《瞬間看地球》Stranger's Blog: 2010.11.22 大阪 (日本第二天)

今日行程：
日本銀行大阪支店、中之島圖書館、中央公会堂 →
The Instant Ramen Museum → 手塚治虫紀念館 → 黑門市場 → 大阪城公園 →
天神橋筋商店街 → 梅田食街 → 梅田空中庭園展望台

今日車程：12 程

今日早餐係噚晚買果兩個杯麵，以杯麵嚟講，絕過好食過喺香港買得到嘅杯麵~
今日又要孭住個腳架成日......

今日第一站係「日本銀行大阪支店、中之島圖書館、中央公会堂」
去呢三個地方，主要係影吓相，睇吓啲歷史建築，見有時間先安排去吓，到此一遊咁，冇咩特別意義~

酒店 → 日本銀行大阪支店、中之島圖書館、中央公会堂
大阪地鉄：　本町 →→→ 淀屋橋

一早走在清涼整潔又冷清嘅街道，真係有種說不出嘅寫意~
不過今日天色唔多好，睇天氣預測就話有機會落雨，希望就算係落都好似噚日咁夜晚先落啦~

一出淀屋橋車站，雖然冇落雨，但地面係微濕嘅，路面嘅行人個個都好匆忙，同香港返工時間沒有兩樣，我哋兩個嘅悠閒動作同現場格格不入，就好似啲 MV 咁，主角站著不動，而身邊嘅人就以快鏡咁走過~
要到上述三個地方，先要經過一條跨河嘅橋~

日本銀行大阪支店

同場加影「大阪市役所」

中之島圖書館

中央公会堂

附近嘅環境

其實有時我覺得重點都未必係喺建築物度，都係俾個藉口俾個方向去行吓冇咩大景點嘅尋常街道~

下一站係「The Instant Ramen Museum」
係屎塔今次旅程指定要到嘅地方，佢稱呢度為「杯麵博物館」，主要係介紹杯麵同即食麵嘅起源同發展過程~

中央公会堂 → The Instant Ramen Museum
大阪地鉄：　淀屋橋 →→→ 梅田
阪急電鉄：　梅田 →→→ 池田

出咗阪急池田站，跟住地圖走咗入一條商店街，但行行吓迷失咗方向，呢個時候梗係要搵個人問吓路啦~
不過呢度都幾清靜，冇咩人，見到遠處有一男一女喺度開緊舖，立刻走埋去問吓佢~
比較近我嘅係一位婦人，於是我走埋去問佢~
結果係，佢不暗英語，亦睇唔到細字，佢表現得唔好意思又好有禮貌咁一邊鞠躬一邊後退去搵個男人嚟同我哋傾~
唉，其實你真係唔駛好禮貌得咁緊要，我哋反而覺得打擾你哋唔好意思~
個男人又好友善咁嘗試幫我哋，佢喃喃自語咁自己同自己講嘢，佢太太(我估係)就拎咗一本大型書籍出嚟，原來係本地圖~
佢喺索引度搵咗好耐，而我知道博物館係喺吳服町附近，所以我就幫手望埋一份，我指俾佢睇索引內吳服町嘅位置，佢翻開相關頁面，左睇右睇，再向我哋嚟嘅方向指一指，再喺地圖上面比劃著，其實單憑指兩指又點可以知道點去吖，不過最緊要係個方向要啱先，根據佢嘅指示，我哋就係行錯咗方向，thank you 一輪就向返車站方向行去~

返到車站就睇一睇車站提供嘅地圖，大約知點行，行行吓見到圖中左面呢個牌，掂晒！

距離博物館差唔多一百米到，見到有個小朋友同個女人一齊出嚟，屎塔問我係咪之前入去果個細路仔，所謂之前，就係行前我哋十多秒到入去果個，我話邊有可能呀，佢拎埋個自製杯麵出嚟喎，十幾秒就做到？ @@

從各方資料顯示，呢個博物館非常受歡迎，所以我計劃好一開門就嚟到，不過之前行錯路嘥咗啲時間遲咗嚟，唔知會唔會已經好多人到咗~

入咗門口又唔覺好多人，可能仲早啦~
由於我有 Kansai Thru Pass 嘅關係，嚟呢個博物館係會有紀念品送嘅，一本拍子簿咁嘅嘢~

一入到去，趁人潮未殺到，影吓相先~

淨係掛住參觀影相，都冇留意自製杯麵果部份開始有人龍出現，可幸仲未算好多人，我即刻拉屎塔過嚟排隊~
以下係自製杯麵流程：

首先買個空杯先~

洗手後就坐低畫圖畫~

屎塔好有心機逐筆逐點咁去畫，而我喺繪畫方面就比較......所以......就咁嘞~

畫好就可以入麵餅，象徵式自己上麵餅~

選味道同揀材料，可揀四款~

再嚟就係封口同包裝~

包裝好之後就會獲分配一個袋同一條繩，睇住人哋點整我哋就跟住整~

完成！

今日旅程開始咗唔係好耐，已經有兩舊咁嘅嘢拎住，又易惹來其他人嘅目光~ @@
整完杯麵就繼續參觀~

博物館內提供咗一個地方可供即場食用自己剛製成嘅杯麵，同場亦有杯麵機，可買到唔同種類嘅杯麵醫肚~

跟住睇埋動畫就打算離開~
好彩我哋早嚟，而家只係十一點，已經咁多人等緊自製杯麵~

原來排到出出面~ @@

下一站係「手塚治虫紀念館」
我嘅童年裡面冇咩手塚治虫嘅記憶，一係因為我唔多睇電視，一係因為我根本唔知我睇緊嘅係出自手塚治虫手筆~
講到底，我對手塚治虫冇咩興趣，反而屎塔就幾有興趣，不過，陪佢去佢想去嘅地方，亦係我嘅興趣之一~

The Instant Ramen Museum → 手塚治虫紀念館
阪急電鉄：　池田 →→→ 宝塚

一出宝塚車站就見到指示牌指導手塚治虫紀念館嘅方向，上面寫住約 750M~
向住佢指嘅方向行，係一個商場，商場入面一樣有指示牌，唔會行錯~

穿過咗個商場就係行人步道~

其實呢度真係非常舒適，不過對腳就有啲攰，始終我哋係有目標咁行，唔係嚟散步，難以充份享受呢度咁正嘅環境~

好似行咗好耐咁，終於都到~

入到去，個職員用日文向我哋說話，當知道我哋係外國人，佢就指一指部購票機，原來佢想同我哋講，如有機上所列出嘅 pass 就可獲得購票優惠~
上面有我哋用緊嘅 pass，即時獲得九折~

買完飛交俾職員時，職員問我哋買唔買套票，一年內進場三次可獲優惠~
我真係唔明，呢種紀念館，普通人一生一次已經好夠，死硬派都未必會一年嚟三次卦!? @@

呢間紀念館共有三層，由地面進入係第二層，我哋先參觀呢層~
大門口嘅內部環境~

呢層主要係珍藏品，例如有啲可能係手稿或者係絕版漫畫~

行樓梯上上一層，係圖書館~

跟住就搭 lift 落兩層至最低層，係一個動畫教室，不過一個客都冇~

Well....對我嚟講，我對條行人步道嘅興趣比呢間紀念館仲要大~

下一站係「黑門市場」
黑門市場又名大阪廚房，係大阪市內好有名嘅街市~
睇咁多本旅遊書，每一本都有介紹，仲有蔡瀾提過嘅豆漿，唔到唔得啦~

手塚治虫紀念館 → 黑門市場
阪急電鉄：　宝塚 →→→ 梅田
大阪地鉄：　梅田 →→→ 難波
大阪地鉄：　難波 →→→ 日本橋

回程都係行返果條行人步道，中途見到有雪糕賣，有兩間打對台，貴啲果間標明係北海道牛乳，就呢間啦~

買完杯雪糕，就坐喺橋底慢慢嘆~
北海道果種牛奶味真係香滑好多，不過實在太貴，唔係好捨得買第二杯~

去到大阪地妷鉄嘅梅田站，我哋決定將兩個杯麵同腳架放入儲物櫃，到今晚返嚟梅田睇夜景前再攞返~

由於梅田地鉄都幾大，又四通八達，我哋擔心搵唔返個儲物櫃，所以就喺附近搵咗個地標影張相先，搵唔返都可以問吓人~
呢張相咁易認，相信問地鉄職員一定幫到我哋點去~

出咗大阪地鉄日本橋站，落緊大雨，唉，乜今日咁早落呀~ >_<
我哋冒雨跑入黑門市場，好彩黑門市場係有瓦遮頭嘅~

入到黑門市場，散步式咁閒逛，著實唔覺有咩咁吸引，只不過係一個街市，何以每一本旅遊書都有介紹呢？

反正嚟到，就行吓佢啦，中途就搵到蔡瀾提過嘅豆漿~
蔡瀾在 2010 年 11 月 10 日的蘋果日報內的專欄提到最香濃的豆漿，見以下連結：
http://hk.apple.nextmedia.com/template/apple_sub/art_main.php?iss_id=20101110&sec_id=12187389&art_id=14644387
為免日子久了連結失效，現將內容貼上：
蔡瀾在 2010 年 11 月 10 日的蘋果日報內的專欄：草草不工
標題為：求答案
「想喝又濃又香的豆漿，可不是一件容易的事，店裏賣的，全部已兌過了大量的水，淡得有如黃霑兄常說的「師姑尿」。
記憶中，最香濃的，是在大阪的黑門市場喝過的豆漿。轉角處有間小店，專賣豆品，門外擺着個豆漿器，塑膠玻璃製造，有鐵翼在不停地旋轉擺動。付六十円，店裏的老太太就會按掣，用紙杯盛出給你。
我們的旅行團一到，必請大家去喝一杯。老太太看人一多，也隨便讓我們自己動手，互相信任，喝多少杯付多少錢。
沒試過的團友半信半疑，以為我說這是天下最濃的豆漿這句話，是誇大其辭，但一喝進口，即刻點頭讚許，明白我所說的。
那裏的豆漿並不加糖，老太太說：「這樣，才喝出豆的香味。」
「你替我問問，為什麼只有她才能做出這麼濃的豆漿來。」團友常這麼吩咐，我照辦。
老太太笑了：「豆加多，水放少。」
就是那麼簡單的一個道理呀。
回到香港，凡是喝到店裏的豆漿不濃，都向老板們說：「試試，做出一杯的話，可當招牌生意。」
「太濃了，煮時容易焦。」這是一般得到的答案，沒有人去試。
至到近來，有位朋友說：「我煮豆漿時，小心攪動，不會焦的。」
但做出來的也不夠濃，問原因，回答說：「太濃的話，一擺久，會凝成豆腐。」
那麼日本的那位老太太的產品何來？一定有辦法克服，即刻跑去問「公和」的老師傅，也說不出來。再去問「義香」的陳先生，這家店開了五十多年的老板，陳先生說：「我也不知道。」
我想，如果用鹼水把豆漿凝成豆腐花的話，可以放些什麼，讓它不會結起吧？這要問問化學老師了，不知有那一位可以解答？」

我哋走埋去要咗兩杯，一飲，嘩，味道真係好奇怪，從未飲過咁樣味嘅豆漿~
平常飲到嘅豆漿都帶點明顯嘅甜味，而呢杯呢，不單一點甜味都冇，質感仲比較稠~
(註：上網查過，廣東話講比較"杰"，正字為竭，音同為杰，不知是否真確，假定正確，但覺有點矯枉過正，寫出嚟冇人明，已經失卻文字嘅字義，如沒有註明而用上竭字，恐怕將來自己睇返都唔知點解~)
咁純咁濃嘅豆味，我個人就覺得唔算好飲，但如果話佢勁濃豆味，呢點我又絕無異意~

要行嘅都行晒，我哋求其搵咗間嘢入去食晏，吸引我哋入去嘅，係門口擺賣嘅燒餅~
屎塔很喜愛嘅燒餅~

入到去第一件事就叫咗個燒餅先~
幾好食，不過呢種燒餅都好少會唔好食嘅~

跟住叫咗個廣島燒~
味道可以啦，冇咩特別，不過都幾飽肚~

其實我哋入到去已經有位阿叔，呢位阿叔真係好專心咁睇緊報紙，有時食緊嘢有人自外進內，望一望係好自然嘅動作，但佢由我哋入去坐低到食完嘢，完全冇望過我哋一眼~

食完嘢，諗住去下一站，不過見到出面天陰陰，落緊微雨，掙扎緊好唔好買把遮，要掙扎係因為如果用唔著，拎住佢都幾麻煩~
最後決定咗唔買，博佢唔會好大，但係行咗唔夠五步，我又改變主意，因為嚟緊去果度，落大雨的話想搵地方避都未必搵到，到時仲狼狽~
最後買咗把透明遮，喺大阪呢度，每十個人揸住把遮，起碼有三四個都係呢種透明遮，不論男女~

下一站係「大阪城公園」
其實我都唔知點解會安排嚟大阪城公園，或者係因為去琵琶湖但冇去彦根城；去和歌山但冇去和歌山城；去神戶但冇去姬路城，大阪城公園就喺大阪市區，點都要遊一遊日本古舊嘅城池~

黑門市場 → 大阪城公園
大阪地鉄：　日本橋 →→→ 谷町九丁目
大阪地鉄：　谷町九丁目 →→→ 谷町四丁目

出咗大阪地鉄谷町四丁目站，落緊雨，但唔算大，好彩買咗把遮，雖唔算大雨，但亦冇可能就咁衝出去，好唔方便咁行到去大阪城公園~

一路跟住人流方向去行，去到一度門前就俾個男人截住，佢嘗試用佢嘅肢體語言話俾我哋知唔入得去，原來今日有特別節目，要另外買飛~
我唔知點解佢知道我哋係外國人同點解知道我哋冇飛，我問佢可以喺邊度買飛，佢話所有門票已經售出~
我做功課時都睇唔到有特別節目唔俾其他人入，冇計啦，唯有喺外圍行吓啦~

行吓行吓，又去到另一個入口，而呢個入口勉強可以影到天守閣，我哋嘗試盡量攞角度去影，其實咁樣做一啲意義都冇~ XDDD
不過做完啲無聊嘢，我哋發現呢個入口係冇人看守嘅，咁，我哋係咪可以入去呢？
我哋當然唔會錯過呢個機會，大搖大擺咁行入去，冇事喎！掂！

沿住前行方向一路行，冇咩特別，普通公園一個~
越行就越大雨，見到天守閣時，雨勢大到唔可能隊部相機出去幾秒快速影一張相，係一秒都唔得，左就右就影過便算~

原本都未必會上天守閣，由於天氣太差，連考慮都不需考慮，唔會上~
屎塔喺公園內去過洗手間，出嚟時話，雨勢明顯地比佢入去果時大咗~
天色開始暗，雨勢持續大，要盡快離開冇瓦遮頭嘅大阪城公園~

下一站係「天神橋筋商店街」
根據旅遊書提及，天神橋筋商店街，係全日本最長商店街之一，全長 2.6 KM，橫跨三個地鉄站，仲可以喺街頭同街尾找某商店蓋印，以証明行畢全程~
可否取得証書，我一啲都唔關心，甚至乎唔會去蓋印，就連可否行畢全程，我都唔太在意，冇咩所謂，睇情況啦~

大阪城公園 → 天神橋筋商店街(一丁目)
大阪地鉄：　谷町四丁目 →→→ 南森町

行返出公園時，個天好似同我哋有仇咁，係咁倒啲水落嚟，咁嘅雨勢喺香港起碼都黃色暴雨~

呢個時候我發現，我雙腳膝蓋以下，就好似浸咗落水池度咁樣，完完全全濕透晒，幾經辛苦走到入地鉄，步行時發出「吱吱」聲，每一步都極不舒服，但又實在冇咩辦法~

出咗地鉄，即刻走入天神橋筋商店街，2.6KM，行就真係行咗好耐，仲行畢全程，但要用文字記述，真的沒甚麼好說，但為咗將來睇返都有少少回憶，勉強找點東西來說說吧~
呢條商店街，其實不為旅客而設，係實實在在好地道嘅商店街，全條街分六段，分別為一至六丁目，售賣嘅東西可謂林林總總，應有盡有，但都係果句，唔係特別為旅客而設嘅物品~
我哋行到四丁目一半已經死咗大半，直情隨時都可以放棄，但放棄同唔放棄都冇咩分別~
先前提過，成條商店街橫跨三個地鉄站，我哋由南森町開始行，第二個站係扇町，第三個站係天神橋筋六丁目，我哋而家就喺扇町同天神橋筋六丁目之間，唔行落去返轉頭去扇町同繼續行埋落去到天神橋筋六丁目都係差唔多路程，所以我地就慢慢行埋落去~

到咗六丁目，屎塔話想休息吓，其實我都係，大家都攰喇，我哋見到有啲圓頂矮柱，見有其他人都係咁坐，於是我哋就學似人哋咁樣坐低咗~
不過呢個區域就唔係好日本，因為呢度嘅乾淨度同日本一貫嘅整潔有一段距離，不過我哋實在太攰，唔理咁多，反正又未到接受唔到，休息陣至算~
我就真係純粹休息，俾對腳抖吓，屎塔直情好似按咗個掣咁，一按即睡，完全 skip 晒由準備瞓至到熟睡中間嘅所有階段~ XDDD
佢一瞓就瞓咗半個鐘，我就坐定定保持清醒，睇吓路人嘅人生百態~
原本我安排咗喺呢度搵地方食晚飯，不過今日午餐又晏食又食得飽，仲要經過大雨嘅洗禮同身心俱疲，呢度又冇咩特別吸引，我決定到梅田食街搵嘢食~

下一站係「梅田食街」
梅田食街係我臨時加插嘅，反正本身都係去梅田區，順便過去食埋嘢先繼續行程~

天神橋筋商店街(六丁目) → 梅田食街
大阪地鉄：　天神橋筋六丁目 →→→ 東梅田

到咗地鉄東梅田站，先要行返過地鉄梅田站攞返今朝寄存嘅腳架同杯麵~
梅田站同幾個鉄路系統相連，成個站好似個地下城咁，四通八達，由東梅田行返去梅田都要行一段路，去到梅田站開始搜索返我哋嘅物品，左騰右騰行咗好多個位，但就係點都搵唔返個儲物櫃~
唯有出動今朝影果張相問問附近嘅職員，我哋對張相可以引領我哋到達目的地好有信心，我哋搵咗一個職員，佢望咗一陣，表示唔清楚，我個心即時一沉，唔係卦，你喺梅田站返工，但對站內環境都唔清楚？就算你唔係負責果邊，我都好難相信一個喺站內嚟講算係突出又大嘅地方，你會唔知道......
好彩我哋唔趕時間，再問第二個，今次呢個答到我哋喇，不過佢表達咗好耐，我哋都唔多清楚佢想講咩，唔緊要啦，照佢所指嘅方向，過到去唔見咪再問人囉~

行咗百多米過到另一邊，又真係唔多似，冇問題，再問人啦，問第三個，佢竟然指返我哋過先前第二個果邊~ @@
有冇搞錯，我真係唔能夠相信，有冇咁難搵呀！
再問第四個，呢個掂呀，佢一睇就好似知道喺邊咁，但就有口難言，最後佢用咗最簡單嘅英語單字教我哋去，嘩，聽佢講都幾複雜，要穿過下層停車場再唔知點上上一層又唔知點轉咁先到，真係痴鬼線~
見佢咁有信心，信佢啦，我哋落咗一層通過埋個停車場再上返一層，見到個樣似似哋，再加上我哋嘅直覺，終於都同個儲物櫃重逢~

最後果位日本人好嘢呀，我講就簡單，因為我只記得少部份，正確嚟講，佢識廣東話都好難教到我哋去，見佢果種表達唔到又想幫手嘅焦急，如果唔係佢唔可以離開工作崗位，我諗佢會帶埋我哋去添呀！

上到去梅田食街，行咗一個圈都唔係好揀得到，實在太多日文字，冇咩漢字，最後就入咗間以餃子為招牌菜嘅食店~

一入到去坐低，牆上菜牌盡是日文字，只好問職員攞 menu 睇睇，我哋用英文問佢，佢望咗我哋一陣，只係好短好短時間，但有人望住你半秒同只係望一望，你係分得到嘅，眼神唔多友善，究竟係佢定係我太敏感呢？
其實間嘢冇咩選擇，一本 menu 十頁都冇，每頁一張大相加菜式名字，我哋就點咗最基本嘅豚肉拉麵同豚肉炒飯，再點咗一客招牌菜 - 餃子

豚肉拉麵，豚肉本身幾好食，有種豬肉嘅羶香味，但略嫌豚肉切得太厚，破壞整體感覺。拉麵口感無疑上乘，但論及精華部份，一定係湯底！奶白湯底非常香甜，嘗過一口，必會再來第二第三第四口，精彩！
豚肉炒飯，相同嘅豬肉羶香味，但香味比拉麵大大片的更濃更香，炒飯本身就不過不失~
招牌餃子，涵料非常鮮味，外皮厚度適中，沒有煎得過火，點上醬汁，從未食過咁好食嘅餃子，果然係招牌菜！屎塔唔多好餃子都不停話好食！
呢餐真係好滿足！

下一站係「梅田空中庭園展望台」
由梅田食街到梅田空中庭園展望台，只需步行便可，但路程一啲都唔近，仲落緊雨，對腳仲要濕晒未乾，呢程路都真係夠晒辛苦~
去到展望台，分兩個 tower，我哋先入 Tower A，裡面有幅指示圖，我哋跟住指示上一層行過條橋過咗 Tower B，見到部 lift，但按掣位置有塊厚身牛皮膠紙痴住咗，但佢只係痴住上端，可以揭起，就現場情況睇，唔會搵到任何職員，我就試吓揭起塊膠紙試吓按掣，可惜按極都冇反應，我好擔心一場嚟到但上唔到去，我本來打算睇吓去邊度可以搵到人問，不過就喺呢個時候，lift 門打開，喺裡面出嚟嘅人，明顯係遊人，唔係職員，不過我哋唔理咁多，等啲人出晒嚟就走入去，按樓層再閂門，部 lift 一切正常咁向住我哋按嘅樓層向上升，理所當然咁到達後就開門，出咗 lift 門，要再搭扶手電梯上上面，由於我哋身處三十幾樓，而呢條扶手電梯係凌空同埋佢嘅管道係望到出去嘅，一路上一路都有少少驚~
搭完扶手電梯就見到售票處，我哋咁樣上嚟，但又唔覺在場職員有覺得奇怪，亦冇打算阻止，佢哋都只係以友善態度等緊我哋行過去，真係奇怪，不過上到嚟就得啦，唔理咁多~

買完飛走入去就見到有幾個好似咖啡杯嘅物體，其實係凳嚟，不過全場得四杯，而且都已經有人坐緊，我都唔奢望會有機會~
諗住慢慢行個圈，未行到第一個杯，第二個杯上面果對男女就起身走咗落嚟，嘩，原來奢望都未必唔可以成真！

我哋坐咗上去先知原來我哋已經攰到死咁滯，而家咁樣坐吓，真係舒服到爆~