呢個漏洞造就咗我哋四個可以一齊落去食酒店早餐，我哋差唔多七點就落到去~
酒店嘅早餐係非常極之一般嘅西式酒店早餐，冇期望亦冇失望~
食完早餐，出發去「圓明園」
「圓明園」其實可去可不去，不過唔去又覺得有遺憾，去咩，有咩好去？真係唔知~
不過，唔去或者會遺憾，去遊一遊亦冇理由後悔，該如何決擇，明顯不過~
去「圓明園」，計劃中係地鐵 → 城鐵(地鐵支線) → 公交巴士，不過最後都係由的士代替尾程嘅公交巴士~
由地鐵行去城鐵，以轉車嚟講，都算行幾遠，感覺就好似香港嘅旺角地鐵站行去火車站咁遠~
由於「一卡通」已經冇乜值，唯有買車票~
搭城鐵搭到五道口站，再轉乘的士到「圓明園」南門
南門對開地方好大，又放咗好多嘢~
門票 $10 + 西洋樓 $15，即係每位 $25
我對當年有冇到過「圓明園」一啲印象都冇，只係答到好似有，但完全唔肯定~
一入去就見到個湖，湖面已經結冰，彷如陸地~
我就只敢用「彷如」去形容，不過，屎塔竟然當正係陸地，行出去影相！真係離晒譜！
跟住仲話想行過對面，我當然唔批准！
見到遠處有人喺度唔知玩緊乜，我哋就走過去睇吓~
行到埋去只見佢用繩綁住舊磚，不停打碎橋下面湖面嘅冰，點解要咁做呢？
八卦嘅XX(唔方便公開，我未想死住......)訪問過佢，我都喺佢身邊，個男人好樂意接受訪問，不過溝通方面出咗少少問題，唔多明佢講咩~ @@
經過條橋向前行，有一座建築物，叫「鑑碧亭」，俾我哋見到一個有趣嘅修葺痕跡，就係用紙板扮真門~ XDDD
座嘢冇咩嘢睇就折返再向前行~
前面有條破爛不堪嘅橋(睇完典故先知佢係一條穚)，原來呢條已經係當年園內受侵襲後，保存得最完整嘅石拱橋！
當年園內有約二百條石拱橋，就只有呢一條得以保存至今~
現被命名為「單孔殘穚」
真係激死人！呢個屎塔成個細路仔咁，聲都唔聲就衝咗落去「橋孔」話要影相，我嗱嗱聲係咁二影完就叫佢返上嚟！
「圓明園」內風光
「圓明園」內最出名嘅係「西洋樓」
亂石一堆，實在慘不忍睹，當年嘅亂況真係難以想像~
就喺行緊「西洋樓」嘅途中，屎塔唔小心拗柴，仲要唔係輕微嘅扭傷，好一段時間行唔到，其後仲要一拐一拐蹣跚地要我扶住行~
唔知係咪泳池嚟呢~
有棵樹啲紋好似著咗迷彩服咁~ @@
可能我對當事嘅歷史認識唔深，行完「圓明園」，都唔會有太大感覺，仲有啲悶，只不過不可不遊而已~
下一站係「頤和園」，我哋都係搭的士過去，行就遠，搭的士就好近，落車地點係東門~
門票 $20，仲有其他收費，但我哋冇時間行晒咁多地方，所以唔需要買聯票~
我哋用 $10 買咗一張地圖，真係好貴~
「頤和園」真係好大，一睇就知我哋一半都行唔到，就喺地圖上面，擬好一條路，行完就算~
我哋決定由東門向北行，經昆明湖直達北門就算行完~
所經之處都係差唔多嘅建築，實在冇咩興趣行落去~
唯一叫做令人醒神啲嘅係昆明湖，因為真係好鬼凍~ @@
為咗避免血液凝結，我哋走咗入一間商店避寒，阿茄仲買咗明信片~
蘇州街
呢座建築物令我想起西藏~ =P
出口見到有隻金牛，老實講，我就覺得同現場格格不入，簡直係不倫不類~
行就行咗好耐，不過真係冇咩值得記吓，真係到此一遊便算~
跟住就要去食午餐~
本來講好食「康師傅牛肉麵」，唔知點解講講吓去咗食「李先生加州牛肉麵大王」
個名夠晒駕勢！
由於都係屬於同區，所以搭的士就最方便同化算~
喺搭緊的士嘅途中，發生咗一件事！
喺一個轉左大路口，的士喺快線(大陸最左線為快線)，右邊有部旅遊巴，部旅遊巴逼到部的士左後輪上晒壆先不至撞車，阿的士司機已經著著地響號以示不滿，以為冇撞就冇事啦，點知阿旅遊巴司機仲起勢係咁夾我哋，阿的士司機終於著晒火，衝前截停部旅遊巴，雙方下車理論，其實都唔係理論咖喇，互小會比較貼切啲，佢哋講咩我真係聽唔到，一來喺的士入面又冇開窗，二來北京人同北京人互小，台灣人都未必聽得明啦~ @@
不過都俾我聽到一句，就係：「操你媽！」
有人話學語言，通常學識粗口先，不無道理~ XDDD
不過事情嘅發展出現咗新變化，所謂「初則口角，繼而動武」，兩條友竟然就喺路中心打起上嚟！
不過好快就分出勝負，的士司機絕對唔算細粒，不過旅遊巴司機無論高度同件頭都嬴晒，旅遊巴司機一拳打落的士司機唔知邊度，阿的士司機完全先勢「嘭」一聲撞返落自己部的士尾，大勢已去，不過旅遊巴司機仲未肯放過佢，好彩，唔知邊度走條友出嚟，應該係識嘅，拉住旅遊巴司機，最後半推半拉咁同佢一齊上返部旅遊巴~
阿的士司機當然極度不忿，但又打唔過人，唯有喺臨上車前攞返個尾彩，鬧返幾句：「過了年你就死！」連續鬧咗幾次~
咒人都可以咁厚道？ XDDD
去到附近，見塞塞地車，就喺塞到停果度落車，主要係因為想盡快離開部的士~
一個人懷著憤怒嘅心情揸車，可以好危險，快啲落車為妙~
落咗車回頭一望，原來部旅遊巴就喺部的士隔離！佢哋各自喺車再開戰，不過講咩就真係聽唔到，亦唔想咁多事，當見唔到當聽唔到......
過一條馬路就到「李先生」
「李先生」其實係一間快餐店，先買票後取食~
選擇就唔係咁多，其實都冇咩關係，一場嚟到，梗係食牛肉麵啦~
不過阿茄有啲胃痛，冇叫到牛肉麵，叫咗手撕雞麵~
我哋三個就食牛肉麵~
唔講得上係好好好好食，但絕對唔錯，俾咁嘅價錢，食到咁嘅食物，完全係物超所值！
跟住叫咗青瓜前菜、菜、鴛鴦雞
前兩樣不過不失，碟雞呢，以快餐店嚟講，算係一流~
一早約定食完呢餐就分道揚鑣，茄康原本去朝陽區「798」藝術區，不過阿茄嘅情況唔多好，打算返酒店休息，再睇情況決定去唔去~
我哋就有我哋繼續行程~
下一站係「大鐘寺古鐘博物館」
我哋搭地鐵由「五道口」站去到「大鐘寺」站，落咗車唔多識行，睇地圖都唔係好肯定，估吓大約方向就試吓行~
由於要搵洗手間嘅關係，我哋入咗「大鐘寺家居廣場」行咗一陣，好似好悠閒咁~ =P
只係行咗一陣廣場就離開，途中見到張巨椅~
行吓行吓，估吓估吓，又俾我哋行到~
入場費每位 $10
(連大門口都冇影一張正常啲嘅相，都唔知邊個揸機嘅~ =.=!)
門口廣場~
內裡有好多間房，每間房都係一個展廳，放滿林林總總唔同時代嘅古鐘，對我嚟講，分別唔大~
不過有一個就幾吸引到我，設計以龍為主題，相當漂亮~
嚟到呢度，竟然會發現一座擺設，同北京機場嘅一模一樣！
每一間房都有一個人看管，每個人都有一間細小嘅看管所，同樣，每一個人都在看書，因為遊人實在少得可憐，唔睇書真係冇咩好做，佢哋冇瞓著已經算好勁~
就以當日為例，計埋我倆，都只係得兩個人~ XDDD
唔計工作人員同我倆，仲有一隻貓，呢隻貓都真係幾污糟，佢係咁圍住屎塔嗲，好似識咗好耐咁~
館內一座最大嘅古鐘，係「永樂大鐘」，6.75 米高，46.5 公噸重，要用多支粗大嘅支柱同橫樑先可以支撐得住~
鐘身刻有二十三萬多字，上百種嘅佛教經咒~
呢個鐘喺 1733 年被搬至現址，究竟當時係點搬呢座咁重嘅鐘嘅呢？
『古人以巧妙方法先移鐘、後建殿：挖水道，趁冬季結成冰路時把鐘滑行到目的地，再興建大鐘樓』
真聰明！
我哋竟然冇影到全相~ @@
穿過密集式嘅展館，去到一片空地，空地上有幾個亭，每個亭內都有一古鐘~
其實我對古鐘興趣不大，只係俾一座建築物吸引咗我嚟，就係放「永樂大鐘」嘅「大鐘樓」
再嚟到下一站，「中國古動物館」，都係搭的士去~
古動物館，主要係展示史前動物，包括人類~
入場費每位 $20
館高三層，都算幾多嘢睇，用心睇一定要花好多時間，我哋走馬看花都覺睇咗好耐~
跟住就搭的士到「西什庫教堂」，其實呢個教堂完全冇咩特別之處，純粹因為我有「教堂強迫性綜合症」，一定要去望望影吓相咁~
跟住就搭的士去「牛街禮拜寺」，個的士司機唔多知道喺邊，最後停咗喺附近，我哋落車再搵吓問吓人就搵到~
入場費每位 $10
呢十蚊(兩位即係廿皮啦)真係俾得唔值，入到去冇咩嘢睇，但當初我又點解會計劃到來呢？
咪又係因為建築物~
呢座建築物，係混合咗中式同伊斯蘭式嘅風格，好似好特別，咪嚟望吓望影吓相咁囉~
座嘢就喺外面，如果單純嚟睇呢座嘢，根本唔需要入去，入咗去反而睇唔到~
入面完全冇嘢睇！
不過要影佢全相都唔係咁容易，座嘢對開係馬路，行到盡頭仲要蹲下以低炒角度嚟影先勉強影得晒~
係時候同茄康會合，不過打俾佢打極都唔通，真係激死人！
試吓 sms 俾佢，又等極都冇覆，點算好呀~~~
不過又真係唔怪得佢，因為個問題其實喺我度，原來我張電話卡冇晒值......
好彩，有個好朋友喺我出發前俾咗張充值卡我，大派用場呀！
增值完再打俾佢，通就通喇，不過落咗留言呢！
又試吓 send sms 俾佢，又係等極都冇覆~
開始入夜，條街亦開始大風同氣溫明顯下降，我哋唔可以再企定定喺度等茄回覆，因為我哋都覺得好凍，如果再唔搵個地方避吓，隨時凍死！
一路行一路搵可以避寒嘅地方，附近就只有伊斯蘭教嘅超級市場，我對伊斯蘭教冇咩認識，真係唔多敢走入去，最後搵咗條柱避一避風，只係稍為好少少~
我哋一路等，當然有啲焦急，聯絡唔到茄康點算好呢？最正路當然係照計劃進行，期望佢哋都會咁做~
後來唔知點解，神推鬼擁咁，屎塔下意識咁拎個電話出嚟睇，原來阿茄有 send sms 俾屎塔(後來先知茄都搵我唔到，安全計 send sms 俾晒我哋)，最後知道佢哋而家喺「798」，十五分鐘內會離開，前往食飯地點~
一天都光晒！(明明係天黑......)
我哋都唔再等，即刻截的士走人~
不過個的士司機唔識路，俾地圖佢睇，佢又睇唔到，我估佢有老花，佢搵個放大鏡放大嚟睇都唔多睇到，不過咁，佢都有信心去到附近，好啦，見步行步~
行行吓，佢又問我哋附近有啲咩，其實附近真係咩都冇(當然係地圖冇顯示)，跟住佢又問我哋攞地圖，佢停埋一邊，一路自言自語，一路研究地圖，又再開行，途中見到公安，佢就停低問公安，嘩，佢哋啲對話真係......我哋一粒字都聽唔到~ @@
結果去到某一個位，佢話就喺附近，但實際喺邊，佢真係唔多楚~
算啦，佢係唔識，磨落去對大家都冇好處，希望真係到咗附近，咁就有希望搵到~
落咗車，最好梗係搵個人問吓，問咗幾個，終於有答案，佢求其向我哋嘅十一點方向指一指就冇理我哋，但我哋仍然抱有一絲希望，走過去睇睇~
過咗對面馬路，行到第二條街就搵到我哋要搵嘅「翠花胡同」！
胡同內非常暗，亦冇咩人，雖然搵到同名胡同，但我仍然冇十足信心可以搵到間食肆~
不過，行到過咗一半，我哋見到個招牌喇！
喺條咁暗又冇咩人嘅街(胡同外嘅大街都一樣冇咩人)，有間咁嘅嘢，除非真係遠近馳名，否則邊有生意咖~ @@
既然搵到，刻下最緊要嘅，緊係聯絡茄康，今次好順利聯絡上，知道佢哋十五分鐘內會到，等埋先入去~
不過條街咁難搵，佢哋都係搭的士，喺電話度亦知道佢哋個的士司機唔多識路，最後唯有叫佢停喺「王府井大飯店」，再行過嚟~
路程的確唔近，但起碼我哋可以教到佢哋點樣由「王府井大飯店」行過嚟~
佢哋行過嚟起碼十至十五分鐘，我同屎塔就打算行出大街等佢，順便睇吓附近有啲咩睇吓~
途中遇到有個當地人問我哋路，佢問我哋呢度係咪「翠花胡同」，我哋話係，佢又問「悅賓飯館」喺邊度，我哋指一指入面，佢「射射」完我哋就走咗入去~
其實我哋都係知道咗唔夠三分鐘~ XDDD
大街附近有一間酒店，都幾大間同埋唔係低級酒店，但書同地圖都冇提過，否則用呢間嘢做地標，一定好易搵到間食店~
我哋亦叫茄康留意有間咁嘅酒店，因為附近最燈火通明嘅建築，就只有佢~
見到茄康後，就過去「悅賓飯館」，推開門入去，嘩！原來好鬼多人！真係估唔到一條咁僻嘅胡同，一間與世隔絕嘅食店，內裡竟然擠滿了人！
成間舖多人到容不下我哋四個人，最後職員帶我哋到另一間舖頭入座，但名稱不同，叫「悅仙美食」，話係同一間，咁緊係冇所謂啦~
不過書就講係唔同舖頭，仲叫讀者唔好搞錯，究竟係邊個搞錯? @@
人有三急，知道坐邊之後就搵廁所，我有晒心理準備，咁僻嘅胡同，開放俾人用嘅廁所，可能係我去過最差最臭最多昆蟲嘅廁所，不過有時啲嘢就係咁，硬係同你所諗嘅差天共地~
個廁所當然講唔上氣味清新環境舒適，雖則簡陋程度說得上數一數二，但勝在冇咩味，冇咩昆蟲，只係因為好暗，因為簡陋，所以絕不予人乾淨之感，但亦不能用污糟嚟形容，誇張啲講句：有驚喜！ XDDD
去完廁所返埋位，茄康正在考屎塔，佢手上嘅係咩嚟~
我自問 IQ 零蛋，但仍然加入靠估行列~
最終都要阿茄開估，原來係原筆~
店內環境不過不失，簡簡單單，冇咩特別裝修，感覺整齊，只係啲檯放得比較逼~
我哋點咗：
唔記得乜嘢卷~
第一件冇包嚟食，好食！第二件用薄餅包嚟食，更好食！
糖醋排骨
正！味道調得啱啱好！
蒜蓉油墨菜
好味！
又唔記得乜嘢魚
呢碟係店員推介嘅，一樣係好食！
蒜泥肘子
呢間食店佔本旅遊書嘅篇幅非常少，攞放位置亦唔起眼，呢道菜係本書唯一推介嘅菜式~
結果，大失所望，肉質雖然唔錯，但冇味嘅，試過之後都唔想再食~
呢間嘢非常值得推介！！！
跟住就要行去「王府井大街」買烤鴨做手信~
途經返第一日都經過嘅「東堂」，今次有著燈喇，我又再次病發......
今次睇真啲先知「東堂」係文物保護建築~
到達「王府井食品店」，發覺唔係幾揀得落手，我哋就轉戰「全聚德」，去到發現只出售禮盒裝，其實我哋都係送俾屋企人，實在唔需要花錢喺包裝上面，又走返出嚟，見到對面有間「北京烤鴨」嘅食品店，又入去睇吓~
入到去都有幾多選擇，比較出名嘅就只有「全聚德」嘅普通裝，對我哋嚟講，其實都係冇得揀，冇理由揀啲唔識嘅~
一隻要八十幾蚊，是旦啦，又唔係買得多~
揀好咗，店員反而手執另一品牌推介俾我哋，佢話出名就梗係「全聚德」，但係講好食，就呢隻最好食，又抵食~
一隻只需四十幾蚊~
我唔理佢背後有咩原因，係利潤高啲定係真心推介，反正未試過，就試吓佢推介嘅，當然，平咁多係其中一個推動力~ XDDD
買埋包鴨用嘅薄餅，搞掂！
跟住阿茄話要去「同仁堂」買藥酒，我哋就拉隊一齊走返入商場，商場入面有一角係「同仁堂」嘅檔口，但唔係自家舖頭，售賣物種一定會少啲，結果真係搵唔到茄指定要買嘅藥酒~
不過，問咗店員，附近係有一間自家「同仁堂」嘅舖頭，梗係即刻走過去睇睇~
途中阿茄又搵到心頭好 - 福娃
我對福娃真係零興趣......
話近唔近話遠又唔算遠，終於搵到間嘢~
入到去搵咗一陣，指定嘅牌子始終搵唔到，幸好店員非常落力，又不失誠意咁推介，茄康同佢哋傾咗好耐，屎塔都唔執輸，大手入貨護膚用品~ =P
間舖頭空氣非常唔流通，焗到頭暈，我同屎塔開始頂唔順，尤其係我，真係好似呼吸唔到咁，全身發熱冒汗，真係唔知啲店員係點樣生存到~
其實我見到茄康都覺得熱，但佢哋可能有任務在身，集中力放晒喺啲藥酒同店員度，我哋兩個又冇咩做，買完自己嘢就同茄康講，我哋頂唔順，行出去先~
不過茄話佢都要俾錢走人喇，一來揀好咗，二來佢都好唔妥，當然係因為焗嘅關係啦~
跟住齊齊一袋二袋搭的士返酒店~
返到酒店，睇吓屎塔拗柴後嘅傷勢，嘩！又腫又黑，爆晒微絲血管！仲行咗成日，陰公囉~~~
嗱嗱聲打劫阿茄啱啱買嘅藥酒搽兩嘢先~
阿茄喺「798」買咗本「護照」，其實係避孕套嚟，佢仲提議玩啤牌，邊個嬴咗，就可以取得呢本「護照」~
結果佢自己嬴咗攞返......
茄康喺「798」影嘅相~
沒有留言:
發佈留言