《瞬間看地球》Stranger's Blog: 2010.10.25 台北 (台灣第五天)

今日行程：
總統府 → 台北賓館 → 小人國 → Hello Kitty Sweets → 台灣故事館 → 恆志美容髮品專賣店 → 台北之家 → 師大夜市

今日天氣繼續放晴，真的幸運得很~
今日早餐仍然係果間咖啡店，今日點咗「鮪魚蛋沙律三文治」同「醬燒雞腿三文治」，一樣咁美味~

今日第一站，向總統府出發~
由酒店去總統府，只需步行約十分鐘，非常近~
中途我哋見到一個有趣嘅現象(圖)，重點不在建築物，而係一咋機車~
每到紅燈，都會累積一咋機車在等候，就好似賽車等起步咁~

總統府附近，自然唔會有各式各樣嘅大廈包圍，烈日當空，又冇高樓遮一遮，非常曬~
總統府係一座好闊嘅建築物，對開就係一條十分寬闊嘅馬路，粗略數過，最少有十條行車線！

要正中咁影一張總統府嘅相，其實好難，雖然一早交通唔係好繁忙，但由於有交警喺度，我哋都唔敢行出馬路影相~

再行落去就係台北賓館，台北賓館係以前用嚟接待上賓嘅~
不過去到只見圍牆，但我哋又冇咩興趣入內參觀，結果經過就算~

我哋仲經過「二二八和平公園」，入去望兩望就算，本來都冇打算嚟~

下一站係今日嘅重大景點 - 小人國
我有興趣嘅唔係小人國，係小人國裡面嘅叮噹場景~

由台北賓館至小人國，要搭捷運再轉乘台聯客運~
我哋要搭捷運去到景安站，今次係南勢角線，情況同噚日一樣，又係一個月台兩條線，要睇清楚先好上車~

不過我哋似乎冇咩汲取到教訓，噚日要搭新店線就上咗南勢角線，今日要搭南勢角線就上咗新店線......
兩日都係二份一機會，兩日都中錯果邊，我都話我黑仔咖啦~
又要搭返倒頭再等返班啱嘅車~

到咗景安站出埋閘，搵到台聯客運個站，不過距離 0900 仲有一段時間~
屎塔突然話人有三急，但閘入面先有洗手間，唯有入一入閘~
就係咁，我同佢張悠遊卡嘅值就唔同咗~

我喺出面等佢就真係焦急如熱窩上的螞蟻，要知道過咗 0900 呢班車，下一班係大半個鐘頭後，遲入小人國都好小事，問題係要喺街外呆站大半個鐘！
好彩，0850 就見到屎塔出現，班車就應該係 0900 嘅，但 0855 就到咗，而且上晒客就開車，唔會等到 0900 先開車，好彩我哋早到咋~

呢架車有啲奇怪，佢只比單層巴士高少少，但就有分上下層，成架車都怪怪地咁~ @@

一路去到龍潭站，就有人上車叫去小人國嘅人要落車買飛先，咁即係叫我哋啦~
落咗車，買入場劵再買埋來回車票，跟住就上返車繼續行程~
咁樣買門票同車票真係有夠新奇嘅安排~ @@

到咗小人國，入面好多迷你嘅世界景點，其實我就興趣不大，不過呢度人唔多，同屎塔拍吓拖慢慢行吓都唔錯~

行吓行吓，突然見到好多藍色嘅嘢進入眼簾，原來嚟咗勁多小朋友，相信係小學生嚟旅行啦~
人數之多，直情好似蝗蟲咁，我真係懷疑係咪全學校嚟齊晒~ @@
有見及此，我同屎塔嗱嗱聲睇晒呢個地區，走去搭小火車先，如果唔係，俾班小學生追過，肯定有排都上唔到車~

啲小朋友同架車好襯色吓~ XDDD

貼一貼呢區啲相先~

搭乘小火車，係去第二個區域，第二個區域，一樣係迷你景點模型，不過之前係亞洲區，呢邊就係歐美區~

呢邊除咗有景點模型，仲有個大型衝浪遊戲~
話佢係大型真係一啲都冇錯，衝落嚟撞起嘅水花勁到呢，可以用誇張嚟形容，我真係未見過同類型嘅衝浪遊戲可以有咁勁嘅水花，不過我哋冇玩~

跟住就買咗杯幾好飲嘅百果紅茶，再去坐船仔~
場內有條河道，圍繞住歐美區，冇咩特別，坐吓休息吓都幾好~

呢度有個小型室內機動遊戲嘅場地，我哋就唔係樣樣都有玩~
好似呢個咁，年紀大喇，怕頂唔順，唔玩啦~

地心之旅
玩法係坐住列車喺一個非常黑暗嘅環境，附近會有啲怪獸呀、假火呀咁~
其實可以話悶到爆，唔止我哋覺得悶，就連啲小朋友都覺得悶，佢哋係咁講「很無聊哦」「浪費時間」「終於都完了」XDDD

悶爆出嚟就玩「雲霄飛車」
玩法類似迪士尼嘅「飛越太空山」，雖激刺度不及迪士尼，但亦差不遠~

再嚟就係「碰碰車」
我真係好耐都冇玩過碰碰車，雖然同成班小朋友一齊玩好似好低能咁，但同屎塔一齊低能，怎說也是一件快樂事~

玩到呢度就停一停，搵吓嘢食~
不過場內冇咩選擇，我哋揀咗章魚丸~
呢盒章魚丸真係俾到我哋好大驚喜，wasabi 加木魚夾章魚丸，勁夾，個皮仲要好脆，正！

不過事後睇返啲相，原來我哋唔係第一個享用~ >_<

見到佢哋要自拍，我哋主動上前幫佢哋影~

跟住去咗玩呢個「採礦列車」，未玩已經笑死咗~ XDDD
其實即係小型過山車，唔算太刺激，可以話冇咩料到~

隔離係「大力士」遊戲，我同屎塔講，千其唔好玩~
因為由頭到尾都要好用力，玩法係坐喺車卡入面，將車內的操控桿不停向上向下搖，利用機械原理將部車推前~
一來唔覺有咩樂趣，二來上咗車冇得返轉頭，我見個個都"被"玩得好辛苦~ XDDD

沒有開放的「摩天輪」

貼一貼呢區啲相先~

呢區都行完嘞，係時候去我期待已久嘅叮噹場景~
我哋搭返小火車返去之前果區，一落車就已經到叮噹場景嘅入口~

啲小朋友仲未玩到入嚟，所以主題館內冇小朋友~
提起呢班小朋友，由入場包圍我哋直至到呢度為止，真係嘈到爆炸，但我唔係想話佢哋，反而係想讚佢哋，佢哋玩得幾忘我幾心急都好，由頭到尾，唔好話打尖或推撞，就連掂到你都冇，個個都好守規矩好有教養，有個小朋友仲好友善咁同我打招呼：「帥哥你好~」 =P

主題館內~

完結小人國行程，而家係 1530，離開時遇到新華團入場，好奇怪，咁晏先入場？
喺門口等咗一陣就有車，去返捷運景安站~

下一站，係去食嘢，食咩唔重要，重要嘅係主題，因為係屎塔最喜愛嘅 Hello Kitty，呢間嘢係「Hello Kitty Sweets」

由景安到 Hello Kitty Sweets，搭捷運到忠孝復興站便可，所以好快就到，不過一出捷運站又落雨......

入面全店都係粉紅色，當然有好多 Hello Kitty 嘅裝飾，感覺極之夢幻，連我都覺得好鬼正，鍾意 Hello Kitty 嘅人，我真係怕會頂唔順~ XDDD

我哋被安排坐樓上，樓上只有三個卡位，而且全部有客坐緊，我哋唯有同職員講，如果有人走，請安排我哋轉過卡位~

坐咗一陣，其中一個卡位嘅客埋單走人，我哋即時示意職員我哋要轉過去，但我左邊兩張檯(左一張冇人坐)果兩位小姐即時向在場職員提出抗議，其實我聽唔到佢講咩，但就估到佢話佢哋嚟先同排卡位隊先~

果位小姐講得有啲肉緊，不過佢講完之後，可能知道自己反應大咗啲，好友善咁向我哋講：「不好意思」，我哋當然冇問題啦，微笑點頭作回應~
好好彩，過咗一陣，又有一檯卡位客人埋單，今次真係輪到我哋喇~
其實而家仲未夠 1700，冇晚餐叫，只有 tea 食，我哋一人點咗一個 set~

香草天空

Kitty 日耳曼塔

大家都有嘅啫喱

食物方面，僅僅合格，不過不失~
但杯飲品呢......
我份人點咗嘅食物或者飲品，盡可能都會完成佢，除非飽到食唔落~
一生人當中，唔係玩嘢嘅正常飲品，難飲到飲唔落真係冇咩點試過~
呢兩杯真係上晒榜，我嘗試合上眼當苦茶咁飲，唔掂，真係搞唔掂！廿四味或者咳藥水都絕對好飲過佢！

我同屎塔都飲得好開心，因為喺一個咁嘅地方飲到杯咁嘅嘢，真係好搞嘢好滑稽吓，仲要兩杯截然不同嘅飲品都可以同樣咁難飲，我認輸喇~ XDDD
一人飲咗少少就放棄佢哋喇~
好彩只可以食 tea，因為佢個晚餐勁貴，而且我唔期望會好好食~

離開 Hello Kitty Sweets，仲係落緊雨~
其實淨係食甜品又點夠飽吖，我決定再搵嘢食~

有一間食店，係我計劃行程時都有諗過去食嘅，但後來捨棄咗，呢間嘢就喺 Hello Kitty Sweets 隔離，就食呢間啦，呢間嘢係「饌王精品牛肉麵」

間嘢喺二樓，地面入口只係一楝舊嘅大廈，上到二樓搵唔到間嘢，再細心啲睇，原來已經搬咗~

我哋決定根據佢個地址，行過去，都行咗幾條街，希望係好嘢嚟，令我哋感到值得冒雨行幾條街去幫襯佢啦~
去到發現，原來佢瑟縮喺誠品地庫嘅美食廣場入面嘅其中一個舖頭仔，即係冇自己一間舖頭~

埋去買完嘢食，佢分配咗一個叫號器俾我哋，當呢個叫號器震同亮著時，就可以埋去攞嘢食~

我哋點咗一碗紅燒牛肉牛筋麵~
不枉我哋千辛萬苦走到嚟食呢碗麵，認真唔錯，幾好食，但唔算太有特色，點講都好，水準好高~

下一站係「台灣故事館」，搭捷運到台北站便可，其實好近我哋住緊間酒店~
不過去到只係見到「恐怖故事館」 XDDD

但係搵唔到門口入，一路圍住個商場，五六個玻璃門都封咗，去到最尾先搵到商場入口，再由尾行返上頭先入到台灣故事館~
「台灣故事館」主要係一啲舊台灣嘅場景，嚟到見到實景，老實講，真係冇咩興趣，我都唔知點解會計劃嚟......

離開時先知道，正門對正大街，只係我哋去咗第二邊入~
不過我哋返到香港幾星期，網上有人話呢間嘢已經執咗......

下一站係「恆志美容髮品專賣店」，呢間嘢據聞係全台灣唯一授權賣公主李眼睫毛嘅店舖，好似好勁咁！
呢個地點，係一位幾出名嘅博客介紹嘅，佢就係 Queenie

由台灣故事館到恆志，只需搭捷運到中山站，再步行十分鐘~
步行時途經「小吃博物館」同「寧夏夜市」，其實我都有啲興趣，不過博物館咁夜唔知閂咗未，就算未閂我都冇多餘嘅時間加插景點~

到埗發現間嘢只係一間好普通嘅舖頭~

屎塔買好嘢就走，唔駛五分鐘~

下一站係「台北之家」，係同電影有關嘅地方，其實我都唔知係咩嚟，不過見門面幾靚，又開得夜，就去行一行~
今次豪啲，搭的士！否則要行十五至二十分鐘，咪搞~

我哋見有部的士泊埋一邊，於是敲窗，問一問個司機識唔識去台北之家，佢話識，我哋諗住上車，點知佢原來等緊指定客人，我哋只好再搵第二部~
等咗幾分鐘就有車，不過今次冇咁好彩，呢個司機唔多識去，俾埋地址佢都唔多知點行~
佢非常健談，係咁同我哋傾偈，可能始終係本地司機啦，最後都去得到~

台北之家，有間商店，有間食肆，有間咖啡店，有間傢俬舖，仲有間擺放攝影比賽得獎作品嘅房，冇咩特別~

下一站，今日嘅最後一站，係「師大夜市」
由台北之家到師大夜市，只需搭捷運到台電大樓站，出站行一小段路就到~

師大夜市都係一般夜市果個樣，我哋揀咗「阿鑫麵線」
其實呢檔嘢唔啱屎塔食，因為佢個麵係獨沽一味豬大腸麵線，而屎塔係唔食內臟嘅~
但啲大腸真係好香，屎塔都食咗少少，啲麵好似有一層嘢，唔識形容，好似一層睇唔到又觸摸唔到嘅透明質咁，只係感覺到，幾好食，個湯底都好好味，呢碗嘢幾掂！
不過下面係坑渠口，真係好鬼驚有曱甴~ >_<