Rome
S. Maria in Cosmedin - Bocca della Verità (真實之口)
Terme di Caracalla (卡拉卡拉浴場)
Colosseo (圓形競技場，又名鬥獸場)
Colle Palatino (帕拉提諾之丘)
Foro Romano (古羅馬市場)
Piazza Venezia (威尼斯廣場)
今朝喺旅館食晒早餐先出門口，都係啲北方嘢，我個人本身就麻麻地，不過食落又幾好食，仲食咗好多~
同檯有南方人有北方人，咁啱北方嚟嘅人坐埋一邊，南方嚟嘅人又坐埋另一邊，北方人果邊明顯食得快啲~
第一站係 S. Maria in Cosmedin - Bocca della Verità (真實之口)
傳說呢個口以前係用作測謊嘅，伸隻手入去，如果你說謊，就會被咬，真係信不信由你......
喺旅館行去 Roma Termini 對開就有巴士到真實之口門口，不過呢部巴士冇報站系統，兩條粉腸戇居居到咗門口都唔識落車，直至過咗兩個站先落車！
好彩佢啲站都幾密，行返轉頭都唔會話要行好遠~
今日好好天~
泊得夠晒寸~
去到門口仲未開，睇返門口資料，原來開 0930，我上網搵料就話佢開 0900，現場已經有人排緊隊~
其實呢個景點好唔就腳，如果可以晏啲先嚟就最好，不過我知道呢度好多人嚟，經常排長龍，行程點排都好，我會安排呢個一早要到，去到開門時，排隊人數約二十，唔算多~
好嘞，終於等到開門，一轉入去入面，我同屎塔都發現一樣嘢，不約而同強忍住要爆笑嘅情緒，其實個情況唔係真係咁好笑，但就唔知點解會忍唔住想大笑~
我哋排咗半個鐘，一轉入去門廊，真實之口兜口兜面就喺面前，我哋完全冇咁嘅心理準備係咁快會見得到，可能覺得通常呢啲咁有歷史價值又唔大件嘅物件會放得比較保險啲~
其實我哋喺半個鐘頭前就可以見得到呢個真實之口，因為佢嘅所在位置同外面只有一度很疏嘅鐵欄隔住，喺外面一望就望到，不過咁，一場嚟到，又冇理由唔入去影吓正面，呢個景點相信到嚟嘅都係刻意嚟，因為附近冇咩其他景點，唔會係順便過嚟~
我係一個誠實嘅孩子，唔怕會被咬，反而怕污糟，日日都俾人摸咁多次，肯定係細菌溫床！
現場寫明 EUR0.5，不過正如網上啲人咁講，佢唔會要求你俾，亦冇見過人俾，個個都係就咁行埋去影相~
從外圍望向 Colle Palatino (帕拉提諾之丘)
下一站係 Terme di Caracalla (卡拉卡拉浴場)
步行過去就得，不過都行幾遠，需時約 20 分鐘~
呢個係屎塔指定要到嘅景點，不得有誤！
入到去，好多欄欄住，以為只係可以睇到外邊好少地方，喺樹下休息咗一陣，諗住走人，行返出去嘅時候見到入面有個人，佢又唔似係工作人員，睇吓睇吓，就見到越嚟越多人，咁即係可以入去入面咖啦！
於是我哋又走返入去睇吓，原來真係有路入，只係有人發雞盲姐！
呢個浴場真係好大，大到能同時容納 1500 人同時洗澡，可惜只現剩下頹垣敗瓦，連想像空間都唔多~
下一站係 Basilica di San Giovanni in Laterano (教堂)
之前喺浴場休息時睇旅遊書， 以為呢度冇咩睇，諗住去埋 Basilica di San Giovanni in Laterano (教堂)，點知睇埋入面出嚟，啱啱好係我預計時間離開，但呢刻又好想去埋 Basilica di San Giovanni in Laterano，唔理咁多，想去就去~
睇地圖好似好近，點知行咗成幾個字都只係行咗一半，中途諗住放棄，我唔怕呀，我怕屎塔辛苦，我建議搭的士去下一站啦，唔去呢個教堂喇，不過屎塔話唔怕，反正都行咗一半，行埋佢啦~
我個心梗係多謝佢啦，不過同時都有啲壓力，好彩，都冇咩點行錯路，終於都到~
下一站係 Colosseo (圓形競技場，又名鬥獸場)
頭先喺曬住嘅情況下行咗半個鐘，真係消耗咗好多體力，而家我哋實在係太攰，為免睇地圖以為近，點知行餐死，打算搭的士去鬥獸場，由於我哋所在地點嘅方向唔啱，行咗過對面馬路，又覺得唔係幾適合等車，於是又行多幾步，我哋發現，鬥獸場原來就喺不遠處(下圖紅箭咀)，既然係咁，搭乜鬼車吖，行過去把啦~
沿呢條路行落去都有唔少餐廳，我哋一路行一路睇吓邊間吸引啲，陣間返嚟食嘢~
我哋發現，雖然間間餐廳食嘅嘢都差唔多，但越近鬥獸場，價錢越貴，真係識做生意~
不過望就近，行都行咗十五分鐘~
穿過咗呢條街，見到一個人，佢係一個黑人，膚色係非常黑果隻，佢戴住頂白色帽，著住白色西裝外套同白色西褲，再加對白色嘅鱷魚皮鞋，非常強烈嘅對比，好有型，真係想同佢影返張相~ =P
我哋到咗鬥獸場嘅東面~
東面冇咩人，我哋向右邊行，諗住行返去西邊，一轉右圍住鬥獸場向北行，見到越嚟越多人，再越嚟越多人，原來個入口喺北面，好多人排緊隊，由於我出發前買咗聯票，所以見到咁多人都唔係好擔心~
我拎張 printout 出嚟俾個職員睇，佢望咗兩眼就放我哋入去，其實呢刻我係有少少唔敢望其他人，要知道排隊排到嚟近入口呢度嘅人可能已經曝曬咗兩個小時，而我一嚟到就可以進入，真係有啲唔好意思......
其實佢本身係有一個平台，只不過已經塌陷咗~
不能再用的樓梯~
唔知係咪有啲身份嘅人可以坐呢度~
唔知點解，唔係好願走，不過唔願走都要走咖~
鬥獸場正面同側面~
順便睇埋 Arco di Constantino (君士坦丁大帝凱旋門)
從鬥獸場影嘅~
從地面影嘅~
跟住就去食嘢~
先前嚟果時經過好多餐廳，但其實走返轉頭又有少少多餘，本來計劃時諗住可以上去 metro 果度睇吓附近有啲咩食，不過屎塔問我上面仲有冇其他嘢睇，如果冇，不如喺度求其食啲嘢，唔駛刻意搵間餐廳，佢冇咩所謂咁話~
咁都好喎，反正上完去都係要返返落嚟，曬到死，無謂行嚟行去~
就喺大路見到有流動車仔檔，屎塔話不如試吓，咁我就走去買，屎塔就搵個位坐低咗，佢坐咗喺部流動車嘅影度，現場所見唯一一個位係唔曬嘅，咁都俾佢搵到，好嘢！
喺流動車仔檔買咗兩件三文治，揀好佢會烘一烘先俾你~
一件主要係煙火腿，一件主要係沙律，沙律果件實在太清，都係煙火腿好食啲，不過塊面包皮就"韌"咗啲~
喺食嘢嘅時候，附近有好多賣紀念品嘅人，唔知係咪我哋嘅外表實在太窮，啲販子向每一個坐低咗嘅外國人兜售，而每一個販子都係連一眼都冇望過我哋，亦冇向我哋兜售，我哋喺佢哋眼中真係好似透明咁，究竟係佢哋覺得我哋一定唔會買，還是其實佢哋嘅經驗話俾佢哋知，一般東方人都唔會買，所以只向西方人埋手呢？真係佢哋先知~
下一站係 Colle Palatino (帕拉提諾之丘)
呢個景點就喺鬥獸場附近，鬥獸場嘅聯票係包埋呢個景點嘅，即係又唔駛排隊入場，不過就算要排隊都唔係好多人~
步行過去嘅時候......噢！
入到去其實冇咩好講，又係頹垣敗瓦，不過呢度大過卡拉卡拉浴場好多，睇嚟有排行~
行咗一陣，見到有凳又有樹蔭，休息咗差唔多半個鐘，嚟到意大利，第一次飲當地街上嘅泉水，自己腸胃唔係特別差，我覺得可以試吓飲，一向怕肚痛嘅屎塔都放膽去飲，真夠膽！
行行吓見到有個博物館 - Museo Palatino，唔算多嘢睇~
三孔 。。。插座，同我住果間旅館一樣~
行完博物館繼續行帕拉提諾之丘~
下一站係 Foro Romano (古羅馬市場)
沿住帕拉提諾之丘一路行落去就係，不過呢度就細得多，一眼望晒~
正在進行考古研究~
又有博物館~
行完博物館又繼續行古羅馬市場~
今日真係行到夠晒皮，離開咗古羅馬市場，即刻搵地方休息吓~
坐低咗就見到流動車仔檔有雪糕賣，梗係整返杯啦，不過呢度賣得好貴，細細杯賣成 EUR3，唔捨得買兩杯，買一杯一齊食算數~
下一站係 Piazza Venezia (威尼斯廣場)
嚟呢個廣場，當然係為咗欣賞一下 Monumento a Vittorio Emanuele II 呢座咁宏偉嘅建築物~
諗住睇吓地圖點行啦，點知一擰轉頭就見到佢頂部嘅雕塑，唔駛睇地圖啦！
行到過去後面，見有樓梯上就上咗去先，上到去見到有博物館，又入去睇吓~
由上面望出去~
可以搭 lift 上頂層，相信景觀唔錯，不過收費貴得有點嚇人，不上了~
喺威尼斯廣場望返過去~
後記：噚日黃昏、今朝、而家，分別經過/嚟過共三次，都見有欄欄住，返到香港睇返原來係開放嘅，只係我見襯都唔啱時間，所以當時一直都以為係唔開放，不過其實都係好小事~
威尼斯廣場~
遇見 Harley Davidson 電單車團，非常吵耳，但又覺得好過癮！
好嘞，諗住搭巴士返去旅館先醒起我有樣嘢唔記得做，就係買車飛！
本來諗住今朝搭巴士時買埋回程用嘅巴士飛，費時到時搵地方買，不過唔記得咗，咁唯有周圍搵吓啦~
東南西北四個方向都行咗幾條街先搵到，已經好鬼攰咖啦~ .\!!/.
返到 Roma Termini，做返啲補救功夫先，就係去買返啲真正嘅橙嘞！
返到旅館，期待今晚會唔會又係食餃子呢？好彩唔係，係好正常嘅家常菜，而且味道不錯，仲有湯飲，正正正！
我哋又喺超市買咗沙律，不過，真係 OK 難食......
沒有留言:
發佈留言