《瞬間看地球》Stranger's Blog: 2010.11.23 神戶、有馬、六甲山 (日本第三天)

今日行程：
神戶 Mediterrasse → 北野異人館 → 平壤冷麵 → 一番商店街、大正筋商店街 →
鉄人広場 → 有馬溫泉區 → 六甲山頂 Garden Terrace → 六甲山上天纜台 →
洋食いくた → 美尼堅公園 → 神戶港震災紀念公園

今日車程：13 程

今朝早餐，好自然就係食返噚日自製嘅杯麵，不過味道及唔上之前喺便利店買果啲，但都唔錯嘅~
今日第一樣要克服嘅問題，就係腳趾尾嘅傷患，右邊冇咩問題，左邊呢，根本就冇可能就咁著對襪唔理佢，我試吓搵啲紙巾繞住隻腳趾再著襪同鞋，好彩都算 OK，應該冇問題~

今日第一站係「Mediterrasse」
Mediterrasse 係座落喺神戶嘅一個普通商場，但外牆設計就以地中海為主題，有人話佢靚，有人話佢醜，我就覺得佢特別，反正唔駛好刻意咁去，算係順道一遊~

酒店 → Mediterrasse
大阪地鉄：　本町 →→→ 梅田
阪急電鉄：　梅田 →→→ 三宮

由酒店行去地鉄站起碼要十分鐘，絕對考驗到用紙巾包傷口是否可行~
未到地鉄站已經有結果，當然係失敗，要一拐一拐咁走到地鉄本町站，打算見到藥房就買膠布，一路去到地鉄梅田站，步行往阪急站途中先見到有間藥房，即刻走入去買膠布~
我哋揀咗一種非常薄身同貼身嘅小圓型膠布~

藥房隔離有條巷仔，我哋見冇咩人行，就竄咗入去貼膠布，由於冇得坐低，我又多嘢拎住，只好委屈屎塔幫我完成任務~
除咗對鞋，發現紙巾已經完全走位，唔怪得咁鬼痛啦！
新買呢種又貼又薄嘅膠布，感覺有啲神奇，貼完好似貼咗一層皮膚落去咁，望落去係睇唔到嘅，摸落去亦唔多感覺到膠布嘅邊緣位，要極仔細咁去感受先感覺得到，非常薄同貼，當然，摸落去塊膠布度同摸落去真正皮膚度嘅感覺，梗係唔同啦~
搞掂之後行兩步睇睇，掂晒！
但係一路去到阪急三宮站，越行就越痛，又返返去今朝紙巾走位時嘅痛楚，我相信塊膠布同樣都走咗位~
出咗阪急三宮，見到 7-11，即時走入去睇吓買唔買到普通果種膠布，好彩買到~

時間尚早，條街冇咩人，我哋走咗入個凹位，又開始展開急救工程，工程師仍然係屎塔~
今次先貼薄膠布，取其貼身舒適嘅優點，再貼上普通膠布，取其厚身及穩固，希望可以減少與傷口之間嘅磨擦而走位~
著返對鞋，係就係因為有舊嘢喺度唔多舒服，但總好過不停磨擦住個傷口，而家嘅感覺係穩陣又唔痛，而且唔難適應~

行去 Mediterrasse 唔太遠，離阪急站兩三條街嘅距離，好快就到~
成個畫面好似畫出嚟咁，有啲唔係好真實~

下一站係「北野異人館」
以下旅遊書對「北野異人館」嘅註解節錄：
幕末至明治時期因日本人才缺乏，洋建築的設計與用家均為洋人，被日本建築界通稱為「異人館」。而明治後期有大量洋人建築移入「北野」區，「北野異人館」因此得名。

由 Mediterrasse 到北野異人館，只需步行便可，但有一定路程，而且沿途都係上斜，慢慢行的話，二十至三十分鐘走唔甩~
本來可以搭 City-Loop 上去，但如果時間安排到，我反而想行吓神戶嘅街道，又或者係一個借口去逃避研究點樣搭 City-Loop~ =P

途中見到從未喺香港見過嘅美國跑車 Chevrolet Corvette，靚！

er......咩屋呢？

由斜路上，行咗唔係好遠，就見到有售異人館嘅門票，其實我就有啲猶豫，書中完全冇提過可以喺呢度買飛，都係話上到去喺啲館前買，但呢度係日本，我又唔覺得會有一檔騙人嘅舖頭可以大模斯樣咁喺度做生意，我放下戒心，走埋去睇睇~
但佢只售三館 passport，而我哋只打算遊兩館，所以冇喺度買~

沿途都見到具西方特式嘅建築~

Starbucks

一路沿斜路行上嚟已經有少少外國嘅感覺，一啲都唔日本~
真正入到異人館區就更加唔駛講~

風見鶏本舖
賣嘢食嘅，相信唔係歷史建築~

神戶六甲牧場
軟雪糕，係我至愛，唔食唔得！

北野異人館有分幾種門票，每種都有指定異人館，如果組合方面唔啱用，亦可到每館單獨購票，咁當然會貴好多啦~
門票種類：
二館劵：「風見鶏の館」、「萌黄の館」
三館劵：「デンマーク館」、「ウィーン‧オーストリアの家」、
　　　　「香りの家・オランダ館」
四館劵：「イングランド館」、「仏蘭西館」、「ベンの家」、「旧パナマ館」
五館劵：「うろこの家」、「うろこ美術館」、「山手八番館」、
　　　　「北野外国人倶楽部」、「旧中国領事館」
九館劵：四館劵 + 五館劵

正如我之前所講，我哋只會買二館劵，我覺得實在唔需要每館都仔細搜索，咁做的話，花時間得嚟又毫無意義~

食完雪糕，先去「北野観光案内所」，睇吓有咩資料可以攞，不過裡面有用嘅資料，喺旅遊書中都可以搵到，冇咩需要攞啦~

跟住屎塔就去探吓個洗手間，裡面都幾靚~

未開始遊館，先見到「北野天満神社」

デンマーク館 (丹麥及維京館)

香りの家・オランダ館 (香之家荷蘭館)

ウィーン‧オーストリアの家 (奧地利館)

本家オランダ館 (本家荷蘭館)
閉館了~

うろこの家‧うろこ美術館
兩館連埋一齊，但因沒有購票，只能窺探到少少~

山手八番館

北野外国人倶楽部

プラトン装飾美術館

風見鶏の館 (德国館)
二館劵其中一館，好似好陰森咁~

萌黄の館 (地震痕跡)
二館劵其中一館，入去之前要除鞋~

所謂地震痕跡，係因為此館館頂有個煙囪，在 1995 年神戶大地震時被震裂致墮下，就在此煙囪墮下之處，原封不動，留作紀念~

パラスティン邸

旧パナマ館 (巴拿馬及中南美館)

神戶北野賓館 (Four Seasons Terrace)

イングランド館 (英国館)

仏蘭西館 (法国館)

ベンの家 (動物標本館)

神戸北野美術館

ラインの館 (Rhine House)
免費入場，不過入面真係冇咩好睇~

其他館及北野區風景

下一站係「お好み焼青森」
我哋去お好み焼青森係食晏，因為會去神戶新長田果頭，就喺附近搵間嘢食吓，做功課時查到有呢間嘢，再查吓見到查到嘅結果都幾正面，就呢間啦~

北野異人館 → お好み焼青森
神戶地鉄：　三宮 →→→ 新長田

遊完北野異人館，其實已經遲咗好多，因為呢度比我想像中大，有啲失咗預算，不過唔緊要嘅，邊行邊度啦~
原本係去行商店街同鉄人広場先，但由於時間關係，我決定去食晏先，因為呢間嘢只做午市同晚市，中間時間會休息，我要預返啲時間去食嘢~
お好み焼青森位於區內一啲好少人行嘅巷內，但按圖索驥，唔難搵到~

去到門口，唔多覺佢營業中，我睇睇時間，又未過佢嘅營業時間，再仔細望吓門口，見到「火曜定休日」，再查吓火曜原來等於星期二，哎呀，今日咪就係星期二囉！@@

就喺呢個時候，有兩個中年婦人經過，同我哋講咗一輪日文，我哋估佢都係話呢間嘢今日休息，佢哋又指住斜對面一間舖頭，直豎母指係咁話「呵衣斯」，我記得呢三個日文發音係代表好食咁解，就算唔識解，單憑身體語言都明啦，指完間舖頭就舉起手指公~
我哋微笑住講 thank you，就行過去佢哋指果間舖頭，入埋去~

間舖頭好細，店員連顧客估計唔夠二十人，我哋一入門口，所有人都望向我哋，店員態度雖非殷勤，但總算友善~
呢間舖頭係做鉄板燒嘅，一諗起要自己燒就冇興趣，但附近咁靜嘅街，相信都唔會有好多食肆，有啲焗住上嘅感覺~
不過店員係咁向我哋耍手，明顯示意未能服務我哋咁，我望一望屎塔，睇吓佢有冇咩唔同嘅見解，答案自然係冇，當我哋準備離開時，另一位店員，望向我哋，手部向凳作出一個請嘅手勢，究竟點咖，又耍手又請我哋坐，我費時再有誤會，唔打算留底，同屎塔離開~

出返嚟之後，諗咗一陣，我提議出返大街，先前見到有間食店，呢間食店，係一間好普通嘅日式食店，係果種一定有咖喱豬扒、咖喱蝦，類近日式餐咁果種，唔會有驚喜亦通常唔會失望~
屎塔其實都冇咩所謂，我哋轉身向返大街方向，見到有間食店「平壤冷麵屋」
我對呢間嘢好有印象，旅遊書冇介紹過，但地圖上就有佢嘅標示；google maps 上都有佢嘅標示，反而上面果兩間就冇提過~
我同屎塔講，不如試吓呢間吖，大街果間周圍都食得到~
屎塔實話好~
於是我哋就入咗呢間~

日本人同韓國人，其實係分得到嘅，我唔知係因為我真係分到，定一話受間舖頭名嘅影響，店主一男一女，完全唔似日本人，似韓國人多，咁當然，舖頭名叫平壤，我又唔會因為咁覺得佢哋係北韓人~ =P

坐低睇吓 menu，睇乜鬼吖，99% 都係日文，都唔知佢講乜~ XDDD
見到有啲類似套餐嘅嘢，亦見到有分「冷麵」同「溫麵」，就叫咗兩個餐，一冷麵一溫麵~
都幾好食，冷麵比溫麵出色，不過又未好食到會令人留下深刻印象咁啦，點都好過食咖喱豬扒飯~ =P

下一站係「一番商店街、大正筋商店街」
其實附近有四條商店街，除咗上述兩條，仲有六間道商店街同本町筋商店街，不過旅遊書話如果唔係三国誌狂迷，行一番商店街同大正筋商店街已經足夠~

由平壤冷麵屋到一番商店街，步行便可，幾分鐘就到~
今日係日本假期，商店街都唔係好多人，可以想像到平日有幾冷清~
不過又難怪嘅，所謂商店街，都係啲普普通通細細間嘅商舖，我哋行咗一陣就已經悶到抽筋！
呢度嘅最大特式，係有各種唔同型式嘅鉄人 28 同三国誌人物嘅裝飾，但其實同現場又唔係好夾......

行到中段，腳趾尾嘅傷患開始有明顯嘅痛楚，睇嚟又要做啲修補工程，麻煩你喇屎塔~
修補完之後，我哋商討好唔好再行落去，再行落去都唔似有啲咩會令我哋感興趣，最後我哋行多一小段就折返~
商店街初段係一番商店街，尾段係大正筋商店街，其實我哋有冇行到落大正筋商店街都唔知，實在太悶，可能未到一半已經走咗~

下一站係「鉄人広場」
鉄人広場內有一座巨型鉄人 28，高約十六米，非常巨型，雖然我印象中冇睇過一套鉄人 28 嘅卡通，但仍然想一睹佢嘅風采~

由商店街到鉄人広場，同樣係幾分鐘步程~
我同屎塔分別都有扮個鉄人影相，相當低能，如果現場係香港，我哋都未必會咁做，旅行就是這樣~
屎塔比我扮得神似，原因係佢有個好嘅指揮者~ =P

附近仲有啲鉄頭燈罩~

下一站係「有馬溫泉區」
其實我哋唔係真係以有馬為景點，亦唔係去浸溫泉，只係經過，順便影吓相~
我哋真正目的地係六甲山，上六甲山有兩個途徑，我就刻意安排經有馬上，再由另一邊落山，可以搭多啲唔同種類嘅交通工具，又可以順道暢遊有馬區~
不過呢個安排，同上比叡山一樣，做功課做到頭都痛，差啲想放棄，對住啲日文網站，真係想死，本旅遊書又只係有提有馬溫泉，但就冇提過六甲山，資料又有錯，要自己搵返啲啱嘅資料，不過經過自己嘅堅持同努力，總算克服到種種困難~

鉄人広場 → 有馬
神戶地鉄：　新長田 →→→ 谷上
神戶電鉄：　谷上 →→→ 有馬口
神戶電鉄：　有馬口 →→→ 有馬溫泉

去谷上呢程車，有啲奇怪~
上日本鉄道網查詢班次同轉車資料，如需轉車，一般會有一個標示代表，但去谷上呢程，分兩段鉄路，但中間就冇轉車標示，我嘗試到唔同網站作同一樣查詢，但結果一樣，咁究竟代表乜嘢呢？

查詢結果係咁嘅：
神戶地鉄：　新長田 →→→ 新神戶　●　北神急行電鉄：　新神戶 →→→ 谷上
睇唔明，唯有上網問，得到嘅答案係唔需要轉車，一直坐到谷上就得~
真係有趣~

去到地鉄新長田站，發現原來唔係每班車都到谷上，要睇清楚先好上~
去到谷上轉車，要橫過路軌過對面站轉車，對面月台已經有部車等緊，其實冇咩特別，但感覺又好似幾得意咁~

到咗有馬口就要等成差唔多四個字先有車，天氣又凍，係咁喺度吹風，我哋又蠢蠢地，月台上面有暖氣室，我哋吹咗三個字先識入去~ XDDD
上有馬途中嘅風景~

上到有馬溫泉，令我想起北海道嘅登別，其實環境上兩者相差好遠，但我就係諗到登別~
好慶幸決定上嚟有馬一遊，環境唔錯，不過勁多人又勁多車，我計劃行程時已經放棄乘車，選擇步行約半小時到達上六甲山嘅車站，一來巴士班次極疏，二來行吓叫做遊過有馬~

唔係行咗好耐，見到觀光案內所，入去攞返張地圖先~
跟住地圖行，行行吓唔係好對路，見到前面有工程封咗路，此路不通，唯有再諗第二條路，但就要兜路行，冇所謂啦~
所謂「塞翁失馬，焉知非福」，就係因為兜路行，先會行到有馬嘅中心，叫做可以睇多啲嘢~
一路行，離開咗中心位置，啲路開始唔正常，但照地圖睇就一啲都冇錯，人越嚟越少，但由於呢度地勢簡單，基本上唔會錯，我哋深信自己嘅方向係啱嘅，繼續向前行~
條路越行越斜，我哋又去到無人地帶，車就間中都有一架，唔知屎塔呢刻嚟緊啲咩，我唔敢問，我相信唔方好嘢~ XDDD
行咗一大段斜路，我哋終於都見到纜車站，叫做喺有馬到此一遊咁~

下一站係「六甲山頂 Garden Terrace」
Garden Terrace，係山頂嘅觀景台，我諗個個上六甲山都會去~

有馬 → 六甲山頂 Garden Terrace
六甲有馬ロープウェー(Ropeway)：　有馬溫泉 →→→ 六甲山頂

去到纜車站，嗱嗱聲買車飛先，再睇睇時間，仲有十分鐘先有車，可以四圍睇吓~
到差唔多時間就去排隊，車程約十五分鐘~

一出車站門口，成個醒晒，呢度嘅溫度，同有馬可能爭成四五度，好鬼凍！
出咗車站只有一個方向有路，跟住條路一路行，見到我朋友 Smile 上次嚟都有影過嘅嘢~
唔知係咩嚟......

再行落去到咗有商舖嘅地方，係賣手信嘅地方，商舖背後可以望到山外風景，呢刻我已經忘記咗我哋要去 Garden Terrace，唔知係咪因為太凍忘記了，定因為我而家所在嘅位置已經滿足到我~

影完相行返出正門，打算走過去對面睇吓，到呢刻我先知，原來頭先影相果度就係 Garden Terrace~
先前唔知，原因係方位問題，如下圖所示，假設 Garden Terrace 呢塊牌係向東，我哋就係從西邊行過嚟，由牌嘅左方穿過舖頭到牌嘅右邊，根本就冇機會睇到個牌，直至我向東行再回頭睇吓屎塔先見得到~

對面有個奇怪建築物，本來想上去睇吓，但原來係要俾錢先可以上去，我同屎塔都興趣不大，所以冇上到~
呢舊嘢叫「自然體感展望台」

要睇嘅都睇晒，我哋就走返入去舖頭揀手信~
我喺入面見到 INFORMATION 呢個牌，我就走埋去問吓職員，問吓佢想搭落山嘅巴士，應該喺邊度搭，同埋尾班車係幾時，佢搵咗好耐，又有啲緊張，終於都搵到啲資料，再指個巴士站方向俾我知~
我見屎塔成個人迷晒入去啲食物嘅手信度，出面又咁凍，我就同屎塔講，我去探路，你繼續睇嘢，唔好行開~

寒風刺骨，身體不停震，好彩好容易就搵到巴士站，睇睇時間，我哋仲可以喺度逗留一段時間，可以影相影到天黑先走~
時間慢慢咁過去，氣溫亦開始下降，天色黑得好快，外面實在太凍，好多人同我哋一樣，匿入舖頭暖一陣，又走出去影吓相，又匿入舖頭暖一陣咁~

下一站係「六甲山上天纜台」
六甲山上天纜台只係山腰另一個觀景台，我哋由有馬上六甲山，再由另一邊落，就會經六甲山上天纜台~

六甲山頂 Garden Terrace → 六甲山上天纜台
六甲山上バス(六甲山上循環巴士)：　六甲山頂 →→→ 六甲山上

時間差唔多，我哋行到巴士站時，天已經黑晒，巴士站附近有幾間商店，等車嘅人亦有好多，天氣非常寒冷，我哋搵到個地方可以坐吓，類似冇門嘅候車室，坐咗一陣，屎塔冒住凍死嘅危險都要出去影相，但由於我實在太凍，我冇同佢出去~
過咗成十分鐘都未見佢返嚟，我開始有啲擔心，佢會唔會已經變成路邊嘅凍死骨呢？
於是我就走出去搵佢，其實又點會有事吖，佢都係影緊相姐，不過我唔打算返返入去坐喇，寧願凍都唔想擔心佢~

見到有巴士到，我即刻拉屎塔過去巴士站，點知架巴士唔係落山嘅，空歡喜一場，唉，就嚟凍死喇~
我而家嘅衣著，十四五度就足夠應付，十度會覺得凍，但尚算頂得住，而家我諗只得五六度，仲要勁大風，基本上係凍到意識開始模糊，精神難以集中，屎塔身穿嘅衣服比我保暖，但都唔好得幾多，我而家最集中嘅嘢就係快啲上車、快啲上車、快啲上車......

再等多一陣，又有車到，我見冇咩人郁，以為又唔係，但為保險計，都睇睇架車去邊先~
咦，呢部係落山咖喎！點解冇人郁嘅？我抱住非常懷疑嘅心態拉住屎塔上車，唔理咁多，信自己！

上咗車冇位坐，全程都係落斜嘅彎路，不停踩迫力又不停左扭右扭，浪到個人嘔咁滯~ @@
到咗六甲山上站，睇到站上一層有個觀景台，我估計就係六甲山上天纜台，其實就算唔係都冇所謂，邊度睇都係一樣~

上去前已經見到寫住 1800 閂，而家係 1745，仲有十五分鐘，即刻衝上去~
上到去比山頂好少少，冇咁大風，但其實都一樣好凍，我全身震住咁開腳架~
時間慢慢咁過，感覺上唔止十五分鐘，但都唔理咁多，附近仲有其他人，又冇人上嚟趕，逗留到想走先走，反正都頂唔到幾耐~ @@
影咁多張相，呢張已經係最清，冇計，咁大風，用腳架都死~

影完落返去站入面，入面有條路上去可以去到 Art Gallery，屎塔諗住上去，我同佢講，呢個 Art Gallery 好似喺頭先上面影相果度喎，但我唔十分確定，佢上到一半就知道條路係通上天台，即係我講果度，佢話都係唔上喇，大家明顯凍到就死~

下一站係「幡治」
本來係 search 喺神戶食正宗和牛嘅，搜尋結果見到幡治，食平價黑毛和牛，於是我就改咗喺大阪食和牛，喺神戶食幡治~

六甲山上天纜台 → 幡治
六甲ケーブル(Cable)：　六甲山上 →→→ 六甲山下
神戶巴士１６號：　六甲山下 →→→ 阪急六甲
阪急電鉄：　六甲 →→→ 三宮

落返嚟啱啱 1800，有班車走咗，下一班係 1820，我哋見到有個待客室，走入去等，入面有凳有暖氣，等到 1810，突然好多人排隊，我哋都只好走出去排，離開呢間暖笠笠嘅房間~

車到喇，屎塔叫我負責影相，自己就一支箭走咗去，我都唔明，無論相機同技術，我都差過佢，點解由我負責？

部車有兩卡，我影完相就入第一卡，唔見屎塔就穿過去第二卡，嘩，第二卡冇窗咖，肯定凍到傻！@@
(事後睇返相，兩條友凍到紅都面晒~ XDDD)
屎塔話佢搵位時覺得好奇怪，點解第一卡咁多人，第二卡冇乜人嘅？答案明顯不過，屎塔話幾凍都會坐呢卡，呢啲嘢一定要試，機會過咗就未必再有，我非常同意，想法一致！
不過啲風景就唔多影到，唔夠光，但部車又郁緊，咩都影唔到~

落咗車，我知道要搭巴士落阪急六甲站，都未嚟得切睇資料就見到有部巴士，見到佢有個牌顯示途經阪急六甲站，唔理係咪本身想上果架，上啦！

出咗阪急三宮站，根據地圖去搵幡治嘅位置，唔難搵，我一路都深信我冇行錯，去到我覺得應該要見到間嘢嘅時候，但係我見唔到~
反覆睇吓地圖，我唔覺得我有行錯，唯有問吓人啦~

附近分別有阪急同 JR，我走入 JR 問人，有晒地址仲有相，我滿懷信心對方一定幫到我~
佢睇完又睇，又自言自語，最後竟然扭頭，話唔知道~ @@
好，算我唔好彩，你可能唔係喺度做好耐，唔識唔出奇，問第二個~
不過，咁上下嘅情況不斷出現，唔係唔識就點錯路，行咗勁多冤枉路~

有相有地址仲有地圖，問咗成六七個人都冇一個答到我哋，最後希望，我走咗入間時裝店問咗一位小姐，果位小姐一睇就知喺邊，一邊指示一邊講，佢所講嘅，完全係我一嚟到就以為冇行錯嘅位置，但我見佢咁肯定，希望係我記錯，總之跟佢所講嘅行一次，臨離開時佢講咗一句說話：「may be closed」
天呀，照咁睇，摺凸機會極大啦！我唔理，行過去睇睇！
Again，呢個世界邊有咁多奇蹟吖，接受現實啦~ >_<
喺搵幡治嘅時候，我哋又經過 Mediterrasse，同朝早睇到嘅當然唔同啦~

好嘞，食唔到幡治，食咩好呢？我哋漫無目的咁行，希望搵到間一睇就有興趣嘅食店，最後，屎塔話想食西餐，純粹因為唔駛雞同鴨講，坐低點餐等食就得~
我哋搵到間門口有晒套餐模型，任君選擇，合晒屎塔河車啦！ =P
呢間食店叫「洋食いくた」

坐低咗，拎本 menu 睇睇，只有日文字冇圖片，只好捉個職員出去指俾佢睇我哋想點乜嘢~
由於我哋之前未揀定，又要搵人睇住啲私人物件，所以我同屎塔輪流出去，個職員真係好耐性，沒有面露不悅，一臉認真，抵讚！
食物方面，一如我下午所講，呢種日式西餐，通常唔會有驚喜，亦唔會令人失望，味道不過不失，算係唔錯~

下一站係「美尼堅公園」及「神戶港震災紀念公園」
到美尼堅公園，主要係想影吓神戶塔，據屎塔提供嘅資料，如果只為影相，喺呢個公園影係會較為理想~
神戶港震災紀念公園，係 1995 年神戶大地震後，保留原址原貌嘅紀念公園~
由於兩者相連，所以一併遊覽~

由洋食いくた到公園，只需步行，步程要十五至二十分鐘~
洋食いくた位於神戶最中心地帶，比較旺同多人，一路向住公園方向行，亦一路遠離繁囂，燈光亦越嚟越少~
行咗一段路，見到有條橫街比大街更光亮同多人，我望咗兩望，原來係唐人街~
出發前，有同事曾經推介我去神戶嘅唐人街行吓，佢話好多嘢睇，不過我本身冇咩興趣，亦冇咁多時間，所以諗都冇諗過~
世事真係奇怪，唔通整定要我嚟嘅？不過我見佢都收得七七八八，只有近大街大約五十米到仲有舖頭未收，我入去行咗一轉，就僅有嘅舖頭嚟睇，真係零興趣，到此一遊就算~