《瞬間看地球》Stranger's Blog: 2012.05.28 意大利 (Rome、Florence)、梵蒂岡 (歐洲第三天)

今日主要景點：
Vatican
Piazza San Pietro (聖彼得廣場)
Basilica di San Pietro (聖彼得大教堂)
Cupola della Basilica di San Pietro (聖彼得大教堂圓頂)
Musei Vaticani (梵蒂岡博物館)

今日，為咗避開人流，0630 就出門口，即係話五點幾就要起身~
我哋習慣早啲起身去多啲地方，避開人龍，唔好浪費時間喺排隊度，只要之前一晚早啲瞓就得啦~ =)

落到街，真係舒服，晨早涼涼哋嘅氣搵，係最醒神最舒服嘅~
不過今日天色唔好，天氣預告仲話會落雨，唉，祝我哋好運啦~
0630 出門口好似好早咁，但係條街已經有唔少人，的確，呢個時份火車站附近黑人比例都唔少，但我又真係唔覺得有咩唔安全嘅感覺，警覺性就幾時都要有，但就唔駛太緊張咁啦~

第一站係 Piazza San Pietro (聖彼得廣場)
又係搭巴士過去，舒服過搭地鐵，又可以睇吓嘢~
落咗車行入去廣場，真係冇咩人，好正！

下一站係 Basilica di San Pietro (聖彼得大教堂)
Day 01 貼過聖彼得大教堂，今日再貼多張~

入教堂前除咗要經過安檢，仲有禁止穿著背心、短裙、短褲及涼鞋者進入~
過咗安檢有兩邊排隊位，一邊係入教堂嘅，一邊係上圓頂嘅，反正圓頂未夠鐘放人上去，縱使見到已經有人排緊隊上圓頂都好，入咗教堂先，我相信就算睇完教堂返出嚟都唔會好多人，始終仲係早嘛~

教堂內部好靚，感覺好宏偉~

下一站係 Cupola della Basilica di San Pietro (聖彼得大教堂圓頂)
行完教堂，走去排隊上教堂頂~
排緊隊嘅時候就感覺到有少少雨，不過係好細好細，怕就只怕上到去先落大嘅呢，聽天由命啦~ =(

上教堂圓頂，可以全程行樓梯，亦可以搭 lift + 一部份樓梯，好自然，全程行樓梯係平啲嘅，不過為咗保護雙腳，我哋揀咗搭 lift~
行樓梯就唔駛等，搭 lift 就要等吓喇，一部 lift 載唔得幾多人，等咗兩轉先到我哋~

出 lift 行出去就喺圓頂腳下~

進入圓頂就可以從圓頂內部望返落教堂內部，有圍欄，好安全~

跟住就真正行樓梯上圓頂~
初時係一條好窄嘅樓梯~

再嚟就係一條好窄嘅迴旋梯~

跟住就要斜住行，由圖中的西方女子作示範~

再經過「Z」形樓梯~

仲未完咖，仲有呢條梯窄到連扶手都整唔到，靠條繩~

上到去，雖然天色差，不過冇落雨，算叫幸運咖喇！
上到嚟好涼，好醒神，左扭右扭行到上嚟，真係好值得，好正！

都真係 hea 咗好耐，係時候離開，落去呢條梯要好小心咁落，好難行~ @@

落到底係喺教堂入面，出返去就見到梵蒂岡士兵~

而家大約係早上九點半到，個廣場已經有條好長嘅人龍~

個肚開始提醒我哋：今日未有嘢落過嚟喎！
嗱嗱聲走出大街搵嘢食先！

不遠處見到流動車仔檔，掂晒，早餐姐，求其隊啲嘢落肚，冇咩所謂~
行到埋去，原來仲未開工，見到佢部車，好似見到隻龜縮埋晒啲手手腳咁，好得意~
現場有成四五部呢啲車，呢檔仲未開工，走去下一檔睇吓~
唔，呢檔啲手手腳腳伸晒出嚟，有嘢食喇！ =P

一件普通火腿，好香，一件煙火腿，好味~
不過最衰嘅係，一路食一路有雨水做醬汁，我唔要呀！ >_<

下一站係 Musei Vaticani (梵蒂岡博物館)
我哋預約咗 1100 嘅門票，其實仲未夠鐘，不過我覺得佢未必唔俾我哋入去，食完嘢就行過去~

去到見到其實唔係好多人，不過睇人哋啲 blog 同旅遊書嘅相，通常都勁多人排隊，唔知今日咩原因咁少人，十點幾都算早咩？
沿途有好多人兜售導覽服務，我知道 join 呢啲服務係唔駛排隊就可以入場嘅，佢哋嘅態度一啲都唔會死纏，只要你示意冇興趣，佢哋就會行開~

梵蒂岡博物館外圍~

到咗門口俾預約証明門口嘅職員睇就放咗我哋入去，入到去要做安檢，過咗安檢就要拎張預約証明去換飛，有一個獨立嘅櫃位專責處理預約咗嘅參觀者，成個過程都好快手~
過咗入票閘就係一條幾靚嘅通道~

呢間博物館都幾大，不過有時啲通道有拉帶欄住，所以成日都行錯路，就算睇住現場指示，同香港嘅路牌一樣，指指吓就冇咗指示，當然，可能係我自己發雞盲，又或者唔識睇地圖，不過好彩都搵到職員問吓，有時佢仲會拉開啲拉帶俾我哋通過~

以下圖片為旅遊書提到最最最精華及我個人比較喜歡嘅展品：
【Cappella Sistina】(Sistine Chapel)

Il Giudizio Universale (Last Judgement) - Michelangelo Buonarroti

Genesi (Genesis) - Michelangelo Buonarroti

註：圖片經過本人合拼，中間白色部份為維基百科的圖片中不完整部份 (現場是完整的)

Genesi 當中以 Creazione di Adamo (Creation of Adam) 最為著名

註：堂內禁止攝影，以上四張圖片來自維基百科

【Museo Pio-Clementino】
Apollo del Belvedere (Apollo Belvedere) - Leochares
註：下半身給圍板封了

Gruppo del Laocoonte (Laocoön and His Sons) - Agesander, Athenodoros and Polydorus

【Stanze di Raffaello】(Raphael's Rooms)
Stanza della Segnatura - Scuola di Atene (Room of the Segnatura - School of Athens)

Stanza dell'Incendio di Borgo - Incendio di Borgo (Room of the Fire in the Borgo - Fire in the Borgo)

【Pinacoteca】
Trasfigurazione (Transfiguration) - Raffaello Sanzio

Madonna di Foligno (Madonna of Foligno) - Raffaello Sanzio

Incoronazione della Vergine (Crowning of the Virgin) - Raffaello Sanzio

Incoronazione della Vergine (Crowning of the Virgin) - Giulio Romano

Angelo che suona il tamburo e il flauto (Angel playing the drum and flute) - Melozzo da Forlì

Angelo che suona il liuto (Angel playing the lute) - Melozzo da Forlì

Deposizione dalla Croce (Deposition from the Cross 又名 Entombment of Christ) - Caravaggio

Compianto sul Cristo morto (Lament over the dead Christ) - Giovanni Bellini

S. Girolamo (St Jerome) - Leonardo da Vinci

Comunione di S. Girolamo (Communion of St Jerome) - Domenico Zampieri

Martirio di S. Erasmo (Martyrdom of St Erasmus) - Nicolas Poussin

Crocifissione di S. Pietro (Crucifixion of St Peter) - Guido Reni

Guido Reni (Vision of St Francis) - Pietro da Cortona

Pietro da Cortona (Adam and Eve in the Garden of Eden) - Wenzel Peter

Modelli della Cattedra di San Pietro (Models for St Peter's Chair) - Gian Lorenzo Bernini

Testa di S. Atanasio & Testa di S. Giovanni Crisostomo (Head of St Athanasius & Head of St John Chrysostom) - Gian Lorenzo Bernini

博物館中央
Torso del Belvedere (Belvedere Torso) - Apollonius

【Sala Rotonda】

【Galleria dei Candelabri】
Afrodite Efesina - 查不到作者是誰

以下展品名子不詳：

博物館內外~

其實今日幾好彩，入咗博物館先落大雨，朝早上圓頂冇落雨，算係咁~ =)
影呢張相嘅時候唔算大雨，相直情唔多睇到，不過有時喺館內走廊都聽到雨聲，仲幾大下~

我知道離開時可以經過一條相當美麗嘅樓梯離開，但我哋唔清楚呢條樓梯係咪唯一離開嘅樓梯，為免行錯第二度離開又冇得返轉頭，我哋決定問一問職員~
我哋有相在手，拎出嚟問咗兩個人，回應如下：
第一個：好有善咁指咗個方向俾我哋，我哋跟住個方向行，但其實呢個方向係行返入博物館，係錯嘅~
第二個：很 cool 的說「not possible」，停了約兩秒再說「it's closed」
我哋聽到佢咁講都好失望，只好按照現場出口指示離開~

經過迷茫與失望，接著嘅，可以係欣喜~
我哋跟住指示離開，其實個指示就係指我哋經呢條美麗嘅樓梯離開~ =D
呢條樓梯係由意大利建築師 Giuseppe Momo 於 1932 年建成~

親眼睇到咁多咁靚嘅藝術品，真係好開心，至於之前果兩位職員嘅回應......算吧~
離開博物館時約 1420，出面仍然係冇咩人排隊，但其實入面係勁多人，好多時多人到要碎步慢行，究竟啲人係邊度入嚟嘅呢？

跟住就沿路離開求其搵咗餐廳食 lunch~

Spaghetti Frutti di Mare~
幾好食，幾有鮮味~

Fettuccine con Funghi Selvatici
雜菌好香，都幾好食~

由於袋入面已經有支半水，今餐冇再叫水，個侍應好似好唔高興咁......

食完嘢就搭巴士返旅館，返到旅館，就向館主買下那個三孔轉插器，免得去到意大利其他城市遇上相同情況，未必次次咁好彩搵到呢種轉插器~
仲有成個幾鐘先夠鐘搭火車過 Florence，出面又落緊雨，附近又冇咩行，就喺旅館坐咗大半個鐘先行過去火車站~

行過去火車站時遇上 Smart 車展，羅馬真係周街都係 Smart~

行經火車站側門，有個黑人見到我拖住個篋，好有禮貌咁拉住度門示意我入先，佢果種態度真係令人有種窩心嘅感覺~
入到火車站，拎返張 e-ticket 出嚟，對返時間及列車編號，好容易就搵到月台編號~

到咗月台再對一次，上車坐返 e-ticket 上面嘅座位編號，唔駛換飛唔駛打飛，有人查就俾佢睇，成件事就係咁容易咁方便~

上到車第一件事唔係搵位坐，係搵位放行李~
我哋已經唔算遲上車，但上到車仍然係冇位放行李，但其實又唔算係冇，只係有個位唔夠放我個篋，我其實想拎起下面啲細篋，放我個篋喺底，再將啲細篋放喺我個篋上面，不過我又覺得郁人哋啲嘢唔係幾好，知係邊個嘅都話問吓佢介唔介意吖~

正喺我諗緊辦法嘅時候，有個男人喺廁所出嚟，佢望一望我，跟住走埋個細篋度放啲嘢入去，掂，等佢搞掂就問吓佢先~
佢放好嘢就拎起個篋，擰轉背面向我，示意我放我個篋入去，呢刻真係有啲愕然，不過當然，都只係愕然咗半秒到，於是我就試吓放我個篋入去，結果都仲係爭少少，個男人見狀就拎起埋另一個細篋，咁我就好輕易放咗我個篋入去，個男人就放咗兩個細篋喺我個篋上面~
有人幫我梗係開心，不過睇得出，佢幫到我佢都好開心，嚟咗三日意大利，非常開心，意大利人好多都好友善，令我個旅程可以錦上添花~
我坐返埋位，猶豫緊上唔上單車鍊好，其實個個都係就咁放咖啦，不過諗吓諗吓，反正有帶嚟，點解唔上唧，於是我就等冇咩人嘅時候走去上咗條單車鍊，成個人安心晒！ =)

車程約個半鐘，沿途風光就真係冇咩特別，而且又落緊雨，睇吓旅遊書，又睇吓自己記下嘅行程~
隔離個男人一直喺度睇文件同用手提打字，當佢買咗杯咖啡同餅乾俾錢時，整跌晒自己喺檯面嘅嘢，好自然，我梗係幫手執啦，執完之後，佢問我係咪去 Florence，其實部車終點係 Venice，可能佢睇到我啲行程，又話俾我知下一站就到~
我唔理佢係咪裝過我嘅行程，又或是人哋根本完全冇理過我，只係純綷一問，意大利人真係好友善，令人感覺好放心~ =)

到咗 Florence，我冇信心可以喺旅館附近搵到超市，所以我哋喺火車站搵埋超市，買埋生果同明日早餐，甚至買埋今晚晚餐先去旅館~
經過羅馬嘅買生果經驗，我好肯定我今次係買咗橙！
早餐就買咗預先包裝好嘅 Tiramisu 蛋糕，見佢都幾大件，但佢係唔駛放入雪櫃，夠我哋喺 Florence 幾日早餐~
晚餐就喺超市隔離 pizza 店買咗兩件 pizza，味道只屬可以 (pizza 忘了影相)