菁桐火車站 → 十分火車站 → 九份 → 金瓜石 → 九份 → 基隆廟口夜市
我唔係鐵道迷，但一啲古舊嘅鐵路站對我嚟講仍然有一定嘅吸引力~
九份，就係有一種講唔出嘅魅力，令人陶醉，流連忘返，捨不得離開~
九份之後安排咗去基隆廟口夜市，呢個安排係屎塔嘅意思，絕配，因為九份有一程巴士可直達基隆，無論係佢自己諗嘅定係參考人哋嘅行程，同樣抵讚！
今日嘅行程是否順利，唔計天氣因素，就睇我哋起唔起到身，因為去菁桐火車站嘅車非常疏落，錯失咗一班，整日嘅行程都會受影響~
當然，搭唔到火車都仲有巴士或者計程車，但去遊覽火車站都唔搭火車去，像樣嗎？
今日天氣都唔多好，仍然有雨，只要唔係好似噚日咁大都好啦~
屎塔真係一個旅遊嘅好拍擋，計劃好嘅行程佢都會一一配合，就例如今日七點就要到達食早餐嘅地方，佢真係做到~
我哋未夠七點就到，間嘢都仲未開門，不過裡面有光，等咗一分鐘到就開門，今日我哋要叫外賣上火車食~
今日點咗法式黃金三文治同鮪魚蛋沙拉三文治~
今日第一站係菁桐火車站，佢係平溪線嘅終站，嚴格嚟講，成條平溪線每一個站都值得細味，不過如果時間唔充裕的話，只遊菁桐、十分同平溪站都可以~
但由於火車班次奇怪及極為疏落，錯過一班可能要等多 90 分鐘，而我只能花一個早上遊覽平溪線，經過反覆思量，任何組合都試過，點都係唔得，我決定放棄平溪站，反正環境同情懷都同十分站相近，而十分比佢更多景點~
成功通過七點買早餐呢個 check point，第二個 check point 係一定一定要搭到 0730 台北開往瑞芳嘅火車~
買完早餐就行過去台北火車站，到達時為 0710，心想成功在望，去到入閘口問一問職員可唔可以直接用遊悠卡入閘，阿職員竟然話唔知道，真的有夠神奇！佢指我過另一個閘口，叫我去問果邊閘口嘅職員，我立即行過去，點知睇住個職員行開，理論上佢係守呢個閘口嘅，唔可能離開太耐，但我等咗佢半分鐘都未見人，就問對面果個閘口嘅職員，佢話要上上層買票先得~
頂，我嗱嗱聲走上去買飛再跑返落嚟，想懶啲都唔得~ @@
我哋成功入閘時為 0720，相信冇題啦~
落月台時見到有指示用嘅螢光幕，上面都係一啲火車班次嘅資訊，0730 台北往花蓮(經瑞芳)班次嘅月台喺 4A，掂晒啦，十拿九穩呀！
落到月台又未夠鐘，坐低等等，等咗幾分鐘，到 0730 喇，完全唔覺有車埋站，反而後面 4B 月台就有，我有啲懷疑會唔會係呢架，望一望，埋站時間係 0730，方向花蓮，唔理喇，照上啦！
(我同屎塔都肯定冇睇錯月台編號，真係唔知點解會咁......)
車上座位分兩邊，每邊有兩個位，架車冇乜人，我哋求其搵個位坐低咗，跟住右邊就坐咗兩個男仔~
我不停留意住車上嘅顯示牌，極希望佢會顯示會停瑞芳，但係等咗好耐都未見......
右邊兩個男仔交談係用廣東話嘅，食又係食同一間咖啡店嘅早餐，好可能都係香港人，自由行~
坐開邊果個男仔突然轉過嚟同我哋講嘢，問我哋係咪去九份，我口快快答咗係，隨即兜話下晝先去，朝早去菁桐先~
佢好似聽唔明咁，我再補充話即係平溪線，佢先哦一聲表示明白，又話佢哋同我哋掉轉，而家去九份，晏晝先去平溪線~
其實我諗佢唔係真係想同我傾偈，因為佢哋點睇都唔係外向同健談果種，可能只係想確定部車係咪去瑞芳~
其實我自己都唔肯定係咪上啱車，不停留意火車上嘅螢幕顯示，頭十分鐘都冇講會途經咩站，好彩，最後都有顯示，係會經瑞芳嘅，安心晒！
不過我心中奇怪，咁早去九份，會唔會啲舖頭未開門呢？又，平溪線嘅火車站，相對九份，比較適合朝早去，除非撞啱天燈節啦，同埋九份玩到天黑都冇咩所謂嘛~
不過我自己都唔多識，可能有啲嘢我唔知啦，咪理人咁多，食早餐先~
拎早餐出嚟時先發現杯朱古力瀉咗少少，成個紙袋底都係，好彩唔算多，否則都幾狼狽~
坐咗好耐都冇停過站，我預計唔駛坐好耐，屎塔食完早餐冇耐就開始合上眼休息，我當然唔可以同佢一樣，如果唔係可能去鬼咗花蓮~ @@
一路坐一路欣賞吓風景，一路望吓屎塔，真係賞心樂事~
差唔多到瑞芳站，屎塔仲係熟睡中，真係有少少想樁佢，其實見佢瞓得咁香酣，唔係幾忍心叫醒佢就真，不過都冇計咖，唔通真係去花蓮咩~
落咗車，最緊要搵地方買平溪線一日票先~
呢張一日票，基本上會去遊平溪線嘅人都會買，因為搭三程已經值回票價，又方便，唔駛每程都買票，除非你只去一個地方，來回兩程車啦，我諗都好少遊人會咁~
車上面果兩個男仔都同我哋一樣，買咗一日票先，買完就離開，而我哋就要喺月台呆等，等平溪線嘅車到站~
而家係 0811，我哋要等嘅車 0839 先到站，足足要等成半個鐘，天氣都凍咖，加上呢度都幾大風，不過點都冇噚日咁辛苦嘅~
其實咁樣等法真係勁嘥時間，但係又冇計~
等咗一陣，果兩個男仔又再喺月台上出現，佢哋坐低咗，相信係等車，我估佢哋都係改為朝早去平溪線，下午先去九份啦~
喺呆等嘅期間，我哋又行又坐又影相，雖然真係悶悶哋，但我哋都樂此不疲(好矛盾 XDDD)，出面間中有雨，但無損我哋嘅心情，當然係因為唔係好大啦~
月台分兩邊，分別都有顯示牌顯示下一班車嘅到站時間同目的地，等咗成二十分鐘，顯示牌所顯示嘅資訊都係一樣~
我哋早已確定邊個月台係去菁桐，不過等到夠鐘都未有車，係兩邊都未有車~
根據另一邊月台嘅資訊顯示，的確係未夠鐘，而且仲顯示要延遲~
再望望我哋呢邊嘅月台資訊，原來我哋果班車都要延遲，要遲八分鐘~
八分鐘過後，仍然未有車......~_~!!!
跟住又顯示遲九分鐘，究竟想點！再等多一陣，終於見到遠處有車嚟緊喇！
我同屎塔都準備好影相，等...等...等...部車越嚟越近，越近就覺得越唔對路，部車唔係入我哋呢邊月台咖！
我哋嗱嗱聲走過另一邊，唔理係咪我哋要上果班車，影咗先算，為免兩邊都有車入而影唔到相，我同屎塔講我返過去準備~
我果邊係一啲動靜都冇，跟住屎塔就叫我，佢話呢班車係去菁桐，叫我快啲過嚟上車~
頂！台灣啲火車係咪亂嚟咖，鐘意去邊個月台就去邊個月台?
還是處理顯示牌個系統有問題？ .\!!/.
條線就舊嘅，部車嘅內部又幾新淨~
呢架係區間車，即係站站都會停，但我哋會坐到最尾果個站，即係菁桐站先會落車~
架車冇咩客，上咗車有三對人，同樣係講廣東話，我哋啦，仲有果兩個男仔啦，仲有一對情侶~
沿途都冇咩特別，係經過疑似十分瀑布，不過不在今次旅程內~
因為一來到咗十分站仲要行好遠先去到，二來多數評語都話好細，不看也罷，三來要收錢 (因為屬私人地方)，聽講仲要唔平~
沿途風光~
到咗菁桐站，果兩個男仔同我哋一齊落車~
菁桐站係一個好清簡嘅火車站，一個露天月台，一間簡單嘅小屋作為售票處~
站附近嘅環境~
呢個站有兩間非食肆嘅舖頭，其中一間係「菁桐鐵道故事館」
店內註明不許拍照，唯有喺門口影過便算~
呢間店出售嘅物品以鐵道、台灣、貓為主題，其實嚟咗台灣幾日，感覺到貓喺台灣真係相當受歡迎~
呢度仲有木製明信片，一塊塊厚厚的，厚嘅有五毫米厚，薄嘅都有兩三毫米厚，而且仲可以即場寄，門口都寫明「不要再問了，真的可以寄」XDDD
另一間係「菁桐鐵道文物館」
呢間店出售嘅物品同故事館有啲相似，但其實又有好大分別~
佢主要係紙製品，主題多數都係鐵道，同時又有其他嘢~
不過因為唔吸引，行完就連印象都冇乜~
睇中咗件衫，但冇我碼，試著大一個碼真係太大，屎塔仲話原來著咗上身好低能，唔要啦！
今日第三個 check point 係要搭到 1020 由菁桐開出嘅火車，因為下一班係差唔多十二點~ @@
不過火車站就喺身邊，要成功不是難事~
要睇嘅嘢都睇晒，仲有幾分鐘就開車，時間真係啱啱好，嗱嗱聲去埋個洗手間先上車~
上到車，又見到果兩個男仔，佢哋向車頭方向行去，原來車頭係有座位嘅，不過幾秒後佢哋就返返出嚟，望到我哋，我問佢哋點解唔坐嘅，佢哋話因為喺廁所隔離，好臭~
我哋其實都想坐果個位，於是就上前聞吓係咪真係咁臭先~ XDDD
其實都唔算好臭，只係有好輕微嘅廁所味，可以接受喎，於是我哋就坐咗喺車頭，同車長視野一樣~
下一站係十分車站，中途開始大雨，唉~
到咗十分車站，兩件雨褸再次出場~
十分比菁桐「有規模」得多~ =P
兩個車長交換位之餘，仲會交換一個大圓型嘅鎖匙~
呢度有間「十分鐵道故事館」，不過又細又冇嘢睇~
嚟到十分，除咗遊覽車站，仲有一個叫「台灣煤礦博物館」嘅地方，距車站十五至二十分鐘步程~
雨勢有點大，但無損我哋旅遊嘅雅興，呢啲地方，落雨有落雨嘅情懷，另有一番味道~
十分同平溪都係傳統放天燈嘅地方，所以十分呢度都有相當多同天燈有關嘅裝飾同店舖~
講開天燈，每年平溪都會有天燈節，晚上過千個天燈一齊升空，場面壯麗，不過今次旅程就遇唔上~
一路行，一路覺得唔對路，做乜鬼好似越行越荒蕪，又係人影都冇隻，但一路都有指示牌，冇理由唔信佢咖~
好彩最後都冇信錯佢，我哋搵到喇~
不過又唔好開心得太早，沿路鬼影都冇隻，就算到咗都係，重門深鎖，完全唔覺有任何人類嘅生命跡象~
我哋去到門口睇到營業時間，冇錯吖，0930~1700，而家係 1110，但入面又冇燈，敲門又冇人應，明顯係冇人~
我哋好唔願意咁接受呢個事實，屎塔估計後面好似荒廢咗嘅建築就係呢個博物館供人參觀嘅地方，打算自己走過去睇吓，但我評估過各個因素，認為太危險，無論如何都唔答應屎塔，當然都唔容許佢去~
失望固然會有，但總唔能夠太過冒險去慰藉呢個小小嘅失望感，屎塔亦冇堅持，唯有影完相好失望咁離開~
由於冇參觀到「台灣煤礦博物館」，有機會可以搭早一班車，早啲上九份，好彩我早有準備，記下幾班火車班次，方便控制時間~
嚟到十分，我哋仲安排咗放天燈，不過咁大雨，都唔知放唔放得，聽天由命啦~
其實去程時已經睇中一間天燈店「阿媽之天燈」，返轉頭搵佢，店內有幾種尺吋嘅天燈，原來要放上天就要用最大果隻，字要自己寫，寫字嘅嘢梗係屎塔做啦~
寫完字就由「阿媽」(我估佢就係店名嘅阿媽)埋尾裝上滕架，成個天燈已經完成可以準備升天~
其實由頭到尾都係個店主做招待，唯獨上滕架就由阿媽出手，似乎有特別嘅象徵意義~
萬事俱備，只欠天氣，店主望一望出面，雨勢唔大但亦唔算細，店主話應該冇問題，我哋只好信佢~
佢拎住個天燈快跑橫越路軌過對面，我哋就跟住佢~
過到對面店主要我幫手拎住頂端，佢就點火~
成盞天燈開始脹大同變熱，店主拎起天燈一拋，咁巨型嘅天燈就自動急速上升~
店主話如果天氣好就過以穿過雲層，燃燒耗盡就會跌落附近山頭，我哋望住豆豉咁大嘅天燈，說著說著，只係十多秒，就睇住盞天燈進入雲層消失，真係出乎意料，咁大嘅天燈可以升得咁快仲升得咁高！
如果有人問我有咩咁好玩，我真係講唔出，但絕對過癮同興奮！
係時候離開返返車站等車，我哋啱啱好趕得到早一班車，行返去時見到又有人放天燈，佢嘅天燈比我哋多樣嘢，就係底部連住一串爆仗，上升中途就會爆，不過唔係好大串，幾下就爆晒，可能因為太重，盞天燈飛得唔高，感覺佢上到半空就冇再升高，只係向橫飄~
放天燈果對情侶就似乎冇我哋咁興奮，企定定望住佢飄，視線受阻都冇話行出兩步望多兩眼，只係睇到睇唔到就算......
今次呢班車比起之前算係多人搭，一路搭到去瑞芳就落車，向九份進發~
由瑞芳去九份，搭巴士上去就得，而我仲記得上次喺邊度上車，離遠仲見到有部巴士喺上車嘅地點，急步走過去，部車係去九份咖，即刻上車啦~
唔駛半個鐘就上到去，間中有雨，但都係細雨，一落車，果種似曾相識嘅感覺即時出現，都話九份就係有咁嘅魅力，尤以微雨嘅九份，更具一種 blues 嘅情調~
一落車，就拉屎塔去果個所謂嘅觀景台影相，雖然我都唔覺得果度影落去好靚，但係有啲嘢就係有佢嘅模式，個個都會做嘅模式~
屎塔影完相就見到「亨利家族」同「李儀餅店」，成個人拍咗嘢咁，超級亢奮！出發前佢已經同我講，要減咩行程都得，但一定唔可以減李儀餅店！呢句說話，出發前已經聽過大約二十次，絕冇作大，二十次已經係保守估計~
佢只不過係食過一次定兩次李儀嘅太陽餅之嘛，都唔知佢諗乜嘅，嗱嗱嗱，又一次唔知佢諗咩喇~
不過冇理由咁早買定咖，前世未拎過咩，我走去問定佢哋幾時閂門，預返時間就得，不過都唔係冇壓力咖，趕唔切返嚟買的話，我諗屎塔就喺九份推我落山都似~ @@
下一個指定動作 - 閒逛九份老街
買咗條日式牛奶棒，都幾好食咖，不過呢啲嘢食多條都會覺得膩~
經過「九重町」，有位女仕叫佢老公幫佢影相，佢老公揸住佢老婆部單反機，影完先發現冇開閃光燈，諗住開返再影，但阿老公就唔識點開，阿老婆就開始有啲不滿咁話(廣東話)：我咪同你講過好多次囉，你記住佢啦，咁蠢咖你~~~
阿老公脾氣真係好，默默忍受，等老婆話完佢再教佢點開，語氣方面又唔算好鬧，但怪責味甚重~
雖則話人哋嘅嘢唔關我事，我亦唔會多事到去干涉，但我自己就覺得人要面樹要皮，唔需要當眾鬧個老公蠢，又唔係咩大件事，點解要講啲傷害人嘅說話？
當然，可能係人家嘅相處之道，我唔應該胡亂去作出批判，但表面上睇著實不該~
嗱，屎塔，我唔識用你部機咖，就算教完我唔識，我只係冇心學，唔係蠢~ XDDD
(我同屎塔喺呢度影咗七張相，只有一張冇果位女仕嘅樣，其實如果唔係有人遮住，第七張都會有佢嘅樣~ XDDD)
下圖中呢位阿姐，佢自己本身就係招牌，夠晒爆！
我哋就喺度買咗兩串綜合腸，包括：飛魚、墨魚同原味，幾好味咖~
再喺隔離舖買咗醬爆燒丸子，味道可以啦，冇咩特別~
繼續行，又係食，漫無目的咁就入咗呢間嘢，叫咗碗招牌「五味綜合魚丸湯」同一碗魯肉飯~
成間嘢都貼滿相，不過有啲係重覆嘅~ =P
碗魚丸湯啲丸勁大粒，味道一般，都係冇咩特別~
呢碗魯肉飯直達難食級數！我都因為難食而食唔完，罕有！
再行落去就就見到第二間亨利家族，又係亨利家族......
呢次旅程已經見過四間亨利家族，偏偏我計劃好會去果間總店就未見，我哋問店員點去，不過聽完都唔係好明，佢俾咗張卡片我哋，有幅簡單地圖~
經過泥人吳，打算入去睇睇，原來要收費嘅，我哋即刻出返嚟~
行完九份老街，仲有一處係九份區內必遊嘅地方 - 豎崎路
佢係一條唔齊整嘅長石梯，我個人覺得有一種落寞嘅情懷~
此石梯為當年《悲情城市》取景地方之一
「海悅樓」係今晚食飯嘅地方~
「昇平戲院」
1914 年開業，為台北第一家戲院，於 1986 年結業~
旅遊書上仲見建築上有「昇平戲院」四個字，但到現場睇已經見唔到~
終於嚟到亨利家族嘅總店「亨利屋」
其實賣嘅嘢大同小異~
另一面嘅九份風景~
完成九份嘅行程，可以向金瓜石進發~
經過噚日嘅壞天氣，本來好擔心今日會唔會上唔到金瓜石，因為如果今日大雨，平溪線同九份行程都肯定會受到影響而延遲~
算係好彩，今日嘅雨勢對行程冇影響，時間上同我所計劃嘅差唔多~
我哋喺豎崎路下面嘅橫街，向住巴士站方向行，其實我哋都唔知啱唔啱咖，只係懶行返上石梯，希望循住啱嘅方向就會有路行，後來問過吓人，係行得到嘅~
行到某處上樓梯，上到頂就已經係觀景台個位，正！
等咗十分鐘車，就見到去金瓜石嘅車，即刻上車啦~
我一直以為金瓜石比九份仲要高，但架巴士一路行，一直都係迂迴嘅平路，直至到站都一直係平路，即係話，金瓜石只係喺山嘅另一邊而已，不過地形就好似凹咗入山中咁~
一落車就到咗黃金博物館入口~
之前睇過啲資料，以為園區好大，但我嚟到旅遊中心問過，最遠嘅主館，步程都只係十分鐘~
一路落共有七個館，不過唔係個個都有興趣，隨心而行~
去到最後嘅「黃金博物館」先係我哋上嚟金瓜石嘅目的~
顧名思義，入面講嘅全部都同黃金有關，仲有舊金磚可以供人觸摸，其實都唔知有咩好摸，不過我都有去摸~ XDDD
其實成個博物館區(即係金瓜石區)對我嚟講就好普通，不過唔知點解，我都幾鍾意呢度，成個環境真係好舒服，可能就係比九份少了一份繁囂~
完成咗博物館嘅行程，開始有啲雨，我哋搵個地方休息咗一陣，其實我心裡面另有想法~
一場嚟到，想去嘅地方都會盡量去完成佢，呢一刻，我仲想去「報時山」
報時山離黃金博物館有好一段距離，亦可以想像到唔會多人去，起碼我哋休息咁耐，可見去報時山嘅路，不論往返，一個人都冇，其實好可能沿路都冇人~
落緊雨又大風，步行去一處一公里以外零人煙嘅山頭，著實唔係一個明智決定，不過同屎塔商量過之後，決定出發~
首先要過一條橋過對面山，再沿路行落去，路面係鋪好咗嘅路，唔係果啲未開發嘅路，唔會好危險~
一路行落去，見到間大屋，好似係民宿嚟~
再行落去經過「勸濟堂」
一路係咁行，真係驚行錯路，行極都未到，仲要一路都冇人，好彩最後都到喇~
觀景位置有兩個，一個就係上圖所見到嘅山頂，另一個就係過咗個頂再向下嘅好似山谷咁，落完再上，冇之前個咁高，但因為夠出，所以兩個位置望到嘅景係會有分別~
嚟到呢個位，我哋猶豫咗一陣，究竟我哋到此一遊算數，定真係向上行呢？
有咁嘅考慮，係因為怕梯面濕滑，好易跣倒，更加因為呢度啲風非常強勁，更更更加因為喺強風之中夾雜住超強烈陣風，成個環境根本唔適宜上去~
突如其來嘅超強烈陣風，絕對會令人失平衡跌到，如果上到頂被強風吹倒，有咩事會發生真係難預計！雖然現場係有欄桿嘅，但高度連腰間也未及，失平衡至跌出欄桿外並非絕無可能！
不過就好似上次去登別地獄谷咁，我哋深信只要小心啲，唔會有事，所以決定前往~
上去嘅時候，我哋要"烏"低身快步向前行，以減低風阻從而避免被風吹跌~
睇返呢張相，我自己都覺得好笑，GoGoGo~ XDDD
平平安安到達第一個觀景點~
上圖左首嘅木梯就係通往第二個觀景點~
我同屎塔講，好喇，唔好再去喇~
因為現場實在太大風，誇張啲講句，件雨褸隨時會俾啲風撕破吞噬~
木梯中段兩旁都係斜坡，現場望落去有點怵目驚心~
屎塔還價，話落少少影張相就返上嚟，我唔反對，但就講咗不下一百次「小心啲呀，捉實欄桿呀~」
屎塔落到最低處仍然唔停步，直至到達第二個觀景點......
我就知道你會咁做，我太了解你喇，X你個X，我就知道你會咁做！ >_<
不能同年同月同日生，只求同年同月同日死，要死一齊死，衝呀，我嚟喇！
我過到去，兩條友蹲低，一隻手扶住對方，一隻手扶住欄桿，要影相就兩手穿過欄桿，後臂以欄桿借力，前臂揸穩相機~
由報時山望出去，可以見到「陰陽海」同「舊日礦業工廠遺址」
我哋逗留咗一陣，其實有少少唔捨得離開，我哋都好享受呢種冇人打擾，天與地都好似屬於我哋嘅感覺，呢個世界就只有屎塔同我~
現場風雨交加，但我感覺寧靜，如果唔係趕住天黑前離開，我實在非常樂意同屎塔在此促膝長談，實在是人生樂事~
離開時同樣要好小心咁"烏"低身向前行，直至落返地面先鬆一口氣~
落到地面，我哋兩個同樣感到暈眩，可能實在太大風，吹到頭都暈埋就係呢種~
沿路行返返去，冇咩特別，由金瓜石影返過去九份......我估係九份呱......
行到近黃金博物館附近，見到博物館外牆著咗燈，係個金字~
一路行返落博物館出口等車，過返去九份食晚飯~
等咗一陣就有車，唔算太多人搭，巴士開動，突然又停低，原來有班學生衝出嚟上車，班學生係咁入係咁入，直至逼到再上唔到人，陣間都唔知點落車@@
左面係人牆，右邊窗外都係黑漆漆，我真係怕到咗九份都唔知，希望會有好多人落車啦~
到咗九份，我真係唔知已經到咗，我帶點猶豫咁問屎塔，屎塔都唔太肯定，有一部份人落車，但又唔算多，前面有位女仕就提我哋這裡就是九份，我哋即刻動身連聲道謝擠出車外~
落咗車，第一件事去李儀餅店先，過到去，完全冇諗過其他產品，淨係買咗幾盒太陽餅~
買完太陽餅，我哋行返今朝上嚟果條樓梯去海悅樓，避開熱鬧嘅九份老街~
不過呢條路又真係太過僻靜，成條街都好暗，又冇咩人，不過我都覺得安全嘅~
途中仲見到幾隻貓~
揀中海悅樓，純粹係因為本旅遊書嘅推介~
我哋點咗兩個餐一個菜~
韓式海鮮泡菜鍋~
村料新鮮又豐富，好實在，食極都有，唔會夾兩夾就淨返啲配菜~
村料咁新鮮，都好難唔好食啦，正！
蘋果咖哩雞~
冇咩評語，不過不失，料唔算多~
炒地瓜葉
味道特別，幾好食~
下午嘅九份唔算太大風，但夜晚就唔同，我哋一路食嘢一路聽到強勁嘅風聲，出面柱位上仲有把掛扇係咁搖，我真係怕佢會被吹跌繼而破窗而入~
食完嘢出出面影吓九份嘅夜景，真係勁大風，我哋捱咗一陣就算，反正九份嘅夜景冇咩特別~
我哋行經九份老街返出大街搭車，而家只不過係 1910，但係絕大部份九份老街嘅店舖已經閂咗，剩返嘅都收緊工~
突然聽到啲好嘈嘅聲，原來有部小型垃圾車駛緊入嚟，但佢嘅響聲真係好勁，估計係要話俾啲人知佢嚟緊，有咩掉好拎出嚟喇~
我哋走咗出李儀餅店門口等車，但嚟咗兩架車都係去瑞芳嘅~
七點幾嘅九份真係靜得出奇，成條街都係黑色嘅~
等咗成二十分鐘，終於等到去基隆嘅巴士，屎塔上車先，到我上車拍遊悠卡時，點拍都係紅燈，即係唔成功，仲以為冇晒錢，但又冇理由吖，屎塔張卡仲少錢過我~
諗住俾現錢啦，但係又冇散紙喎，司機大聲問其他乘客有冇散紙可以同我換，車上面啲人個個都好幫手，好快就成功換到合適散紙~
車上空位唔多，淨返啲單邊位，屎塔見到我果邊上方有小小強，我即時坐過第二邊啦~
襯司機停燈就請司機到咗基隆夜市提一提我哋落車~
呢個司機揸車都幾危險，又落斜又多彎仲要落緊雨，係咁怒劈九份，返到落平地先安心啲~
坐車坐咗成五十分鐘，感覺非常漫長，司機終於都開聲提我哋落車，我仲以為佢唔記得咗添~
佢態度一般，但絕對係好人一個，佢教我哋落咗車要點行，真係唔該晒！
落咗車發現雨勢不輕，真係麻鬼煩，又要狼狼狽狽咁遊夜市~
跟住司機嘅指示行，見到前方有車仔檔，估係啦~
由於大雨關係，基隆夜市人真係唔多，但話晒係夜市，點都唔會冇人嘅~
其實都有晒心理準備，賣嘅食品大同小異，不過今次俾我哋見到其他夜市見唔嘅食品，就係螃蟹粥同油飯~
不過我哋諗住再行吓先，所以冇坐低~
基隆夜市分兩部份，前段都係一般夜市咁~
轉個街口嘅後段同其他夜市好唔同，好工整~
嚟台灣咁多日，到過唔少多人嘅地方，今晚都係第一次俾人撞，呢個人係明知會撞上都唔縮，我就算縮咗都依然被撞上，佢竟然對我怒目而視~ @@
行到街尾又見返同一間螃蟹粥同油飯舖頭，原來之前果間係分店，呢間係總店~
最後都係食咗螃蟹粥同油飯~
螃蟹粥好足料，唔係蟹柳，係真嘅蟹肉，唔錯~
油飯可能只係糯米飯，屎塔一向唔多好糯米......
離開夜市先見到夜市招牌~
今日行程去到尾聲喇，原本我準備好地圖，由夜市去火車站嘅，不過因為落雨關係，懶得拎地圖出嚟睇，直接問人火車站點行~
問咗一個人，佢表現好似好難話到俾我知咁，好明顯，唔係三言兩語教到點行，佢教我哋去到見到大鐘就要再問人~
跟住指示行，都唔見大鐘，不過唔緊要啦，路在口邊嘛，再問~
原來火車站遠在天邊，近在眼前，就喺對面馬路，不過呢度地理環境有啲複雜，就算有人指埋俾你睇，你都唔係咁易睇到個火車站，一定要經行人天橋行到過去先睇到~
過去對面之前，見到麗星郵輪~
去到火車站問一問，又係唔可以用遊悠卡，唯有買票~
基隆火車站好細，可以話一眼見晒，售票處、入閘口、月台都喺同一層，入閘時已經有部車喺度等緊~
上到車見到有個人手上揸住杯勁大珍珠奶茶，我真係未見過咁巨型，裡面可能有數百粒珍珠，我同屎塔笑到收唔到聲~ XDDD
呢架係區間車，站站停，返到台北火車站係用咗五十分鐘......
返到酒店，準備入 lift 嘅時候， lift 門打開，又見到果兩個男仔~ XDDD
夠晒有緣呀~！
沒有留言:
發佈留言