烏來 → 袖珍博物館 → 天成飯店地下雪糕店 → 金峰魯肉飯 → 西門町 → 華西街夜市 → 黃金海岸
今日天氣唔錯，真係幸運得很，可能「梅姬」嘅影響已經散去~
訂酒店時已經知道酒店本身係冇餐廳嘅，真正純粹租房，但酒店又有包早餐咖喎，就係喺酒店附近嘅咖啡店 - 丹堤咖啡
步行若兩分鐘，非常近~
早餐唔係大酒店果種自助餐，係一 set set 咁叫，其實咁都冇所謂，夠食就 OK~
餐單方面，都算有幾多選擇，不過主餐其中一項隱形咗(主餐七選一，但選項只有六項)，我哋有同職員反映，佢只係尷尬一笑~ =P
我哋主餐點咗法式黃金三文治同鮪魚蛋沙拉三文治~
我預期只會係一般品質，點知非常意外地，兩樣都很美味！
份量嚟講算幾好，唔太多亦唔算少~
由酒店去烏來，要搭捷運到新店站，再轉烏來客運到總站~
本來真係非常簡單，但係我哋就連咁簡單都搭錯車！
台北去新店嘅月台，同時亦都係去南勢角嘅月台，兩條線頭幾個站都係一樣嘅，但中途就會分道揚鑣，所以上車前一定要睇清楚架車係去邊嘅~
由於感覺上搭捷運就好似喺香港搭地鐵(硬係唔慣講港鐵)咁，月台啱就見車上車，所以我哋都唔醒起要對號入座，睇吓架車嘅目的地，見有車嚟就上~
二份一機會，以我嘅黑仔指數，先嚟呢班車，梗係唔會係我哋要上果班車啦~
初時都唔知道上錯車，但架車去去吓去咗頂溪站，我就知道出咗事~
因為去新店線嘅車係唔會經頂溪站嘅......
我哋即刻喺頂溪站落車，搭返回頭車去上一個站，金晴火眼睇清楚來車係去新店站嘅先上~
去到新店一出站就見到一排巴士站，同時亦見到好多人等緊車，等咗十分鐘到就有車喇~
唔駛三十分鐘就到烏來~
相信係因為時間尚早，條街啲舖頭都未開~
不過我嘅計劃係上咗上面先，晏啲先返落嚟行吓，所以而家未開都冇咩所謂~
烏來只係一個地方名，一般嚟講，遊客都係為咗「烏來瀑布」同「雲仙樂園」而來~
我計劃好先上烏來瀑布，再上雲仙樂園~
上去瀑布，可以選擇步行六公里或者搭台車，即使有選擇困難症嘅我，都可以很容易作出決定~ =P
落咗車行前少少就見到傳說中嘅「烏來瀑布」
老實講，瀑布？我只係覺得係有個位穿咗個窿咋喎......
上雲仙樂之前，去個洗手間先~
嚟到台灣，去親嘅洗手間都唔太污糟，亦冇咩異味，烏來呢間，算係第一次接觸到有異味嘅洗手間~
上雲仙樂園，係要搭纜車(吊車)嘅，之前睇過朋友去烏來嘅纜車相，感覺相當簡陋，不過今次到嚟親身目睹，又冇咁嘅感覺~
纜車開始運行，屎塔見我兩手空空，問我：「支綠茶呢？」
係喎！支綠茶呢？原來我上車前買咗支綠茶唔記得攞......
突然間，緩緩上升緊嘅纜車一下子就完全停止咗，成部車喺空中吊吊揈，有些微畏高嘅我梗係嚇個半死啦，不過好快就聽到廣播話電力超出負荷，導致停電，纜車好快就會開返咁話~
的確，停咗一分鐘到就開始運作返，不過都夠嚇死，原來真係咁簡陋~ @@
幸好路程唔算太遠，好快就到~
上到上面向下影咗張相~
究竟雲仙樂園入面有啲咩嘅呢？其實我到而家都仲未知，淨係知道嚟烏來就要上嚟~
離開咗纜車站，見到一個地方，似係遊樂場中嘅遊戲之一，坐小火車入內，裡面可能會有啲嘢嚇吓你咁~
不過唔好講裡面，就連外面都係死氣沉沉，如果唔係見到有個管理員向我哋招手，我哋仲以為已經荒廢咗~
不過可能年紀大咗，對機動遊戲嘅興趣真係唔大，唔玩啦~
向前行就只見望唔到盡頭，分開幾段嘅樓梯，再睇吓地圖，要行晒雲仙樂園肯定會花唔少時間，好彩我都預咗有好幾小時俾佢~
上晒所見嘅樓梯，我漸漸發現，雲仙樂園，只不過係一個非常簡單嘅樂園，可以租船仔遊湖，亦有一個看似供小朋友玩碰碰車嘅地方，又有一個水上嘅舞台，仲有可供射箭嘅場地~
不過除咗租船同射箭呢部份有工作人員外，其他地方都唔見有工作人員，就連遊人亦只有三數個~
成個所謂樂園真係可以話超級 hea，為咩要上嚟？唔知！上嚟有咩做？唔知！@@
我哋都圍住主要部份行咗一圈，好慢好慢咁行，又休息吓咁，以一個超級 hea 嘅心情去配合返呢個超級 hea 嘅樂園~
不過咁，呢度嘅環境真係好好，空氣清新到恍惚去咗另一個世界~
中途有一小插曲：
屎塔行行吓大叫咗一聲，我好好奇，究竟咩事呢？屎塔見到嘅嘢，同我見到嘅嘢冇理由唔同~
前面係石屎地，兩旁係草地加樹木，我問屎塔做咩，佢又冇答我，我望一望佢個樣，依然係驚魂未定~
我再問佢一次做咩事，佢先答我話見到有蛇~
我循佢所望嘅方向望去，又唔係好見到有蛇，佢再指一指俾我睇，我睇到喇！
屎塔咁大反應，我又覺得唔係好驚，佢都唔似係咁細膽，我俾佢嚇親多過俾條蛇嚇親~
成個雲仙樂園，行咗一半就冇興趣再行，不過就算預先知道個環境係喎，都會計劃上嚟行吓~
簡陋嘅纜車、從未呼吸過嘅清新空氣、地靈人傑嘅仙境，足教人心神嚮往~
對呢個樂園都冇咩特別好描述，貼吓圖紀念吓咁啦~
係時候落返去下面行吓同食晏~
搭纜車落去嘅過程好順利，冇再遇到停電情況~
落到去，啲舖頭開晒，遊人亦多，似返個旅遊區~
不過我哋對啲舖頭賣嘅嘢興趣不大，慢慢行過就算，途中經過一間賣杏仁粉嘅舖頭，就算你冇望到，都會知道呢間舖頭嘅存在，因為撲鼻而來嘅味道，真係極之杏仁~ @@
由街尾行到街頭，就到咗我哋今日食晏嘅地方，賣點係民族菜式，名叫「泰雅婆婆」
我都係睇旅遊書介紹先決定食呢間，而事實上，呢條街正式食店唔多，而呢間算係較為有特色嘅~
坐咗入去，左睇右睇，都係決定叫書介紹過嘅菜色~
原味竹筒飯
唔算有好香濃嘅竹味，味道可以~
炒魚香山蘇
啲菜味唔係一般食到嘅菜味，唔係一食就覺得好好食，亦唔難入口，但感覺幾新鮮，越食越有味道~
山胡椒生木瓜雞湯
個湯就幾好，好在胡椒味冇蓋過個湯嘅鮮味，難得~
炸溪魚溪蝦拼盤
個魚幾好，蝦就一般~
炒山豬肉
呢個真係好有豬味，好食~
總結一吓呢間嘢，只可以話有特式，可以一試~
跟住落嚟就要去「袖珍博物館」，呢個景點係屎塔做功課時搵到嘅，我睇咗咁多本書都冇提過呢間嘢，都唔知屎塔係點搵返嚟嘅~
顧名思義，梗係同袖珍有關啦~
呢間嘢係一對夫婦，喺世界唔同地方搜集到嘅袖珍物件，日積月累落嚟都有好多件，於是就作公開展覽~
由於地點唔近捷運，今次搭完捷運仲要搭公車~
公車同客運唔同，烏來客運，就明顯同烏來有關，公車就要自己慢慢研究搭幾多號，喺邊搭，又搭到去邊咁~
鳥來去博物館，要搭返客運去捷運新店站，再搭捷運到中山站，再轉公車~
一切順利去到捷運中山站，一出捷運發覺落緊雨！
不過雨唔算好大，冇遮都冇咩問題~
根據功課搜尋個公車站，搵係搵到，不過係對頭車~ XDDD
我哋即刻過返對面線，見到有一咋公車站，之前睇定嘅公車號數全部喺晒度，有啲係功課以外嘅公車都去到我要去嘅地方，選擇咁多，好快就有車，我哋上咗 282~
由於車上面有顯示下一個站係咩站，只要知道目的地個站名，就可以輕易到達，唔怕落錯車~
我哋嘅目的地站名係 - 南京建國路口
搭咗十多分鐘，就見到顯示牌寫住「下一站：南京建國路口」，我哋當然按鐘示意下一站落車，架車行咗一個街口就停車並且開門，其實我覺得好奇怪，咁近就一個站？於是就問一問車長，係咪南京建國路口，車長當時同緊街上一名行人對話，但佢有望向我哋回答是，咁我哋就喺呢度落咗車~
落咗車睇睇地圖，唉，落錯車啦，呢度根本就唔係公車站，唯有行過去啦~
阿車長，同你無仇無怨，做乜咁玩我哋呀？
行咗幾條街又問吓人，終於都搵到袖珍博物館~
入面都幾多人，要影相有時都要等~
關於袖珍博物館都冇咩好描述，所有展品都係喺玻璃櫃入面，影相又反光，但又冇理由唔影，最後都影咗超多相，紀念一下~
入面藏品非常豐富，如果要仔細咁睇，相信最少要花上三小時，甚至更多時間~
多謝屎塔，呢個博物館真係好值得嚟，好好睇！
跟住呢個景點就真係有啲無謂，佢唔係咩景點，唔會有人慕名而來，佢只係一間喺天成飯店地下開設嘅咖啡屋~
今次計劃要嚟，全因為我上次嚟台灣時嚟過食嘢，屎塔又要試埋一份咁話，其實都唔知仲喺唔喺度......
由博物館去天成，一程公車便可，同樣地，去到公車站，邊架啱就上邊咖，我哋上咗 307~
好快又可以落車，但其實落咗車冇晒方向，唔緊要，路在口邊嘛，天成飯店一定有人識~
問吓人，原來轉個角就到，都好近吓~
行到埋去飯店，間咖啡屋仲喺度，但環境就有啲唔同，擴充咗~
坐低諗住點返上次食過嘅嘢，點知原來係季節限定，唯有叫其他嘢食啦~
叫咗個雪糕，諗住 share 食，點知店員話每位客人有 min charge，我好辛苦先揀咗杯嘢飲~
質素呢，又貴又普通咁啦~
食嘢期間隔離檯有三個操純正廣東話嘅男女，一人拎住一部手提電腦，其中一個睇緊賽馬，仲好肉緊咁嗌 6 號、6 號、6 號......
間嘢雖然係擴建咗，但都仲係好細間，只得六七張檯，有啲仲係二人檯，空間非常有限，條友係咁嗌，當正自己屋企咁，真係離晒譜！
跟住就到傳說中嘅「金峰魯肉飯」，呢間嘢舖頭細細，環境一般，但傳聞一年做成千萬生意！
能夠做到遠近馳名，全靠一碗魯肉飯！
天成去金峰，捷運直達，非常方便~
去到仲要等位，不過好多人都係一飯一湯，流轉速度好快吓，等咗一陣就有位~
睇睇餐牌，選擇唔多，唔駛講，魯肉飯就叫硬咖啦~
不過由於我哋都仲有少少飽，叫個細嘅試吓先~
一啖咬落去，真係好好食，果吓豬嘅羶香味唔算好濃，恰到好處，加埋汁同飯一齊放入口，真係有一種好幸福嘅感覺~
油豆腐
好食，就係簡簡單單好好食嘅豆腐~
人參雞
唔錯，但參味唔算濃，不過咁，45 蚊新台幣咋喎，想點呀~
燙青菜
一般新鮮嘅青菜，唔會有問題~
真係好想叫多碗食，不過實在食唔落~
跟住就係閒逛西門町，由金峰去西門町，只需搭捷運到西門站就得~
一到西門町，就見到一班人，個個揸住支長炮對住個擺緊 pose 嘅女仔，好明顯係籠友做緊嘢，屎塔都唔執輸，即刻拍埋去扮籠友~
跟住就去影吓「紅樓」
西門町咁多嘢行，我就唔打算行啲商場，主要行吓條街，睇吓啲特色商店~
菓風小舖
第一次嚟西門町，呢間嘢可以話係必到，所以我就帶咗屎塔嚟行吓~
亨利屋家族
鴨肉扁
鴨肉扁鴨肉扁，梗係以為食鴨嘅地方，其實佢係賣鵝肉嘅~
本來計劃入去食吓嘢嘅，不過我哋暫時實在再食唔落嘢，到一到便算~
謝謝魷魚羮
嚟到呢一刻，我哋仍然係未飽完，不過都食得落嘢，再加上屎塔鍾意食魷魚，所以就決定入去試吓~
店舖環境，喺我接觸過嘅台灣食店嚟講，佢算係罕有咁污糟，佢唔係污糟在檯凳或者食具，而係有曱甴！
煮嘢食嘅地方有，店內牆壁又有，不過都係啲好細隻嘅，但都夠恐怖啦~
講返碗嘢先，又真係認真唔錯，魚肉包魷魚夠晒彈牙鮮味，個羹用柴魚同大白菜熬煮，鮮味濃郁，再加上適量胡椒同芫茜，正！好好食！推介！
飲咗杯白苦瓜汁
保險套世界
老天祿滷味
唔少香港人都識嚟西門老天祿滷味買鴨舌，又真係幾好食嘅~
嚟到呢度，我哋嘅體力都用得七七八八，但今日嘅行程仲未完~ XDDD
跟住落嚟會去行華西街夜市~
由西門町去華西街夜市，可選擇步行或捷運加步行，兩者所需時間都係十五分鐘，我選擇咗步行~
其實搭捷運行上行落又要等車，出咗站都仲要行，倒不如直接行過去，又可以睇吓嘢~
不過呢十五分鐘就認真攞命，沿地圖行去，一路都係非常暗嘅路，又一路都冇人，但又唔覺得行錯，兩條粉腸拖住疲累嘅身軀爬過去，好彩最後都去到又冇行錯路，不過就有少少說話聽咁啦~
我相信我哋係去咗街尾，不過冇所謂啦，咪行返上街頭囉~
由尾行返上頭，冇食過嘢，原因唔單止因為唔肚餓，更因為冇興趣~
華西街夜市有別於我哋行過嘅夜市，冇咩小食，以正式食店同其他舖頭為主~
我哋真係就咁行過到此一遊就叫做嚟過~
兩條友攰到就嚟爬都爬唔郁，我問屎塔：「咁鬼攰，不如唔好去黃金海岸啦~」
屎塔就係咁倔強，唔會咁易認輸，佢決定去埋今日最後呢一個景點，好，我就捨命陪屎塔！
最後一個地方係黃金海岸，其實係一間食肆嘅名稱，主要食蝦嘅，係一位同事極力推介我去試嘅~
由華西街夜市到黃金海岸，要行一段路到捷運站，搭到大坪林站，仲要行一段路~
由華西街夜市行去龍山寺捷運站，我哋經過啲街仔，見到好多濃妝中年婦，成個環境都好似好雜咁，我哋都唔敢多望，行快兩步~
出咗大坪林站，行咗幾條街，兩條人乾終於搵到黃金海岸~
一入到去，完全唔似食店，個老闆仲喺度食緊晚飯，冇其他客人~
我自己呢，就好鍾意食蝦嘅，但我又知道屎塔好想食螺，老實講，兩個人，又唔肚餓(仲可以話飽飽地)，冇可能食得晒一碟螺加一碟蝦，我大膽問問老闆可唔可以兩溝，不過老闆話唔可以，因為煮嘅時間唔同，要分開做~
在商言商，想俾一份錢食兩樣嘢，仲要老闆收一份錢做兩樣嘢，拒絕你都好應該啦，冇辦法啦，二選一，我梗係點螺俾屎塔食啦，再講，蝦，幾時都有得食啦~
就點咗個胡椒鳯螺~
等緊螺嘅時候，我走去四圍參觀吓，又影吓相咁，我行埋去個養蝦池度影相，老闆專登閂咗個水泵，佢話咁樣先影得到啲蝦，真係好人！
兜胡椒螺終於都整好，上檯喇上檯喇~
老闆問我哋識唔識食螺，我哋都唔知點答佢好，佢笑笑口咁攞咗我哋一隻，教我哋食~
首先，取肉。
就係用小叉叉住個螺頭，一邊轉一邊拉，咁先可以成舊肉取出嚟~
講就易，我就唔係次次都成功嘞~
繼而，咀嚼後深呼吸及閉氣。
果然陣陣胡椒螺嘅香味慢慢滲進每顆味蕾，周邊嗅覺都完全被呢種香味侵襲，好過癮！
好食還好食，兩個人食咁多隻，都幾厭，食到最尾梗係冇開頭咁過癮啦~
正式完結今日行程，又行幾條街返捷運站搭車返酒店~
沒有留言:
發佈留言