香港 → 台中 → 格上租車 → 日月潭 → 格上交車 → Masalili
一般嚟講，屋企到機場我都會預多啲時間，不過今朝發生咗少少意外，導致遲咗出門口，唯有揸快少少......
其實我知道遲少少問題不大，不過如果我唔趕就會遲好多，最後都算趕得到~
今早嘅意外，其實未解決，最壞嘅情況，會一直拖到今晚先可能可以解決到......
為咗唔好將問題拖到去台灣，我哋嘗試喺機場就地解決~
呢個問題就係有個笨人，諗住將個篋嘅密碼改一改，但就喺改緊密碼嘅時候甩手，結果，密碼係就係改咗，但就秘密到連改密碼嘅笨人自己都唔知個密碼咩......
唉，最壞打算就係去到酒店爆篋，不過都未必要去到呢一步嘅，試勻一千個密碼總會開到嘅，除非今早嘅意外整壞咗個密碼系統啦，我諗唔會咁兒戲啩!?@@
去到機場，見仲有五分鐘先到最後 check-in 時間，一人做事一人當，我開始逐個密碼去試，諗住試一百個先，但試完唔成功，但覺得比想像中用嘅時間少，唔理咁多，一千個就一千個，試晒佢先 check-in！
反正遲少少冇問題，我哋深知已經過咗五分鐘仍然埋頭苦幹咁去試，兩人交替咁試，試到手指都紅晒，我本來想忍痛自己試晒佢，唔想屎塔試密碼試到傷晒，但實在冇辦法，時間緊迫，唔容許休息，只好繼續交替嘗試~
去到最後一百個，輪到我試，唔通真係解鈴還須繫鈴人？
二人加埋重覆試咗九百次嘅動作，其實去到中段已經麻木，變成機械動作，我好擔心因為過於機械嘅關係，就算撞中咗密碼都唔知~
最後呢一百下，我好小心去試，故事好正常咁發展，終於俾我試到！一千個密碼，試咗超過 950 個，天呀，六合彩唔見我中？
撞中果吓心情，用一個興奮嘅「YES」，可以表達到~
事不宜遲，嗱嗱聲走去排隊 check-in~
排咗一陣，就有個男職員叫出我哋要搭嘅航班編號，原來時間開始有啲緊，佢叫我哋出嚟，指咗我哋過隔離櫃檯 check-in 先~
跟住就去搵啲嘢食，去咗大快活，一個餐，二人 share~
關於拍婚照嘅準備，我做漏咗一樣嘢，就係唔記得拎皮帶，雖然我覺得問題不大，但我都盡量去補救~
喺機場只搵到一間有賣皮帶嘅舖頭，不過最平果條都要 $300，太貴喇，唔買~
今次係我第一次搭華航(其實去程係華信)
第一次唔係直接上機，要搭呢種特別嘅接駁巴士~
架機非常細，左排兩座位，右排兩座位，係咁多，飛機餐只得一款~
台灣呢幾日都受颱風「梅姬」(港譯鮎魚)影響，雖然唔係吹正，但都好受外圍雨帶影響，我哋固然有晒心理準備，但都祈求影相果日順順利利，唔好落雨~
「鮎魚」被港稱為史上最強颱風，又會咁蹺俾我撞中，都係果句，六合彩唔見我中?
不幸中之大幸係，冇吹正台灣，雨帶影響亦唔算好嚴重，希望冇事啦~
去到台灣上空，有啲雲，但冇咩雨，個心就滿懷希望。直至到咗機場，啲窗上面出現一劃劃嘅雨絲，唉......
台中「清泉崗機場」，好似好荒蕪咁，四圍都係雜草~
架飛機降落咗之後，轆咗好耐好耐先停低。
跟住就有廣播，係空姐嚟，佢一開聲就講「各位 baby」，我心諗，咁親切？XDDD
事實當然唔會係咁，其實佢係講緊「各位貴賓」，我同屎塔笑到咀都爆埋~ XDDD
台中機場入境處嘅地方好細，行李輸送帶更只得一條~
順利入咗境，就跳上計程車去格上租車~
台中交通唔算方便，旅遊書就有列出機場至市中心嘅各種交通工具，但就推介搭計程車，大約 400 蚊新台幣~
如果大約 100 蚊港幣，就可以唔駛等唔駛拎唔駛搵又點到點，抵啦！
上咗計程車，司機開價 450 蚊新台幣，我問佢 400 蚊得唔得，佢話唔得，其實 450 我係冇問題嘅~
個司機好多嘢講，而且非常唔守交通規則，不停衝燈，不過佢係去到路口見冇車先行，都唔算太危險~
個司機唔係好識路，再三要我哋俾個地址佢睇，去到附近見到格上喺對面，佢就喺一處非常多車並且不准掉頭處掉頭......
我哋終於安全抵達格上租車~
關於台中租車，主要有和運同格上，由於格上車款比較多，所以就揀咗格上，好好彩，格上啱啱做 promotion，可以以租日本車嘅價錢租歐洲車，於是我哋就租咗 VW Polo(當然係出發前在網上搞掂啦)，車牌仲好靚仔添~
我同屎塔上咗車，職員就喺我隔離(車外)不停講解保險細節，聽到我釣晒魚，我雖然深明佢有責任講，我更加有責任聽，不過真係搞唔掂，好眼瞓，只係聽到七成左右~
喺日本租車，取車時係滿油嘅，但今次喺台中呢度，取車時只得半缸油，當然，交車時嘅油量最少要同取車時一樣啦~
GPS 一早喺網上預留，見到個樣就對佢冇咩信心......
我知道用 GPS，有目的地電話就最好，但係日月潭又點會有電話呢?所以我搵咗個碼頭嘅電話，作為目的地，呢個碼頭叫朝霧碼頭~
但係職員幫我輸入電話號碼時，就顯示冇呢個電話，我哋就唯有同佢講我哋想去邊，睇吓佢有冇其他方法可以諗吓~
最後佢就喺 GPS 入面利用景點推介搵到日月潭其中一個地方，而呢個地方同碼頭係非常近嘅，佢仲同我哋講附近有個大型停車場~
咁就掂晒啦，我原先仲諗住去到泊車要睇環境執生添~
根據 Google Maps 嘅資料，台中市中心去日月潭，車程要大約兩個鐘，搞掂晒啲手續就嗱嗱聲出發~
開車唔係好耐，已經俾個 GPS 玩咗幾鑊，五分鐘內上到高速公路嘅路段，因為佢嘅指示唔清，白白喺市中心行咗好多冤枉路，最少浪費咗三十分鐘！
以前用過一次 GPS 係喺日本嘅北海道，唯一問題係指示比實際情況有少許遲緩，但好易適應，適應咗之後完全唔係問題~
但呢個 GPS 就唔同，佢指嘅大方向係啱嘅，但佢會分段指示，成日叫你靠左，但去到靠左係要轉左，佢去到路口先再計算下一段路，話你知要直行！
佢冇錯呀，佢叫我靠左咋，冇叫我轉左，最弊最左果條線要轉左呢，冇車就可以偷雞直行嗟，唔係次次都得咖~
有時落咗橋底直情冇晒訊號，都唔知點算~
有時佢所顯示嘅路同實際環境又唔同，原來只係佢有啲遲緩，但佢嘅遲緩可以遲成五六秒，一架行緊時速 30 公里嘅車，五六秒足以錯過一兩個路口啦，有時多車仲唔可以行得咁慢......
本來喺橋底收唔到訊號都唔怪得佢，但我喺日本試過冇問題呢吓令我不得不怪佢~
今次自駕遊，靠 GPS 之餘，仲要靠睇路牌，夠晒過癮~ @@
台灣同香港揸車最唔同嘅地方，係左軚，真係極之唔慣，我更曾多次忽略咗右邊車身而差點撞壆，真係好彩每次都有驚無險~
如果攞台中同香港及大陸嘅駕駛文化比一比，我會話；香港切線要人讓，肯打燈肯遞手，一定有人讓；大陸切線只要夠位入就可以入，一般嚟講後車都收得切；台中，以上兩種都唔適合，你打燈或遞手，唔會有人讓！你睇準時機入線，就算後車可輕鬆收得切，都一定砵到你爆！喺台中揸車切線，都係停喺度，比多啲耐性等冇車先好入線~
時間非常緊迫，仲要浪費咗半小時遊花園，幾經辛苦先上到條啱嘅高速公路，好衰唔衰，台中嘅駕駛文化裡面，係冇慣性超速呢回事，條路限時速 110 公里，但 99% 以上嘅車都係行緊 100 左右，我真係唔好意思左穿右插同揸得太過快~
行咗唔係好耐，終於離開咗主車群，剩返兩線單程嘅車道，車亦唔多，雖然話趕時間，但其實以安全為先，都唔會開得太快，再加上一路行，我更加留意到一樣嘢，香港好多揸開車嘅人好怕遇到 fastlane blocker，但喺台中，可能冇呢種想法，兩車平排頂住晒後車嘅情況時有發生，後車亦唔會喺號或閃燈催促，只會乖乖地跟隨住，有機會先至扒頭~
我喺香港遇著呢啲情況都唔會催人，喺呢度更加唔會，只好忍耐一下~
一路 keep 住咁嘅情況行，不停出入隧道，大約一個鐘到，終於都離開高速公路，第一件事係搵廁所，最方便嘅梗係油站啦，順便入埋油~
呢間油站叫中潭石油~
我入 400 蚊新台幣，俾 500 蚊紙佢，佢送咗支水俾我，我同屎塔都好口乾，呢支水真係及時雨！跟住見佢放好錢但又冇打算找錢，唔通果 100 蚊差額係稅嚟嘅？我落車去問佢，佢先恍然大悟，原來佢唔記得咗找錢...... ~_~!
屎塔去完廁所就到我去，我去緊嘅時候聽到門外有人大聲講嘢，我冇咩為意繼續我做緊嘅嘢~
完事後出到嚟就有個大嬸好急咁同我講嘢，我啲國語唔係太好，佢講得咁急我真係唔知佢講咩，我用心聽多次就知道，原來我架車頂住後面架車，真係唔好意思，嗱嗱聲開車走人~
離開咗高速公路，係一條四線雙程嘅來回道路，多彎而且路面不平，再加上左軚車，好冇安全感~
由開車到而家，天色都唔係幾好，一路都係陰天，而且越近日月潭就越暗，但就冇落雨，希望一路 keep 住咁樣唔落雨就好嘞~
台中有一種燈號，我真係點諗都唔明，就係不停閃動嘅黃燈，我見個個都唔停繼續行，我當然照跟，不過就冇俾油，腳掌放在 brake 上方，以防有突發事情~
究竟呢種燈號代表啲咩呢？我有諗過係要慢速通過，但又眼見架架車都冇收慢過......
又行咗一段時間，不幸地，開始落雨，一直落，落到我哋到咗目的地都仲落緊~
根據 GPS 嘅指示，我哋需要穿過一條街，呢條街人唔算多，當然係因為落雨！其中一旁泊滿車，不過，呢條路係俾來回嘅車穿過嘅，條路亦唔係由頭到尾都係直嘅，啲車又唔係泊到貼晒邊，結果，一架車行都可以嘅，但有啲位係要偷位偷得好好先過到，長啲嘅車絕對要幾手軚先過到~
GPS 就帶到我哋嚟呢度，其餘路程就要靠自己~
穿過咗呢條街，我見到個大型停車場，直行有條路，但係好窄，唔多似係俾車行，我好慢好慢咁駛前睇吓個環境，我睇到前路係條樓梯，唯有倒車啦，我倒車時就有人話我知停車場點去，真係尷尬~
去到停車場入口，冇閘又冇人走埋嚟，原來個場係免場咖，我最鍾意呢啲場~ =P
泊好車睇睇時間，用咗 1 小時 50 分鐘，唔計行錯路，唔駛個半鐘就到，早咁多，相信係 Google Maps 嘅計算比較保守之故，咁嘅設定都啱嘅~
泊好車望一望，雨唔算太大，但一啲都唔細，有一刻閃過不如揸架車周圍行吓就算，其實自己都深知唔會咁做，一場嚟到，冇理由唔用腳四圍行吓，雨之嘛，算得啲咩？
因為時間關係，本身都諗住只係散步式遊覽，食吓嘢消磨兩小時，但落咁大雨，難免掃興，就連日月潭都看不清，只係隱約見到日月潭嘅景色，海面能見度好低~
走出碼頭，原來成個碼頭都係浮於水上，影完一輪相就去返先前果條窄街搵嘢食~
首先放入口嘅，係雪糕，香菇雪糕~
我就覺得一啲菇味都冇，唔好食嘅~
再行落去，都搵唔到一間令我哋有興趣嘅食肆，行返出大街再往前走，多數舖頭都冇開，都係落雨累事，不過其實我哋都唔肚餓，可以話冇咩胃口，決定唔食嘢住，四圍行吓影吓相~
日月潭......
日月潭燈柱
總統魚 @@?
見到條友揸住把遮開機車，單手濕地兩個轆，簡直係特技~ @@
雖然仲有時間，不過留喺度都冇咩意思，決定先去交車，再去 Masalili 附近食嘢~
開車唔係好耐，雨勢細咗好多，又咁啱見到有一處地方比較能夠睇到清楚啲嘅日月潭，我哋決定落去睇睇~
其實我已經過咗落去嘅路口一個車位，好彩後面冇車，我就倒後少少落返去~
景都唔係好好多，不過一場嚟到，影多幾張相留念都要嘅~
一路回程，天色就開始好返啲。我負責駕駛，屎塔負責瞓覺~ XDDD
個多小時後就到市區，台中嘅機車(電單車)真係多得嚇人，無處不在，機車同汽車嘅比率可能係 3；1 甚至係 4：1，真係好誇張~
喺台中揸車，要極其小心突然殺出嚟嘅機車，不過有度好，佢哋主要行慢線，印象中好少見到機車行中快線~
不過咁，佢哋可能真係訓練有素，不論男女，又或者係阿嬸阿叔，儘管四處亂竄，手車都唔錯，可能係環境造就一身好駕工~
跟足 GPS 嘅指示，去到一條小路，小路盡頭係 90 度左轉嘅街角，街角處外圍係停車場，根據指示，過咗街角就即刻要右轉，但現場環境，根本就冇路可以轉出去，除非......除非穿過個停車場啦！
我又怕一入個停車場，佢就以為我泊車，繼而開始計時收錢~
我即時倒車，停埋一邊，打算落車問吓停車場嘅人，不過我一落車就有車喺停車場對面大廈駛出嚟，直接穿過停車場到出面大街，哈，二仔底死跟啦~
結果真係可以就咁樣穿過，又係過路處又係停車場，真係好奇怪~
好輕易就到達格上交車，租一日但只駕數小時嘅客，睇怕都唔會好多~
泊好車後，想話開車尾廂攞返個篋，不過我試極都開唔到，唯有向職員求助~
佢一邊驗收，一邊同我傾偈，問我跟住去邊度玩，我就話去 Masalili~
我唔知 Masalili 喺當地名氣有幾大，會唔會好似香港啲大型婚照公司咁，多數人都會聽過，但係結果，佢唔知我講咩......
我話佢知係影婚照嘅公司~
搞掂晒啲手續，職員問我哋要唔要叫車，如要佢會幫我哋叫，真係細心~
不過佢話呢個鐘數好難叫車，但佢依然打電話碰碰運氣，結果真係冇車，唯有出街截~
佢哋真係好好，好主動咁出街幫我哋截，好彩只係等咗幾分鐘就有車~
的確，呢個鐘數，真係好多車，眼見嘅每一條街都係車，非常繁忙，仲有少少塞車~
而家係五點幾，個天已經好暗，條街仲暗，因為街燈仲未開，相比香港，咁嘅天色，一早就著晒燈~
坐咗半個鐘頭計程車就到 Masalili，個天亦都已經黑晒，街燈亦已經亮著，不過啲燈唔算好光，只係好過冇~
唔知當時做乜鬼，張張相都影得好差，可能因為拖住個篋，心情又緊張啦~
去到門口已經有人開門，門口有成四個人，我哋入到去，佢揸住份表即刻講咗一個名字，其實佢又點會知我哋係邊個，之前做嘅溝通全部都係電郵同電話~
好明顯，因為我哋早咗成個幾鐘到，佢睇時間嚟認人，當然係錯晒啦~
我哋話唔係，跟住就喺佢份表度指出我哋係邊個~
揸住份表果個係個小肥仔，不過佢係大隻果種肥，個樣仲幾可愛，佢嘗試用廣東話讀出屎塔個中文名，都算 OK 讀到~
呢個小肥仔勁似日本人，屎塔忍唔住問吓佢，佢笑笑口咁話唔係~
我哋說明來意，想放低行李去食嘢先，佢哋好熱情咁即刻幫我拎行李，放埋一邊，另一位工作人員仲介紹我哋可以去邊度搵嘢食，個個都好友善~
放底行李梗係輕鬆晒，即刻去搵嘢食~
根據果位職員講，附近有兩條街都好多嘢食，一條大街，一條小街，直覺上好似小街會比較地道，一於向住小街方向行去~
穿過一條冇人嘅暗巷，出咗大街(即係好多嘢食嘅小街)，好多機車又好多人，好彩冇落雨，可以慢慢行吓~
駛唔駛咁大個招牌......
10 蚊新台幣一件壽司？平就梗係平，但係咁樣擺法我哋真係唔敢食~
經過一間拉麵舖，好香，不過最後都係揀咗「龍品魚丸店」
食物種類唔算多，求其叫咗兩碟飯同兩個餸(字眼跟足餐牌)：
- 招牌飯：包括魯肉飯、排骨、二條蝦捲
- 綜合飯：包括魯肉飯、蝦捲、花枝
- 燙青菜
- 蝦仁湯
呢間嘢嘅點菜形式係喺餐單上 tick 你要嘅嘢，之後呢？我都唔知，見到阿姐就問吓佢，佢指一指出面，咁我就拎住張單出出面檔口俾出面個阿姐~
阿姐收咗我張嘢，就遞過隔離個阿姐，咁我好自然就移過隔離個阿姐前面，點知收單果個阿姐好豪氣咁同我講嘢，我唔知佢講咩，佢又再問一次，原來佢問我要甚麼~
我咪 tick 咗喺張單度囉，仲問？我叫佢睇返張單，佢揸住隻碟指一指前面怒吼：「選三個」
佢前面有七八樣小菜，我明喇，除咗我哋 tick 嘅，仲可以揀三樣，早知咁多嘢就叫少啲啦~ @@
我又求其每碟揀咗三樣~
睇個樣就真係麻麻地，不過味道比想像中好得多，尤其係果碗蝦仁湯，彈口有鮮蝦味，好食！
食到飽一飽，見仲有時間，就兜去外邊大街慢慢行返 Masalili~
行咗一圏，唔難明白點解台中機車比汽車多，仲要係多好多~
因為機車幾乎可以停泊喺街上任何地方，就連行人路都俾機車盡佔，非常方便，再加上台中公共交通如公車，班次唔密，至少我就好少見到公車嘅蹤影，又冇鐵路，揸機車可謂經濟又方便~
我覺得台中嘅行人路，基本上唔係為行人而設嘅，全部擺滿機車，其實諗諗吓，喺台中揸機車完全可以點到點，啲人邊駛行路？
行喺台中嘅路上，非常冇安全感，好多時都要行馬路，隨時隨地有機車近距離喺身邊飛過~
返到 Masalili，照例受到熱情嘅款待，首先被邀請上一層，樓梯係開放式嘅，二樓只得一樓(即地面)一半面積，一樓係可以望到二樓天花，而且每層嘅樓底亦非常高，形成一個空間感極其強烈嘅感覺，一入到去已經好舒服~
上到二樓要再上半層，上呢半層之前要除鞋，並附有拖鞋~
內部裝潢唔算華麗，但就予人一種非常舒服嘅感覺~
帶我哋上去嘅係一位小姐，名叫曉曦，佢第一件事就問屎塔有冇帶 Nu-Bra，有係有，不過喺樓下個篋度，我梗係即刻落去攞啦，但係冇理由曦地下咁多人同客面前爆篋咖，唯有成個篋拎上去，攰到爆~ @@
其實屎塔準備咗 Nu-Bra 同 Girdle，我哋估計台灣唔興 Girdle，因為佢提都冇提過~
跟住曉曦就帶我哋再行入啲，入面係一條樓梯，上咗兩層，嚟到一處明顯係放衫嘅地方~
兩邊盡頭係試身室，兩旁放滿衣袋，加埋其中一間試身室入面嘅衣袋，粗略估計，有成百五至二百件，全部係晚裝，而且全部可以揀，唔會話某啲要加錢先可以揀，真係好多選擇~
屎塔嘅任務係要揀三件晚裝，簡直係一個挑戰~
成個區域就只有我倆同曉曦，真係夠晒自由，可以慢慢揀~
屎塔一路睇一路嗌攰，梗係啦，件件都咁重，仲要逐件拉出嚟睇，又要不停推移，我都已經有幫手，等佢唔駛一次過推咁多件，不過依然係好攰~
曉曦叫屎塔睇啱就拉一拉件衫出嚟，佢見到就會成件拎出嚟放入試身室，其實我哋都唔算得係啲咩，佢一日都唔知要服務幾多個客，日日係咁做，肯定好辛苦，難怪佢要戴護腕開工~
不過曉曦好專業，全程沒有一絲不快表情，一直係微笑友善同樂意，值得讚賞~
屎塔揀衫途中，曉曦都有嘗試幫手，問屎塔有冇咩喜好或者有冇啲咩顏色或款式一定唔會揀，佢再因應屎塔嘅喜好而作出推介~
最後揀咗好似都有八件，曉曦同屎塔就入咗試身室，逐件試，試完再俾我望一望~
試第一件係最耐嘅，因為屎塔唔識用 Nu-Bra，曉曦要幫佢~
試身過程我就最冇嘢做，只好呆坐~
每試一件，就要用心用力記住佢，到最後要決定要邊三件~
佢揀嘅咁多套入面，只得一兩件著咗上身唔係咁鍾意，咁就頭痛，真係好難揀，件件都咁好睇咁鍾意~
最後當然決定到要邊三件，仲決定埋邊兩件用喺外景同邊一件用喺內景~
其實我哋可以決定揀少一件白紗(即婚紗)，將個 quota 俾埋晚裝，但係我哋唔會咁揀，我相信多數人都唔會咁暕~
決定咗晚裝，輪到白紗，落一層就到揀白紗嘅地方，白紗選擇較少，大約有六七十件，其實都已經好多，屎塔要揀兩件~
屎塔又開始挑選嘅工夫，不過今次冇咁頭痛，揀中嘅只有五六件，其中一件唔係放喺衣架嘅，係放喺類似茶几嘅檯上，曉曦話呢件好重，唔可以放衣架上~
呢件睇落幾可愛，所以都會試一試~
結果呢件一著上身，真係同就咁睇爭好遠，即 foul！
另一件就望落一般，但著咗上身就認真唔錯，就要呢件~
再另外有一件，屎塔著咗上身成個阿嬸咁~ XDDD
唔係好難咁就揀咗兩件，決定埋邊件用於外景同內景~
成個過程用咗唔夠兩個鐘，我覺得算幾快~
跟住就要落返地下，同攝影師溝通~
攝影師其貌不揚，但風趣幽默，氣氛輕鬆，他叫主任，其實我搞不清「主任」呢兩個字係職級還是別名，反正他自我介紹自己做主任，我哋以主任去稱呼佢點都唔會錯~
嚟台灣之前，已經透過電郵收到一份問卷，大致係想了解一下我哋對婚照嘅喜好，有冇啲咩形式嘅照片比較不喜歡咁，主任手上就係揸住呢份問卷去同我哋再深入啲咁傾~
佢問咗好多問題，例如是否喜歡懷舊照、是否喜歡跳脫......等等
經過一輪溝通，又輪到另一位小姐同我哋傾，佢係客戶服務部嘅 Elly
佢係同我哋傾返我哋買果個 package 嘅內容，當中當然包括收費~
佢詳細講解返個 package 嘅內容之後，就開始講優惠，講嘅，係再加錢買嘅優惠~
我哋個 package 只得 20 組(佢哋叫一張相做一組)相片，其實真係太少，我哋都預咗會加相，經過一輪答問，今日加多一本相簿，可以有八折，聽日先加就冇折~
我哋即場決定加多一本，即 20 組~
而我哋之前參加過 Masalili 一個活動，取得 3000 蚊新台幣嘅 coupon，但唔可以用喺 package 本身同運費，亦唔可以同其他優惠共同使用，所以決定買多幾張相~
傾完一輪，加相入相簿一定要以 20 為單位，咁又係嘅，唔通幾張相同你開一本新相簿咩，最折衷方法係買相但唔入相簿，只要檔案，沒有固定單位，600 蚊新台幣一張，3000 蚊 coupon 剛好可以用盡買到 5 張相，就咁決定~
Masalili 嘅收費模式，如果俾現金會平少少，而且唔會一次過收晒，三日服務就分三日收，非常均真~
不過第一日通常都會俾埋第二日嘅錢，因為第二日出外景，唔方便帶咁多錢喺身，我哋都係咁做，第一日俾埋第二日嘅錢~
去到尾聲，佢俾咗六張貼紙我哋，作用係送俾值得加許嘅服務員，我哋即時送咗一張俾 Elly，佢好開心咁連聲道謝~
完成晒今日嘅溝通，盡快返酒店休息，今晚一定要有充足嘅睡眠，避免聽日冇精神同殘殘地咁去影相~
Elly 幫我哋叫埋計程車，服務真係好好，成個過程都好愉快，好滿意~
今日坐過兩種計程車，發覺呢度啲司機手車真係唔錯，要同無窮無盡嘅機車爭路，入到啲小街先利害，多人又多機車，佢哋都可以以超乎想像嘅速度前進，我揸車經驗都快有十年，而且差唔多日日都揸，自問真係冇佢哋咁勁，佩服！
經過二十分鐘驚心動魄嘅歷程，終於嚟到酒店 - 黎客商旅 Le Parker
呢間酒店係拍婚照個 package 包埋嘅，包兩晚，其實個 package 仲有另一個選擇，係一晚長榮桂冠(二晚要額外自己俾)，我哋對酒店嘅要求，係價錢、地點同清潔，酒店是否高級及多設施，唔係好重要，所以揀咗黎客商旅~
沒有留言:
發佈留言