出發前，上網睇過，二月一日嘅升旗儀式會喺 0723 開始~
http://www.tiananmen.org.cn/ flag/index.asp
我打算 0630 出門口，0700 就去到鬥逼，逼返個好位~
其實升旗有咩咁好睇呢？我都唔知，反正嚟到，咪湊吓熱鬧囉~
呢日教鐘教咗 0530，不過未聽到鐘響就自然咁醒咗，仲聽到啲聲，啲聲係來自洗手間嘅，我即時就已經發現我身旁嘅屎塔唔見咗，咁當然，佢係入咗洗手間啦~
我望一望手提電話，0540，心諗，屎塔真係乖，咁早就自動自覺起咗身~
我好瞓到鐘響都唔知......
突然，我好懷疑自己有冇睇錯！咦？唔係喎，真係 0540 咩？點解我又好似睇到係個 6 字唔係個 5 字嘅？
咁我就再睇多次個手提電話啦，嘩！0640？？？咁咪遲咗個幾鐘起身？四個人輪個洗手間，點都趕唔切睇升旗啦！結果大家都放慢晒手腳~ =D
最後大約 0730 先出發，行去永安里地鐵站，搭地鐵到天安門東站，未夠 0800 就到。
我哋求其上咗個出口，上到去已經係故宮門口，即係毛澤東像嘅門前~
如果去天安門廣場，呢個出口係錯嘅，因為天安門廣場喺對面馬路，但係都冇所謂，當前急務，梗係影相啦~
後來我哋見到有個軍人企喺燈柱下站崗，兩位少女都心思思想同佢影吓相，但又唔係好敢，最後，勇敢嘅屎塔走上前，鼓起勇氣企埋去，可惜，果個軍人講咗句嘢：「 不許拍！不許拍！」咁冇計啦~~~
後來屎塔同茄趁佢隔離冇人，離遠就位同佢影咗張，係康揸機嘅，因為要就位嘅問題，我就諗住等康影完先用我部機再影。好嘞，康影完，咁我就埋位啦，我都未舉機，就見到右邊有隊軍人操緊過嚟，一路向我嗌：「走開！走開！」我唯有聽聽話話走開啦~
事後屎塔得知我影唔到，就有少~~~~~~許微言，內容唔係咁方便公開，總之就......唉~~~
我梗係有反駁啦，之後佢仲同我講對唔住，話唔應該怪我，係佢唔啱。哼，肯認句錯就算啦，我又唔係咁小器嘅，哈哈哈哈
(幻想永遠是美好的......)
其實我同屎塔嘅性格真係火星撞地球，一個堅持、有原則，一個固執、拗到底，我就梗係有原則果個啦~XDDD
(呢編嘢一出街，睇怕我都要跪玻璃...... )
不過屎塔又好好嘅，講完就算，唔會一路係咁講，亦唔要求你做啲咩去補償，更加唔會黑口黑面，講完繼續有講有笑，一啲都唔小器，呢啲女仔真係好難得~
影飽相就諗住落地鐵過對面嘅天安門廣場，落到地鐵，有兩個軍人守住條路唔俾人過，只可以出，唔可以入，呢條路正正係通往天安門廣場嘅......
我哋正喺度思索點先去到天安門廣場之際，有兩個似係當地人嘅女仔走埋去個軍人度，講咗幾句嘢，然後就可以同個軍人合照~
掂喎！我哋又走埋去講幾句嘢咪得囉！跟住屎塔走埋去想話合照，對方嘅回應係：「不許拍！不許拍！」
有冇搞錯！大細超！大家都係中國人，駛唔駛咁呀！李露眉小姐出場吖唔該！！！
地鐵唔過得，唯有返上地面睇吓有冇得過啦~
上到去左望望右望望，見到前方好似有得過，見到有人過馬路，於是我哋就向住果個方向行~
首先，我哋經過「國家博物館」，其實就算唔經都會走過去影吓相~
有啲嘢就係咁，去到一定要影，到此一遊，但係咪真係咁需要同想咁做呢？又唔一定係咖喎，就係唔知點解要影，國家博物館係其一，之後仲有大把嘢都係咁，為影而影......
喺國家博物館門前左影右影，又見到有軍人操過，今次我冇阻住佢哋，自然唔駛俾人喝~
跟住行過對面馬路準備入天安門廣場，但原來進入天安門廣場要做安檢嘅，茄仲話見到好多打火機被沒收，好彩佢冇帶噚晚買嘅火炬形火機喺身，否則益晒啲公安~ =D
我哋無驚無險就入咗天安門廣場~
其實都冇咩好行，不過嚟北京，冇理由唔入嚟行吓姐~
入到嚟冇耐，茄就發問：咁多鷹嘅？
其實真嘅鷹就唔多嘅，只係有啲魚目混珠，係紙鳶嚟姐~ XDDD
不過真係好似係真嘅，直至見到好扁先知係假嘅~ =D
嚟到呢度，真係勁凍！係隻手好凍，戴咗手套都仲係勁凍，好辛苦，屎塔就拎咗佢個妹俾佢用嘅暖包出嚟，可惜等咗好耐都唔暖，啲暖包已經失咗效......
唯有死頂啦~
周圍行吓，行過「人民大會堂」、「毛主席紀念堂」同「人民英雄紀念碑」，所謂行過，只係喺門口行過~
上次去人民英雄紀念碑，係冇嘢欄住嘅，今次唔止欄住，仲有軍人駐守~
記憶中，人民英雄紀念碑上面，有好多子彈痕跡，今次唔俾靠近，當然睇唔到~
整個天安門廣場嘅環境，同上次去真係好唔同，上次去好似比較自由，冇咁多關口，冇嘢圍~
廣場雖大，但值得細味嘅地方，可以話係冇乜，速速行過就算~
人民大會堂
毛主席紀念堂
人民英雄紀念碑
下一站係到「國家大劇院」
我哋離開天安門廣場時，唔知點解會有部車喺內裡駛出大馬路，啲公安移開啲欄俾部車出，指導交通嘅仲趕我哋喺行人紅燈嘅時候過馬路......
繞過人民大會堂，離遠見到國家大劇院，由於我哋時間上比原定遲咗好多，所以只係影張相就算，唔打算入內參觀~
下一站就去「故宮」，故宮係我哋嚟北京必遊地點之一，不過時間唔係好夠，都唔會行得晒~
進入故宮前要過一條橋，橋嘅兩旁都有人企喺度，著便服又冇掛牌，每邊五六個到啦~
成個故宮都有條小河圍住，河面已經結晒冰，我哋想影吓個河面，但就俾兩旁嘅人趕走：往前走！
屎塔就一路行一路影，咁就唔怕俾人趕又可以影啦~
入咗大門，仲未到售票處，我哋見到有嘢食，係一間快餐店，一於食咗嘢先繼續行程！
呢間嘢叫「天苑快餐廳」，喺大陸叫得快餐店，我真係唔會對佢有咩期望，但大家都未食嘢，反正就腳嘛~
內裡一如所料，非常一般，主要係賣一餸或兩餸飯，選擇唔多，但亦唔算難揀~
話明快餐店，好正常，都係先付款後取食。經過噚晚茄大人溫柔嘅溫馨提示，我唔會再一疊錢咁拎出嚟，我將一百蚊同其他紙幣分開兩疊放喺袋~
由於怕收到假嘅紙幣，對於冇信心嘅地方就俾散紙，對於有信心嘅地方就俾大紙，希望佢找多啲散紙俾我，等我需要時都有足夠散紙用~
由於身上都冇咩散紙，唯有用一百蚊紙，不過我相信都安全嘅~
我伸手入褲袋，從一疊一百蚊紙度，只係拎一張出嚟，點知......
我只係拎咗十蚊出嚟，係一張一百蚊紙嘅十份一，我搣爛咗張銀紙呀~ T.T
好自然，掹埋果九十蚊出嚟，諗住問個收銀姐姐有冇膠紙，就喺我準備開口問之際，個姐姐一手搶咗我果九十蚊同十蚊紙，同時講咗句：「沒事！」
嘩！好型呀！真係型到爆！
又幫我解決咗問題，堅係型！
俾完錢就去揀嘢食~
我同屎塔揀咗排骨同牛肉丸~
茄康就食牛肉片同排骨~
揀完之後，我就去買嘢飲，買咗康師傅冰紅茶~
返埋位時，見到茄康同個職員好似有啲拗撬咁，原來茄康問個姐姐攞匙羹，但個姐姐只肯俾筷子，經過來來回回嘅刀光劍影，個姐姐好唔願意咁俾咗隻匙羹我哋，仲好唔忿氣以半罵方式咁話：「買湯才會給調羹！」茄康有匙羹喺手，話之你再講啲咩吖，轉頭就埋位食嘢啦，唔該晒茄康~
真係奇怪，兩餸飯成二十五蚊，一個湯都只係八蚊，話晒都幫襯唔少吖，買平嘢就俾羹，買貴嘢就死唔肯俾......
如果用碗裝，用筷子扒都冇問題，但係用碟裝，用筷子扒就真係有點兒那個......
食物質素呢，一定唔會話直豎拇指咁好食，但又未去到想像中咁差，睇環境同碟嘢，幾肚餓都唔會覺得好好胃口，但又未到難食，算係咁~
真係好求其咁填吓個肚，差唔多走人，望吓人哋，唉，真係慘，用筷子喺碟上夾啲好多汁嘅飯，諗都諗到，啲飯一夾就跌，再夾都係跌咖啦~
夾極都夾唔到，唯有扒啦。唉，又唔係同你乞，點解唔肯俾匙羹呀，文明啲啦！
離開咗天苑，又要過一度門，呢度門，相信有睇開電視嘅人都唔會感到陌生~
過咗呢度門，再行百多米就到售票處，未到售票處，有幾座大炮喺度，其中一座，更加係有粒炮彈喺炮咀度~
除咗大炮，唔少得嘅梗係售賣紀念品嘅檔口，我當然都係唔會感興趣嘅~
去到售票處前，茄就好似個小朋友咁嚷著要租個講解器，好啦好啦，就租俾你啦(陣間你就知味道，嘿嘿~)
排隊買票時，有個女人不停叫賣故宮地圖，$10 一份，都幾貴，不過我哋總共有兩本旅遊書，都有故宮地圖，所以唔駛買~
入場每位 $40，部講解器租金 $10 + $100 按金，按金喺離場時交回講解器就可以攞返~
部機個設計好精，只有一邊耳機，一機同時只能一人用，我哋有諗過攞自己個耳機出嚟試吓，不過最後都係不了了之......
好，真正進入故宮喇~
第一度門，呢個名，實在係響噹噹！
經常喺電視劇聽到：「拖出午門斬首！」
我哋已經到咗傳說中嘅「午門」，午門對開正正就係收入場票嘅地方~
過咗午門，眼前嘅景象，係幾咁熟悉，呢條咁嘅橋仔，又係喺電視劇見慣見熟，呢條橋叫「內金水橋」
故宮實在太大，所以旅遊書分咗三條路線去行(有理由相信係參考自官方網頁 http://www.dpm.org.cn/Big5/C/ C1/cindex.html)，主要分兩小時、半日同一整日咁行，我計劃好跟半日路線嘅~
不過計劃時冇預早餐，而我哋又確實花咗啲時間去食早餐，我對於可以行半日嘅信心開始有啲動搖......
其實心中有數，一定行唔晒，唔理咁多，邊行邊計劃跟住嘅路~
我哋依然跟住原定嘅半日路線去行，過咗內金水橋，感覺有啲宏偉，亦有啲普通~
宏偉，自是必然；普通，因為喺電視睇得太多，感覺就好似參觀電視城嘅廠景咁，又怎能講得上特別？
不過我相信隨住我哋睇得越多越深入，感覺會好唔同~
故宮入面人山人海，我哋仲見到美麗華有人帶緊團，一邊行一邊講解，如果可以混入去聽埋一份就好喇~ =D
過咗橋，到達「太和門」
冇咩特別，到此一遊又再向前行~
先前講過，茄要租部講解器，我仲心諗佢陣間就知味道，究竟係咩？機就得一部，點先可以令四個人都享用到呢？就係由聽果個做廣播嘞！ XDDD
向前行，就到咗「太和殿」
近睇啲咁嘅建築，真係唔識形容，好靚好宏偉！！！
乾隆御筆
宮殿係唔開放嘅，所有人都只係從外圍窺探內裡環境，亦只有正中門口位先可以睇得清楚，要影靚相，就更加要企正正喺中間位，仲要唔好俾人撞先影到。男仕逼入去當然冇所謂，女仕就唔係幾好，隨時蝕底晒，但我揸機技術差又手震，只好由屎塔代勞，我就做護花使者~
再嚟就係「中和殿」
跟住就係「保和殿」
行到呢度，發覺每一處要停留嘅時間都唔多，我就懷住一份渴望同希冀，希望可以依照原定計劃，行晒半日嘅路線。
正前方係乾清門，不過我哋唔行呢個住，行向左邊許許多多大大少少嘅宮同殿，行到最後再倒轉行返轉頭，再行右邊嘅宮同殿。
嚟到呢度，我又有返啲信心，因為其實唔係想像中咁費時~
經過「大石雕」
向左行，首先到達「軍機處」
睇完軍機處，康想去廁所，望兩望，見到洗手間嘅指示牌，就跟住去，但行嚟行去都搵唔到，康話邊行邊搵，可以睇住嘢先，咁我哋就順住行，順住搵~
再落係「養心殿」
呢張嘢真係唔知佢想點，坐又唔係瞓又唔係......@@
再嚟就係「永壽宮」
咁細個就要去選秀女......
瑾妃......正呀~ @@
妃、嬪宮分食物一覽表
一個人一日食十二斤豬肉？？？仲有其他都好誇張！！！
上面大標題有英文翻譯，下面細節嘢又冇，真係奇怪~
睇完永壽宮，大家都覺得度度差唔多，就喺大家有共識嘅情況下，決定唔行啲細嘅宮，淨係行返啲大嘅就算~
先前講過，行落唔係想像中咁費時，只係我估錯晒，主要費時嘅係啲細宮，而我先前只係行過啲大嘅，同埋唔入得嘅，梗係快啦~
既然大家都冇大興趣行落去，時間方面又唔係咁鬆動，一於略過啲細宮。但當前急務係搵廁所！
我試過問人，跟住佢講嘅方向都係搵唔到嘅，唔通個廁所曉隱形嘅?
一路行到去最後近出口位置，終於搵到廁所。個廁所咁難搵，有理冇理，有冇需要都去咗先~
個廁所保留北京公廁一貫嘅臭同污糟，好唔容易先從呢個嘔心嘅環境逃出......
廁所少，遊人多，成個廁所對開空地，擠滿晒人，天氣又凍，衣衫又多又厚，環境著實令人難受~
解決咗廁所問題，就行返去中間，再慢慢行返轉頭睇嘢睇到出口。
茄同我哋講，個講解器會叫佢行快啲，又會叫佢唔好行咁快，同埋到過同講解過嘅地方會熄燈，都幾有心思，唔錯~
逆行行到有個位有一排長椅，屎塔話不如休息吓，其實我哋大家都攰，又點會唔同意呢?
坐咗都唔係好耐，又繼續行程，就喺呢個時候，康有啲唔舒服，想去廁所~
有時真係唔舒服都冇辦法，明知係地獄都要返去，唉~
康真係慘~
我哋約定喺返離開嘅地方等，即係乾清宮。
再前啲係乾清門，反正要等人，乾清門又冇咩人有意思去望望，我就一個人走去影幅相，屎塔又想休息吓，於是我就向前行， 屎塔就向後行，順便行埋中途嘅景點，全部人喺返頭先休息果度等，茄就原地等康，同康行埋中途嘅景點，再去集合地方匯合。
我影完相就都係行埋中途嘅景點先去匯合點。
「乾清門」
「乾清宮」
「交泰殿」
「坤寧宮」
我睇完呢啲景點，就喺坤寧宮後面見到屎塔休息緊，等咗一段短時間，就見到茄康喇~
康睇嚟冇咩事，好彩咋~
大家又休息咗一陣~
繼續落嚟係「坤寧門」同「天一門」
再落係「欽安殿」(我稱之為「陰乾殿」)
「順貞門」
「神武門」
咁就行完故宮，當然只係一小部份而已~
跟住落嚟就係醫肚，原本打算搭地鐵去嘅，但係由於時間都相當緊迫，所以決定搭的士去~
好容易就等到的士，亦都唔係坐咗好耐就到目的地~
喺北京搭的士真係好平！
途中見到好多電車用嘅電纜，又令我想起二十年前......
落咗車之後就睇吓間嘢喺邊，初時以為間嘢冇開，因為牌下面間嘢係閂咗門，再仔細啲睇，原來要行過一條巷仔先到嘅~
呢間嘢叫「花家怡園」，門面都幾靚~
食就係食中菜嘅，梅艷芳都幫襯過~
店內環境優雅，我同屎塔一入到佢，異口同聲：「嘩！」
真係估唔到咁靚咁舒服，我諗終於有返間似樣啲嘅食店，唔駛好似噚晚咁......
裡面好光猛，主要係因為天花係透明頂，陽光直射入內，但又唔覺刺眼，好舒服~
入面格局井然有序，企企理理，一入到去就覺得舒服同靚~
不過冇咩點影入面......
菜牌非常精美~
隻碟都好靚~
環境清優，檯邊仲有個有蓋大竹籃，可以放啲隨身行李入去，同埋會有椅套套住啲外套，非常細心。
不過咁，一間咁注重賣相嘅飯店，侍應嘅態度可以話係差，個個木口木面，好多香港茶餐廳嘅伙記都好態度過佢哋~
但我又相信佢哋唔係刻意嘅，可能真係文化問題~
另外仲有樣好奇怪嘅事，我哋一旦開始點菜，佢哋就好似一定要一次過落晒為止咁，講咗落住咁多先，佢哋都唔會行開，仲係咁等我哋點其他菜，已經講咗唔止一次，佢都依然係咁企定定......@@
我哋點咗書有介紹嘅幾味菜~
「怡園霸王雞」
呢味菜係有故事嘅，故事如下：
梅艷芳零二年來訪時，指明要吃雞，不過白切雞太淡、口水雞又太辣，希望吃一種介乎兩者之間的菜式。為此，廚師設計出一道新菜：冰鎮三黃雞配麻辣汁，梅艷芳吃罷雞肉，還另點蔬菜、麵條等，放入剩餘汁料弄成冷麵，品評「此雞霸道」，故名「梅姐霸王雞」，成為店內招牌菜。
梅姐逝世後，菜式便改名為「怡園霸王雞」。
麻辣汁材料：辣椒、薑、蒜、蔥、辣油、麻油、豉油、芝麻醬、糖、醋、鹽
初時唔知要拌勻啲醬，面頭果浸好鬼辣，後來拌勻咗就冇咁辣，仲幾好味，啲雞都唔錯~
仲有跟埋嘅麻花都幾好食~
「花家排骨王」，可以啦，但唔係特別出色~
「鮮蝦竹笙湯」，好清，飲落好舒服~
「魚腐扒時蔬」，呢個唔錯！
「花家白菜」，呢味係加入紅椒炒嘅白菜，樣子普通但幾好食！
嚟北京一定要試片皮鴨，當地人叫烤鴨，呢度菜名叫「八爺烤鴨」
正呀！好好食！
「八爺」一字嘅來源：
老闆花雷在家排行第八，人稱八爺，由他改良的招牌菜皆以「八爺」為名。
食完賣單走人，價錢合理，唔算好貴，咁當然，於當地而言，已算係一間中上等嘅飯店啦，內裡客人嘅衣著，亦俾人一種時尚嘅感覺。
離開咗花家怡園，本來係要去鐘樓同鼓樓，不過時間實在係晏咗好多，只好取消~
其實鐘樓同鼓樓唔去都冇咩大損失，我都只係諗住去到影吓相，到此一遊咁嗟~
鐘樓、鼓樓：古人在城內報時或廣發消息，慣用撞鐘和擊鼓兩大方法。
由於時間關係，我哋要坐的士去「水立方」同「鳥巢」
坐的士途中，我發現車裡面五個人，有三個都神志不清，瞓鬼咗~
唔駛講，一定唔會係司機，既然係我發現嘅，又一定唔係我，其他三人精神上都出現咗少少問題~
我唔係唔攰，其實我都攰到死咁滯，但係我坐人車(巴士除外)好少瞓，係唔敢瞓，去旅行就更加唔可以瞓，何況四人當中，一定要有一個清醒，否則醒咗都唔知去咗邊！講到醒，非我莫屬啦~ XDDD
差唔多到(我估)，醒果個梗係要叫晒精神出現問題果幾個啦：你哋醒吓啦！
落咗車，見到鳥巢同水立方喺遠處，似乎仲要行一段路。
根據資料顯示，水立方比鳥巢早收，收 1700，1630 就停止售票，所以我哋決定去咗水立方先~
一路行我個心就一路急，因為真係遲咗好多。
行咗一陣，見到間酒店成支火炬咁
又有一排排嘅雙層巴士，唔知擺到幾時先再用得著~
行行行，行咗好耐，一心諗住到水立方入口買票，點知售票處唔喺水立方入口！
其實一路行，都有好多人手持門票兜售，$25 一張(官方正價為 $30)，但為免受騙，我哋係唔會買呢啲票嘅~
既然售票處唔喺入口，唯有繼續搵，搵搵搵，已經圍住水立方行咗差唔多一個圈，仍然未見售票處！天呀，個售票處喺邊呀~~~！
又行行行，茄康已經行快我哋五十米，我見茄康前方轉角有人群聚集，心諗一定係售票處！由於我係負責俾錢嘅，我打算行快少少，屎塔實在太攰，佢叫我行先，佢會跟上嚟。咁好啦，一眼見晒，都唔怕走散嘅~
去到轉角位，我同茄講：「你喺度等屎塔，唔好走開，我同康去前面睇吓。」
我同康走去人群處睇吓，最後發現都唔係售票處，係入口，但不售票，真係火都嚟！
其實佢又唔係冇指示，指示有兩種，一種就有個箭頭，我哋當然有跟住箭頭走，但第一個指示之後，可能要跑一次馬拉松先可以見到第二個指示。另一種呢，就話售票處在西北方，真係唔該晒！本地人可能知西北方喺邊，遊客知個屁麼！
問人咩，個個答法都一樣：往前走
我哋唔係冇跟呀，問題係往前走都係搵唔到售票處呢！
我同康繼續行，行到一處，唔知點解，我好似知道前兩條街就係咁，但其實前兩條街係離開咗水立方嘅，唔理咁多，過去睇睇~
過咗兩條街轉左，見到好多矮鐵欄，十足十排隊咁嘅位置，我同康再行前睇睇，原來真係售票處！
但係，我哋見到啲人買完票就直接向前走，如果買完票一定要向前行，我哋當然唔可以即刻買啦，我哋要匯合咗屎塔同茄先。
我同康返轉頭去返個轉角位打算同佢哋匯合，但行到去唔見佢哋！唉，點解會咁咖，咪叫你唔好走開囉......
我同康就唯有周圍搵，跟住就分頭搵，約返喺轉角位等。搵咗一陣都仲係搵唔到，我同康估佢兩個可能諗住上前搵我哋，於是我哋又上前去睇見唔見到佢哋。
結果去到售票處都唔見佢哋，我決定打俾茄，響咗一次冇人聽，再打就已經打唔通，再打，再打，再打都係唔通！唔通唔通唔通，真係急死人！你兩條粉腸去咗邊呀~~~~~~
由於我講過俾大家知今晚會去邊度食飯，所以我更加唔知，如果真係搵唔返，今晚去邊度匯合會好，去食飯果度好，還是返酒店好呢？因為我只係講過一次，佢哋唔一定記得喺邊度食，記都都未必知點去......
呢刻真係好徬徨，點算好點算好！雖然始終會滙合到，但點都唔想到呢日嘅終結先一齊返，嘥咗半日~
我哋又由售票處慢慢咁行返去個轉角位，今次用雙眼配合極緩慢嘅步伐精密咁掃瞄一次，唉，都係搵唔到！
正當我哋都想放棄嘅時候，果兩條粉腸出現喇！我即刻車巴阿茄，問佢帶咗屎塔去咗邊！(此動作純粹虛構，切勿模仿！)
我壓制住我嘅怒火，好溫柔咁話：「我咪叫咗你唔好走開嘅，你去咗邊呢？」
原來茄聽到我話：「你喺度等屎塔，跟住去前面搵我哋。」( 大意係咁上下)
言語上嘅誤會，又唔怪得茄，可能係我講得衰呢，不過誰是誰非都好，得啖笑，我哋彼此都唔會怪對方嘅~
屎塔中途試過打俾我，不過都係打唔通，真係奇怪，長途都係麻鬼煩~
(屎塔本來冇開電話嘅，所以我都冇諗過打俾佢)
原來我哋搵緊佢哋嘅時候，佢哋喺對面馬路見到我同康，仲大叫過我哋，只係我哋聽唔到~
話時話，我哋一路向前行都未過過對面馬路，亦冇任何理由促使佢哋要過對面馬路，點解佢哋會過咗對面馬路呢？呢點真係耐人尋味，不過我冇打算追問，反正一啲都唔重要，眼前最重要嘅係，買票入場！
我哋向前急步疾走，嚟到售票處嘅側面，見到有人將鐵欄移動，心知不妙......
不幸被我估中，停止售票了，望一望手提電話時間，1601，就只係遲咗一分鐘，係一分鐘咋！咦，咪住，根據資料，停止售票時間係 1630 喎！唉，梗係又係資料唔夠 update 啦！
之前有個朋友托我幫佢買啲嘢，只有水立方入面先有得賣，我仲拍晒心口話我會入去，可以幫佢買，而家冇啦！好彩我個朋友明白事理嘅，絕對唔會怪我，不過心理上梗係想幫到佢啦~
入唔到水立方，對我嚟講，冇咩損失，因為我本身就唔諗入嘅，係茄想入，所以我先安排入，我諗茄有少少失望，不過都冇辦法啦，一如政府官員咁，冇人需要負上責任，一係就集體負責~ XDDD
就喺售票處門口，見到有人兜售水立方門票，而家要 $50 一張！真係識做生意~
其實我哋都有啲心郁，我哋猶疑嘅，已經唔再係門票嘅真偽，係時間同票價~
1630 就閂門，而家係 1602，得幾個字，但就要花上二百大元，我問茄，係咪真係好想入，如果係嘅，我會陪你入，一場嚟到，唔緊要~
我又話，如果嫌太貴，你一個入去參觀吓，影啲相嚟睇吓，我哋喺出面等你~
茄最後決定係唔入，好，冇問題~
我哋唯有轉移到下一個景點：鳥巢
行去鳥巢嘅途中，我哋四個，都用盡生平可能嘅粗言，去炮轟售票處嘅選址同指示不足，其實我哋係憤怒多於失望！
我同茄講：「最衰都係你，唔係你，我哋都唔會踏上奶嘢之旅，食又冇啖好食！」
在場嘅人都唔會懷疑我呢句說話嘅認真性，有人話，上機前已經踏上咗奶嘢之旅，亦有人話買 package 果時已經奶嘢，更甚嘅，話上 yahoo 睇嘢已經衰咗，無論點都好，繼續行啦~
我又戲言，鳥巢嘅售票處，又唔知喺邊度，又要行幾多冤枉路，更可能要搭船過對面海先買到票~
去到鳥巢附近，我哋唔搵喇，問人啦！
搵咗一個似係工作人員嘅人問，但係我哋聽唔明佢講咩，聽多幾次，原來佢話喺 H 果邊~
但確，附近係有啲有蓋地方有英文字母嘅，我眼見前面有 A 有 B，心諗，今次都應該好易搵，順住落好快到 H！
依照佢所指嘅方向行，一路搵 H，但 AB 過後，又係 A，跟住就係 M，咁 H 呢？
不過今次好彩少少，但唔係因為搵到 H，而係未見 H 已經見到售票處！
咁，H 究竟係咩呢？@@
唉，唔理咁多，嗱嗱聲走去買票先~
呢個售票處都神秘過人，有兩條路落，就好似香港啲行人隧道咁~
$50 一個人，唔知有咩睇呢？一樣啦，我個人就唔係話一定要入去睇嘅，茄話想入，咁就梗係一齊啦，我都冇咩所謂，一齊入開心啲~
近睇嘅鳥巢，真係唔覺得有咩咁靚，遠睇都幾特別嘅~
好嘞，入場喇，係人手收票嘅~
入到去，首先要上電梯，上到去已經係看臺嘅中層位置， 跟住我哋就去探吓個洗手間~
呢個洗手間都算幾乾淨，而且仲好大添~
之後，大家就坐咗喺看臺啲凳度休息~
休息嘅時候，傾起後日會分開玩，所以我哋就試吓啲通訊設備：SMS
我 send 俾茄，佢收唔到，佢 send 俾我，我又收唔到，咁就弊啦！
試吓用屎塔部機，好彩，大家互相都收到，咁都 OK~
不過，我話晒都一卡雙號，有咩理由唔得吖！哼！
由平台望出去，老實講，唔覺有咩特別，入場睇，只係滿足一下到此一遊~
不過話分兩頭，一個運動場，你又想有幾特別呢？
休息完之後，就落去周圍行吓~
場中間有兩隻吹氣福娃，當然會成為大家嘅影相目標，不過有樣嘢我就唔係好明，個場咁大，點解唔放齊五隻呢?
要知道，你又影我又影，大家都唔想相中有其他路人甲乙丙，但得兩隻，你想冇其他人都難啦~
除咗吹氣公仔，仲有由人扮成嘅福娃，不過呢五隻由人扮成嘅福娃，喺我哋動身落去時，閃咗......@@
行到落去，茄指住個出場位好興奮咁話：喂，落去果度扮出場吖~
見佢咁興奮，費事推佢啦~ XDDD
於是我哋就落去揮手扮出場......
真係好有趣呀~ @@!!!
繼續行，見到跑道上有啲保護膠舖咗上跑道面，不過有好多都移咗位~
劉翔踏過嘅，我哋都踏過！
跟住就同果兩個吹氣福娃影吓相，周圍行吓咁~
見到某方座位上有一排福娃公仔，齊晒五隻，循例都要吓相啦~
上上吓見到原來有兩排福娃公仔，一排喺中座位，一排喺平台頂座位~
較低果排勁多人影，一影完就有人埋位，一影完就有人埋位， 好難先霸到位影相~
較高果排就冇咩人，點解呢~
因為果排冇陽光照到(其實天色都開始變暗)，平台上亦冇乜燈光，梗係冇咩人影啦~
好喇，要行嘅都行晒，其實一入到去已經行晒~ XDDD
睇埋精品店就走人~
精品分兩邊，一邊只有扣針式嘅精品~
一邊就乜都有，我見到其中一個幾別緻嘅，買就唔會喇，影低佢就會~
睇咗都有一段時間，反正跟住嘅行程非常鬆動，慢慢嚟都得~
睇完就走人，見到門口又有人賣精品，但係呢啲人，好明顯唔係官方人......
竟然喺精品店門口賣老翻(我認定咗係老翻)，仲大模斯樣咁擺檔，點解會冇人理......@@
我真係有啲意外，雖然喺中國都冇咩唔可以發生，但話晒鳥巢都係極受國民重視嘅地方，亦係國家邁向世界嘅一個里程碑(奧運場館)，咁都唔好好管理，著實令人費解~
離開咗平台，落到地面，我哋都好想搵個人揸機，一齊影幅合照，不過我哋唔敢隨便搵一個路人甲幫手，搜尋咗好耐，見到有兩個人蹲下不停咁調教部相機，佢哋都教咗好耐吓，我哋覺得佢哋係香港人，於是膽粗粗咁走埋去示意，想搵佢哋幫手揸機影相~
結果，佢哋真係香港人嚟，搞部相機搞咁耐，都係想影到島巢一邊嘅全景，真係好心機！
影完睇相，影得唔錯，喺咁暗、冇腳架嘅情況底下、仲要 hold 住部機咁耐(因要曝光)，影出嚟都算清，真係好嘢！
我哋當然連聲道謝先離開啦~
佢仲問我哋係唔係自己嚟玩，原來佢哋都係自己嚟玩嘅~
穿過出口，先發覺外面氣溫好低，又好大風，但係我哋梗係要影吓夜晚水立方同鳥巢先肯走啦~
其實喺遠處都仲有一楝嘢，我就唔知果楝係咩，只係知道奧運至而家只有短短半年時間，就已經有一格壞咗......
影完相，係時候去食晚飯，今次我哋會搭地鐵去~
今次搭地鐵要轉兩次車，即係三程地鐵~
離開時，都只係依照直覺，估到地鐵站喺邊個方向，其實係唔會錯嘅，多數人都行果邊，再加上我睇過地圖，所以好有信心~
不過真係又凍又大風，感覺已經行咗好遠好遠，但係都未見地鐵站，亦冇見過任何指示，見到有啲工作人員，又走去問吓，答案係：往前走
我對呢個答案已經麻木，但都只好信佢~
一路行一路行，真係行咗好遠，有人提議不如搭的士，不過照現場情況，你係想搵部的士都難，大家都打消咗呢個念頭~
好明顯，有人計劃得唔夠好，先會令到大家咁辛苦......
唉，當汲取經驗啦~
繼續行，又行咗一段路，終於見到似係地鐵站嘅物體，但大家都仲未好肯定，因為環境好暗，而且前方係向下斜嘅，所以唔係睇得好清楚~
好快，我哋就肯定到果度就係地鐵站，我哋終於都到喇！呢次長征，絕對係喺我計劃之外......
地鐵嘅奧運線非常新淨，仲有種好現代嘅感覺~
我哋要搭三程地鐵先可以到食飯嘅地方，分別係：
奧運線：奧林匹克中心 → 北土城
地鐵 10 號線：北土城 → 惠新西街南口
地鐵 5 號線：惠新西街南口 → 北新橋
順順利利就到咗北新橋站，不過出口方面就同睇地圖嘅有少少出入，唔理咁多，斷估冇痛苦！
憑直覺，我信有出路(年輕嘅朋友未必知呢句嘢嘅出處~=P)
認定咗一個似係正確嘅出口，出到去竟然係條巷仔！
不過站啱的話，我諗要行都唔會話行好遠卦......
我哋行返出大街先，諗住再問吓人~
由於今晚食嘢嘅地方同今日晏晝嘅花家怡園係同一條街，同埋只係隔幾個舖位，於是我就直接問人花家怡園點去，因為我相信兩間嘢相比，花家怡園會出名好多~
我哋行行吓，見到有一對情侶，於是我就拎住我自己嘅 notes，好唐突咁開聲問佢哋~
個女仔俾我嚇到成個跳起咁滯，我連忙說：bu 姣依斯 同 堆 bu 遲
佢就回應返我：味斯味斯
咁我就拎張 notes 俾佢哋睇，指住花家怡園，再問佢哋點去，個男仔就完全唔知，個女仔就好似知道，佢諗咗一陣，就話咗個方向俾我哋知~
不過溝通上出現咗一個極小嘅問題，我哋講嘅「轉右」，佢哋會講「 右拐」，第一次唔係好明，佢講咗三次，我哋終於明佢講咩~ XDDD
我哋「射射」完佢哋一輪就向住佢講嘅方向行，行咗一陣就見到似層相識嘅環境，就係花家怡園附近嘅環境~
行到花家怡園門口，再行落去就到我哋今晚食飯嘅地方「小青島」
小青島係食海鮮嘅地方，本書有介紹，又話平又話正，咁就試吓啦~
不過，由於北京遠離海邊，我對北京嘅海鮮，唔會抱有太大嘅期望~
入到去，以北京嘅地方嚟講，算係幾整潔，服務態度算幾好，甚至比花家怡園都要好~
入面燈光比較昏黃，好普通嘅圓檯，一張一張咁填滿整個空間，冇咩特別~
一坐低，引起我注意嘅係臺面嘅食具，有啲膠包住，上面寫住已消毒~
看似好衞生，不過，我係唔會信嘅......
諗咗好耐，叫咗以下幾樣：
「豉沖蒸扇貝」，肉質可以，但味道一般，而且仲有沙~
「辣炒蟶子」，肉質可以，但味道一般，而且仲有沙~
「清炒西蘭花」，冇乜特別，唔會唔好食~
「蒜蓉油墨菜」，我一向唔多鍾意食油墨菜嘅，但係呢碟嘢真係好得！好食！
「魚肚蛋花羹」，呢個羹就真係麻麻地，不過又未到唔好食嘅~
「椒鹽魷魚鬚」，非常惹味！幾好食！不過佢整得好辣~
「薑葱蒸青斑」，正！好食！
一間專門提供海鮮嘅食店，竟然最唔得嘅係海鮮！係咁蹺今日個廚有啲心事，還是大家口味唔同呢？
海鮮就只有條魚好食，著實令人失望，好彩價錢合理，否則真係影響晒旅遊嘅心情~
食完嘢，離開前就去個洗手間先，由於店內不設洗手間，要到店外隔離嘅公廁，但我相信公廁內非常污糟，並且唔會好寬闊，如果著住件咁肥大嘅褸去，著實令我擔心，但外面又好凍，仲好大風，唔理喇，死就死啦，我同屎塔一鼓作氣咁衝出去，好彩公廁就正正喺隔離，嗱嗱聲搞掂就返返入去~
一如我所料，勁臭勁污糟勁難受！真係聞一聞，寧舍醒神；索一索， 舒筋活絡！@@
下一站係去「什剎海」行吓，睇地圖，係可以用合理嘅時間行過去嘅，但佢哋(其餘三位團友)就有啲懷疑，怕行得太遠，想話搭的士過去， 最後我哋就問吓啲職員~
初頭幾個都唔知什剎海喺邊，最後問到一個，佢話都幾遠，我就梗係主觀同盲目地覺得冇理由，純粹因為想捍衛自己所計劃嘅一切，但我就冇太過堅持，原因係佢哋講嘅嘢都不無道理~
最後當然係搭的士啦，上咗的士開咗車，我好希望好快就到，但事實話俾我知，如果我堅持行過去，北京會出現四隻僵屍！
佢哋首先就呢件事開腔，話好彩搭的士，大家係好朋友，絕對唔係俾說話我聽，只係純講出心底說話，但聽進我耳，當然不是味兒，呢啲就正正係言者無心，聽者有意......
我情不自控咁講咗一句悔氣話，半秒內，車廂內只剩下車外傳入車廂嘅聲音，跟住，就係大家安慰我嘅說話，我知道佢哋唔會怪我，但我就有點自責，事實就係事實，無論你事前做咗幾多功夫，事實係唔 work 就係唔 work，冇理由要盲目咁跟住去做，只係我自己有點不忿，明明做足功課，明明睇完旅遊書嘅地圖再上 Google 地圖，只係數百米，明明唔係太遠，明明......
唉，接受現實啦，其實換個角度，係佢哋救返我~
其實個的士司機都唔知喺邊度落俾我哋，求其去到附近就算，都係嘅，就好似喺香港咁，上咗的士話要去旺角，又講唔去旺角邊度，咪求其喺旺角放低你囉~
落車地點正正係「煙袋斜街」，係我計劃好要行嘅地方之一， 咁好自然，就由呢條街開始~
呢條街好暗，好少人行，不過賣嘅嘢比較時尚，同時有啲藝術性嘅產品，講吸引力，絕對吸引到遊人逐家逐戶去搜索。
買滿 $80 蚊，就可以抽獎一次，其實有咩抽我都唔知，不過是但啦，抽就抽~
結果俾我抽中嘅嘢，令大家都有點興奮，興奮嘅，並非單純獎品本身，係同我買咗果件 T-shirt 有絕對嘅關係~
我買咗果件 T-shirt，有一個好大嘅 8 字，8 字以粗線條構成，線條內盡是中式嘅花紋，而我抽中嘅，係一隻水杯，水杯嘅圖案，同 T-shirt 上嘅圖案係一樣嘅！
初時以為抽到隻杯好開心，點知，隻杯嘅用料同款式，正正係兒時返鄉下所用嘅漱口杯，只不過換上咗呢個 8 字作圖案而已，觀感還是不令人感到興趣~
繼續行，去到一間專賣皮具嘅店舖，喺當地係有一定名氣嘅，名叫「 食草堂」。
茄同康左揀右揀，最後都買咗同一款同一色嘅銀包，送俾自己嘅媽媽。
買完銀包出咗間舖頭，見到有兩個男人企埋一邊食煙，令到身上冇火機又想食煙嘅茄有所行動，上前借火。
呢條街其實好短，去到街尾，抹一個彎角，另有一番天地！
彎角後嘅前方，係一條橋，橋身短而闊，帶點微拱，橋後可左可右， 附近滿是酒吧酒廊，有的細小只有百多平方尺，有的高兩層，有的在店外放置喇叭同影像，各式其式~
歌者所唱嘅，有啲耳熟能詳，都係一啲為人熟悉嘅台灣歌曲，有啲聽都未聽過，好多都係自彈自唱，不過有一點可以肯定嘅係，歌者嘅聲底同歌唱技巧絕對不會令人覺得係噪音，因為大都有一定水準，是音樂，不是噪音；是動聽，不是吵耳~
我原先定下入一間叫「后海5號」嘅酒吧，可能大家都有點累，想入酒吧嘅意慾都唔係太大。而我，同大家都一樣，睇吓見唔見到間吧，見到就入，見唔到就算~
咁多間吧，點解揀呢間？書裡講嘅呢間算係比較舒服嘅一間，係請人返嚟自彈自唱，唔會太嘈~
最後都係搵唔到(根本就唔係搵，係求其望吓)，一直行落去就算~
什剎海，係一個地方名，亦係一個湖嘅名，一個好細嘅湖(其實我都唔知可唔可以用湖嚟形容)，湖水喺冬天係會結冰嘅，我哋今晚就見到湖面上放咗好多冰上單車同冰上座椅，亦都有人喺冰上面玩緊冰上單車同滑冰，不過我覺得都幾危險，又黑又好似冇咩管理人員咁，出咗事都未必有人知~
一直行到落街尾就完成咗今日嘅旅程，大家都好攰，所以選擇搭的士返酒店。
喺的士上面先醒起，我哋唔記得買杯麵作為明早早餐......
每日點滴：
今日竟然因為遲起身而錯過一個景點，真係......唉~
天安門俾我最大嘅感覺，始終都係二十年前嘅子彈痕跡~
北京的士真係好平，我哋四個人搭，每程每人都係幾蚊，正！
花家怡園嘅烤鴨真係好好食！
兩大奧運場館嘅售票處，真係唔可以指示得好啲咩?
北京人嘅說話語氣，同香港人真係好唔同，我相信佢哋又唔係刻意嘅，只係文化差異嗟~
沒有留言:
發佈留言