伏見稲荷大社 → 東福寺 → 壹錢洋食 → 袛園 → 八坂神社 →
清水寺附近嘅著名街道 → 清水寺 → 地主神社 → 花見小路 → 鴨川 → かっぱ寿司
今日車程：7
今日唔駛點搭車，咁意味住會行到死為止~
今次日本之行，一般出發時間會計劃喺早上七時三十分，我唔知一般人會點計劃，我只係覺得七時三十分出發，其實都算幾早，幸得屎塔陪我癲，心感幸福~
我特意提起出發時間，係因為我哋今日去得更盡，六時三十分就要出發，天未光就要起身，又唔係去睇日出，真係夠晒癲！ XDDD
計劃行程時，要喺「伏見稲荷大社」同「東福寺」二揀其一，但兩個地方我都好想去，實在難以取捨，而且兩者鄰近，如不能同遊，深感可惜~
其實我心底裡已經放棄咗東福寺，唔係因為我更想去伏見稲荷大社，而係我知道屎塔好想去伏見稲荷大社，但我心有不甘，不停掉行程，睇吓有冇辦法可以去埋東福寺，唉，時間係得咁多，有咩可能塞得入吖~
實在冇咩辦法，唯有出最後一招！我向屎塔提議，不如早啲起身，去晒兩個景點，屎塔根本就唔覺得有咩問題，所以諗都冇諗，答應了~
非常喜愛屎塔呢種咁爽嘅性格！
今日第一站係「伏見稲荷大社」
認識呢個神社，係因為屎塔個妹上次去完日本返嚟，睇過佢啲相，相當吸引，所以先決定我哋都要親身去一次~
由於呢個神社係以鳥居出名，所以我本來都誤以為呢度叫「千本鳥居」
其實呢個神社會為某啲捐獻者樹立鳥居，久而久之，樹立嘅鳥居已經過千個，「千本鳥居」因而得名~
酒店 → 伏見稲荷大社
大阪地鉄： 堺筋本町 →→→ 北浜
京阪電鉄： 北浜 →→→ 丹波橋
京阪電鉄： 丹波橋 →→→ 伏見稲荷
天都未光晒就出發，不過感覺上同前幾日冇咩分別，條街一樣咁冷清，只係天色比較暗一啲~
喺日本搭鉄路，有一點真係幾有趣~
由 A 點到 B 點，如 B 係細站，特急或急行車唔會停，但亦可以有好幾種搭法，最簡單嘅搭法，可以係一程過，唔需要換乘；亦可以係先搭特急或急行車到最近 B 點嘅大站，再換乘普通車次~
通常嚟講，後者會快一點，視乎班次而定，今日就有咁嘅體驗~
做功課時，知道搭京阪電鉄由北浜到伏見稲荷，係同一路線，可以唔駛轉車，諗住唔駛轉車就梗係最好，但唔同網站給我嘅結果都係要到丹波橋轉車，我初時諗極都唔明，直至睇返啲行車時間才恍然大悟，時間上慳返唔少，梗係寧願轉車啦~
到咗伏見稲荷車站，同其他站好唔同~
未到神社就見到佢嘅鳥居~
到咗神社，我一心係想睇千本鳥居，完全忽略咗神社本身嘅可觀性，咁嘅旅遊心態，真係要不得，我竭力將我嘅耐性拎出嚟，慢慢欣賞神社本身嘅氣氛~
呢個神社供奉嘅神明，係狐狸~
佢哋除咗用繪馬，仲會用呢種彩帶祈福~
終於到去到我哋期待已久嘅千本鳥居~
不過現場同睇相好唔同，睇相嘅密好多，又好似冇咁高咁~
過咗呢排鳥居先發現，後面真係有啲又矮又密嘅鳥居~
兩排都係指向同一個位置~
過咗呢排鳥居，見到同出面唔同嘅繪馬，係狐狸形嘅，好特別~
有啲仲畫得幾有趣~
下圖左首白色紙上寫著：
This means heavy light rocks. If you felt this rock is light you will get your wish.
經過我哋拎起過兩舊石，兩舊重量相約，但起碼有 10KG 重，一般人要拎起 10KG，怎可能覺得輕？
睇嚟願望註定泡湯了~
其實我哋只係行咗十份一到，再向山上行都仲係神社嘅範圍，不過我哋一心想遊千本鳥居，所以冇打算繼續行落去~
下一站係「東福寺」
東福寺係賞楓名所，出發前睇過一本專門介紹京都嘅書，作者講過一句說話：如果在賞楓季節遊京都，沒有到過「東福寺」及「永觀堂」，等於沒有到過京都賞楓。
睇作者嘅文章，我感到佢很愛京都，對京都認識相當之深，好有說服力，我對佢嘅說話毫無保留地相信，所以，我極力安排能到東福寺一遊~
伏見稲荷大社 → 東福寺
京阪電鉄： 伏見稲荷 →→→ 東福寺
離開伏見稲荷大社時，入咗間便利店買嘢食買嘢飲，買咗包巨型桃哈多，巨型唔係巨在包裝，係巨在食品本身~
我自己就好少食零食，我唔知道呢種桃哈多係咪香港都有得賣，甚或周圍都有得賣，我淨係知道，桃哈多係童年回憶，我都已經好耐冇食過，一嚟就嚟包咁過癮嘅，感覺極之有趣！
我以為食幾舊就會好膩，原來佢唔係好甜，大大舊食落口仲好有質感，不過咁大舊，冇乜幾多舊你食就真嘅~
出咗東福寺站，仲要行一段路先去到，路程約十五分鐘~
去到個寺度，只見到零散嘅楓葉，我有啲失望，會唔會係未開得切呢？再仔細睇吓，原來真正嘅楓園，喺另一邊，買票就入得去，即刻做嘢！
過咗圍牆之後，完全係另一個天地，一個大大大嘅花園，裡面全部都係唔同顏色嘅楓葉，陪伴住嘅，仲有超級勁多人......
園裡面又有一個庭園，好多京都嘅寺都會有個庭園，庭園內又會有個沙石池，再喺沙石池上面設計出唔同嘅花紋，有時仲會用啲石表山，沙代表海，睇落真係有幾分禪意，或許每人都會各自參透到唔同嘅意境~
去完東福寺，先真正叫做賞過楓，如果冇安排到呢個景點，相信會好遺憾~
下一站係「袛園」
袛園以前係「舞妓」同「娼妓」嘅集中地，今日就變成帶有濃厚京都風味嘅摩登街道~
東福寺 → 袛園
京阪電鉄： 東福寺 →→→ 祇園四条
離開東福寺步向鉄路站時見到隻貓，佢好熱情，同佢玩咗一陣~
一出袛園四条站就見到南座~
到咗袛園，感覺好特別，成條街都好舊日本，但又好現代，我又唔覺得唔夾，幾得意~
經過壹錢洋食，見到佢開咗門，咁就奇喇，壹錢洋食開十一點，我預計嚟到嘅時候係未夠十一點，所以先計劃行吓袛園先~
望望時間，原來已經十一點，比我預期晏咗，為免行回頭路，不如就食咗嘢先啦！
先唔講壹錢洋食係食咩先，講講佢嘅主題，成間嘢都充滿性話題嘅繪馬，莫講話兒童不宜，就算對於我嚟講，我都認為有部份實在太露骨，已經超出幽默嘅範圍，可以話係淫穢~
至於呢間嘢係食咩嘅呢？睇睇 menu 就知~
冇錯，成間嘢就只得一種食品，仲大大個 menu，夠晒玩嘢......
咁其實又係咩嚟呢？
材料有：
九條蔥、櫻蝦乾、牛肉、半熟蛋汁
成舊嘢都幾鹹，冇咩特別~
下一站係「袛園」
轉出大街已經係袛園商店街，不過舖頭方面，都係啲地道嘢，唔係咁感興趣，反而我幾鍾意條街~
咁多間舖頭，唯一有興趣嘅係「よーじや」
呢間嘢係賣化妝護膚方面嘅用品，對佢有興趣嘅，當然係屎塔啦~
屎塔喺度買咗好多嘢，其中一部份係手信嚟~
下一站係「八坂神社」
八坂神社，喺京都都好出名，但出名喺邊，我就唔係好清楚，反正只係喺袛園商店街嘅一端，順道一遊~
我對於八坂神社嘅門口，有種好模糊嘅印象，記得上一次嚟京都，都好似去過相類似嘅地方，可能我真係嚟過都未定~
不過呢個神社，從遊客角度，不比其他神社特別，都係咁上下嘅模樣~
八坂神社後面就係円山公園，plan 行程時已經決定唔會到，因為呢個公園賞櫻會比較好，賞楓就不算甚麼~
但我哋行行吓，唔小心就入咗呢個公園，反正入到嚟，就係咁二行吓啦~
見到有雪糕賣，我哋自然唔會錯過~
下一站係「清水寺」附嘅著名街道
呢啲街道包括：
寧寧之道、石塀小路、一念坂、二寧坂(二年坂)、產寧坂(三年坂)
去呢幾條街，亦都係步行可達，途經「花見小路」，決定先遊~
本來我安排好黃昏先遊花見小路，安排黃昏時間係因為有機會碰上真正嘅藝妓，但屎塔話到時影相唔夠光，好難影得清楚，不如而家行吓影吓相先，夜啲再返嚟~
我睇睇時間，認為可以，所以都冇反對~
花見小路集中咗好幾間正宗日式飲酒嘅地方，而且仲會有藝妓表演，聽聞只會招待熟客，所以門口冇人招呼，亦唔會有好起眼嘅店名或裝飾，亦聽聞預約一次非常昂貴！
行完花見小路，睇睇地圖，可以唔駛走回頭路，喺街尾繼續行都可以去目的地，不過唔知我係咪發緊夢，睇住本地圖行都行錯晒，好彩唔係錯咗好多，及時修正~
寧寧之道冇咩特別~
石塀小路就有少少可觀性~
行完石塀小路就行返出寧寧之道，搵個地方坐底休息咗一陣先再行~
一念坂、二寧坂(二年坂)、產寧坂(三年坂)都係差唔多嘅街道~
下一站係「清水寺」
清水寺對一般遊客嚟講，最出名可能係佢有部份建築係建於懸崖上，而下面承托住嘅木架，完全沒有用一根釘，只係靠入榫位去固定~
上次嚟清水寺，到而家嘅印象，最深刻都係上述所講嘅特點，其他嘅已經唔係好記得~
屎塔第一次遊京都，冇理由唔去遊一遊清水寺咖，而我就好期待睇一睇，被楓葉包圍住嘅清水寺~
行完產寧坂上幾級樓梯就已經見到清水寺嘅入口~
對於清水寺，其實都冇咩好講，著名景點，必遊項目，不過原來比我印象中細得多~
屎塔突然有個鬼主意，佢行過去對面建築，我就停喺原地影佢，佢講完就走咗去，喺我視線範圍內消失咗~
呢刻我有啲不安，我深知唔會有啲咩事發生，亦唔會走失，但我就係有少少擔心~
清水寺入面仲有個地主神社，上次嚟呢度根本就唔知清水寺同地主神社係兩樣嘢嚟，以為係清水寺嘅一部份......
地主神社上面有兩舊戀愛石，傳說如果可以喺閉上眼由第一舊石走到第二舊石，就可以同你喜歡嘅人一齊~
問題係，根本冇咩可能中途冇碰上其他遊人~ XDDD
其他清水寺嘅風景~
下一站係「花見小路」
正如我之前講過，黃昏時份會返返去，睇吓會唔會遇到真正藝妓~
回程一樣走返相同嘅路，再次步進產寧坂，我哋見到有間舖頭賣嘅食品，非常有趣，簡直係逆市而行，我好懷疑會唔會滯銷~ XDDD
(留意左邊求肥餅，我唔知佢本身係咩意思，但就咁睇都幾好笑~ XDDD)
再次落到寧寧之道，即係今午休息果度，我哋再次坐低休息~
其實由今朝食完壹錢洋食果少少嘢到而家都冇嘢落肚，都有少少肚餓，我印象中附近有章魚丸賣，四圍行吓，真係有，不過睇個款好似擺咗好耐又唔熱咁，唔係好想買，不過附近都唔似有小食賣，殺啦！
食落認真麻麻，不過又真係好過冇嘅~
休息夠就行返落花見小路，不過最後都遇唔到真正藝妓~
夜晚嘅花見小路~
下一站係「鴨川」
鴨川係一條小川，其實冇咩特別，睇過資料，話會有啲食肆將店舖架於川邊，以木架支撐，反正去食晚飯時會經過，就嚟睇吓影吓相~
不過嚟到現場就睇唔到上述講嘅嘢~
下一站係「かっぱ寿司」(河童寿司)
かっぱ寿司係一間平價但有一定質素嘅寿司店，而且仲有一樣有趣設計(詳見下文)，對不暗日語嘅人嚟講，非常貼心！
仍然係步行可達~
去到問口，見到好多人等緊位，入面有部機，係攞飛仔排隊等位之用，但上面有幾項選擇，全部日文，於是我就問櫃面果位小姐，佢當然意會到我遇到咩問題，但問題係，佢完全唔識英文，叫佢埋嚟作用不大，佢喺度指手畫腳，是旦啦，你俾張飛我就得~
我又記得旅遊書提過，叫號只會用日語，我又走去果位小姐到，我用最簡單嘅英語，話佢知到咗提我，因為我唔識聽日文，佢似有反應又冇反應咁，自求多福啦~ @@
等咗幾個字，果位小姐望住我又伸隻手出嚟，我諗佢係示意我俾張飛佢，佢就喺張飛到寫上檯號，我哋就開始去搵張檯~
再問入面啲職員，張檯原來喺樓上~
坐低咗，開始試用佢呢個有趣又貼心嘅設計~
迴転帶分兩層，下層係平時見慣見熟嘅迴転帶，睇啱就攞睇啱就攞~
上層就係「新幹線速遞」，負責運送我哋點嘅食物~
落單點食物，唔需要同職員講，係你同佢講佢都唔會理你~
落單就要透過每張檯上方嘅一個輕觸式螢幕，點選心水食物，每款食物都有圖樣，唔識日文完全冇問題~
點選後就等待食物由新幹線速遞送到~
飲品係自助形式嘅，我斟第一杯嘢，見到有泡嘅，唔知咩嚟，冇咩所謂，咪斟嚟試吓，返到埋位，飲咗一啖，成個人呆咗，原來係啤酒嚟......
浪費都冇法，我同屎塔都唔飲啤酒嘅~
至於食物方面，碟碟 105円，我當你兌 0.1，都只係 $10.5 港幣，但新鮮度絕對超越板長或羽寿司呢類較貴嘅迴転寿司店！碟碟軍艦嘅紫菜都係脆嘅！
真係有啲不可思義！直達痴線程度！
食咗 19 碟，兩條粉腸食到仲飽過食放題，埋單港幣 $200 仲有找，仲要咁鬼新鮮，真係超級推介！
喺食嘢期間，迴轉帶嘅另一邊，有一對講廣東話嘅中年男女，唔係好識用個系統，佢哋以為每攞一碟寿司就要喺個系統度登記一次，不過呢兩個人好似冇咩禮貌咁，我又唔係好想幫佢哋，但我最後都係忍唔住，走咗過去教佢哋用~
如果佢哋係一對有禮貌嘅人，而我又幫到佢哋，成件事真係開心得多~
食完呢餐就結束今日行程，返酒店前買咗明日早餐同今晚宵夜，宵夜仍然係雞蛋布甸~
今日真係由朝行到晚，攰到爆炸！
かっぱ寿司 → 酒店
京阪電鉄： 三条 →→→ 北浜
大阪地鉄： 北浜 →→→ 堺筋本町
返到酒店，竟然俾我發現有曱甴！好彩唔係大隻果啲，一厘米長到啦，即刻開殺戒！
不過租住平價酒店，又只係一隻同咁細隻，我又覺得唔係話唔可以接受嘅事情~
沒有留言:
發佈留言