《瞬間看地球》Stranger's Blog: 2010.10.26 台北 (台灣第六天)

今日行程：
士林官邸 → 淡水 → 十三行博物館 → 八里 → 漁人碼頭 → 美麗華百樂園 → 士林夜市 → 喵喵館

今日冇咁好彩喇，一起身就見到落緊雨，不過就唔算好大，希望就算落都唔好大過而家啦~

一出酒店門口就知奶嘢，氣溫比噚日低起碼三四度，有風又有雨，大約只得十七八度，但我就只係準備咗短袖衫，而家係朝早七點幾，根本搵唔到地方買衫，唔通買份報紙圍住自己咩，唯有頂硬上啦，反正我就未聽過十七八度會凍死人~ @@

今日早餐點咗法式黃金三文治同陽光鮮蔬沙拉，三文治之前試過啦，個沙拉都 OK，不過返食嘅興趣就唔大 lu~

今日第一站係士林官邸~
士林官邸係蔣介石同佢嘅夫人宋美齡嘅住所，園內分多個區域，包括官邸正房、凱歌堂(禮拜堂)、玫瑰園、生態園、西式及中式庭園、生活園藝教室及後加設嘅士林官邸庭園咖啡餐廳~
餐廳只提供 A B C 餐，售價分別為 350 180 130 (新台幣)，相當昂貴！我梗係唔打算試啦，食咗蹺飛咩~ @@

由酒店到士林官邸，又係捷運啦，搭到士林站行五分鐘就到，不過地理環境比一般街道複雜少少，都要搵吓先去到~
去到士林官邸，落緊微微雨，我哋都冇咩點理到，反正好細，仲時雨時停，冇問題~
一入到園首先見到嘅係「法輪大法好」@@

一路行入去，有指示去各個區域，不過地方雖大，但一啲都吸引唔到我~
原先我冇計劃嚟嘅，不過見有個現成大花園，就安排呢個地方俾屎塔玩吓影相，不過天色唔好再加上環境唔吸引，又碰著其他人食煙同大聲說話，咩興趣都冇晒~
冇興趣冇興趣都行咗大半個鐘，因為地方實在太大，嚟到又冇理由唔行吓~

下一站係淡水，係今日行程嘅重點，可以話由朝玩到晚~
由士林官邸到淡水，搭捷運到淡水站就得~
呢條線中途會經架空路軌，即係可以俾我哋望到車廂外嘅環境，亦俾我哋望到失望~
因為大雨咗好多呀~ >_<

到咗淡水站，真係要嗌救命，氣溫明顯比台北市中心仲要低，加上臨海又大風又大雨，溫度起碼爭兩三度~
屎塔見到有間 7-11，提議買件雨褸，擋風擋雨一舉兩得，呢個提議簡直可以問頂諾貝爾獎！
雖然屎塔有兩件衫，其中一件係長袖衫，但唔係厚衫，我相信佢都好凍，比我好不了多少~
間 7-11 好細，我心中不禁懷疑會唔會有雨褸，結果係有嘅，雖然放得極唔起眼~
件雨褸只係用完即棄果種透明 0.3 mm 薄雨褸，動作大啲都會整爛果種~

唔理咁多，兩條友出咗門口就喺出面啲檯度著咗佢，難免惹嚟旁人嘅好奇眼光~
最過癮嘅係，兩條粉腸著好晒雨褸，準備起程，阿風同阿雨小休中，玩咩~ @@

於是我哋又除返佢，摺得靚靚哋放返好，其實被玩唔緊要呀，可以冇風冇雨，玩多幾鑊都冇問題~ XDDD
不過世事就係咁，放好晒再次準備起程，佢又刮風又落雨！
今次我哋決定著返之後，除非有一段時間停雨啦，否則都唔會除！激死人喇！

著返件雨褸，真係起程嘞，由於我係嚟過嘅，憑記憶搵到淡水老街，相信由於天雨關係，路中心車仔檔一間都冇開，舖頭嘅就九成都冇開，開咗嘅都只係好悠閒咁準備緊開檔，成條街非常冷清~
唉，真係掃興~

落雨除咗令旅遊熱點變得冷清，亦令我哋變得狼狽，屎塔怕整濕部相機，影相時要搵嘢擋住啲雨，咁樣好難影得好，我又要睇住啲路線同行程，要好小心咁喺雨褸內伸手去拎旅遊書同筆記，真係好麻煩~
不過去旅行一定要盡興，落雨其實又冇咩大不了~

經過「搜奇博物館」，就好似「信不信由你」咁，專門擺放奇奇怪怪嘅展品，不過據講範圍好細，但入場費要 $180 新台幣，兩個人加埋差唔多成舊水港幣，我又覺得唔係好值，所以冇打算入~

「童玩反斗城」係刻意安排去參觀吓嘅，上次嚟台灣都有到過一間類似嘅店舖，啲玩具非常懷舊，真係唔知佢哋啲貨喺邊度嚟，而家仲有人生產呢類玩具咩？
隨住時代嘅進步，真係買少見少，想藉住呢次機會同屎塔去行吓~
不過今次呢間舖頭賣嘅玩具，雖然唔算好現代，但亦唔算太懷舊，可能真係賣一件冇一件啦~
不過呢間舖一定有返咁上下歷史，由地面嘅痕跡可見一斑~

跟住係屎塔指定要到嘅「阿婆鐵蛋」，佢話一定要買嚟食同做手信，我都唔明有咩咁緊要，非到不可，不過佢啲嘢，我有好多都唔明~ XDDD

由於落緊雨，有多個袋遮吓部相機會方便啲，我問店主(我估係)攞多個袋，店主好友善，好好笑容同好樂意咁俾多個袋我~

跟住就去搵食，搵一種非常地道嘅食品，至少喺香港係未聽過(當然係因為我孤陋寡聞)，呢種食品叫 - 阿給
阿給係咩嚟呢？根據旅遊書所講，將油豆腐從側面切開，釀入粉絲，再用魚漿封口，蒸好後澆上特製醬汁，係淡水獨有嘅小食~

個名就真係夠怪，而呢間舖頭個名，亦都係叫「阿給」，旅遊書話呢間嘢好唔起眼，有啲難搵，但就話呢間嘢係冇名嘅~
其實有名定冇名，真係任你講，總之如果搵到間賣阿給但有店名嘅就唔係佢啦~

阿給離阿婆鐵蛋有一段距離，而且地圖唔算清晰，最鬼衰又落好鬼大雨，唔能夠正常咁抬頭望吓啲環境，又有件雨褸阻擋視線，就算俾你冇遮冇擋，咁鬼大雨，出面都係白朦朦咁咩都睇唔清楚，地圖隔住盡是流動嘅雨，勁難睇得到~
種種困難都令我難以覓路前進，我同屎塔都好鬼狼狽，但又好鬼開心，反正都係一種經歷，一份回憶~

離開咗淡水老街，雨勢好似越嚟越大，根據地圖，要上一條冇行人路嘅上斜馬路，我好擔心屎塔，佢份人好鬼論盡，我又怕佢跣親，又怕佢俾車撞親~
雨水就從馬路面傾瀉而下，我哋就著住對 converse 碎步而上，過咗段斜路，再睇睇地圖，我推斷目的地就喺附近，面前有一條好闊嘅大馬路，同我哋一齊等過馬路嘅有好幾十個著住黃色雨褸嘅小朋友，由幾位大人帶住，相信係師生關係~
為免被班小朋友圍住，一轉綠燈我哋就快快起步，過咗對面有條小路，我估計上咗條小路嘅平路就會到~

果然冇錯，但又啱唔晒，因為一上到平路就見到阿給，不過係有店舖名嘅，即係唔係我哋搵果間啦，而且門牌都唔啱~
再行前幾間舖，終於都到喇！

沿途經過見到賣阿給嘅都坐滿晒人，多數都係小朋友，我哋搵嘅呢間都唔例外，相信又係小學旅行啦~
店內環境極普通，我哋點咗一人一個阿給，加杯豆漿~
我哋一份加辣醬，一份唔加，交換試吓，結果係加咗辣醬好食啲，不過啲所謂辣醬唔係好辣，只係有少少辣味調吓味，開吓胃~
阿給本身嘅味道唔錯，但可以想像得到，主材料係豆腐同粉絲，基本上你放咩醬汁就係咩味~
作為淡水獨有小食，真係幾有特色，我哋離開咗之後仲回味緊，後悔冇叫多兩客~

下一站就係「十三行博物館」，位於對面岸八里~
行去碼頭時途經「亨利屋家族」，其實之前喺西門町已經睇過，不過呢間嘢係屎塔指定要去店舖之一，今次再經過，佢又點會錯過再遊覽一次嘅機會呢~
其實喺我安排入面，係上九份先去睇嘅，但未到九份已經睇第二次~ ~_~!
不過呢間只係開咗半閘，我哋只可以喺門口裝吓裝吓~

過對岸嘅八里，要搭渡輪，首先梗係去買飛先，售票處設於海皮，我哋沿海皮一路行過去，成個畫面好似打緊風咁，而家唔算好大雨，但就幾大風，九成九嘅舖頭都冇開，海面又一片朦朧~

好容易就搵到售票處，講到售票處，不禁諗起我朋友嘅故事，一個難以置信嘅故事~

我朋友同佢自己嘅朋友一行四人，上年又係台灣自由行，我朋友本身不暗國語，但佢啲朋友應該冇問題，我朋友返到嚟同我講冇去到八里，原因係搵唔到渡輪嘅售票處~
真係一百歲唔死都有新聞！

今次係我第二次嚟淡水，上次同今次嘅售票處地點都唔一樣，兩次都係我去搵售票處，根本冇可能搵唔到，兩次都係喺碼頭附近，上次係喺舖頭入面，今次就似樣啲，真係一個售票處~
我唔係想講我好叻，因為只係一件極普通嘅事情，一切都係咁理所當然~
搵唔到售票處，已經係極難置信，搵唔到都唔問吓人？我相信喺現場問咩人都好，多數人都答到你，真係冇計都可以走埋去渡輪度問收票果個吖，點會過唔到岸呀？簡直係世紀懸案！冇可能！冇可能！冇可能呀~~~

過到八里仲要搭一程巴士先可以去到十三行博物館，巴士方面，我哋已經知道搭邊架先啱，去到巴士站發現仲有其他路線都啱，最後搭咗 704，上咗車請司機到咗提一提我哋落車~

落車時，司機仲俾咗把遮我哋，把遮已經殘破不堪，相信呢把遮係其他人留底嘅，其實我哋有雨褸，都唔會用把遮......

落咗車之後，見唔到有類似博物館嘅嘢，放眼都是工業村咁嘅環境，附近又冇咩人，同我哋一齊落車嘅人亦已經遠去，我哋唯有跟人行，行到中途有個人喺間廠度行出嚟，我抓緊時機去問一問佢，原來繼續向前行就會搵到~
穿過呢條橫街，過埋個停車場就見到間博物館，為免整濕晒人哋啲地方，入館前我哋咗件雨褸袋好佢先入去~

十三行博物館所展示及介紹嘅係此處嘅遠古文化，此館內亦係一個古蹪所在地~
不過對我嚟講，吸引力只係一般，而且有啲悶，不過山長水遠咁樣過嚟，本身已經好夠樂趣~

對開係南中國海，非常大浪~

八里渡船頭附近都有一間童玩店，就係我上次去果間，冇話特別想去，只係去到碼頭未有船的話，不失為攝時間好去處~

回程我哋行返去先前個巴士站，上咗「紅13」，原來佢會兜一兜十三行博物館先再去八里渡船頭，早知慳返啲腳骨力......

到咗八里渡船頭，見未有船，就入咗「五○年代童玩」，比我上次嚟，啲玩具現代咗好多......

搭返船到淡水後，仍然落緊大雨，我想講嘅係，我真係好凍，如果冇件雨褸擋擋風同保保暖，我都唔知會唔會頂唔順，都係屎塔嘅功勞~

喺海皮，唔計大間啲嘅食肆，只得一兩間舖頭有開，其中一間係我哋計劃好要光顧嘅，算係好好彩~
呢間就係「巨無霸冰淇淋」

碼頭附近有個地方係有蓋嘅，有幾排櫈，我哋就坐喺度慢慢嘆我哋嘅雪糕~
我開始思考今日餘下嘅行程，嚟緊有三個地方都係啲歷史建築，要步行過去，仲要係全露天嘅，落緊咁大雨，呢啲景點又唔係一定要去，我決定唔去，屎塔都同意咗~
行程有變，交通安排亦有變，好彩係我自己一手一腳做功課嘅，還可以應付得嚟~
刪咗三個景點，時間就變得多咗，反正今日唔會有日落睇，我會安排早啲到漁人碼頭，可以慢慢行，行夠就走~

做完一輪思想家，返回現實，我哋返返去淡水老街，試一試「可口魚丸」
我哋點咗餛飩湯同魚丸湯，餛飩味鮮，魚丸超彈呀，正呀！
不過環境同謝謝魷魚羹一樣，有小小強喺牆度行！ >_<

再嚟就係到此一遊式咁影吓「紅樓」

下一站係「漁人碼頭」，搭「紅26」巴士就最好~
中途上車唔係唔得，但就要研究吓個站喺邊，反正總站唔算太遠，我打算行過去，順便經多一次今朝嚟嘅時候冇人果條街~
今朝嘅死城變得較為熱鬧，但始終都唔算好多人~

紅26總站喺淡水捷運站對開~

好多人都會去漁人碼頭，因為係睇日落嘅絕佳地點，仲有條情人橋，又可以遠望南中國海~
今日，我哋只做到後兩樣~
一到埗，我哋就入咗「魚藏文化館」，都係講啲捕魚歷史同文化~
啲職員好友善，但就有啲煩，不停 sell 佢哋啲手信~ @@

再行吓個所謂商場，地下係攤檔，上層係食肆，我哋就只係行過吓地下，其實都係啲小食同手信檔，冇咩興趣，行過就算~

跟住就係傳說中嘅「情人橋」

橋頭(商場那邊)係梯級，橋面係階磚，由於落雨關係，階磚面極之濕滑，我千叮萬囑屎塔要小心~
有好多年青人喺橋面玩溜冰，有人跌到有人跣腳，真係睇見都牙煙~

到落橋位，左右兩旁嘅梯級細而淺，每邊大約有一米闊，中間嘅梯級就同橋頭嘅一樣係正常梯級~
我個人覺得呢個設計係唔合理嘅~
落斜、濕階磚、淺而短梯級(不夠放一隻腳掌)，全部都係為仆街而設嘅！
落斜位用階磚面冇舖防滑物料仲要用淺而短梯級，腳尖落地先，向前跣；腳踭落地先，向後跣！仲唔係為仆街而設？
就算好小心咁行都好難行，我索性扶實扶手跣落去，同時同屎塔講：「不如你俾我扶住啦」，佢又唔鍾意......
阿屎塔，話時話，我扶你都唔鍾意，你都算係一個好奇特嘅女仔嚟......

呢頭講完，果頭就聽到屎塔哎呀一聲，重重咁跣低落梯級，不幸中之大幸，落點唔係梯級嘅邊緣，係成個屁股墊住咁平坐落梯級面~
唉，好一條濕滑嘅公路，一個粗心大意嘅司機，痛在佢蘿，亦痛在我心~
我二話不說走埋去扶佢起身，睇佢表情仲笑得出，我相信唔會好大鑊~
佢話只係屁股肌肉痛，腳呀腰呀都冇事，咁都好啲~
唔只係我講佢，佢自己都承認自己輪盡，你條粉腸小心啲啦！
我都話啦，專為仆街而設~ XDDD

好小心咁行埋條橋，之後係一條木棧，其實環境就唔算得上有咩咁吸引，不過對開係大海，啲風真係特別勁，海面仲要勁大浪，真係好似感受到大自然嘅強勁威力~

行完條橋，係碼頭嘅上層，下層有一排舖頭，不過又係多數都冇開~

地下呢一層，就只有碼頭同舖頭，我哋見到傳說中嘅「豪大大雞扒」，本來諗住今晚去士林夜市先食嘅，不過見呢度有，我哋又有少少肚餓，時間又早，就喺度挑戰佢啦！
叫咗一塊，仲大過我隻手~
店員送咗張飲品優惠劵俾我哋，一於買埋杯嘢飲~

舖面大大隻字講明不設切雞服務~

我哋問店員附近有咩地方可以坐低食，佢向右指咗一指話果邊有啲櫈~
隔離係餐廳，再隔離唔覺有櫈，都係算啦，自己諗掂佢~

買完嘢沿路行過去，一路行，直至見到樓梯底有張長椅，我哋就坐低諗住開餐，不過都係頂唔順，好大風好鬼凍，我哋唯有厚住面皮，走咗入一間便利店~

呢間便利店叫萊爾富(內衣褲？XDDD)，入面有一角係咖啡店嘅格局，不過冇客人亦冇開燈，我哋好離譜咁坐低食嘢，店員嘅眼光唔多友善，所以我哋就光顧吓，買咗包香口膠，算叫做好睇啲~
不過我哋都唔係好過到自己，又再去買咗隻茶葉蛋，今次可以光明正大咁坐低食嘞呱~
其實個店員都算係咁，開頭冇幫襯都冇趕我哋走，出面風大雨大，俾我哋"匿"陣啦......

講返塊雞扒，啖啖肉，又唔會油得好犀利，幾好食，但就未必會食第二次，始終係噱頭多於味道~
食到尾聲先知原來係有骨嘅......
出面風大雨大，入面就風平浪靜，非常悠閒咁歎我哋嘅雞扒，真係人生一大樂事~

飲飽食醉又暖夠身，係時候離開，離開前，整返乾淨人哋啲地方先~
本來計劃好下一站係士林夜市嘅，不過啱啱食完嘢，又凍到死死吓，我決定去美麗華百樂園買件衫著同夜啲先再食嘢~

由漁人碼頭到美麗華百樂園，要搭巴士返捷運淡水站，我哋上咗紅26，再搭捷運到劍潭站，再搭美麗華免費穿梭巴士~
喺等穿梭巴士到美麗華百樂園時，後面有一對男女，個男嘅用廣東話係咁講其實而家唔係好凍，果時喺英國點凍點凍都頂得住，真係聽到我煩，大佬呀，我好鬼凍呀，入夜比下午仲要凍，我等車等咗十幾分鐘就吹足十幾分鐘，你就係咁講個凍字，又話而家一啲都唔凍，我真係想殺人呀！(其實人哋自己傾偈根本就唔關我事，只係我呢刻對個凍字太敏感喇......)

到咗美麗華百樂園，第一時間睇水牌搵吓便服喺邊層，上到去我人有三急(其實人有邊三急？)，我哋唯有分頭行事，我去辦事，屎塔去睇衫~

我搞掂之後再搵返佢，佢已經有心水，就帶咗我去睇~
佢真係知我心意，完全符合我買衫嘅要求，不過咁，呢件嘢一啲都唔平，一件超薄外套之嘛，要成 $1300 新台幣，真係好唔值！
不過屎塔話而家做緊 promotion，買兩件只收貴果件錢~
咁又唔同！反正屎塔都會買一件，咁就抵好多啦~
最後揀咗件 99% 相同嘅，但就唔同色，一件 $1300 新台幣，一件 $1100 新台幣，而家可以以 $1300 新台幣買到兩件，抵！
俾錢時仲有個小驚喜，原來唔係只收貴果件，係半價，又慳 $100 新台幣，一餐飯咖喇~ =P
久違了嘅溫暖感覺，又再返返嚟~

本來嚟呢個商場，純因為佢頂層有個摩天輪，所以買完衫就走上去~
因為天雨關係，售票處同輪候處一個人都冇，就連摩天輪上面都唔覺有人~
屎塔同工作人員講咗兩句，再話我知要等十分鐘，我覺得好奇怪，冇人排隊，摩天輪上盡是空位，而且轉動得非常咁慢，相信係果種一路轉一路可以俾人上嘅，不過可能我估錯啦，可能係轉完晒到停先可以上落啦~
最後原來我諗錯晒！屎塔係等緊摩天輪上嘅特別座廂，而呢個座廂有客人喺入面，要等佢離開我哋先可以上~

呢個座廂有咩咁特別呢？就係成個座廂都係透明，包括個底都係！

天呀，正常摩天輪我都嚇到死咁濟，仲要全透明？今次死梗......
坐咗入去，我成個人僵晒，郁都唔敢郁，好似一郁就會死咁......
其間因為影相角度問題，要同屎塔對掉座位，我感覺就好似玩緊空中雜耍~ @@
我不停祈求快啲玩完，但係都冇用嘅......
坐咁多次摩天輪最驚呢次！

死過返生，有驚無險，我諗我個心臟應該冇乜問題~
下一站係傳說中嘅「士林夜市」，相信好多未去過台灣嘅人都會聽過呢個咁出名嘅夜市~

由美麗華百樂園到士林夜市，搭返架穿梭巴士到捷運劍潭站，行幾分鐘就到~
不過估唔到天氣咁差都有咁多人~

好求其咁揀咗間「忠誠號」，點咗蚵仔煎同花技焿~
上次嚟士林夜市都食過蚵仔煎，我就覺得唔好食，仲有啲抗拒，不過台灣名物，我試過姐，屎塔未嘛，點都要試試嘅~
今次好食好多喎！但仍然唔算有咩咁特別~
至於花枝焿，不過不失，算唔錯~

由第一日嚟台灣，已經成日見到「大腸包小腸」呢種小食，我哋喺第二檔見到有，就買嚟試吓~
其實都係冇咩特別，有腸有糯米，最特別只係香港未見過~

行行吓，屎塔突然大叫！
原來有隻巨型老鼠從天而降，我眼尾都望到，真係好大隻！隻老鼠一落到地就走咗入間玩具店消失咗~
就係消失咗先驚，好彩我哋都行得七七八八，即時離開呢個範圍去另一邊，買咗杯「檸檬愛玉」飲~

夜市過後，仲有下一站，就係「喵喵館」，顧名思義，同貓有關，佢係一間以貓為主題，產品多元化，有衫有杯等等~
佢總共有三間舖，除咗上面講果間，仲有「汪汪館」同「汪汪喵喵館」，三間舖頭位置都好相近~

由士林夜市到喵喵館，只需搭一個站捷運到士林站就得~
不過失望嘅事情發生喇~
書講呢三間嘢 2300 先閂門，事前我都打算上網查証，不過佢冇官網，唯有信本書~
而家係 2100，我哋見到三間其中兩間落晒閘但仲有燈，剩返果間都落咗大半，擺明就係啱啱收舖！
豈有此理，原本見佢收咁夜，將佢放到最後，點知......！
不過算啦，唔係啲咩大景點，冇咩損失嘅~