但係諗諗吓，又幾日假又生日，冇理由唔搵啲地方去玩吓咖~~~
我提議(其實我都記唔起係邊個提議先嘅，不過為咗領功，我決定話係我提議嘅)搵啲玩一兩日嘅地方去吓~
腦海中諗起笨茄提過野生動物園，我就決定去長隆玩吓~
咁好嘅提議，屎塔著實冇反對嘅理由！
我哋係喺 28/10 決定嘅，我上網睇過啲資料，記低咗幾間旅行社，決定聽日親身去比較吓價錢~
行咗幾間，攞晒資料，套票所包嘅嘢都不盡相同，但都唔會爭太遠~
我哋深知時間緊迫，決定到幫襯邊間，就即打電話去講定，電話中人話要快啲上嚟做先做到~
於是我哋用咗不到十分鐘(沿途好多人)，由油麻地行到去旺角銀行中心，上到間旅行社，去到櫃檯前，講好要講嘅嘢，對方(相信唔係電話中人)卻說唔夠時間做！
唔夠時間做，你又叫我快啲上嚟？爭十分鐘就由可以變唔可以？還是根本唔得，但係呃咗我哋上嚟先？
果刻我哋竟然冇開火提出質問，因為當時最重要嘅唔係為啖氣，係去長隆！
再問咗幾間都話唔得，唔係酒店唔得就車飛唔得，搭船我哋又唔想，咁點解我較早前問嘅時候冇人話唔得呢？
真係佛都有火！係，我哋實在係太遲，咁你乾脆話做唔切，乘機 sell 吓其他短線遊，咁先係做生意，到時我哋亦只好怪自己，同埋覺得你哋提供咗另外嘅方案俾我哋，好貼心~
最後，都係要靠朋友搞掂，本來都唔想搵佢搞，費事靠關係攞著數，但而家已經唔係可唔可以平啲嘅問題，係可唔可以去嘅問題~
所謂出外靠朋友，真係冇講錯，唔駛半個鐘，酒店搞掂，車飛搞掂，連冇諗過嘅電視框都有埋！
第二日上去佢分行攞就得~
我哋訂咗 31/10 0900「香港 → 長隆」嘅車飛；長隆酒店新翼狩獵房；馬戲表演門票；01/11 1800「長隆 → 香港」嘅車飛
車程要成三個半鐘，即係話，01/11 要夜晚九點半先返到香港油麻地~
就喺呢一刻，我醒起一樣嘢！01/11 我約咗屋企人食飯，仲約咗 1800！@@
唯有逐個打電話認衰同改晏啲啦~
幸好，個個都得，改咗 2100，食住等~
(我預計我哋 2130 先到)
到咗第二日，我都成差唔多夜晚八點先上到去攞飛，點知，佢哋打錯咗我個名......
呢間酒店要兩個人嘅身份証 check-in 嘅，但係我相信佢哋可以搞得掂~
經過一個電話嘅溝通，佢哋話到時拎住張收據再同佢哋講聲就可以~
我當然問定佢哋，有咩事可以打咩電話求救，佢哋俾咗兩個電話我，同埋個副經理好識做，俾咗張卡片我，上面有佢手提，佢話有咩打俾佢就得~
我都仲係唔放心，想打俾個朋友(高層)報定案，但我諗深一層，我只係為求安心一點，就可能令到落手做嘢果位同事(即入錯名果個)受到處分......
所以我打消咗呢個念頭，到最後關頭搞唔掂先搵佢出馬~
今日(31/10) 0900 要到油麻地搭直通巴士到長隆，我哋大約八點半就去到~
職員提我哋填健康申報表，我哋先嗱嗱聲坐低填，不過有樣嘢更加緊急嘅係，我哋冇兌換人民幣！
真係大鑊，晨咁早銀行都未開門，去邊度換呀~~~
返到上去先換，對於我呢啲咁少返大陸嘅人嚟講，實在係太危險~
好彩，就喺隔離就有間找換店，但係就未開門，聽天由命啦，開車都未開門就唯有上去先兌~
兩條粉腸完全冇準備~ XDDD
九點五十分，我終於成功用念力令個老闆返到嚟開門，兌換到人仔~
兌完人仔就上車等，我哋搵返自己嘅編號(我初時真係冇諗過搭巴士要跟編號......)，結果係坐尾二，總好過坐最尾嘅，冇咁危險~
我同屎塔講：無論點都好，唔好瞓！
唉，講就易，佢固然一定會瞓，我自己都瞓吓醒吓咁~
呢部車係經深圳灣過境嘅，落車時，司機話過完境要上第二部車，其實咁，係咪已經唔算直通車呢？
過完境，搵返部車，繼續車程~
大約 1245 就到祈福新村，又要轉車到長隆，其實我對直通車嘅意思係咪有誤解呢？
若果有人安排轉車，都算入直通車嘅定義？我唔知道~
轉車後，好快就到長隆，check-in 時，職員對錯名有啲疑惑，佢離開咗一陣，返嚟就當冇事發生咁繼續搞手續~
一切順利，但要到 1400 先可以入房，我哋唯有去食飯先~
食飯前，仲去兌換咗兩張馬戲團入場劵~
我以為可以出去市區搵嘢食，但原來出去係好遠嘅，我放棄咗呢個念頭，喺酒店範圍搵嘢食~
跟隨指示，有個地方叫「蝴蝶谷美食廊」，是旦啦，食咩都冇所謂~
入面環境算幾好，感覺乾淨；食物方面可謂乜都有啲~
天花吊住好多假蝴蝶，驟眼望落都幾靚，但望真啲，其實有啲恐怖......
佢恐佈在做得太像真，蝴蝶始終係昆蟲，昆蟲嘅主體點都唔會被大多人覺得係美麗嘅，實在冇需要做得咁仔細~
我哋求其點咗啲嘢，所謂求其，真係一啲都冇講錯，我哋點咗揚州炒飯、皮蛋瘦肉粥、叉燒包
以酒店食肆嚟講，一啲都唔貴~
不過服務就認真麻麻~
佢哋嘅服務態度，唔可以話差，但感覺就一啲都唔誠懇，僅僅受過訓練而已~
本來都冇乜嘢，唔差就可以，但發生咗一件好平常嘅事，但佢哋嘅表現完全係不知所措咁~
碟揚州炒飯好耐都未到，就同個侍應講，叫佢跟一跟，佢冇咩特別反應就行開咗~
但我留意咗佢一陣，佢唔似有處理我哋嘅訴求~
又隔咗一個我哋認為應該再追嘅時間，就同另一個講，呢個又係冇咩反應就行開咗~
不過，呢個就有做嘢，佢走埋櫃檯，同第二個講，佢似乎唔知點處理，其他人又好似唔知點幫佢咁，佢好苦惱，唔知點算~
其實有咩咁難呢?我未做過食肆，唔知應該點做，但我真係唔能夠相信一個侍應會唔知點處理追單，一個唔知，就連其他人都幫佢唔到？
啍！又過咗一陣，冇人接觸過我哋，當然，碟飯仍然唔知去咗邊！
我哋又催過，如果有人接觸吓我哋，等我哋知道咩情況，根本就唔會係咁追~
今次我哋直情話，未整就唔要喇！
同呢位侍應講完，佢拎張單睇吓，就喺呢個時候，碟飯到喇，不過胃口早就跑到老遠去了~
冇法啦，都要食埋佢咖~
食物質素一般，不過不失~
食完之後，屎塔話想行吓隔離嘅「長隆潮街」，反正冇咩做，當然冇問題啦~
入面其實真係冇咩好行，主要係公仔~
呢隻大老虎都算賣得平，細果啲比成年男人拳頭還要大一些，大果隻嘅售價僅為人民幣三百多元~
酒店大堂予人感覺非常寬敞，就連房門口嘅走廊都非常寬闊~
房算幾大，又新淨，幾舒服~
參觀完房間，我哋都諗唔到有咩做，酒店範圍內會遊嘅地方，一係未到時候，一係就唔夠時間，我哋決定好好咁瞓一陣~
幾個鐘後，我都唔知係鬧鐘鬧醒定係自己醒，呢覺真係瞓得好好~
下午喺酒店瞓，記憶中就真係未試過~
係時候準備出門，去睇馬戲表演~
其實我哋咁得閒，好應該早啲去搵個好位坐，不過，呢個想法，係我等緊車嘅時候先醒起，太遲喇~
由酒店去馬戲團表演嘅場地，係有穿梭巴士去嘅，我哋去到酒店門口，就已經見好多人排緊隊，心知不妙~
等咗一陣都未有車，我走去問啲工作人員，行過去遠唔遠，要幾耐，對方回覆要二十分鐘，唔太遠~
我問嘅時候未到 1900，而馬戲係 1930 開始嘅，我哋決定 1900 都上唔到車就行過去~
其實車唔係冇，只係酒店唔係總站，好多車都滿晒人，每次都唔係上得好多~
其實呢啲黃金時間，點解唔安排一架空車呢? (我將自己準備不足嘅結果歸咎於酒店嘅安排......)
最後我哋未到 1900 就上到車~
(其實我都幾質疑 1900 上唔到車，我哋係咪真係會行過去~ XDDD)
車程約十分鐘，我慶幸我哋冇選擇行過去，因為我相信步行的話，會超過二十分鐘~
嚟到入場位，人山人海，我諗都冇咩好位剩喇......
經過看台頂，有人兜售貴賓飛，我梗係唔會買啦~
向前行多幾排，不停掃描邊度有啲好啲嘅位，最後，都算好好彩，搵到個幾滿意嘅位~
面對舞台，偏右偏高，但其實個位真係唔差，因為偏右角度唔算大，而高度就算幾好，最理想係低多幾行，但太低就反而差，因為表演者時高時低，又有時高低都有，更有啲後過最前嘅位，坐得太低，有啲就要扭轉頭睇，有啲要望向上睇，有啲，就只能揀睇上或下~
坐低咗等開場，有個家庭搵緊位，停咗喺我哋側邊，佢哋望住左前方最好嘅位置，以為係俾酒店住客坐嘅~
當然，我都唔知果啲位係俾邊個坐嘅，我只係覺得，果度嘅位唔多，但都冇乜人坐，我有理由相信唔係俾住客坐嘅，而係俾購買咗貴賓飛嘅人坐嘅~
最後，佢哋都喺我哋附近坐低咗，但就派一個人去睇吓，結果，我相信如我所料，唔係俾住客坐嘅~
(佢哋講嘅時候，我都心郁郁想去睇吓~ =P)
成個表演可謂精彩絕倫！比想像中好睇百倍！物超所值！
2100 散場後就搭返穿梭巴士回酒店~
又到食晚餐嘅時候，都係冇選擇，去「蝴蝶谷美食廊」食嘢~
呢個鐘數，人唔多，冇食晏果時咁嘈，舒服得多~
今次我哋叫小菜食，不過我都唔記得叫咗咩，睇返相先有啲印象~
好似有碟回窩肉(好似係)、雞(忘了煮法)、牙帶魚(好似係)
食物質素僅為合格，不過環境清靜加心情好好，只要唔難食就算滿意~
食完飯就返酒店，到沖涼時先發現，原來浴室個花灑頭好大，天花亦有垂直出水嘅巨型花灑頭，用咁嘅設備沖涼，真係好舒服~
今日(1/11)又係一早起身，食完早餐就去「廣州番禺香江野生動物世界」
食早餐前就去交房先，同埋寄存行李~
早餐又係喺「蝴蝶谷美食廊」食 @@
好一般嘅西式自助早餐，冇咩特別~
酒店職員同我哋講，動物園開 0900，所以我哋食完早餐就等車去動物園~
第一班去動物園嘅穿梭巴士係 0900，食完早餐都未夠 0900，唯有喺候車處等吓~
大約 0920 就到門口，但係售票處仲未開門，我去其中一個窗口位排隊~
售票處附近嘅牆壁都係動物園相關嘅資訊，由於實在太過無聊，呢啲資訊就成為我呢刻嘅娛樂~
睇吓睇吓，先發現動物園係開 0930 嘅，唔怪得未開門啦~
等多一陣，見到有工作人員埋位喇，不過佢哋對出面排緊對嘅人視若無睹，慢條斯理咁執吓檯面，斟吓水，咁又等咗十幾分鐘~
等到近 1000 先開始售票~
入咗動物園，同去其他樂園一樣，地圖在手，樂園通行~
呢個動物園分兩部份，一部份係步行嘅，另一部份係車行嘅~
步行部份佔整個動物園三分二，剩下嘅三分一，就係車行嘅~
動物園設有車行區，對我嚟講，係一件好新鮮嘅事，可惜，喺呢度，我冇租車玩，到時唯有坐園內設有嘅遊覽車~
成個園，全部都係動物，而且地方仲好大，肯定有排行......
一路行，一路影咗好多相，動物嘅名，可以話全部忘記晒，其實就連當時都冇話逐隻動物去認識佢嘅品種，純粹觀看，因為實在太多~
一路行，見到前面有好多人圍觀，我哋自然都去睇吓有咩好睇~
原來係白老虎仔，仲可以抱住佢影相，當然係收費項目啦~
我哋對隻白老虎仔極有興趣，但就冇咩意思抱住佢影相(因為要錢嘛 =P)
隻白老虎仔真係好可愛，可愛到我哋睇咗好耐都絕冇離去嘅意思~
但係始終都係要離開咖，跟住去睇其他動物~
由於場地設計嘅問題，之後我哋又經過隻白老虎仔嘅表演場地~
白老虎仔嘅天然吸力，再次將我哋吸咗過去~
今次，佢走近人群，我哋乘機抽水！
佢啲毛有啲粗「鞋」，佢一啲都唔抗拒俾人摸~
本來去洗手間就冇咩好記敘，不過呢次小便真係驚心動魄！
一入到去，地下好多蟑螂，隻隻都咁大隻！不過都係死嘅，但係都已經好夠嚇人~
好戲在後頭，轉入廁格，嘩，今次呢啲係生咖~~~
不過，生果啲全部都喺個廁所入面游緊水，我喺進行過程中，死命盯住佢哋嘅一舉一動~
其間，有一隻爬到上嚟離開水面，我自然有辦法令佢落返去~ =P
繼續行程~
行咗大半個行人區，由於順路關係，我哋決定坐遊覽車先，跟住再行埋剩返嘅行人區~
去到乘車處，人山人海，又有分兩邊，一邊好多人，一邊都唔知叫唔叫有人~
最後搞清楚，右邊係乘電車嘅，十人一部，要收費嘅，一個人都冇~
先前排左邊嘅人太多，又排得唔夠好，排到歪晒，所以睇落右邊都好似有人排~
左邊先係免費嘅遊覽車，梗係特別多人啦~
部車係點嘅呢?呢刻仲未見到，希望一車可以載好多人咖啦，如果唔係有排等......
等咗十多分鐘，終於放行，不過放行咗仲要行一段路先可以以去到真正嘅乘車處~
到咗乘車處，見到好多部車，原來係搭呢種「卡車」，一架車有四卡，每卡有七行，每行有四個位~
經過一輪複雜嘅算式，得出嘅答案係，一車有一百一十二個位，掂晒，唔駛再等，我絕對可以上到第一架車~
想就梗係想坐第一卡第一行，如果唔得嘅，退而求其次，第四卡第七行都好~
不過我哋排得好後，起碼係第幾十個，邊有得揀吖~
不過都好好彩，坐到第三卡第一行，視野唔錯~
都唔知係我定係屎塔俾人覺得有傳染病，啲人望一望我哋都冇上嚟我哋果行，成架車坐咗唔少人，但到開車時，我哋果行只得我倆~
當然，咁仲好啦，我樂於被視為傳染病患者~ =P
成個過程都有導遊講解，附近都有好多私家車同行，但就一架收費嘅電車都唔見~
條路可以容納兩車平排，不過間中有啲司機唔聽話，封晒路~
我明白，駕車入嚟梗係要慢慢行睇吓嘢，咁唔該你睇吓環境，同其他車停埋同一條線，唔好打斜停甚至平排停車~
呢啲咁嘅嘢真係要人提要人教？
幸好，唔醒目嘅人都唔係好多~
入面劃分咗幾個區，每區代表一個地方~
坐住一部行緊嘅車影相，真係好難，而且，掛住影相，又怎能細意欣賞眼前嘅動物呢？
屎塔，辛苦你喇~~~
呢個設計真係好好，感覺無阻隔，但絕對安全~
坐完車，係時候醫肚~
場內嘅食肆真係間間一樣，數量都算幾足夠，我哋隨意揀咗間就坐低~
食物種類同賣相可謂非常差，但係冇計啦，根本冇選擇~
我同屎塔喺幾種食物裡面，稍為可以接受嘅就只有炒粗麵~
買嘢食時，係有一條隊嘅(先買飛後取食，不同位罝的)，但有條友逼埋嚟就係咁叫：「我要兩罐啤酒咋，俾咗我先啦~~~」
佢都叫咗起碼五六次，但人實在太多，有隊等於冇隊，果條友就喺我隔離係咁逼，我深知同呢種人講道理係多餘嘅，我唯有融入佢嘅文化，同佢鬥逼~
自然，我知道嬴面唔大，人家「逼」嘅經驗，可能已有五十年，我算是甚麼？佢係咁叫，我又跟住佢叫；佢係咁俾錢個收銀，我又係咁俾錢個收銀~
就喺呢個時候，有人向收銀大駡：「究竟駛唔駛排隊咖！」
有個屁用咩，邊個得閒理？
一個二個繼續逼，我俾邊個打尖都唔可以俾個大叔打尖！
最後我爭嬴咗！哈哈~~~
去到取食處，又要爭，好攰呀~~~
你班粉腸排吓隊得唔得呀！.\!!/.
我逼咗一陣都未俾到飛個職員，果條大叔又過嚟嗌：「我要兩罐啤酒咋，俾咗我先啦~~~」
@%$&@#$^($&$^(！你條友咁 煩咖！
今次我冇同佢逼，因為我喺龍尾......其實根本冇龍，總之我同佢一東一西~
今次佢成功喇，而我呢，終於都俾到飛個職員~
不過，當個職員搞掂我盤嘢，嗌：「兩個可樂兩個炒麵」
我即時遞手，不過遞手嘅唔只我一個，我隔離果個唔止出手，仲出埋口，真係佛都有火！
以下係我哋嘅對話：
我：「你飛都未俾，點會係你咖！」
佢：「我叫咗兩個可樂兩個麵喎~~~」
我：「我都係，但我俾咗飛先！」
佢：「咁俾你先囉，冇所謂，俾你先啦~」
我：「唔係你俾我，係應該我先！」
佢仲喃喃自語係咁話冇所謂，咁嘅情況下，真係要收起禮讓，盡快攞完嘢食轉身就走~
將麵放咗上檯，食一啖，嘩，油膩嘅程度遠超所想所見，早知買一個頂吓肚就算~
原本諗住遊完動物園就去鱷魚世界，不過遊動物園所需嘅時間，多過我哋原先預計嘅，我哋決定放棄鱷魚世界~
唔去鱷魚世界，時間就變得好充裕，我哋決定行埋餘下部份就搭多次遊覽車~
場內有多場表演，但礙於時間同興趣關係，我哋只係選擇睇「白老虎表演」
表演 1430 開始，我哋準時入場，已經見到好多人坐低咗，幸好，我哋都搵到位置不俗嘅座位~
表演都算唔錯，起碼唔會覺得嘥時間~
由於遊覽車 1630 為最後一班車，睇完表演，縱使未有行完整個動物園，我哋都決定坐多次遊覽車先，之後先完成未完成嘅部份~
今次搭遊覽車就冇影相，專心遊覽~
搭完遊覽車，繼續餘下行程~
我哋曾經掙扎過行唔行埋佢好，因為只係淨返熊貓未睇，老實講，真係冇咩興趣~
不過一場嚟到，行埋佢啦~
要睇嘅已經睇晒，仲有時間剩；今次嘅旅程亦將完結，仲有少少人仔剩~
基於時間同人仔都有剩，我哋決定搵返隻白老虎仔影相~
行返去今朝見到白老虎仔嘅地方，冇咩遊人，即刻要求影相~
今次攞正牌抽水，影完合照，我哋繼續舉機狂影~
其後，工作人員忙於執拾東西準備收工，竟然疏忽咗隻白老虎仔，任由佢周圍行，行咗去隔離檔口~
隔離檔口咁蹺又整跌咗部裝雪糕嘅雪櫃，成地都係水，隻白老虎就係咁舔啲水~
當個工作人員發現時便一路行過去一路大叫：「老虎~~~」
我同屎塔都覺得好笑，原來隻老虎仔係冇名嘅，又或者，隻老虎仔個名就係叫「老虎」~
正式結束動物園之旅，搭返穿梭巴士返酒店~
同樣，要睇嘅已經睇晒，仲有時間剩；今次嘅旅程亦將完結，仲有少少人仔剩~
我哋利用埋訂房時送嘅免費飲品劵，到指定餐廳坐低飲嘢，仲就住剩低嘅人仔，叫咗個「藍梅芝士蛋糕」~
其間我走向前方落地玻璃，想睇吓外面嘅風景，原來係對住幾隻白老虎嘅~
食完嘢就去排隊等車~
1800 及 1805 都有車返油麻地~
根據當地直通車嘅工作人員所講，我哋被編排乘搭 1805 班車嘅，但 1800 果班車有位剩，問我哋上唔上，又話，1800 果班車係直接返油麻地，唔經祈福新村，而 1805 果班就會入一入祈福新村，兩班車都經皇崗口岸~
照正路，又早啲，又直接啲，我哋又趕趕哋(約咗屋企人食飯)，真係冇理由唔上 1800 果班車~
同屎塔商量咗一秒，決定上 1800 呢班車~
亦係惡夢嘅開始！
坐我前面嘅係一對母子(我相信係)，坐我右邊(我與他有走廊相隔)嘅係爸爸(我相信係)~
三個都係類似印度籍嘅人種，所以，我由頭到尾都唔知佢哋嘅談話內容~
車程大約兩小時，個小朋友就嘈足起碼個半鐘！
個半鐘內不停係咁大聲講嘢又叫囂~
雖然我聽唔明，但我感覺到佢媽媽有嘗試控制佢，不過唔成功~
後來個小朋友走咗過爸爸度，情況一樣，個爸爸亦試圖叫佢唔好咁嘈，亦告失敗~
後來個小朋友終於瞓咗~
而個媽媽，成程車係咁咳，我都為佢感到辛苦，我亦覺得好煩~
煩又點吖，人哋唔舒服佢都唔想，佢仲戴埋口罩，仲想佢點吖~
其實我好攰，但我成程車都瞓唔到~
終於到咗皇崗，臨落車前，司機提我哋要拎埋行李過關，過完關坐返呢架車~
到我哋過完關，見到部份同車嘅人已經企喺度等緊，就企埋一齊~
過咗一段時間，雖然我第一次搭呢啲過境車，但都有少少覺得等咁耐唔係好正常~
後來個司機終於出現~
我講個司機出現，而唔係架車出現，係因為真係只係個司機出現，架車係冇出現嘅~
佢一出現就好急咁問：「你哋有冇見過果幾個阿叉？佢哋冇拎行李，部車過唔到關呀~~~」
睇返現場人嘅反應，好明顯，冇人見過佢哋~
唔知又等咗幾耐，見到部旅遊巴駛過嚟~
好囉，可以起程囉~
由皇崗過落馬洲，我都唔記得幾耐，總之就好快~
入境時，每人都要遞交健康申請表，我同屎塔係唔知嘅(或者可以話唔醒起)，不過交表前有個地方可以俾我哋填，我哋填完就交表~
老實講，咁嘅手續。真係有用？
假設阿甲身體不適，但又怕麻煩，要騙過關員可謂絕無難度~
就算事後被發現入境時身體已經不適，只要阿甲死口話入境時冇唔舒服，又或者有填唔舒服，咁關員又奈佢咩何呢？
一次過成過百人(甚至更多)不停經過收表嘅關員，關員真係睇得切交表人是否需要特別處理咩？我好懷疑~
而且就我自己所睇，佢哋只係收表，根本就冇每張都望吓~
當然，咁多人，點可能睇得切~
佢哋唔單只不為，同時亦係不能~
此舉作用不能被發揮，最後只係浪費人力、浪費資源~
當然，批評總係容易，不過做得高官，賺取高薪厚祿嘅同時，唔該做返啲實際嘅嘢，唔好只做表面功夫~
過咗關，同上次唔同，唔係人等車，係車等人，一出關就可以上返部旅遊巴~
不過上咗車好耐都唔見個司機，亦唔見有人遲過我哋上車~
我真係覺得好奇怪，成車人一齊過關，就算有先後時間，都唔應該相差咁耐~
由於出呢個關後，乘客唔一定一樣，因為會有幾部車作分流去唔同地方，所以坐返呢架車嘅人唔一定見過，之前見過嘅亦唔一定上返呢部車~
所以我哋根本唔會知齊人未，只知司機唔見咗~
(司機不在但旅遊巴中門大開，係因為在場有其他人控制分流)
又過咗一陣，司機出現，佢同空氣講：「果幾個阿叉真係麻煩，証件有問題過唔到關，唔等喇！」
跟住就開車走~
我絕對有理由相信，搭 1805 果班車走，會快過搭呢班車~
不過世事難料，果班車會唔會有咩事發生，事前冇人會知~
跟住一切順利，大約 2130 就到達食嘢嘅地方~
沒有留言:
發佈留言