哋一齊行~
團係 11:30，不過 11:20 就開始~
導遊喺外圍講咗一輪，就帶大家進入意大利宮~
我哋當然等老人家行晒先，最尾先入~
我哋前面最後嗰個阿叔，佢刻意閂門唔俾我哋入~
我哋拉住度門再進入，呢位阿叔同我哋講，要去 office 買飛，我哋同佢講已經買咗~
以上對話，係相方都以友善嘅態度對答的，以微笑收尾~
(後記：呢個阿叔應該係呢團人本身嘅導遊)
意大利宮，我哋覺得有啲悶，冇咩嘢睇，不過最後嗰個小教堂又幾靚~
期間，有個婆婆，知道我哋聽唔明捷克語，向我哋指住牆上壁畫嘅其中一個人物，示意導遊講緊呢個人物~
但其實，知道佢講邊個都冇乜意思，唔知導遊講關於佢嘅乜嘢~
咁當然，我哋梗係有多謝婆婆啦，係真係打從心底多謝佢，婆婆呢個舉動係好善意~
睇完意大利宮出返嚟，停咗雨，就繼續周圍行吓~
Dům U Tří Králů(The Three Kings House)
Kostel Sv. Jakuba(St James' Church)
不過冇開~
教堂對外有個觀景台，個景之前都睇過~
下一站 Phở Hà Nội(Lunch)
有越式泰式中式嘢食~
呢間食店，好快餐形式，得幾個座位，可能主力做街坊外賣生意~
連 menu 都只有捷克文~
舖面得一個年輕女士，落單執檯收錢一腳踢~
睇佢似係越南人~
佢同廚房講嘢就用越南話(估係)；同本地客講嘢就用捷克語；同我哋講嘢就用英文，全部都好流利~
Menu 只有捷克文都唔怕，佢全部有相嘅，我哋又冇咩食物敏感，就咁睇相叫都冇問題~
個女仔話佢可以翻譯俾我哋聽，又或者佢介紹俾我哋都得~
其實都唔駛麻煩佢，我哋主要係想食亞洲嘢，食乜都得~
Čerstvě Letní Závitky(Google translate: Freshly Summer Rolls)
越式蝦春卷~
Polévka s Mořské Plody(Google translate: Seafood Soup)
冬蔭功海鮮湯麵~
Dušená Hovězí Kližka(Google translate: Stewed beef shank)
燜牛𦟌飯~
樣樣都普普通通，都 OK 嘅，勝在係亞洲嘢，都食得開心~
個女仔話好開心我哋叫咗越南嘢，佢話好多本地人入嚟叫親都係泰式或者中式~
食完飯，個天光晒，有啲曬添呀~
本來行程仲有滑道賽道(即係下圖嗰種)，我一直都好想試吓~
做功課時見到 Kutná Hora 有，點都將佢塞入行程~
不過而家由於時間關係，去唔到了~
但其實感覺又冇好失望喎，呢刻去唔到都覺得冇乜所謂咁~
下一站 Chrám Nanebevzetí Panny Marie a Sv. Jana Křtitele(Cathedral of the Assumption of Our Lady and Saint John the Baptist)
教堂建於 13 世紀末 14 世紀初，哥德式風格，18 世紀初重建，為巴洛克風格，後來稱為巴洛克哥德式建築。1995 年，教堂和 Kutná Hora 歷史中心，成為世界遺產的一部分。
教堂內部於 2020 年起，室內禁止攝影，以下圖片來自官網~
呢間教堂唔止可以上第二層，仲可以上埋屋頂嗰層(仍然係室內)，屋頂嗰層有個畫展，不過就同間教堂冇關嘅~
呢間教堂真係幾靚，尤其鍾意個天花同條樓梯~
講起樓梯，由地面嗰層面向樓梯入口，呢一個角度真係幾靚，可惜唔俾影相，但個映像一直都喺我腦海入面~
下一站 Kostnice Sedlec(Ossuary Sedlec)，人骨教堂
Ossuary Sedlec 中文俗稱人骨教堂，是一座小型羅馬天主教小聖堂，是世界文化遺產。這座小聖堂中收藏有四萬到七萬人的骨架，具體數字並沒有統計。這些人骨以裝飾品、家具的形式陳列在這裡。這些人骨多來自 14 世紀黑死病和 15 世紀初胡斯戰爭被殺的當地人，他們原先被葬在 13 世紀末建造的公墓里，這座哥德式小聖堂 1400 年左右建成時掘開了許多墓葬，墓葬中的遺骨就被收藏於其中，因此變成了藏骨堂。
去到售票處，俾三合一票個小姐睇嘅時候，個小姐話噚晚見到我哋，喺噚晚間餐廳 Restaurace Dačický~
佢話見到我哋影碟 potato dumplings，佢估我哋覺得碟嘢好得意~
我哋話，其實我哋乜都影，因為呢個係回憶嚟~
寒暄咗幾句就入去參觀~
教堂內部於 2020 年起，室內禁止攝影~
以下圖片來自官網~
以下圖片來自維基百科~
聖堂入面非常嘈，因為正在建造一個木架，睇形狀就似係用嚟放骨嘅，不過，仲有新骨咩？或者係用嚟頂替舊架啦~
下一站 Supermarket Albert
入去買料準備定聽日嘅午餐~
因為聽日入去布拉格城堡，真係預計唔到要花幾多時間喺入面~
根據網上資料，喺入面食嘢係超級超級貴~
嚟咗捷克食咗咁多餐，對坐低喺餐廳慢慢食一餐已經冇乜渴求~
所以，寧願自己整啲輕食，都唔想食得唔值~
排隊俾錢時，前面係個滿面鬍鬚嘅大叔，我行緊埋去時，佢女伴向後行，可能有嘢未拎返轉頭拎，前面仲有兩個人排緊隊~
大叔突然同我講嘢，佢講捷克語又指手劃腳，由於成面鬍鬚，睇唔到佢表情~
地下有兩米距離指示，唔通佢話我行得太埋？但其實個個都冇跟喎......
呢個時候，佢女伴返嚟，好友善咁打手勢叫我哋行先，同時呢個大叔面露笑容~
我唔知大叔係因為女伴未返所以俾我哋先(但其實未到佢哋，我又覺得佢唔駛咁快決定俾我哋先)，定還是見我哋好少嘢(一包一水)所以俾我哋先，我比較傾向係後者，總之成件事係好友善嘅~
呢刻當然要 say thank you，我哋俾完錢再講多次多謝同 have a nice day，佢哋兩個面露笑容咁 say bye~
下一站 【Praha】Budget Car Rental
之後幾日都係喺布拉格遊走，唔需要用車，而家就揸去還車先~
沿途隨影~
中途因有交通意外，好塞車~
去到布拉格範圍，交通開始複雜，行行吓，行咗入只准電車行嘅路，超尷尬......
一見有機會即刻轉返入行車馬路~
屎塔問，其實可唔可以去旅館度 check-in 放低行李先再還車？
係喎，點解我計劃行程時冇諗到？
所以呢，有時真係當局者迷，不得不承認，有時計劃行程會計劃到個人有啲迷失，會有盲點~
(其實係掩蓋自己唔得醒嘅藉口......)
不過由於較早前塞車用咗好多時間，如果而家要咁做，時間上會有啲緊，甚至會遲咗還車~
唔理喇，呢個主意係好嘅，盡量快手啲~
去到旅館樓下，只有一個 reserve 嘅街位，自然，我唔應該離開架車，無論阻住人泊又好，驚抄牌都好，司機都應該留喺車，隨時開走~
咁就只好辛苦屎塔拎埋行李去 check-in~
我趁有時間就設好個導航，等屎塔返嚟即刻開車~
睇睇所需時間，嘩，要成 25 分鐘？其實唔係好遠咋喎，可能塞車啦~
咁我都幾肯定會遲交車，都唔緊要，遲少少好小事~
搞掂晒就開車去還車，差唔多到目的地時，醒起還車前未入油，頂！
即刻停埋一邊，睇吓邊度有油站~
好彩，好近已經有，不過附近一帶都塞車，可能要啲時間~
我以為布拉格油價會貴啲，又唔係喎，同鄉郊差唔多咋喎~
入完油又塞返去還車，還車時遲咗 25 分鐘~
對方檢查完部車，俾嘢我簽話冇問題喇~
我問佢，我遲咗還車，條數會點計？
佢話遲一個鐘內還車無需收費~
咦，又係喎，我好似都聽過睇過定係點，總之都有啲印象~
還好車，人又喺布拉格，開始要諗吓點找數~
而家天色光亮，時間又唔係真係好晏，我問屎塔，攰唔攰，仲有冇精力去遊覽？
佢竟然答有，仲係諗都冇諗就話有，平時日日喺度嗌攰……
好，我已經諗好咗去邊~
下一站 Museum of Torture
屎塔話明知都係嗰啲嘢，又睇過晒，唔知點解都仲想去~
我個人就已經冇乜興趣，唔係對中世紀嘅 torture museum 冇興趣，係睇過晒唔會再好感興趣睇，尤其前幾日已經喺中世紀城堡實地睇完個好正嘅~
不過佢想睇就同佢去囉~
個出口都幾有 feel~
入面好暗，有啲位又好窄，相就真係影得唔多~
如果不作比較，單單以呢間館嚟講，其實佢做得唔錯，應有盡有，又有氣氛~
如果係第一次睇呢類型博物館，相信會覺得好好睇~
由頭到尾，就只有我哋兩個遊人，我哋行完返出嚟，都未夠關門時間，佢已經掛咗個 closed 嘅牌喺門口~
下一站 Gallery Of Steel Figures
Gallery Of Steel Figures 嘅位置好近 Museum of Torture，安排上冇難度~
呢度有分免費區同收費區，我哋只係睇咗免費區~
前幾日話再返嚟布拉格時，睇吓點樣安排三個想去嘅地方，而家完成咗兩個，仲爭 boat trip 啫~
係時候去食飯~
要去餐廳，一係行 20 分鐘，一係搭車就要 17 分鐘~
我叫屎塔揀，佢話行~
佢係咪啪咗嘢？咁好精力嘅？
不過就算佢揀搭車，當我話個實情俾佢知嘅時候，佢可能都會揀返行~
因為搭車 17 分鐘，當中有 8 分鐘係步行，9 分鐘先係搭車時間，都仲未講要等車~
下一站 U Maltézských Rytířů(Dinner)
本身計劃好會去嘅餐廳係 Ferdinanda - Malá Strana，我哋去到嘅時候係 20:00，佢話已經閂咗門......
網頁呢，就寫收 23:00 嘅~
咁唯有搵第二間~
我哋向旅館方向行，沿途再揀~
經過 U Maltézských Rytířů 時，我哋望吓餐廳外嘅 menu，即時有位女士行出嚟問我哋想食咩~
我諗佢意思係介紹俾我哋啦~
其實食嚟食去都係嗰啲，咁我哋都 OK 嘅，呢幾日嘅捷克菜，俾我哋感覺係求其入一間餐廳都唔會太差~
就呢間啦~
呢間餐廳裝修得好有心思，幾靚~
Sprite & Hot chocolate
Oldbohemian beef goulash soup
鹹到癲！
Pike-perch, mashed potatoes
魚皮唔脆又乾，魚肉少少乾但味道 OK~
Svíčková - traditional creamy sauce served with chicken and dumplings
雞肉乾但個汁個味道相當不錯，dumpling 配 cream，食落幾有趣~
食到尾，店主話呢度已經有好多年歷史，下面以前係墓穴嚟，有興趣可以落去睇吓~
下層堅正，如果佢早啲講就好，喺下層食氣氛一流！
埋單時見張單多咗一項收費，問佢佢話係服務費，我之前都聽人講過遇過咁嘅情況，張單包埋服務費，佢未必講你知，呢啲情況可以唔駛俾貼士~
不過我照俾齊頭數，當參觀費又好乜都好~
(後記：食完呢餐飯，超級口渴......)
食完飯就行返旅館~
難得嘅夜景~
今晚間旅館會連續住三晚，呢間旅館應該都有啲歷史，又夠大，仲有按摩浴缸，幾正~
沖涼嗰時感到個水壓超級強勁，勁到都唔敢開咁大，驚啲水會穿過個身體~
不過屎塔沖完到我，只剩暖水......等極都只有暖水......
聽日要反映吓~
Book 呢間旅館時，我一廂情願以為有早餐，原來係加錢先有，不過價錢唔平，所以決定唔加~
旅館入面有張紙，都係啲溫馨提示嚟，佢有講附近有間超市開七點，咁聽朝想食嘢都有地方買到嘢食，咁就掂啦~
沒有留言:
發佈留言