亦因為以上情況嘅關係，今日可以食完早餐先出發，唔駛捱餓玩完先食早餐，真係非常好！
食早餐時，有人同細路爭盤用~=P
早餐都係西日式咁啦，冇咩特別~
跟住就去征服個火山口！
做功課時有人話過，地獄谷+大湯沼要行兩三個鐘，如果積雪太深，就連大湯沼都去唔到......
一場嚟到，梗係唔想啦，希望 OK 啦~
一行出酒店門口，嘩！勁大雪！
咁大雪，究竟應唔應該開心呢？
眼前嘅場面，實在令人興奮，大雪俾我嘅感覺好特別，我唔識形容，感覺非常良好！
問題嚟喇，大湯沼！會唔會去唔到大湯沼呢？@@
我哋開始行，要行十分鐘先到達地獄谷嘅入口。
呢刻都仲係好大雪，但氣溫並不如想像般凍，著住件羽絨，仲好似有啲熱，當然又不至會出汗。
一路行上去，其實唔會見到整整一個圓形嘅火山口，只係見到連綿不斷嘅山丘。
地上(山面嘅地上)有好多山溪咁嘅水路，上面全部都係黃色嘅硫磺，氣味帶點刺鼻，但就唔係好濃烈。
我哋所行嘅，好多都係木板地，當然係建喺山地上面。
自從到咗入口，行入少少至離開咗石屎地，就再見唔到有其他人，只有我同屎塔。
因為咁，地面上，就只有我倆嘅足跡......
咁嘅環境，莫講話大湯沼，就連地獄谷都可能只係行到少少。雪不停下，地面嘅積雪亦好深，就連腳底下嘅防跣橫木都睇唔到。我哋步步為營，好小心，好小心咁逐步行，又有斜路......
有欄嘅還好，可以扶一扶，木地板上仲有橫木防跣，只要小心啲就得。
我哋都知道附近完全冇人，有咩事真係冇人知，唯有不停咁同自己講，要好小心，好小心......
絕對唔容許任何一個有事！
一路行，基本上已經睇唔到所行嘅路，亦知道開始要往上行，進入山谷，危機程度有增無減！
地獄谷範圍唔太大，危險是有的，但只要小心就冇問題。
但要過大湯沼，就一定要跨過山頭！
我哋只好邊行邊評估，行到行唔到先再算。
一路行過嘅斜路都唔算好斜，同埋好多都有得扶吓，難度唔算大。
直至去到某處，首次遇到真正嘅考驗！我哋停咗落嚟，視察咗一陣，睇吓究竟應唔應該行落去，還是放棄，打道回府呢？
我哋所面對嘅環境，係一條約三四十米往上嘅彎曲斜路，斜度頗高，地面只有雪，雪下面係點完全唔知，左右兩旁除咗植物，根本冇任何嘢可以借力，步行上去係冇可能嘅！
其實呢條所謂路，只因為中間冇植物之故，我哋先認定佢係一條路......
我哋猶豫咗一陣，我心中已經有答案：如果屎塔唔上去，我會上去探吓路先，如果之後嘅路唔太差，我希望可以返轉頭協助屎塔上嚟。
再等咗一陣，屎塔開聲先：「我諗可以試吓，睇落都唔係好長。一場嚟到，唔想去唔到。」
好！真係好！同我諗法一樣！GoGoGo！
屎塔講完就郁身，佢拉住啲細小植物，半爬半拉咁擒上去，幾經辛苦，又跣腳，跣完再爬跣完再爬，就係咁，佢終於爬到上去。
屎塔真係好嘢，幸好佢不畏艱辛，我哋先可以再行前多一點！
到我！先前佢爬先，我喺後面一路睇住佢嘅跑法......(睇得太多頭文字D......)爬法，我跟住佢嘅線位，佢拉邊棵植物，我就拉邊棵！
好，我開始上，一手就拉住屎塔拉過嘅植物，哎呀......
我一拉，棵植物應聲折斷......@@
唯有自創一條路線啦......
其實附近真係冇咩合適植物可以作為借力之用，幸好，我見到有啲木梯嘅扶手頂，於是我就將木柱作為承托，每一步都撐穩先再行，好小心，好小心咁，搖搖晃晃咁行到上去。
啲積雪原來真係好深，深到扶手都爭啲見唔到......@@
繼續行，積雪太深，只好一步一步咁行，好有冒險家探險嘅感覺！=P
有啲斜位嘅右邊會有繩綁住喺樹與樹之間，方便可以扶住上，不過只係好過冇，因為啲繩綁得好鬆，一啲都唔好扶，感覺上唔夠紮實。
一路行，都見到有指示方向點去大湯沼嘅。
行咗成個鐘，差唔多到喇！
大湯沼
奧之湯
我哋發覺積雪比想像中深，外圍積雪竟達膝蓋位置！
想到欄邊近距離睇吓兩個湯都唔得，我哋再唔能夠走落去，危險程度已經超過我哋能夠冒險嘅範圍。
時間上亦唔容許喺呢個廣場逗留太耐，附近有個天然足湯，試嘅興趣就真係冇，但都想探個究竟，到此一遊~
跟住諗都冇諗，大家都做咗個決定：唔去！
時間同環境都令我哋唔能夠再走落去，我哋好唔想走，好唔捨得，不過都冇計啦，唔通要玩雪葬咩......@@
成個過程，部相機都好似唔見得光咁，一拎出嚟影完就要即刻收返埋......
我同事同我講過，相機都怕凍，凍得滯部相機會唔聽話！
仲有，當部相機接觸到雪，其實即係掂到水，所以要好小心處理~
真係要走喇，本來個設計，回程係行第二條路走嘅，但係以咁嘅惡劣環境，我決定行返原路走比較保險，反正我哋都到過大湯沼同奧之湯。
嚟嘅時候有好多上斜位，自然，走嘅時候會有好多落斜位，屎塔多次由高處跣落低處，幸好，完全冇受傷，到後期，佢仲係刻意咁樣跣落去，好似好好玩，我又跟佢咁試咗一次，點都冇佢玩得咁瀟灑......
我哋回程時發現，好多我哋行過嘅足跡，都消失晒，好明顯，係落雪嘅關係。
如是者，經過同樣嘅艱辛路程，我哋終於腳踏實地，再次踩在石屎地上，不過回程比去程快，因為唔駛爬又可以跣住落，呢個時候係 0940。
今早嘅行程可以話係樂而忘返，喺一望無際嘅雪地下歷險，一個普通人，一生可以有幾多次呢種經驗？
到目前為止，登別，係我喺呢個旅程入面最喜愛嘅城市，嚟緊仲有函館同東京。當然，東京對我嚟講，絕對不比登別可愛，所以，餘下就只剩函館。
返到嚟現實(石屎地)，經過商店街，經過閻魔堂，其實登別到處都係閻王......
據說呢個魔王係會變臉嘅，不過我哋就無緣見到喇~
經過十多分鐘路程，我哋又返到酒店，攞埋行李就可以休息吓。
休息，其實係被逼嘅，我哋要搭 1142 嘅 JR 落函館，但嚟緊喺酒店去 JR 登別站嘅巴士，分別有 1043(1100 到) 及 1128(1142 到)，好明顯，而家離 1043 班車有四十五分鐘，並且只有呢一班可以搭，搭遲一班車，只會睇住 1142 班 JR 走......
四十五分鐘，可以做得啲乜呢？尤其喺呢個乜鬼都冇嘅登別......
再講，就算我哋件羽絨聲稱係防水嘅，都經唔起兩個鐘內不停落雪環境，好多地方都開始濕到入去，尤其係袖口位。我哋只好坐喺大堂，除咗件羽絨灘開少少，等佢可以乾啲。
其間，我哋食咗好多北每道嘅美食~ =P
我哋住咗幾間酒店，房內都有啲小食，我哋袋起咗但未食，就喺呢個時候，可以食盡札幌、小樽、登別嘅美食嘞！=D
都等到差唔多，就起程行去巴士候車室，坐低買咗罐唔知乜鬼嘅嘢飲吓，傾吓偈咁，好快就有巴士到。(330 日元一個)
好嘞，1100 就到 JR 站，個站又細，附近真係乜都冇，我哋足足呆咗最少半個鐘先見到去函館班車......
呢個站同其他站有啲唔同，其他站係可以晨早就企喺月台等，呢個呢？呢個係唔可以嘅，差唔多開車先可以過閘(人手)行過對面月台，奇怪......
呆咗咁耐，終於可以上車。
而家係 1142，預計 1350 到達，成兩個鐘，瞓又怕唔知醒落車，唔瞓又未必頂得順......@@
結果我都係瞓咗~=P
瞓之前教咗鐘，都 OK 嘅~=)
未到 1330，我已經醒咗，屎塔早過我瞓，但遲過我起身~=P
一切都好順利咁到達咗函館，一個號稱世界三大夜景嘅城市，究竟係點嘅呢？
我哋好快就已經搵到要去嘅酒店，誇張啲講句，就喺隔離，好快 check-in 咗就可以出去玩。
間酒店叫 Harbour View，我一直都期望房間係望海嘅，入到房，好可惜，完全唔係我想像咁樣，不過都唔算得係啲咩嘅，好小事嗟~
離開酒店，我哋會去金森赤倉庫群。金森赤倉庫以前係貨倉，而家就變成商場，而且係成群咁嘅。
由酒店去金森赤倉庫，要搭當地主要嘅交通工具：電車
好近酒店就已經有站，好方便，個站叫做函館駅前，搭到去十字街呢個站落，只係三個站，再步行十分鐘就到。(200 日元一個)
函館一日電車票係 600 日元一個，不過我哋計過，今日每人都係搭 400 日元，聽日每人都係搭 440 日元，所以唔駛買一日票。
未去到金森赤倉庫，就見到明冶館同西波止場(都係商場咁上下嘅地方 )，我哋冇入去，只係經過吓，叫做到此一遊咁啦~
到咗金森赤倉庫，我哋決定醫肚先，見到附近有個西波止場嘅食堂，入去睇睇，都啱食喎，就係咁坐低咗食飯先~
我哋點嘅，都係啲好普通嘅嘢，不過味道就超乎想像嘅好味！
食完飯，又點咗雪糕食，北海道嘅雪糕，真係冇理由唔好食！
食完嘢，發覺時間比原定嘅遲咗，唯有縮短行街嘅時間，對於我哋嚟講，冇問題啦~
離開食堂，有啲嘢跌咗落個頭度，好自然咁搵手摸吓，濕濕地嘅？？？@@
哦，原來落雨......
嚟北海道，完全忘記咗呢個世界係會落雨嘅，感覺上只會落雪咁~=D
我哋當然唔會有遮啦，幸好，都唔係好大雨，都冇問題嘅。
溶雪加上落雨嘅關係，我哋越行就越覺得凍，我提議著返條雪褲，於是我哋就走入其中一個金森赤倉庫，搵洗手間著返條雪褲。
再行咗一陣就離開呢區。
下一站緊要囉，登登登登......世界三大夜景之一：函館
呢個夜景，又稱百萬(美元)夜景！
函館夜景，絕對係今次遊北海道嘅重點項目之一。
欣賞函館嘅夜景，要上函館山山頂。山蔍站(即纜車站)離金森赤倉庫大約十五分鐘路程，行過去就得。
好容易就到咗山蔍站。
呢部纜車，冇座位嘅，只有企位，一次過可載 125 人，勁！
更令我驚訝嘅係，全程大約一公里嘅綱纜，中途完全冇支點，係一嘢過由平地到山頂嘅，第二個勁！(紅箭咀為地面嘅山蔍站)
由山腳到山頂，只需三分鐘，第三個勁！
之前做功課嘅時候知道，二月份，函館嘅日落時間為 1710，一場嚟到睇夜景，點可以錯過日落時份？所以我哋 1615 到就上到山頂，打算睇完日落就食晚餐。
上到山頂，眼見仲有時間，就周圍行吓。
果度有個類似香港山頂凌宵閣大小嘅商場，商場有四層 ，第一二三層係室內，第四層係天台，可以飽覽整個函館。
呢個商場，人流好多，每一層都有好多人，第四層就更加唔駛講啦~
我怕日落時份餐廳會多人，好位俾人坐晒，所以我打算早啲入餐廳坐低。
呢度嘅餐廳有三間，一間係似 bar 咁嘅；一間就食自助餐嘅；一間就係食西日晚餐嘅。
我決定食西日晚餐，餐廳名係 Genova。
一入到餐廳，當然要坐靠窗邊位，為免淨坐太礙眼，我叫咗杯函館牛乳做吓樣~=P
又真係幾好味！
一路等日落，等佢由光變暗。
相信因為我哋唔係向西，而且極有機會係向東，完全睇唔到太陽落山嘅情景......
其實都冇咩所謂，主要都係想睇夜景嗟~
天開始黑嘅時候，就有人遞上杯墊，呢款杯墊，有光嘅，都幾特別~
時間一路過，天亦開始黑，百萬夜景終於來臨！
係時候食晚餐喇，我哋叫咗薯茸、燒原隻帆立貝、鐵板刺身飯。
薯茸：都幾好食，但唔覺特別。
燒原隻帆立貝：正到爆！好味！好味！好味！
鐵板刺身飯：真係人都癲，點可能咁好食咖！
食完飯，梗係叫雪糕食啦，一人一杯，正！
美女靚景再加上美食，此情此境，何止百萬？
呢間餐廳，我預咗起碼食 $500，賣單一計，唔駛 $330，抵食！平靚正！
食完飯，先係真正去賞夜景，先前喺餐廳隔住玻璃，總係爭啲咁~
我哋上到天台，嘩！搵個位影吓相都難！好鬼多人！@@
等咗一陣先可以搵個位影相~
老實講，靚係靚，但又未到咁嘩嘩聲咁囉......
跟住就落山喇，嘩！好多人呀！@@
好多旅行團......
落到去，就去影吓相，影啲當地比較有特式嘅建築物~
其實我都唔想夜晚先去影，部相機唔 pro，人就更加唔駛講，咁嘅情況下，點會影到靚相吖~
不過時間上真係就唔到，冇計啦~
當中包括：
聖約瀚教堂
哈利斯特斯正教會
元町教會
舊函館區公會堂
舊北海道函館支廳廳舍
元町茶寮
函館之板道
基督教團教會
船魂神社
元町日和館
元町公園
全部建築物都算係集中，所以都唔係行咗好耐。
不過由於溶雪關係，地面非常跣，我哋兩個有好幾次都爭啲跣低咗，好彩冇咩事。
其實我哋今晚行過嘅地方真係好靜，好偶然先見到一兩個人，靜得有點可怕。
行晒之後就搭電車返酒店，由元町公園行落電車嘅末廣町站，搭到函館駅前，都只係幾個站，每位 200 日元。
不過我哋等咗差唔多半個鐘先有車......@@
每日點滴：
今朝早兩條友獨自探險嘅情形，真係畢生難忘！亦係今次旅程最正嘅一段！
函館俾我嘅感覺就麻麻地，只係一個比普通更普通嘅城市~
沒有留言:
發佈留言