Rome
Basilica di Santa Maria degli Angeli (教堂)
Chiesa di Santa Maria della Vittoria (教堂)
Piazza di Spagna (西班牙廣場)
Fontana di Trevi (許願池)
Chiesa di Santa Maria della Concezione (人骨教堂)
Pantheon (萬神殿)
Piazza Navona (廣場)
Castel Sant'Angelo (聖天使城)
Vatican
San Pietro (聖彼得廣場)
今次件行李有點重，我哋都知道會超過航空公司規定嘅 20KG，不過超少少通常都俾過嘅~
一上磅，24.5KG！一見到呢個數字，有啲擔心唔俾過，但結果對方都冇出聲，順利通過~ =P
香港直航到羅馬~
第一次搭咁長途嘅飛機，我都好好奇究竟會有幾多餐食，原來係有兩餐~
第一餐~
食完第一餐，我哋盡量唔瞓住，遲啲先瞓，希望可以減少到埗後對時差嘅影響~
第二餐係早餐嚟~
其實十三個鐘頭機雖然有點辛苦，但其實都唔算太難捱太難過~
到達羅馬時間俾預定嘅早咗成個鐘~
我以為入境時會問好多嘢，點知原來勁求其，接過護照，係咁二望咗一眼，打印，過得...... @@
拎埋行李跟住指示行，有個意大利男人(我估)跟住後面，佢見我個篋好重，搭電梯時望一望我哋個篋同我哋講咗句：「Heavy」，又示意自己有兩個篋都係好重，感覺好友善~
一路去到買車飛出市區嘅地方，見到有幾部自助售票機，得一部冇人用，不過走埋去點篤都冇反應，我哋都懷疑呢部機係咪壞咗，就喺呢個時候，之前同我哋講嘢果個意大利男人又出現同我哋講嘢，佢話：「out of service」，原來螢幕上果句意文係解 out of service，我哋 thanks 完佢就去另一部機搞~
我哋首先就攞咗張必需到當地取票嘅車飛先，呢張飛出發前已經上網買咗，不過到當地要憑 code 換票先算真正車票，呢張飛係一星期後去瑞士嘅車飛~
好容易就攞到張飛，跟住就諗住買埋 Leonardo Express 車飛出市區，不過付款方式要用信用卡，我哋今次旅程都冇打算用卡俾錢，只當後備，只好走去售票處排隊~
買完飛就跟指示走，結果越行越唔對路，最後睇返原來自己睇錯咗，面對住售票處向左行，行五十米就到，我就走咗去右邊，仲行咗幾遠吓先醒覺！
我不停咁提自己上車前切記要拎張飛去部黃色機度打飛，否則捉到罰 EUR100 大元！
我哋放張飛入部機度，搞極都冇反應，偷偷望吓隔離點做，原來要放到最左先打到飛，上車前會有人查飛~
入咗歐洲境內第一程火車，我哋都好著眼點樣放個篋最穩陣，最後搵到個位可以坐兩個人，又可以睇到個篋嘅，正當想問吓對面個女仔有冇人嘅時候，個女仔先開聲：「坐吖，冇人咖~」聽佢講嘅廣東話，相信係香港人，佢同另外一個男人用英語交談，望一望，原來又係之前同我哋講嘢果個男人！
車程約半小時，個香港女仔同個意大利男人一直都有交談，另外有個意大利男孩對呢個東方面孔嘅女仔好有興趣，但個男孩又唔識講英文，好自然，果個意大利男人就充當臨時翻譯員啦~
到埗後，就到咗傳說中，羅馬其中一處好雜嘅地方 - Roma Termini，即係羅馬主要嘅火車站~
不過，親身到過就會發現，感覺係一啲都唔雜，可能係時間問題呱，不過我哋都唔會放下戒心，保持警覺~
出咗火車站，梗係搵我哋已經訂好嘅旅館先啦~
由於做足功課嘅關係，好容易就搵得到，不過我哋太早到喇，間房仲未預備好，館主仍然好熱心咁招待我哋，等佢做好啲基本嘢(我見到佢換床單)後就俾我哋入房，佢果種熱心，唔係裝出嚟嘅，果種熱心係好真誠，初步印象非常好！ =D
放低晒行李，準備好出門要帶嘅嘢，正式展開我哋嘅旅程！
步行在羅馬街頭，首次衝出亞洲嘅我哋，好似發緊夢咁，好唔現實，心情好興奮~ =D
附近街景~
第一站係 Piazza della Repubblica (共和廣場)
呢個廣場由旅館步行過嚟就得，其實我對呢個廣場興趣不大，不過我見個個去羅馬都會提到呢個廣場，反正我去某個教堂係一定會經呢個廣場，就當係其中一個景點去參觀吓啦~
下一站係 Basilica di Santa Maria degli Angeli (教堂)
呢個教堂就喺共和廣場隔離，首次歐遊嘅我哋，第一次親身到來咁靚嘅教堂，不禁大驚小怪咁低聲嘩咗一聲。我哋知道，嚟緊仲會有更多更靚嘅教當等緊我哋去參觀，非常期待！
講返呢間教堂，原來佢原身係 Terme di Diocleziano 浴場嘅一部份，羅馬帝國垮台後被毁棄，其後由 Michelangelo 改建而成嘅，所以佢嘅外表係好似有點廢墟嘅感覺~
附近街景~
下一站係 Chiesa di Santa Maria della Vittoria (教堂)
仍然係步行可達，可惜外牆在維修中，全給封了~ =(
呢間比之前果間細得多，但卻相當華麗~
下一站係 Piazza Barberini (廣場) 及 Fontana del Tritone (海神噴泉)
我哋喺呢個廣場休息咗一陣，休息完就繼續行，途經雪糕店，嘆返杯先！ =D
我哋揀好杯，揀埋口味就同職員講，我哋以為一杯一種味，但見佢將我哋講果兩種味放埋落同一杯度就知一杯可以有兩種味，見佢拎起咗第二隻，嗱嗱淋求其揀咗另外兩隻味~
一杯朱古力 + 雲妮拿；一杯檸檬 + Cappuccino
最後佢問我哋要唔要 soy，其實都唔知咩嚟，是旦啦，殺埋佢！
除咗檸檬，另外果三種味都幾好，個檸檬味實在太酸，唔係好頂住~ @@
佢另外加果種 soy，好鬼甜，下次唔會再加！
下一站係 Piazza di Spagna (西班牙廣場)
仍然係步行可達，不過今次就行得遠少少~
我哋知道嚟意大利旅遊，要小心小偷，有人提醒要特別注意吉卜賽人，我哋亦都知西班牙廣場呢類著名旅遊地方，亦都係小偷搵食嘅地方，我哋嚟到呢度，警覺性自然都提高咗，不過由嚟到，行上去又行返落去，一個吉卜賽人都見唔到，其他嘅可疑人物都唔多覺，可能因為現場有一班警察喺度巡邏有關~
實在不明白何以呢條階梯會咁出名，人多到針都插唔入咁滯！
由階梯上到頂，我哋搵咗一處地方休息，屎塔嘅休息方式，毫不例外，瞓，而我就坐喺度細賞途人百態，真係寫意~
其間我見到有東方面孔嘅女人企喺欄邊揸住支金屬伸縮棒，棒頂有個公仔，唔算大，明顯係領隊嚟。佢不停向下探索，我估計佢係搵緊人，同時希望呢一個人睇到佢手上所持嘅公仔，不過喺太陽咁猛烈，公仔又咁鬼細嘅情況下，相信都幾難睇到~
最後佢都係放棄，走埋我哋隔離同其他人講嘢，一開口就係唔純正嘅廣東話，再加上其他人嘅回應，我相信係星加坡團。領隊用「佢哋」嚟形容想尋找嘅人，即係唔只一個啦，又話打電話都搵唔到佢哋，個領隊顯得焦躁又無奈，最後就唔知點喇~
其間我又見到有幾個人揸住鮮花係咁隊埋啲女士度，叫佢哋買，佢都真係隊得好埋，不過我就冇見到有一個會買，全部都因為佢隊得咁埋而閃避~
現場又有好多人喺度畫畫謀生，亦有售賣紀念品嘅臨時檔口，所謂臨時，即係放一塊布喺地下，布上放滿貨品果種，就喺呢個時候，有部警車駛過，除咗畫畫人之外，所有賣嘢嘅人即時逃走，明顯係走鬼啦！
不過警車並冇停低，果啲小販見狀，十秒之內全部歸位，成個情況就同見到警車前冇分別~
太陽開始曬到上面，我叫醒屎塔，等佢回返神時就同佢影吓相，為咗就位，我越坐越過，突然間感到有人篤我，我第一時間以為有人對我有不軌企圖，保持警覺咁向後望去，見到一位滿臉友善笑容嘅西方大叔同我講嘢，佢唔係講英文，我唔知佢講咩，佢再指一指我身後，原來佢想講我知，我再坐過啲就會坐正石上嘅雪糕迹~
其實係咪我太緊張呢？嚟咗意大利半日，不曾見過疑似有不軌意圖嘅人，但和善嘅人就隨處可見，睇嚟呢度嘅治安並不如想像般差，而意大利人嘅友善同熱情，都令我更享受~ =)
本來計劃好下一站去 Chiesa di Santa Maria della Concezione (人骨教堂)，不過時間比原定早咗，教堂未開，我決定跳一跳去再下一站，雖然唔係好順路，之後仲要走回頭路，不過都冇辦法~
下一站係 Fontana di Trevi (許願池)
仍然係步行可達，真係一山還有一山高，呢度啲人多到不得了，冇決心係決不能走到池邊好好參觀一番的！
終於嚟到傳說中嘅許願池，唔......，雖然真係好靚，但又唔及見到啲教堂內部咁激動咁啦~
不過同西班牙廣場一樣，唔覺有咩可疑人~
時間仲係好早，距下個景點開門仲有成兩個鐘，睇嚟可以慢慢慢慢咁行過去，途中睇吓搵間餐廳又慢慢慢慢咁食吓嘢~ XDDD
途經一間餐廳，見佢門口可以睇圖叫嘢食，貪方便就坐低咗~
一人叫咗一碟再加一支有氣水~
Lasagne al Ragù
唔錯唔錯~
Spaghetti allo Scoglio
有鮮味，真係唔錯，唔係話真係好好食，不過作為冇咩期待嘅普通一餐，都幾好~
食完嘢仲有啲時間，早啲行過去望吓街好過坐喺度~
周圍行吓，無啦啦就行咗去 Fontana delle Api (蜜蜂噴泉)
藍精靈棋盤~
的骰巴士~
下一站係 Chiesa di Santa Maria della Concezione (人骨教堂)
註：內部禁止拍攝
入到嚟，我又冇一種好驚嘅感覺，都係當藝術嘅一種咁去睇，冇咩特別，只係將啲人骨砌好晒，做成唔同圖案放上牆同天花板，有啲就堆得靚靚地咁~
其後我先知原來佢上面係有座教堂咖，冇去到添~ >_<
不過睇相就冇咩特別，唔算太可惜~
附近街景~
下一站係 Pantheon (萬神殿)
仍然係步行可達，我哋到達嘅時候，見到外面有人開始排欄，我哋以為只係控制人流，但係越望越唔妥，似係封門唔再俾人入，我哋咩都唔理，行快兩步，趁佢未封晒走入去~
入到佢最吸引我嘅係個圓頂，其實我都唔知點解，睇到陽光從頂部嘅洞射入嚟，再投射到圓頂內某處，好似有種好莊嚴嘅感覺~
我哋冇估錯，真係截人，我哋入咗去唔夠五分鐘就開始清場，好彩入過吓嚟叫做到此一遊，自然，門口早已封晒唔俾人入，真係嚟遲啲都入唔到！
萬神殿外的噴泉~
順便行埋過 Piazza della Minerva (廣場) 及 Chiesa di Santa Maria Sopra Minerva (教堂)，不過冇入到教堂參觀~
下一站係 Piazza Navona (廣場)
仍然係步行可達，廣場呈長方形，內有好多賣藝人，亦有好多畫家，如果有咁嘅閒情逸緻，喺度消磨數小時，實在係人生一大樂事~
嚟到呢度，已經完成晒今日計劃好要去嘅地方，時間尚早，睇吓邊度近，去吓之後計劃好會去嘅地方，咁果日啲時間就好用啲~
下一站係 Castel Sant'Angelo (聖天使城)
仍然係步行可達，不過我係冇打算入裡面嘅，睇過好多遊記裡面嘅相，唔係好感興趣，對外面反而仲有興趣~
睇完聖天使城又見到走鬼~
附近街景~
下一站係 Piazza San Pietro (聖彼得廣場)
仍然係步行可達，去到廣場，見到好多人排緊隊，所以我哋都只係遊覽吓個廣場~
本來想去 Piazza Venezia (威尼斯廣場)，不過有意料之外嘅小問題發生咗~
呢段旅程並冇預先計劃好，所以我只能憑做功課時嘅記憶去搵車搭~
首先去報紙檔買車飛先，跟住再去搵巴士，我見不遠處有幾個巴士站牌，走埋去睇吓，全部路線都唔啱，冇理由咖，我記得有一加經咖喎，於是我又走去報紙檔問吓老闆，佢向反方向指一指，原來喺另一邊，自成一角，所以唔係好覺~
去到已經見到十數人，相信好快有車~
等呀等，等呀等，由十數人累積到數十人，都仲係未有車，好明顯唔係正常情況，不過如果放棄，走去搭 metro 又好鬼遠，今日已經行到死咁滯，真係唔想再行~ =(
我又唔見有人放棄，所以我都冇諗住放棄，最後等咗足足四十分鐘，終於都有車！
浪費咗咁多時間，我打消咗去威尼斯廣場嘅念頭，反正搭呢架車都可以返到旅館~
部車一埋站，見到車上面已經有好多人，等緊車嘅人好似餓鬼搶屎咁，係咁逼上部車度，大家都好有決心，好似搭緊尾班車咁，一定一定要上到，最後都上得晒，不過大家都變晒罐頭入面嘅沙甸魚~ XDDD
上咗車要打飛~
部車行咗一段時間，越行越慢，我以為開始近 Roma Termini 多車啲，塞塞哋一啲都唔出奇，不過塞塞吓直情唔行，等咗五分鐘有多，開始唔對路，有人落車，我哋梗係唔落車住，睇定啲先~
等吓等吓，隔離線開始出現單車群，係好多好多單車，咩人都有，有啲仲打鑼打鼓咁，似係有活動又或者係示威咁款，好密集嘅單車行咗成十分鐘都仲有好多，大大話話有千幾二千架~
突然聽到司機講嘢，我哋當然聽唔明，但佢講完之後，車上面 95% 嘅人都落車，我哋又跟住落埋一份，睇環境我覺得唔會離 Roma Termini 太遠，買咗嘅 offline maps 終於都要出場~
一睇，原來轉個彎已經係今朝嚟過嘅共和廣場，咁就易啦！
行到仲有幾分鐘就到 Roma Termini，開始落雨，仲係果種越落越大嘅雨，今朝出嚟時見幾好天，冇拎到雨褸，唔理咁多，反正就到，衝呀~
我哋成身濕晒咁衝咗入 Roma Termini，再搵超市買生果食~
喺超市買生果，同香港好唔同，每種生果有個編號，同一編號嘅生果只可以放入一個袋入面，拎生果時要戴手套，將同一袋生果放上電子磅，輪入編號，佢就會列印產品資料，係貼紙嚟，將佢貼上袋交俾收銀就得~
買完生果返旅館，由於我部相機只係普通 DC，今日已經要用到第三舊電，返到去第一時間梗係叉電先~
一拎個轉插器出嚟準備叉電，咦，點解插座係一排三孔(。。。)嘅？我明明睇好晒資料係兩圓腳咖喎！唔通呢種係舊制式？
咁唯有求助於館主，佢借咗個轉插俾我，係香港三腳轉意大利三腳，搞掂！
呢間旅館包晚餐，我哋都好想知係食咩嘅，結果真係令人意外，竟然係食餃子！除咗餃子，仲有餃子，六大碟餃子，唔夠仲可以添~ @@
吓？唔係下化？真係有啲失望，不過唔駛錢，唔要求得咁多~
其實食落味道係唔錯，而且冇話食到好厭嘅感覺，算係咁~
好嘞，睇吓個橙甜唔甜先~
不過，有啲唔妥，點解啲肉偏紅色嘅？一食，頂！原來係西柚嚟~ XDDD
其實今日間中有微微雨，不過無損我哋興奮嘅心情，希望聽日好天啲啦~ =)
沒有留言:
發佈留言