一放長期，就心思思想搵個地方同屎塔去玩吓~
有個朋友話，近近地，去「東部華橋城」啦，開咗唔係好耐，都幾靚咖~
好啦，反正屎塔都冇乜假要清，一兩日行程啱啱好~
搜集吓資料，好快就發現，有間旅行社所安排嘅酒店特別好，但就要跟團，而非自遊行......
我本來就唔係咁鍾意跟團，不過一兩日姐，是旦啦~
諗住星期四五兩日，但冇位，星期六日就有，竟然六日先有，真係奇怪！
其實都有啲猶豫，星期六日一定勁多人，不過猶豫都多餘嘅，我哋仲有得揀咩？
第一次，真係第一次跟團要喺內地集合！
九時十五分要去到福田集合，其實福田喺邊，我真係唔知，福頭就日日對住一個！
好順利，未到八時四十五分就到集合地點，食個早餐先！
喺大陸食嘢，我真係好有戒心，希望有間麥當勞就最好......
不過人生總係咁樣，往往事與願違，我哋就周圍行吓，睇吓有咩可以食~
過咗對面馬路，見到幾間茶餐廳，間間啲裝修都唔差，好似好企理咁，是旦啦，求其入咗一間~
早餐都係一般嘅早餐，中式西式都有~
屎塔點咗個米線，我就點咗腿蛋，冇咩特別~
好嘞，米線上檯喇，嘩！真係痴咗線，咁鬼大碗嘅！當晚餐都嫌佢大碗啦！我同屎塔 share 都唔知啃唔啃得晒......@@
到我喇，腿蛋應該冇咁誇張卦~@@
蛋就冇咩特別，塊火腿呢，有啲厚，又大塊，啲色好鮮，又係假假哋咁，都可以接受嘅，不過一咬落口，真係過癮，食擦膠咁，冇味嘅！又厚又大塊，但食落冇味嘅，有時食嘢，唔好食都總好過完全冇味，真係唔知係過癮定恐怖~@@
到杯奶茶，嘩，真係一樣比一樣新穎，簡直係挑戰緊我一直以來對味覺嘅認知，唔知點形容，好似玩緊遊戲，將啲唔知咩再溝啲唔知咩，然後叫你飲呢份唔知咩，仲要係 double 雙份嘅，家吓飲酒咩~@@
導遊都未見，就嚟啲咁新奇刺激嘅嘢......
食完早餐就行返過去集合處，仲係未見導遊，老實講，約九時十五分，而家係九時十一分，我認為，導遊唔單止要準時，為咗照顧團友，早到少少都係應該嘅~
不過都係我諗嘅姐，如果佢九時十五分現身，其實都冇問題~
最後，佢九時二十一分先出現，仲要係慢慢行又未瞓醒咁出現，一句唔好意思都冇，遲少少就好小事，但用咁嘅態度從事服務性行業，唔得啦~
點完名就起行上旅遊巴，集合地點距旅遊巴都有幾分鐘路程，而且唔係望到嘅地方，冇人帶一定唔識~
個導遊帶咗幾步就叫啲人向前行，佢自己就停低等埋後面啲人，看似好盡責，但我唔同意此等做法~
最前果班已經去到五十米開外，你一個導旅點樣可以兼顧到五十米開外並正繼續向前行緊嘅二十幾人?要等就一齊等一齊行~
去到車側，由於該處交通繁忙，實不適宜作為登車地點，不過呢點我可以體諒，因為要近又冇乜車嘅地方，唔係你想有就有~
導遊一直有睇住啲客，一路監察交通情況，一路叫客人小心並張開手以保護姿態指示客人上車，呢點做得非常好！
第一站就直飛「東部華橋城」
導遊多次提醒，入場票可作兩天入場使用，千叮萬囑要好好保管，否則第二天便不能進入~
第一日就以遊覽為主，第二日就以玩樂為主~
一去到就直上山頂先，山頂區以茶園為題，名為「茶溪谷」
一開始係一個大嘅花園，刻意種植唔同顏色嘅花，打斜以條狀排列，刻意營造出一幅美麗嘅圖畫，不過唔知點解，硬係覺得爭啲爭啲咁，但又講唔出~
四圍都有啲模型牛，牛身漆上唔同嘅圖案及花紋，有啲似國旗，有啲純花紋~
呢度都幾舒服，人都有返咁上下多，但園地勝在夠大，都唔覺得好擠迫~
導遊話行晒大約要兩個鐘，但首先要跟住佢去到一個登記處登記，手上的票方可通行到明天~
導遊嘅步伐唔算快，但亦唔算慢，想慢慢享受下平時享受唔到嘅舒泰環境，不行了，我哋影完相就要快步追返少少，一停低影相又落後好多，唉，跟團就係咁~
特別係我哋未登記嘅，一定要跟住佢，佢話登記過後，就可以唔跟佢都得，只要喺約定時間現身就得~
終於追到去登記處，去到先知原來要影相！到第二日入場時認票又認人，究竟係嚴謹定係別有用心呢？
影相過後，可以話自由了，但我哋仍然相信跟隨導遊嘅步伐，先可以控制到時間，所以自由還自由，我哋盡量都唔會俾導遊離開我哋嘅視線範圍~
導話開始介紹呢度，佢話呢度係「奀凸拉根」小鎮......XDDD
呢個小鎮，好有歐陸情懷~
一路行，一路見到有啲人喺度扮銅人，真係好似，一身都係銅色，完全唔郁，勁！
過咗呢個小鎮，先真正係「茶溪谷」，一路都係向上嘅斜路，兩旁全部都係樹，上到一處平地廣場就休息一陣~
仲有舞獅，我對普通舞獅冇乜興趣，不過今次睇到嘅舞獅係喺啲椿上面玩嘅，身手差啲都唔掂，佢哋真係好勁！
一位初級攝影新手，而且仲要係見習嘅，即係見習初級攝影新手嘅作品~
離開呢個廣場，就要過一條吊橋，講真，真係有啲驚，不過驚都要過咖~
過完吊橋，又有另一條橋~
團入面有一對夫婦，推住部 BB 車，裡面當然有個 BB 啦，天氣有少少熱，又要上斜又要上樓梯，又要落斜又要落樓梯，我真係好想幫下手，不過講緊係 BB，唔係貨物，都係唔好咁多事，一個唔小心真係幫人變成害人~
過完橋又落樓梯，其實都係返返去「奀凸拉根」小鎮，返到去鎮中心之前，仲有個「四季植物館」未行~
入面全部都係植物，我真係冇乜興趣，不過一場嚟到又仲有幾個字時間，是旦啦~
呢個植物館入面嘅溫度同濕度分別維持喺 30 度同 99%，喺入面真係好辛苦......@@
終於到食飯時間！午餐就係喺呢間「津津(香港)茶餐廳」食嘞~
食嘅嘢，唉，我都唔想講~
我同屎塔唔係最早到，但就肯定係最早起身離開嘅，跟住我哋出咗去出面行下啲商店~
大陸啲舖頭真係好鍾意呢種假蝴蝶......@@
跟住就要搭 "小火車" 到「大峽谷」，由「茵特拉根」站到「大拐彎」站~
以為落咗車就到「大峽谷」，原來仲要轉車嘅，當時都係估估吓，導遊完全冇提過！
今次就唔係搭火車，係搭覽車~
覽車，好多人都搭過，冇咩咁特別，但今次呢架就真係有少少特別~
特別在開車時令我哋好驚訝~
我哋上咗車坐低之後，係面對住車站，前方係冇路嘅，咁開車就一定係向後，但我哋都冇注意到呢點，一開車，我同屎塔都低呼咗一聲，覺得呢一下感覺好奇怪，喺完全冇心理準備嘅情況下向後行！跟住我哋就相視而笑~ XDDD
落咗車之後，我哋首先見到嘅係一支遠處嘅機械設備，同香港海洋公園嘅設施好相似~
導遊話三點三十分有一場表演，而家未到三點，表演前大家可以四圍行吓~
我哋抬頭向上望，見到有一處紅色物體凌空向外伸延，一望就知，係可供步行嘅凌空玻璃地~
我有少少畏高，但我知道我幾驚都會上去~
上到去並不如想像般咁驚，一來地面唔算乾淨(又朦又花)，二來玻璃下面係樹同霧，感覺唔到自己置身之處有幾高，怕，純粹係自己話俾自己知，我怕~
眼見時間差唔多，就行返落去廣場睇表演~
落到去已經見到表演者準備緊，我同屎塔就搵啲好位坐吓~
其實附近冇咩位可以睇到表演又可以坐嘅位，但係我同屎塔都好攰，非坐不可~
而且太陽又猛，仲要搵啲有樹陰嘅嚟坐，其實等於要睇就唔可以坐，要坐就冇得睇~
我心諗，都係啲現代人扮古人嘅表演，不看也罷，點知屎塔同我講，不如坐第二度(佢指住嘅地方係完全睇唔到表演嘅)，佢話呢啲表演睇唔睇都冇所謂，寧願搵個陰涼又冇咩人嘅位坐吓~
梗係好啦！
坐到表演完咗，導遊就帶我哋上「登峰造極」，即係我哋先前上過去果度......
早講吖！
我哋好無奈咁跟大隊上去，但就冇再行出去，只係周圍睇吓~
睇到部機動遊戲，我係絕絕對對地唔夠膽玩嘅！
等大隊行過玻璃地，就要行去搭吊車~
搭吊車對我嚟講一向都係驚心動魄，仲要係喺大陸，感覺係特別怪異~
我哋安全著陸後，醒起導遊冇講到邊到等，咁我哋唯有喺落車後前方空地等~
等咗一陣就開始見到其他團友，佢哋落咗車之後就直奔 KFC，真係奇怪，乜有安排到時間食 KFC 咩？
究竟係導遊有安排自由活動時間但冇同我哋講，還是團友自把自為呢？
我再等多一陣都未見導遊，現場又好鬼曬，又有人去鬼咗 KFC，我仲咁守規矩做乜嘢？
唔理喇，行前啲搵個地方休息吓，但我仍然一路留意導遊嘅蹤影~
當然最後都見到導遊，我揮手示意我哋喺度，佢就行過嚟，我同佢講有啲人入咗去 KFC (我冇不滿嘅意思，只係出於好心)
導遊就話我哋可以自己行去下一個景點，喺一個場地有一劇場，佢話一路行落去就會知，一定搵到~
好啦，咁我哋就行啦~
老實講，唔係一定會搵到囉，我哋都係估吓估吓，入咗去坐~
坐低果刻係四點正，之前導遊話四點三十分「應該」有一場，應該？你有冇做功課咖！
我哋坐咗一陣都唔見有其他人嚟，真係以為自己入錯咗場地~
跟團跟到咁都係第一次~
屎塔真係好攰，佢好快就依附住我瞓著咗~
其實我都攰到爆，但又要頂住唔好瞓，捱到四點三十分，諗住終於捱到啦，但又奇怪點解冇表演者嘅？跟住就聽到廣播話表演會在三十分鐘後開始~
天呀，想輕鬆吓都唔係搵啲時間咁嘥咖！
好辛苦先捱到五點正，終於開場~
故事大綱係講幾男捉一女，另外就有一個男救女，當中又跳水、爆炸、山洪暴發、快艇追逐、電單車飛 Jump，唔算好特別，但可以一看~
睇完表演就走去睇另一場大型嘅表演，要買門票嘅，正價 $70，有樂園門票嘅就 $50
呢場表演名叫「天機」，好似好勁咁！
六點三十分先開場，我哋五點四十五分就到，仲買咗兩條腸仔食~
兩條粉腸攰到爆，咁早到都好，可以休息吓~
到咗六點鐘就有人走出嚟講嘢，原來佢係主持，跟住就有幾個人輪流唱歌同玩遊戲，總算係有返啲嘢睇吓冇咁悶~
表演不外乎歌舞雜技，配合一流燈光聲效，值得一看，$50 可謂物超所值~
但我就難免會同長隆果個雜技表演比較，長隆門票 $150，但好睇程度絕不止天機嘅三倍，長隆冇水浪冇好嘅燈光冇好嘅聲效，更加冇咁鬼多人表演，但絕對精彩！
睇完表演就食晚餐~
本身個團係冇安排晚餐嘅，但個導遊好早就話可以安排我哋食海鮮，每位只需 $50
嘩，$50 食海鮮？其實初時都冇諗過跟佢，我考慮嘅係：
- 喺大陸食海鮮真係有啲驚
- $50 食海鮮，冇事嘅都唔會係好嘢啦
- 俾機會個導遊收佣或食夾棍
- 唔想同團友一齊食
不過最後都係應邀一齊食~
我考慮嘅係：
- 導遊帶得嘅，相信冇事，有事嘅佢會好大鑊；唔跟佢可以點？又怕治安又怕食物中毒
- $50 有雞有鴨有蝦有魚，仲想點？仲要求好好食會唔會過份咗啲？唔難食就算~
- 有時啲錢係要俾人賺嘅，又唔係多
- 兩個人食，食唔到啲咩；有事大圍一齊有事感覺冇咁累街坊
最後跟車去咗邊就唔知，間嘢普普通通，唔算乾淨亦唔覺污糟~
我哋一檯八個人，四人家庭加兩對男女~
果四人家庭一路食一路計，話 $50 一個真係好唔抵，我就覺得係貴咗啲，但唔算太過份，我呢啲守財奴都絕對可以接受，導遊要搵位吸水，梗咖啦，唔太過份咪得囉~
不過導遊話明有雞有鴨，都冇，呢點就有啲不滿喇~
原來呢刻只係嚟咗六成餸咋，跟住仲有幾碟上檯，由於同上一碟餸上檯時間有一段距離先誤會啲餸已經上晒~
跟住果幾碟就真係有鴨喇，咁雞呢？後來又嚟多碟鴨，原來冇晒雞，所以整多碟鴨，但煮法不同~
果四人家庭大有意見，話未經佢哋同意就換碟鴨俾佢哋，跟住就搵導遊理論，最後要人哋整過碟白灼蝦~
我同意間嘢冇問過人就自己揸主意(當然唔排除係導遊意思)換碟鴨上檯係有問題，不過果四人家庭都冇問過另外四人就自己決定要蝦，就連眼神都冇交流一下，根本就冇當我哋存在過，同啲職員咪一樣，真係五十步笑百步~
我哋四個冇食蝦就離場抗議！ (其實我哋都表示食夠了~ =P)
除非個導遊係收回佣，否則食夾棍都食唔到幾多~
食物質素就一般啦，唔算難食~
食完嘢就周圍行吓，其實淨返五分鐘，真係行咗幾間冇嘢睇嘅舖就要折返~
齊人就開車去酒店~
我哋入住嘅係「The Ritz-Carlton Shenzhen 深圳星河麗思卡爾頓酒店」~
我朋友同我講：你一定要食佢嘅早餐！
酒店早餐之嘛，未食過咩，有咩咁緊要呀~
分房時間，咁多人，預咗有排等~
等咗一輪，到我哋喇，個導遊靠近我遞上信封細細聲講：「公司送俾你嘅」
嘩！咩嚟咖，唔會係炭疽菌嚟呱！@@
打開嚟睇吓，係好一般嘅酒店鎖匙，我即時奢想，個朋友 upgarde 咗我上總統套房！ XDDD
我同屎塔都好心急好心急，好緊張好緊張，但係又唔敢離團即刻上房，真係急死人！
好嘞，上房嘅時候，冇人同我哋一齊出電梯，總統套房畢竟是總統套房！哈哈！
一步一驚心，究竟，我哋間房係點嘅呢？
間間房度門都比我一般見到嘅酒店房門大，心情又興奮又緊張！
一開房門，真係好有驚喜，間房明顯唔係普通房，但係屬於咩房就唔知，睇相同實境真係爭好遠，實物空間感大好多~
一楝 H 型嘅擺設，前後各有一部電視機，一邊向床，一邊向梳化，就連浴缸都有電視機~
第二天
今日好早就起咗身，即刻去享受一下浴室嘅設施，同長隆之旅一樣，有一個大花灑加由上而下嘅天花花灑，而且兩者都比長隆更大，效果更好！正！
沖完涼執埋行李就要交房，跟住就落去食傳說中好好食嘅早餐~
心情冇咩特別，唔係好期待，因為早餐點都唔會俾人有咩驚喜，最少唔會俾龍蝦鮑魚你食先啦~
落到去，有位小姐問我房號，我講完佢知，佢非常禮貌地帶我埋位，梗係啦，一聽房號就知係貴賓嚟！ (其實有邊個客人唔係？XDDD)
屎塔就喺門口影相，佢入到嚟話我知有人阻止佢，話門口唔俾拍照，我覺得有啲怪，不過都冇好在意~
好嘞，睇吓有咩食先，都唔算係一啲好特別嘅早餐，但就真係比一般嘅豐富啲，唔知係有晒心理準備定真係啲食物吸引，望落已經覺得唔錯~
同房一樣，睇相唔覺有咩咁特別，但我可以講，呢間係我食過最好食嘅非高級酒店早餐(咁當然只係我見識少而已)，雖不至要慕名而來，但絕對會留下好印象~
食完嘢又未夠鐘，就出去外面行吓，見到酒店內正門前，有為數十多人分兩行面對面排開，另有一人在發表講話，明顯係經理向下屬嘅例行訓示，我哋唔係幾好意思從中穿過，唯有行過另一度冇人嘅門出~
行咗出去一陣，又熱又冇嘢做，都係入返去坐陣算數~
點知一下唔覺意走咗去正門入，嘩，兩排人即時轉向對住我哋又微笑又躹躬，周身唔自在~ @@
今日再到「東部華橋城」主要係玩機動遊戲~
上車前導遊話唔去嘅人可以就此告別，結果有一半人都冇上車~
而我哋呢，就唔係話好想去玩機動遊戲，只係流落街頭都唔知去邊好，反正一心嚟遊「東部華橋城」，咪玩埋佢囉~
我真係老喇，以前都幾鍾意玩機動遊戲，雖則未到瘋狂，但至少都會心思思，蠢蠢欲動咁，而家就真係可玩可唔玩，至少啲比較激嘅，都冇咩衝動~
到達後入閘時，我哋都好好奇，究竟係咪真係認票又認人呢？答案係真咖，入票時，個職員會喺個螢幕度見到持票者嘅樣~
當然，個螢幕只係個職員見到，但其實要裝都係裝到嘅~
入咗場，導遊就講明一定唔夠時間玩晒咁多個項目，佢會帶我哋去幾個佢個人覺得比較值得去玩嘅項目，但我哋唔一定要跟，只需四點三十分喺出口集合便可~
第一站，佢帶我哋去 4D 影院睇電影，佢去睇睇幾點有場，睇完發現距現在仲有四十五分鐘，玩其他嘢又唔夠時間，唯有周圍行吓~
最近叫做有啲嘢睇嘅係「峽灣漂流」，係果啲坐船衝浪嘅機動遊戲~
為免濕身，我同屎塔都唔打算玩，不過，傾吓傾吓，就由唔玩變咗決定玩~ XDDD
等到差唔多時間就返去排隊睇 4D 電影，入院前要買 3D 眼鏡，$2 一副~
實在太好，如果係派俾我用，用後要回收果種，肯定污糟到爆！
電影有兩套：《Haunted Mine Ride》《Turtle Vision》
似乎前者好睇啲，不過後者就新啲~
但係點都好，都唔到我哋揀，因為嚟緊開場嘅係後者，堅持要睇前者的話，就要等多幾個鐘~
觀後感，是被騙了，甚麼 4D，根本就只有 3D~
故事極簡單，而且講國語好鬼怪~ @@
跟住就睇吓個導遊帶我哋去邊，但係個導遊要帶住咁多人，一定慢，反正自己去搵嘢玩一定冇問題，我哋就係咁自己有自己玩~
睇吓地圖，鎖定咗有邊幾個有興趣嘅就順序去玩~
下一站係「叢林穿梭」，係玩滑車嘅，喺條兜型通道飛馳，一車兩人，一前一後，我坐後，屎塔坐前~
都算幾有速度感，由於勁大霧嘅關係，屎塔話係咁撞埋啲霧水到，玩完之後塊面同啲頭髮濕晒~ XDDD
而我呢，前面有擋箭牌，當然冇事，但就非常痕癢，因為屎塔啲頭髮被風吹起係咁撩住我塊面~@@
下一站係「太空迷航」，聲稱可以令玩者感受到重力同無重力~
排隊時有段小插曲，就係有人打尖！
通常排隊玩遊戲嘅地方都係一行行，180 度轉又到另一行咁，當時我就正正喺轉彎位，而呢個轉喺位又異常地大~
排我後面係一對年輕男女，個女嘅係咁郁，初時我都唔為意，一男一女排緊隊冇嘢做，傾吓偈有啲身體語言真係絕對非常極之平常~
排排吓發覺個女仔越嚟越近我，我開始有啲戒心，將身體不經意地靠近柱位，就喺呢個時候，個女嘅一閃身就由內彎走到我前方！
我立時伸手並用身體封住了內彎，個男嘅過唔到我，個女嘅過到我都冇用，我根本唔需要出聲~
我望一望個男嘅，睇得出個男嘅唔想咁做，就喺呢個時候，一聲呼喝：「小姐！」
我前面果個男仔對住打尖果個女仔喝咗一聲，全場目光瞬間聚焦於一點！
唔需要再多解釋發生咩事，個女嘅竟然可以一點尷尬嘅神情都冇，退後返回個男嘅身邊~
唉，我好少返大陸，我一直以為隨住新時代嘅年輕人，會摒棄上一代嘅陋習文化，唉~
講返遊戲本身，係四人一艙，望住個螢幕，個艙開始郁，初時感到非常頭暈，直達嘔吐程度，後來「升空」後就好好多，亦都真係感覺到重力，啲手手腳腳要比平時用力先可以提起，個頭更加係控制唔到個郁動幅度，完全失控！
不過無重力就由頭到尾都感受唔到~
呢個遊戲真係令人好辛苦，玩完仲暈暈地咁走出艙~
跟住再行落去就係「地心四千哩」，不過玩咩就真係唔知......
我哋去到嘅時候，已經排到過咗排隊欄位置，即係人多到連排隊欄都入唔到，欄尾提示要排 90 分鐘，好明顯入唔到欄嘅，要等超過 90 分鐘......
我哋都好猶豫，玩唔玩好呢？時間好有限，但係想玩嘅嘢又真係唔係咁多~
場館入面一直有廣播，但我同屎塔都冇留心聽，直至見到人群起哄，並有人陸續離開，我哋先聽吓廣播講咩~
原來場館內設施發生故障，但冇講要維修幾耐，我哋只好離開~
不過都好，因為我哋未行到埋去排隊已經聞到陣陣臭味，係人類流汗後嘅體臭味，如果要排，真係唔知捱唔捱到 90 分鐘~ @@
嗱嗱聲玩下一個，就係話唔玩又玩嘅「峽灣漂流」
排隊嘅人唔算太多，輕微少過排「地心四千哩」嘅人，而且條隊好似都郁得唔太慢~
第一件事，買件雨褸先，$20 一件一篤或一扯就爛嘅 0.03mm 雨褸真係貴到嘔，擺明打劫，咁你買唔買吖？
不過呢件嘢比起我見過嘅都好，佢有埋腳套，真正可以由頭包到落腳，好細心~
呢次亦係我玩過同類型遊戲最有新意嘅一次~
一般死衝爛衝嘅，萬變不離其宗，但係呢個有兩項創新設計~
1. 衝到某個位，竟然會係盡頭！咁點呢？原來佢會倒後衝一次，真係未試過！
2. 去到某個位，會停一停，就喺停嘅位置會自轉，接到另一條軌道~
我同屎塔嘅衫褲、頭髮、鞋襪都有濕到，但算可以接受~
「峽灣漂流」出口處於整個樂園最低處，行返上去要行一段路，如果要玩第二次，著住件雨褸，相信上到去對腳套已經爛晒，如果唔夠小心，件上衣都應該用唔返~
我哋見仲有時間，就上去玩多次「叢林穿梭」，今次我坐前面，速度感真係強好多！
最後一環就係去返「地心四千哩」，去到知道已經開返，人亦比之前少，不過估計都要等上一小時~
時間上係可以嘅，反正最後一站，排咗先算~
佢一次過放好多人，但好耐先放一轉人，排住先，睇睇情況再決定~
排咗差唔多一個鐘，開始有啲壓力，如果嚟緊呢轉未到我哋，就一定要放棄~
幸好，我哋入到呢一轉，不過我哋開心得太早，原來入到去仲有一條龍，每次放得幾個人，而且放得好慢，我哋大失預算，最後只好放棄~
搞到咁掃興，不得不歸咎於場館內嘅指示誤導~
由欄尾開始排要 90 分鐘，呢點我接受，我都覺得係差唔多，但係入到入面仲要等幾耐就冇提過！
我入到去等咗 15 分鐘，都仲未排到去中排位置，即係話，入到去排最尾，起碼仲要等 30~45 分鐘！
預先知道要咁多時間，排唔排就閣下自理，但排咗咁鬼耐先知只係排咗一半，真係佛都有火！
再唔走就要遲到，唯有帶住遺憾離去~
(其實又唔算係啲咩遺憾，但計劃好要做嘅嘢做唔到，多少有點失望咁啦~)
我哋急步離去，落返去集合地方，為咗補償受創心靈，途經雪糕店，買咗兩杯天價雪糕~
由於實在太趕，相都冇影，落到去已經唔見導遊同團友，其實我哋唔係遲咗好多，不過遲到就係遲到，人哋唔等你絕對合情合理，真係唔好意思~
好彩我哋識路返旅遊巴，自己行返去~
車只係到羅湖口岸，我行去關口時，真係一步一驚心，附近俾我嘅感覺真係罪惡嘅溫床，好似無時無刻都有罪案發生咁~
返到香港，搭港鐵(真係好唔慣，都係講火車自在啲)到沙田，食埋飯先返屋企~
沒有留言:
發佈留言