一如計劃般 0930 出門口，打算 1100 到機場，中間要返一返屎塔舊居攞個旅行用嘅隨身袋，我又可以探吓妹豬，其實我真係好鍾意妹豬，雖然佢令我同屎塔都留下不少永不磨滅嘅傷痕......
未夠 1100 已經進入機場範圍，一路留意長期停泊車位喺幾多號停車場。同上年一樣係二號，顯示牌顯示仲有車位。其實我都冇擔心過車位問題，泊咁多次機場都未試過冇位。
去到二號停車場，離遠見到「滿」呢個字，不過個滿字係喺短期呢項隔離，嚇得我吖，冇得長泊逐個鐘計咪好甘......@@
行到埋去，有個警衛截停我哋，話俾我哋知長期都冇位，但可以轉泊博覽館，價錢一樣。
咁我都安心啲，佢仲派咗張地圖俾我哋，不過我同屎塔都睇唔明，但係我又唔擔心嘅，相信睇路牌都可以去到，反正時間方面好鬆動~
如我所料，好容易就搵到博覽館嘅停車場，埋到去睇吓收費，又俾個收費嚇親！
$80 一日？五日咪 $400......
上年嘅收費，五日只需 $340，唔通加咗價？
咁我就問個職員長泊點計啦，原來都係頭三日 $200，之後 $70 一日，即係同上年一樣~~~
入到去，緊係搵個最近出入口嘅車位啦，不過都泊咗唔少車。泊完車後就留意返個車位編號，方便返嚟時記得部車泊邊，細看之下，呢個編號同我哋兩個都有關係，亦同我個篋用嘅密碼係一樣嘅，實記得啦~
跟手就上咗架穿梭巴士去客運大樓。
我哋搭南航，都知道唔會喺大 counter，睇顯示牌睇到係 J，嘩，好鬼遠呀~~~
不過就唔係好多人，到呢刻我醒起我唔記得做網上 check-in，其實都冇咩所謂，人少時間又早，都唔算係咩問題~
排隊時有段小插曲，我哋前面有兩個人，左面就有兩位客人同兩位職員，正前方 counter 當然都有一位職員啦，左面果兩位職員係咁同 counter 果位職員講嘢，counter 果位職員又拎住個電話係咁講，根本三個職員都處理緊左面兩位客人嘅問題，我哋條隊就冇郁過又冇人理~
其實我都未知發生咩事，因為我都唔係排咗好耐同冇乜留意~
直至前面果位女仕頂唔順開聲，內容大意都係話，如果有特別事情要處理，係咪應該另外搵人做，唔係阻住成個 counter 停晒喺度！
佢又講得啱，如果要 counter 果位職員先處理到，就應該掉一掉人分開處理，不過咁，我又唔清楚發生咩事，啲職員係咪處理得唔好，我又唔敢罔下判斷，我淨係知，經果位女仕講完條隊先郁返~
唔知係因為細航空公司定因為有事煩緊，果位空姐全程冇笑容，的確，人家不是賣笑的，但至少都要俾人感覺有善才是，係咪我要求太多呢？
今次去程行李為 13 KG，算係輕啦~
check-in 完就走去食嘢，我哋決定唔會食中餐，因為新年已經食唔少，去北京，當然亦離唔開中餐，今次我哋揀咗味千拉麵~
由於時間好充裕，即使有兩檯客遲過我哋入但早過我哋有嘢食，甚至其中一檯食完走埋我哋都仲未有嘢食，我哋都冇催~
唔催唔怕漏單咩？唔怕，因為飲品一早嚟咗，我哋覺得漏單嘅機會不大，續以輕鬆嘅心情繼續等~
我點咗個豚肉拉麵~
屎塔就點咗個雞肉冷麵~
因為北京天氣好乾燥，屎塔就準備咗包裝枇杷膏，而我就比較抗拒，並且覺得冇咁方便，於是我就去買咗盒喉糖~
閘口係 30 號，爭啲就要搭無人列車~
過海關時，屎塔有支潤手嘢係 100ml 嘅，但冇用袋入住，海關職員就主動拎個密實袋出嚟入住佢~
有時都覺得幾無謂，有袋同冇袋入住支潤手嘢，真係可以同恐襲扯上一丁點關係嗎？不過法例係咁，海關職員咁做當然冇問題~
等咗唔係好耐就可以上機，好彩冇 delay。經過行人通道時我先醒起，check-in 時唔記得同個空姐講要窗口位，希望有編到啦~
好彩，編咗窗口位，不過就喺廁所前面，椅背只可以向後移好少，其實都冇咩所謂，廁所外其實冇咩味，可唔可以瞓後啲亦冇乜相干，反正如果後面有人坐，我都唔會瞓得太後~
起飛時，空姐介紹機長有豐富嘅飛行經驗，仲講埋有成二十三年，咁下次唔提幾多年經驗嘅，咪即係冇咩經驗？@@
由起飛至一小時後，都覺得好定，可能係大機啦，亦令我對南航有返啲信心~
不過大機還大機，前方椅背係冇螢幕嘅，少了一點 kill time 活動~
咁究竟有冇飛機餐呢？
答案係有嘅，有雞肉麵同豬肉飯，我哋梗係每樣要一款試試啦~
老實講，不比大航空公司嘅差，當然，飛機餐唔會預佢好食，我只係覺得，機又定，餐又唔算難食，價錢又唔貴，都幾好吖~
不過呢，又俾我預到啲唔顧人感受嘅人，前面個女人，係一位年輕婆婆，佢瞓後嘅程度對我食嘢係有少少影響嘅，我要拎起啲嘢先食到，如果唔係個頭就要頂住前面椅背先得~
飲品方面，今次我冇點愛喝嘅茄汁，揀咗椰汁，都 ok 好飲。
突然間，「嘭」一聲！我同屎塔都嘩咗一聲，前面果位年輕婆婆，將椅背放返直，但佢放直嘅時候冇用身體頂住慢放，導致椅背一下子「撞」回原位！杯椰汁震咗一震，喺杯中浪咗幾嘢，好彩冇濺到出杯外~
我唔否認，我果一聲「嘩」，當中除咗真正嘅驚嚇，伴隨住嘅仲有刻意表示我嘅不滿，屎塔係咪都係咁我就唔知喇~
我所發嘅牢騷算多餘嗎？是我缺乏容人之心嗎？是我問題嗎？
好不容易瞓到降落，感覺上算係好平穩，成個人放心晒~
其實我都幾怕搭飛機......
未到入境位時，就見到一啲好古中國嘅擺設，同機場好唔夾......
入境方面好順利冇咩人，等緊嘅時候見到櫃檯前方有排按鍵，睇又睇唔到係咩嚟，但個個人離開前都會襟一襟，我哋有少少擔心唔識襟......
車~~~
原來啲掣係對入境職員嘅評分，我同屎塔都俾咗非常滿意，雖然都係冇咩笑容，但人家不是服務性行業嘛，笑乜鬼唧~
好快就攞到行李，過海關又冇人理，GOOD~~~
過埋海關就正式到達北京機場開始自遊行之旅，一出大堂，梗係影吓相先啦~
我哋見到有部車放咗喺度，再睇吓個牌子，係 Skoda，呢個牌子對香港人嚟講有另一個稱呼......=P
跟住就要搭機場快軌出市區，我眼見好多出口都有機場快軌嘅指示，個個出口都啱，咁我相信呢個機場快軌係貫穿機場嘅，唔係點會咁多出口都話啱吖~
出咗門口，諗住實有指示啦，點知係乜指示都冇！咁我就是但向一邊行，我諗實搵到嘅，行咗一陣都仲未見有指示，擰轉面，就俾我見到有條電梯係向下嘅，上面有個指示牌，呢個指示牌係單向嘅，我唔擰轉面係見唔到啲字嘅，上面有機場路軌呢幾個字，我都係博吓佢係指機場快軌咋，所以決定落去睇睇~
落到去就知我哋冇估錯，但係點解入面同出面唔一齊用機場快軌呢？奇怪~
好，買飛搭車，售票機係好容易用嘅 touch screen 方式，相當簡易，$25 一個，有個掣可以揀一次過買兩張，揀好站同張數，再按照佢入錢嘅方式指示去入錢，以為實搞掂啦，但點入佢都係彈返張錢出嚟。見到上面有個求助掣，咪襟吓佢囉，等咗一分鐘都唔見到人打救我哋，再細看螢幕，原來佢唔收一百元紙幣嘅......
成 $25 一個，連一百蚊紙都唔收？@@
但係我哋嘅旅程先啱啱開始，又點會有散紙吖，唯有睇吓邊度可以有人肉售票處啦~
行幾步轉角位就有，順利買到兩張飛，由機場 T2 搭到去三元橋站~
買完飛我先醒起唔記得幫屎塔買「一卡通」，不過唔緊要啦，陣間轉地鐵前買都得嘅~
上咗車就 send sms 俾茄，話佢知我哋到咗北京。
車廂就冇咩特別，都係一般格局~
隔咗一陣，仲未收到茄嘅 sms，於是我又 send 多個俾佢。
二十分鐘就到三元橋站，跟住我哋要轉地鐵嘅 10 號線去國貿站。一路跟指示，好容易就到咗三元橋嘅地鐵站。
去到地鐵就睇吓去國貿要搭邊個方向嘅車，地鐵嘅換乘指示好清楚，我哋要搭向勁松果邊~
勁松，個名好似怪怪咁~~~
咦？咪住，簡體喎！係勁鬆先啱，哈哈，勁鬆仲怪~XDDD
好，搭地鐵前，要同屎塔買張一卡通先，我揸住我自己果張，走過去幾十米外嘅售票處，同佢講我要一張一卡通，睇書講要 $20 按金 + $20 值嘅。走到埋去，佢同我講要去第二邊買，佢向自己後面指一指就話：那邊
剛才一落地鐵口就見到中間有個冇開嘅售票處，我心諗，你唔係指我去果度下化？！
點都好啦，我又行返過去，經過屎塔身邊，同佢講返我要搵第二個售票處......
三元橋地鐵站好細，我就見唔到第三個售票處，但係點都好，行晒搵唔到先再算啦~
向住反方向行，行咗一陣，原來真係有第三個售票處，我諗冇問題嘞呱~
我又做返同一樣嘅嘢，講同一樣嘅話，佢反問我入幾多錢，我幾乎冇任何反應俾佢，我冇諗過 $20 值唔係預設嘅，呆咗半秒，我好下意識咁答佢二十塊~
買到喇~~~
好快就等到有車，上咗車我又望吓手機，仲未有茄嘅消息，我決定打俾佢！
電話通咗，響咗一陣冇人聽去咗留言。都好，起碼証實我係打得到俾佢嘅~
既然去咗留言，即係計咗錢啦，梗係照留啦！
差唔多落車都仲未有茄嘅消息，不過我又唔太擔心嘅，再夜啲佢都實會主動聯絡我嘅~
臨落車前再打一次俾佢，今次有人聽喇，係阿茄呀~~~
原來佢見到冇來電顯示所以唔聽，留言又以為係推銷電話，笨茄即係笨茄，呢個鐘數，我打嚟嘅機會都好大啦，聽咗先算嘛~~~
佢話我知佢喺王府井大街，叫我 check-in 完過去搵佢，地鐵站口等，佢話只得一個出口，所以一定見到。
咁我就放心晒啦~
到咗國貿站，從 Google Map 上獲得嘅資料，我要喺 A 出口出。但落咗車之後只有 EFG 出口，冇 ABCD......
我同屎塔左望右望都真係搵唔到 ABCD 出口嘅指示，唯有睇吓地鐵站嘅地圖。地圖上都只係有講 EFG 出口附近嘅環境，我將地鐵站嘅地圖同旅遊書嘅地圖對照一下，假如真係要喺 EFG 出口當中揀一個，E 係最近嘅，咁我哋只好利用 E 出口啦~
上咗地面，再睇吓啲街名，認定咗一個大方向，希望冇錯啦~
不過我對屎塔嘅方向感係有信心嘅，佢同我都覺得前方係啱嘅，唔好諗咁多，去吧，屎塔兵團~~~
2009 年嘅北京街頭，絕對唔能夠令我有任何似曾相識嘅感覺，畢竟都快二十年了~
比較有印象嘅係呢種兩截公車，依然存在~
其實喺 E 出口附近，我哋就見到第二個出口，呢個係 B 出口......
一路行一路行，我哋經過中國國際貿易中心，就喺呢個中心嘅大門嘅側邊，有一個出入口，細看之下，原來呢個就係國貿站嘅 A 出口，錯過咗呢個 A 出口唔緊要，至少呢個出口話俾我哋知，我哋嘅方向係啱嘅~
好快就見到酒店嘅外貌~
攞咗電子鎖匙(典型一張卡咁款)，就搭 lift 上去，但係部 lift 襟極都冇反應，我見到有個位係用嚟拍卡嘅，咁我估係要拍咗卡先可以襟啦，結果真係~
房門都係用拍卡形式開嘅，間房都算幾大，仲有兩張雙人床~
放低咗行李就出發往王府井大街會茄康。酒店去王府井大街非常方便，一程地鐵就到。
由酒店行去永安里地鐵站，只需數分鐘。站前泊滿車，仲有個公安喺度寫紙仔攝落啲車嘅水撥度，上面係有時間嘅，唔知有咩意思呢~
落到去發現要做安檢，不過我哋冇大袋，所以冇人理我哋，我哋亦都冇理人哋~XDDD
仲見到大大個字，寫住環保廁所，唔知點環保法呢......
(據消息透露，入邊滿是便便，唔通環保即係連沖水用嘅水都慳返？o_O!)
我哋只需搭幾個站到王府井站就可以去到王府井大街。
上咗車，第一樣嘢引起我注意嘅，就係手挽，上面寫住「我們都是愛國者」
唔駛咁洗腦下化......@@
睇真啲，原來係廣告嚟嘅~XDDD
落咗車，記得茄話得一個出口，我幾乎乜都唔理只往前走，但又見到有 ABC 出口喎......
跟住我見到王府井大街可以利用 C 出口，咁茄都冇錯，只係我誤會咗嗟，得一個出口，咪就係得 C 出口囉~ =D
一路跟住 C 出口，去到一條走廊，牆身係全白色嘅，乜都冇寫，冇牌冇指示，就好似個「二」字咁，左上右上左下右下都有出口，邊個先啱呢？又話得一個出口......@@
其實都冇咩問題嘅，逐個睇吓囉~
逐個睇之前，我見到有啲小販擺賣，賣嘅係福娃同一啲小玩具。
「十塊十塊十塊十塊」$10 一個福娃，都有唔少人幫襯~
「十塊十塊十塊十塊」，那人只需一秒就發晒咁多個音，如果係廣東話「十蚊十蚊十蚊十蚊」，我都可以，國語我就真係唔得，屎塔都試過係唔得嘅，好鬼難讀，條脷又伸又縮，果個人仲唔只叫一次，係不停咁叫，利害利害~
每個出口處轉角都有指示呢個出口去邊(未行到係睇唔到嘅)，但四個出口都冇講王府井大街......
咁唯有是但揀個上去睇睇啦，上到去，未到過嘅都可以估到邊個方向係王府井大街，最光猛，最燈火通明就一定係啦~
雖然我哋上錯咗，但係有個大方向就一定去到~
到咗王府井大街嘅街頭，真係幾凍，但我唔知而家係幾多度，有著羽絨，身就唔係好凍，係個頭同對手，仲有對腳......
上到去唔見茄康，我又出動我嘅手提電話，打俾茄。
佢話我知佢喺我同佢講過嘅小食街，有間 KFC，咁就易啦，就行過去搵佢~
就喺呢個時候見到部咁嘅嘢......
個司機仲望鏡頭笑添~ =D
我同茄講過嘅小食街係「東華門夜市」，我知道東華門夜市同我而家嘅位置係有一段距離嘅，起碼係幾條街之後，但我行咗唔夠一條街就見到 KFC，唔通王府井有唔只一間 KFC？唔理啦，過到 KFC 望一望先再算~
過到 KFC，都唔見茄康，諗住上去睇吓之際，有兩隻鬼咁嘅嘢企喺度望住我同屎塔！
撞鬼囉，原來茄康就喺我哋隔離~
終於都 meet 到喇！
茄向背後上面指一指，原來佢話我知佢講緊嘅小食街係「王府井小吃街」。咁就一定唔係我話佢知有呢條街，因為書冇提過我亦唔知有呢條街嘅~
茄話仲未試過入面啲嘢，等埋我哋先一齊試~ =D
茄又話我哋知佢冇去滑雪，因為一起身已經係十二點幾，諗住去天津，去到火車站，睇吓啲班次又發覺趕唔切，結果就成日喺王府井大街行，仲搭遊覽車遊埋有錢人住嘅胡同。
呢個消息真係好意外......
好啦，係時候食嘢，打算去食「狗不理」，茄康即刻話帶我哋去~
佢哋遊咗一日，真係好熟路~XDDD
行咗一陣就到狗不理~
門面好似好靚咁，入面就好一般，人多檯多，通道窄，職員態度差~
睇睇重點嘅食物先~
食物方面主要係包，有豬肉包、三鮮包、香菇油菜包、山野菜包，全部都係以餐嘅形式咁叫，一個餐有包有綠豆粥仲有風味鹹菜。
由於講好咗我做管錢嘅，一人夾相同嘅錢，公家錢就我俾。我買嘢嘅時候就成疊錢拎咗出嚟，茄即刻喝住我，話我咁樣好危險！
呢吓我又真係笨咗啲，喺香港就鬼咁小心，反而去旅行就咁鬼大意，真係抵鬧！在此要多謝阿茄嘅當頭棒喝！
我哋點咗兩個精品，即係乜包都有，總共九個包、一碗綠豆粥同一小碟風味鹹菜，綠豆粥係可以任添嘅~
茄話碗綠豆粥好難食，我試過又覺得未到難食嘅，只係唔好食同唔會再添......
包就 ok 啦，都係一般包咁嘅味道，飽就唔飽咖喇，不過陣間仲可以食嘢~
食緊嘢嘅時候，隔離檯有位小姐左手揸住兩串冰糖葫蘆，右手就食其他嘢，真係怕佢會唔小心隊咗兩串嘢過嚟......@@
狗不理正對面就係傳說中嘅「全聚德」，雖然好出名，但今次旅程冇編排到去食，因為根據情報搜集所知，有間更好食嘅~
喺全聚德側邊，有個人擺賣緊一啲小玩意，睇真啲，原來就係今次旅程第三日希望會遇到嘅叔叔！
呢個叔叔，只係用口吹，就可以將啲糖吹成十二生肖咁，仲幾靚咖~
書講佢會喺南鑼鼓巷(在第三日行程之內)不定期同不定時擺賣嘅，估唔到今日就喺呢度見到，真係好彩！
不過呢個叔叔個樣唔係好似書講果個，咁我相信唔只一個賣呢啲嘢啦~
我哋都停咗好一段時間去睇佢表演，不過唔好話買，就連睇嘅人都好少~
最大問題係唔會食！隻隻都經過有機處理呀大佬~@@
跟住就向王府井小吃街進發！
一入去第一個檔口，真係嚇一嚇，一串串蠍子同海馬，仲有蟬蛹，我真係唔敢食~
不過茄就好想試一隻蠍子，睇嚟康都可以接受到。一串有四隻，啱啱好一人一隻，茄係咁慫恿我同屎塔。
係冇用嘅~
我喺香港都唔會掃街，又點會喺北京食埋啲咁嘅嘢吖~
屎塔呢，佢更加唔會食，啲嘢凍咗佢都怕變壞，望落唔夠熱佢亦唔多願食，一個食嘢咁小心嘅人，又點會喺北京食埋啲咁嘅嘢吖~
我哋點都唔掣，茄當然冇計啦。唔係一齊食，又真係冇咁壯膽嘅，仲要食兩隻喎，最後都冇買到~
跟住經過一檔土耳其烤肉，茄康就點咗一客~
所謂土耳其烤肉，其實係一條轉緊嘅柱，上面有一大舊肉，有人要就用刀削幾片落嚟，再加上檯面嘅菜，咁就完成~
茄話幾好味，但菜就係凍嘅~
繼續行，又有一檔賣蠍子嘅，但今次同第一檔好唔同，一隻隻大嘅黑色蠍子、蟋蟀、蜈蚣同埋啲唔知咩嘢嚟，好恐怖吓......@@
價錢牌上就有：蠍子、海馬、海狗、海星、海龍、海燕、蜈蚣、金蟬、蠶蛹
全部我都唔會試嘅~
跟住擰轉面，就見到有人揸住「吹糖」嚟食！乜真係有人食咖？？？
喺小吃街入面，最難避嘅，除咗人之外，就係痰！
雖則又未到一地都係，但又真係幾多，我相信我都踩唔少......
人又多，街又黑，點避吖~
當地人喺有人阻礙前路時，最常用嘅方法就係推開你，初頭我好唔慣，但都知呢個係呢度嘅文化，冇計咖喇~
我只好融入佢哋，鬥推！
行行吓，有個女仕就喺我面前隨地吐肉！雖然唔算係啲咩嘢，不過真係有點兒那個囉~
過晒啲小食檔，有間類近百貨公司咁嘅嘢，只有地下一層，門口擺賣冰糖葫蘆。屎塔行埋去，叫我幫佢影張相，點知賣嘢果個人趕我哋走話：不許拍！不許拍！
咁我哋唯有出矛招啦！企開啲 zoom 埋去~XDDD
茄康已經入咗去，我哋影完相就入去搵佢哋。
我拎咗頂帽戴上頭，屎塔幫我影相，不過又俾人趕，今次係唔俾我哋戴住嚟影，其實都可以理解嘅~ =P
都成功影咗兩張~
一張係軍綠色北方人常戴可以蓋埋耳仔嘅方帽~
一張係皇帝金黃色細小圓帽~
離開咗呢個位，康又攞咗頂帽戴，係一頂有辮嘅皇帝帽~
跟住茄就睇中咗個火炬型嘅打火機，經過一輪激烈嘅講價行動，成功以一個幾平嘅價錢買入咗兩支~
我同屎塔就睇吓有咩嘢可以買嚟做手信，不過睇嚟睇去都唔係好買得落手，啲嘢係送俾你都唔想食嘅，點用嚟做手信呀~~~
茄康話出面有間食品中心，可能會多啲嘢揀，於是我哋就即刻放棄眼前揀唔落手嘅禮品~
嚟到呢刻，開始覺得凍到有啲辛苦，但都冇計，頂硬上啦~
離開咗呢間嘢，走入橫街，賣嘅全部都係一啲我哋唔會有興趣嘅物件，而且十檔有九檔賣嘅嘢係一模一樣，唔通係同一個老世嘅？
舖頭唔多，有一間個名，我同屎塔見到後相視而笑，呢個係我哋之間先會知嘅。點知咁鬼蹺，茄康都有差唔多嘅故事，哈哈，於是我哋就揀咗呢間~
呢間舖頭個名係「荷葉飯」
入面非常簡陋，又污糟，不過算啦，我諗間間都差唔多~
坐低咗睇吓食咩，冇咩特別，乜都有啲，有鍋貼有炒嘢有飯有麵咁啦~
我哋好理所當然咁點咗荷葉飯，見到人食鍋貼，我哋又點咗一碟，屎塔話想試吓酸辣湯，又點咗一碗~
落單果條友，好似落得好辛苦，好有困難咁，我哋講完，佢都寫咗成分鐘先落到單，仲要皺晒眉頭，根本就係俾面色我哋睇~
係，四條友點三樣嘢，係就係少啲，咁又點嗟，係咪唔得呀？真係有啲嬲親~
食物好快就到~
先講個荷葉飯，只係一個濕炒飯，啲荷葉嘅作用只係裝飾，冇荷葉味嘅......
再嚟鍋貼，冇咩特別，唔係好食亦唔算難食，層皮足有兩三毫米咁厚，仲有佢碟上嘅油就肯定夠炒一碟菜！
最後係酸辣湯，只係一碗有辣油喺面嘅豆腐菜湯，我哋四個加埋飲唔夠一個普通飯碗嘅份量就唔想再作賤自己~
呢餐真係差差差！環境差態度差食物差！都唔知食乜叉！
自殘完之後，就諗住去食品中心買手信，出返去大街，見到食品中心冇晒燈，原來已經閂咗門。唉，又要去返果度揀啲唔想揀嘅嘢......
返到去，間嘢都落咗少少閘，關門在即，我都仲諗緊買唔買好，但我又諗，嚟緊呢幾日都冇咩機會買到手信，我亦相信第二度賣嘅嘢唔會好得幾多，所以都係揀咗幾盒，做個交待咁啦~
唉，我個人呢，就唔係好鍾意為咗要有手信俾人而買手信嘅，睇啱先買就最好！睇唔啱都買，真係好無謂~
我都同啲 friend 講，去玩就玩得開心啲，唔駛買手信俾我~
我都預咗今次未必會買嘢俾同事食~
但係點都要買啲嘢俾阿媽呢，佢咁在意呢啲嘢......
康康又走埋去買火炬打火機，不過今次未能進一步講到更平嘅價錢，結果都買咗兩個，同茄同價~
買完手信，出返大街行吓，其實咁夜都冇咩好行，真係行街，行吓條街咁啦~
見到有 apm，個 logo 同香港嘅一樣嘅~
一路行都冇咩特別，行行吓就到咗東華門夜市~
東華門夜市，係一條約百五米長嘅街邊檔口，正正就喺馬路邊，叫賣誇張，個個大大聲，仲好似想擒出嚟質你要咁款，著實有啲恐怖~
食物嘅吸引程度唔高，不過天氣咁凍，見到啲熱嘢就梗有興趣嘅~
最後買咗個菠蘿飯、蝦餃同菜肉餃，四個一齊食嘅~
茄康就買咗餡餅同粟米，條粟米熱辣辣，我哋係咁話康康條嘢好暖~ XDDD
茄康就一路行一路食咗個餡餅，粟米就返酒店先食~
其間又見返果啲蠍子呀、蜈蚣呀咁啦~
不過今次係未整熟嘅，仲恐怖~@@
有啲橢圓形嘅，真係好驚嚇，都唔知咩嚟嘅，真係有人食嘅咩？@@
其實大家都已經好攰同好凍，我十隻腳趾已經冇晒感覺，但係我仲有一撻地方想去嘅，就喺夜市落兩條街，有座教堂~
唔知點解，我對教堂情有獨鍾，但其實我係無神論者~
不過喺北京，富有宗教色彩嘅事物，相對上係冇咁自由嘅，自然少有~
去完教堂後係要返轉頭嘅，無謂大家陪我行，於是我建議我自己嗱嗱聲行過去影相，影完返嚟先一齊走，等佢哋冇咁辛苦，不過佢哋話唔緊要，一齊行，咁好啦，就一齊行啦~
兩條街其實又唔算好遠，不過又攰又凍，難免覺得好似長征咁辛苦~
差唔多去到，準備好相機，我只係諗住淨影景，有冇人都冇咩所謂，所以都唔打算行得太近影~
頂！差唔多到埗，教堂嘅燈突然熄咗......
咁樣影相梗係失色好多啦......
我都冇行埋去正面，打斜影咗就算，冇心機呀~
呢間教堂叫「東堂」
回程 lu~
今日嘅行程完晒，係時候返酒店~
我哋拖住無力嘅肢體，頂住刺骨嘅寒風，由街頭行到街尾~
去到王府井地鐵站，一齊搭去建國門站，茄康返凱萊飯店攞返啲行李先，我同屎塔就喺月台等佢哋~
喺地鐵見到某啲幾值得欣賞嘅設施~
立體雙柱式嘅扶手
門側腰墊~
都真係等咗好耐吓，耐到我哋認為係唔合理嘅，不過咁，我哋又唔知凱萊距地鐵站有幾遠，又唔知個地鐵站多唔多樓梯上上落落，更加唔知佢兩個有幾多行李~
兩邊嘅列車川流不息，埋站落客開車埋站落客開車埋站落客開車......
如果可以錄低晒，再播個快鏡，相信會係一件幾有趣嘅事情，因為當中有兩條友行行企企，每當落客時，個個都匆匆忙忙，唯獨呢兩條友企定定，十足十拍緊 MV 咁~ =D
最後當然係等到茄康返嚟，佢哋話個地鐵站冇電梯又多樓梯，行得好辛苦。唔怪之得咁鬼耐啦！大家都辛苦喇~
跟住就一齊再搭多個站到永安里站，再行返酒店~
返到酒店，我就用早前煲好嘅熱水嚟助熱啲嘢食，雖然唔係真係好熱，但至少唔係凍都好啲~
本來屎塔話唔食嘢嘅，因為佢實在太攰，再講吖，啲食物一啲都唔吸引，唔食真係冇損失~
喺我哋再三要求下，佢求其食咗個菜肉包作為交代，刷埋牙就即刻倒頭大睡，就喺佢「瞓」落床呢下，喺中途已經進入咗熟睡嘅狀態~XDDD
咁我食埋佢果份啦，我食咗蝦餃先，再食菜肉包~
菜肉包就冇咩特別，蝦餃就認真麻麻~
再嚟菠蘿飯，嘩，頂吖，咁鬼難食嘅！
我食咗一啖真係要講粗口：好X難食呀！
跟住康康又試一啖，佢嘅食後感係：真係好X難食！
最後到阿茄，佢竟然覺得好食，仲成個成晒！勁！佩服！@@
屎塔有幸逃過一劫，唔駛自殘多嘢~@@
每日點滴：
南航俾我嘅印象相當唔錯
北京好多嘢都指示不足，情況仲幾嚴重吓
當地人推人嘅文化，我真係覺得好難接受
北京嘅街頭，比我想像中乾淨
對間酒店非常滿意
好多恐怖嘢食
今日覺得食在北京，好似冇啖好食咁，希望之後可以遇到啲好啲嘅食肆
沒有留言:
發佈留言