而喺旅程當中，多數交通工具都可以以 Kansai Thru Pass 作為交通費，不在範圍內的交通工具，才會在文中記述需要購票~
今日行程：
関西空港買嵯峨野火車票 → 酒店 → 比叡山 → 八幡堀 → 大津港 → 道頓堀
今日車程：19 程
由於搭凌晨機嘅關係，20/11 晚已經到咗機場~
我哋班機係 21/11 0135 香港 → 日本関西，我哋 20/11 2300 已經到機場泊好車，可見我哋嘅興奮同期待是如何之甚~
今次搭國泰，可以出發前喺網上做預約登機，我哋當然都有咁做，亦有告知櫃檯嘅職員，但職員檢查資料後告知我哋冇做到，我諗可能係我哋有啲嘢整錯咗啦，不過我哋咁早嚟到，而家先做登機其實都冇問題~
不過奇就奇在佢知我哋揀咗咩位，我問佢電腦顯示我哋冇做預約登機，點解又會知我哋揀咩位？職員有認真解釋咖，不過我就唔係好明，是旦啦，無謂阻住後面，扮明聽過就算~
按照慣例，我哋入閘前都會食啲嘢先，但而家已經好夜，我哋二人 share 一個飯就算~
今次揀咗美心~
食完嘢冇咩做，好早就去到閘口，有幾張半躺臥長櫈，我同屎塔一人一張瞓低休息，反正仲有成個幾鐘~
距離我哋大約六至八米，有一班中年女仕，non-stop 咁高談闊論，嘈個不停！
我眼見所及嘅地方，就只有佢哋咁大聲講嘢，成個區域就只有佢哋嘅聲音，唔知點解佢哋可以完全沉醉喺佢哋嘅交談當中，而完全忽略對其他人嘅影響~
屎塔一向都係瞓得之人，我就啱啱相反，睡眠質素唔算太好，又醒瞓，事後屎塔都話俾佢哋嘈到唔係好瞓得到，我就更加唔駛講，醒住瞓！
幾經辛苦，終於等到上機，今次坐飛機同以往唔同，我哋要盡量爭取休息，其實係睡眠，因為到埗後就會開始我哋嘅旅程，冇休息嘅時間~
我呢，經常瞓得唔好，我好清楚自己徹夜難眠後嘅狀態唔會太差；一向好瞓又好(嗜好個好)睡嘅屎塔，唔知會唔會頂唔順呢？不過唔怕啦，一向去旅行搭車佢就瞓，我就負責叫醒佢，佢都可以爭取到休息時間嘅，反正佢天生麗質，相信捱一晚夜都依然美麗~ =P
我哋一上機就瞓，瞓到食飛機餐先起身~
食完嘢又再瞓過，瞓到差唔多到埗先起身~
其實我邊有瞓過吖，極其量只係合上眼，根本就冇瞓過；屎塔就話佢有瞓，不過瞓得好辛苦，瞓吓醒吓咁，其實喺飛機經濟位瞓得到都算係咁~
0600 就落機，凌晨機都幾受歡迎，去到入境閘口已經有唔少人，後來嘅亦唔少，搞掂晒攞埋行李出到入境大堂都只係 1830，呢一刻真係有一種好奇妙嘅感覺，我真係唔敢相信我已經喺日本，我問屎塔，我而家係咪已經喺日本~ XDDD
我去旅行通常都會戴 con，不過今日就唔可以戴，成晚冇瞓過，戴 con 肯定勁辛苦~
我嚟到日本第一樣要做嘅係買火車飛，而関西機場嘅 Kansai Tourist Information Center 0700 先開門，仲要等成半個鐘......
Center 門口有個人喺度，我感覺佢係排緊隊，所以我跟住佢企~
由於我要趕 0715 嘅車到市區，所以心情有啲緊張，我排第二，買埋飛趕唔趕到車呢？
我要買嘅飛係京都嵯峨野嘅小火車飛，由於一定要喺日本先買到，亦由於係楓葉旺季，小火車飛極為搶手，我可以做到嘅就係一到日本境內就買飛，買唔到都冇計~
我排緊隊時，屎塔走去買咗罐嘢飲，感覺好日本~
佢哋好準時，0700 就開閘，排第一果個係買 Kansai Thru Pass 嘅，又要填 form 又要出示身份証明，好彩我喺香港買咗，如果唔係搞完佢又到我哋，分分鐘趕唔切 0715 班車~
好快就輪到我哋，我已經準備好晒要買票嘅漢字同日文，遞俾佢再用英文說明來意~
┌ ┐
嵯峨野小火車
25/11 10:07
トロッコ嵯峨発 → トロッコ亀岡行き
└ ┘
點知個職員面有難色，用雙手打交叉，用英語告知要 0900 等隔離個 counter 開先有得賣，佢仲下意識咁有微微鞠躬同講 sorry~
真係始料不及！
咁點算？咁點算呀？咁咪買唔到小火車飛？咁點算呀？
不過以我所知，所有 JR 綠色窗口都可以買到，但最衰嘅係，我要到下午先有機會去到其中一個 JR 站！唯有聽天由命啦~
真係好失望，屎塔唔單止想坐小火車，仲想回程時搭船泛舟保津川，搭唔到小火車就連泛舟都可能做唔到~ >_<
我仲以為自己安排得天衣無縫、完美無暇、十拿九穩！ >_<
不過而家都冇咩計，收拾心情，起碼要趕到班車先~
而家我哋去酒店 check-in 同放底行李先~
関西空港 → 酒店
南海電鉄： 関西空港 →→→ 難波
大阪地鉄： 難波 →→→ 心齋橋
今次唔駛問人都知點去搭車，因為上次去北海道時係經大阪去嘅，個環境我仲記得，反而屎塔就唔多記得~
上一層，過條天橋就到南海電鉄嘅車站~
喺天橋望出去，我哋首次見到楓葉~
上次嚟日本，做嘅功課唔夠好，唔係咁趕都搭特急，嘥晒啲錢，今次就唔同，搭急行，用 pass 唔駛再補特急附加費，感覺上係免費！正！
上次由機場搭去市區趕到爆廠，又未嚟過，問人先知兩邊月台邊邊先啱，今次就唔同，起碼有五分鐘周圍影吓相睇吓個站，先知道一落電梯就可以睇到非常清晰嘅指示~
呢架車同上次架車比，上次架特急車型好多~
屎塔初時都好鬼精神，坐坐吓就開始釣魚，跟住就梗係瞓咗啦，而我呢，責任重大，雖然成晚冇乜點瞓過，再唔係細路仔咁一晚冇瞓都冇乜嘢，但又未到好辛苦嘅，精神都仲可以~
喺難波落咗車要行去地鉄站，途中見到有個南海電鉄職員企咗喺柱度，佢似係站崗式咁，等顧客有問題時可以幫到手~
其實我深知除咗指定旅遊中心，就只有 JR 可出售嵯峨野小火車飛，呢項係一項極其重大嘅任務，我唔會錯過任何一個機會~
我走埋去問佢，結果如我所料，佢都係教我去 JR 買......
唔緊要，有志者事竟成！
由南海電鉄站行去地鉄站，指示非常清楚，完全唔需要問人，呢樣絕對係日本其中一處可愛嘅地方~
好輕易就搵到地鉄站，搭一個站就到心齋橋~
酒店距心齋橋約十分鐘路程，拎住咁重嘅行李喺條街行都幾係嘢，尤其入咗心齋橋筋入面，行李轆同地面磨擦嘅聲音實在太擾人，真係好唔好意思，但又實在冇辦法~
酒店附近嘅街道，全部都係井字形咁嘅，有好有唔好~
如果數街數得冇錯，一定搵到目的地，但如果數錯，你想認得邊條街打邊條街就絕對唔係一個第一次到來嘅遊客可以認得到~
我哋就冇數錯街，順順利利就搵到間酒店~
接待處喺二樓，地面位置俾間餐廳佔去大半位置，剩下嘅就只有搭 lift 嘅位置~
上到二樓，拎晒啲相關文件出嚟，個中年男人睇完又睇，查完又查，都話冇我哋嘅資料~
個男人禮貌方面絕無問題，一貫日本人嘅誠懇，但溝通方面就有大問題~
雙方用英語交談，但實際上唔太溝通得到，佢問咗一個問題，問咗幾次我哋先知佢問咩，佢問屎塔嘅片假名係咩，其實我哋上網 book 房時有俾片假名佢，我亦記得有印出嚟，不過喺呢刻就係搵唔返張嘢，我諗我帶漏咗啦，真係失策~
擾攘咗一陣，我醒起我可以用佢哋部電腦(供客人任用的)，上返個 web mail 睇返個片假名咪得囉，我已經提起腳想步行過去部電腦度，佢突然講咗屎塔個名出嚟，當然，佢嘅口音，只有我同屎塔先知佢講緊嘅係屎塔嘅中文名發音，我哋立時點頭點到甩咁滯，終於搞掂！
今次係我疏忽啦，好彩唔係咩咁大件事，最緊要係我明白事理嘅未婚妻一句都冇怪責過我~ =P
哼！佢敢？今次行程我一手包辦，啲功課喺晒我度，佢唔聽晒我話，我自己去玩，呵呵~
搞好手續，我就開始問佢嵯峨野小火車飛嘅事情，我問佢最近邊度可以買到呢種飛，佢遲疑咗都好一陣，開始盡佢嘅能力去解答~
不過方向錯晒，佢係教緊我哋去嵯峨野，而唔係教我哋去買飛...... ~_~!!!
但其實我哋都好多謝佢嘅努力，我哋 OK Thank You OK Thank You 咁扮明白，無謂嘥時間仍唔想白費佢嘅心機~
由於我哋以價錢為重點，真係唔會期待間酒店會有幾靚幾好，世事就係咁，你預佢差，佢就差極都有個譜，間酒店比我哋想像中好得多，係地點爭啲姐~
由於溝通上用得太多時間，而家時間比我計劃中遲咗，不過唔緊要，唔係咩大問題，總之放低晒嘢就即刻出發~
今次旅程要拎嘅嘢比過往都多，以前拎隨身物品都會拎到好攰，但二人輪流拎都叫做有得休息吓，但今次屎塔自己要拎部相機，都唔輕咖，而我呢，除咗拎隨身物品仲要孭住個相機腳架成日，下世投胎做女人~ @@
第一站係「比叡山」
酒店 → 比叡山
大阪地鉄： 筋堺本町 →→→ 北浜
京阪電車： 北浜 →→→ 出町柳
叡山電車： 出町柳 →→→ 八瀬比叡山口
叡山纜車： 八瀬 →→→ 比叡山口
空中纜車： 比叡山口 →→→ 比叡山頂
決定上比叡山，係經過好多嘅考慮~
上比叡山，要花好多時間喺交通上，研究上山方法亦相當費時，做功課時真係有啲想逃避嘅感覺，但逃避嘅同時，亦想挑戰一下自己~
事實係，要逃避，可以有一百個藉口，要上去，亦可以有一百個理由，我努力屏棄一啲無謂嘅藉口，只係諗，係咪值得去，時間上係咪安排到，有冇其他地方更值得去~
決定咗上去，係因為想從高處望吓個琵琶湖，亦想親身進入紅橙黃綠嘅自然境界~
除咗呢兩個目的，亦因為比叡山上有一座世界文化遺產「延曆寺」
上山嘅途徑分咁多段，其實都係一種樂趣，亦係一種挑戰~
我哋開始行去地鉄筋堺本町站，四圍嘅環境真係好日本(咁梗係啦)，好輕易就搵到地鉄站~
仔細睇吓路線圖，跟返站內指示，完全唔需要問人，所有指示都係咁清楚~
去到北浜站，要出閘再轉到京阪電車再入閘，睇返我上網所查嘅資料，同現場班次吻合，清楚知道要搭邊班車同大約幾時到~
上咗車之後，冇位坐不特止，就連企嘅位都爭啲冇，同香港返工時嘅情況相約~
呢程車都要搭成個鐘，本來企吓冇所謂，但今日嘅狀態有得坐梗係最好啦，而家連企都冇得企咁滯，仲因為太多人嘅關係，連企都唔可以企得好啲，真係勁辛苦~
我頂得住呀，難為咗屎塔，企喺度釣魚。企喺度釣魚會有咩事發生，唔駛多形容啦~ XDDD
其實咁多人，我真係好擔心成車人都係上比叡山嘅，今日係星期日，係都唔出奇呀~ @@
我企咗大半個鐘冇郁過，因為一郁就會掂到前面個女仔，我唔想被誤會為癡漢......
屎塔就全程企住釣，真係好慘呀~ >_<
好彩，到咗三条站(京都市中心)，勁多人落車，成車起碼冇咗三份二人，屎塔終於有位坐，我擔心人多嘅事情亦只係杞人憂天~
其實坐多兩個站就要轉車，但我哋都唔會放過有幾分鐘嘅舒適~
跟住就轉車到叡山電車，叡山電車係喺地面行駛嘅，咁就冇咁悶，仲首次見到唔同顏色嘅楓葉，不過感覺唔深，因為我哋只係喺車內，感覺唔係好真實~
上咗電車，搭咗幾個站，我開始疑惑，係咪要攞整理劵呢？定要入一入張 pass 呢？我哋係用 pass 嘅，遲咗幾個站先入票，冇咩問題，因為用張 pass 已經唔需要計分段收費~
我怕落車時先入張 pass 會有問題，唔理咁多，走去上車位置入一入張 pass，落車再入，我諗咁樣先係正確嘅程序~
出咗叡山電車站，真正可以近距離接觸到唔同顏色嘅楓葉，好得意~
逗留喺度影咗一陣相就繼續向叡山纜車站進發~
到咗車站，見到有張 poster 講明 pass 不適用，咁我就走埋去買車票~
單憑佢有限嘅漢字，其實都好清楚知道點買法，上山頂要搭兩程車，可買一程或兩程，同時可以買埋來回程咁多個組合~
不過我哋回程唔係喺呢邊落山，所以只係買咗上到山頂嘅兩程車票~
第一程車係叡山纜車~
車內兩旁有對坐嘅凳，但腳部空間非常少，坐對面嘅係一對年長嘅日本夫婦(我估)，四條友八隻腳試咗一百種方法，八個膝蓋都彼此磨擦過，先勉強搵到一個較為好嘅位置~
企位設計成一啲比較闊大嘅梯級，上山斜度幾大都唔會企得好辛苦~
上到中段，唔同顏色嘅楓葉又大棵又開始密，大家都有少少類似驚呼嘅聲音(廣東話就叫嘩嘩聲)，但唔知日本人係咪比較低調，音調低且短促，似要將心中驚嘆壓至最少，以免失禮~
搭完呢一程，就要步行一小段路到空中纜車，去到站前，向外望去，見到座山啲色好似畫油畫咁一筆一筆咁點落去~
望吓望吓，見到有個人為做成嘅圈，上面寫住「厄除」，再見到有人向個圈掉嘢，掉出去嘅嘢可以喺站內買得到~
令我感到好奇嘅，唔係呢種求心安嘅行為，而係掉出去果舊嘢(唔知點形容，暫稱為嘢 XDDD)，係要俾錢買嘅，但又冇人看守，完全講求自律~
空中纜車(吊車)上的風光~
落咗車，正式到達山頂，就喺個站內見到上一層係觀景台，冇理由唔走上去睇吓咖~
嘩，呢個觀景台夠晒特別，係特別流呀！
作為一個觀景台，最起碼視野要夠清晰，但我哋上到嚟，只見環繞住嘅所有玻璃都係朦嘅，望出去嘅觀景亦不比吊車上望到嘅出色，怪不得成個觀景台就只有兩個笨蛋~
出咗站，見到有指示牌指示去「延曆寺」嘅方向，但條路望落比較僻靜，而且要成 30 分鐘，我哋上嚟比叡山，醉翁之意不在寺，亦唔想花啲咁嘅時間為去而去，作罷~
一直向前行，見到有間食店，啱晒！我哋由半夜食過飛機餐之後到而家都未食過嘢~
好肚餓又唔係，但亟希望有嘢落肚，呢間嘢亦只係賣小食，我哋就買咗兩串腸仔同一杯雪糕，不過勁貴呀，我哋都明白嘅，日本指數加兌換率加旅遊區，點可能唔貴吖~
呢度對開係一個停車場，亦係巴士站，我走埋去睇吓啲巴士路線同班次，再決定下一步要點做~
本來如果步行去延曆寺的話，係唔需要再搭巴士離開嘅，但我哋冇去到，就要睇吓點樣離開~
停車場兩旁都有風景，一邊係山區，同搭吊車上嚟時嘅景觀係一樣嘅~
另一邊就唔同囉，另一邊就係琵琶湖喇！不過就隔住好濃嘅煙霞，同埋只係見到少少，好過冇~ XDDD
上嚟都逗留咗好一陣子，係時候向下一站進發~
下一站係近江八幡嘅「八幡堀」
比叡山 → 八幡堀
比叡山頂巴士： 比叡山頂 →→→ 東塔
坂 本 纜 車 ： 延曆寺 →→→ 坂本
京 阪 電 車 ： 坂本 →→→ 京阪石山
Ｊ Ｒ 鉄 道 ： 石山 →→→ 近江八幡
八 幡 巴 士 ： 近江八幡 →→→ 大杉町
近江八幡係琵琶湖周邊嘅城市，係一個水鄉城市，所以吸引咗我嚟~
我哋上咗巴士坐低，大約十分鐘到就到東塔~
落咗車後有啲迷茫，完全唔知點行，望吓望吓，見到有指示指向坂本纜車~
而家係 1229，1230 有車，而指示講步行需時七分鐘，咁肯定趕唔切啦~
30 分鐘一班車，咁我哋散步式咁行都冇問題~
行到中段，我哋見到延曆寺入口，反正有時間，行過去望兩眼~
去到入口處，見到有人龍排隊買飛，我哋就打算行到去收飛嘅地方就折返，但行咗兩步，售票員就用日文同我哋講嘢，唔需要翻譯都知佢話要買飛先可以入啦，即時走人，其實真係有啲唔好意思~
一路行到去坂本纜車站，到達時為 1245，啱啱有班車開咗......
咦，咪住先，30 分鐘一班，我之前上網睇明明係搭正同搭半開車，點解會有班車搭九開，唔通改咗我唔知？如果係咁，下一班車咪成 1315？唉，失晒預算！
我走去問職員，下一班車係幾點，得返嚟嘅答案有點意外，下一班車係 1300，個職員再指一指個時刻表，原來今日星期日有加班車，15 分鐘一班，好彩問一問唧~
而家我哋有十五分鐘，周圍睇吓~
到差唔多時間，就落返去等車~
坂本纜車，上落共用一條軌，去到中間位置先會分開兩條，過後又再變返一條軌,，時間上要夾得好好~
經過呢個位嘅時候，我深明兩部車都有自己嘅路軌，只要大家都行返自己右邊果條，肯定唔會有問題，但望落又的確觸目驚心，兩部車好貼咁擦身而過~
呢程車比我想像中搭得耐~
落咗車，其實我個心開始有啲焦急，但我冇話俾屎塔知~
焦急係因為距離我想搭果班車嘅時間，只剩十七分鐘，而由纜車站行去電車站，最少都要七八分鐘，計算埋欣賞沿途風景同行錯路，可以話一定趕唔到~
咁當然，趕唔到咪趕唔到囉，好過錯過沿途風光，又唔駛為咗趕而發生意外~
沿途風光認真唔錯，但路面處處陷阱，好小心行都踢咗幾次石頭同跣咗幾次腳，如果趕住咁行，恐怕會趕到上救護車~
呢個車位好鬼正~ @@
一個我很喜愛嘅標示~
一路行，一路都擔心有冇行錯路，直至離遠見到京阪電車坂本駅，而家係 0129，我都唔知係自己同自己講定有意識咁同屎塔講：「趕唔到搭半果班車 lu~」
屎塔望一望錶，即時向住個站飛奔過去，仲用咗一秒時間影咗張相，再一路跑一路拎張 pass 出嚟入閘，我哋成功趕到 0130 果班車~ @@
去近江八幡，中途要由京阪電車轉車到 JR，而沿途有兩個站可供選擇，冇話邊個好啲，最主要都係睇班次時間點夾法，所以上到車我第一時間就拎份功課出嚟睇，再運算一下就決定喺石山站轉車~
雖然我呢刻嘅心情係好興奮，但我冇忘記到一樣好重要嘅嘢~
去到 JR 石山，我都顧唔到下一班車係幾點鐘開，我只知道嵯峨野嵯峨野嵯峨野！我差唔多係衝入去 JR 嘅綠色窗口服務處，表明來意，職員查咗一陣電腦，話俾我知當日我要果班車嘅車票已經售罄！我再問佢前後嘅班次，佢竟然回覆一個令人震驚嘅答案：當日車票已經全部售罄！
冇可能嘅，一定係睇錯，冇可能嘅！我真係接受唔到呀~ >_<
好失望 ，真係好失望，希望只係呢個職員出錯，去到近江八幡一定要 check 多次~
我哋張 pass 嘅有效範圍係唔包括 JR 嘅，呢一程車要買飛先可以搭，我又懶得研究點買飛，直接在場向個職員買埋~
今日已經搭咗好幾次日本嘅鐵路運輸，感覺尚算幾容易，但大前題係做好功課先得，否則好難迅速查得到咩急行咩快速嘅車會唔會停你想到嘅站~
到咗 JR 近江八幡站，最最最緊要到綠色窗口先，做同一樣嘅嘢，得到同一樣嘅答案：當日全部車票售罄！我徹徹底底咁從心失望，腦中不斷思索，係咪完全冇晒辦法呢？係咪就此接受命運呢？改期又得唔得呢？我不停諗，不停諗，好似諗咗好耐咁，其實實際時間只係過咗一分鐘，就憑呢一分鐘嘅思索，我諗到喇，我仲未絕望，仲有機會！
嵯峨野小火車分五卡，頭四卡在日本國內一個月內可預訂，第五卡未必開，只在天氣良好下先會開，而且要即場買票，不設預訂，而以我睇到嘅天氣預測，就算唔係天晴，頂多都只係陰天，只要唔落雨都會開第五卡，只要我哋當日倒塔咁早去到，機會仲係有嘅！一於咁話！
出咗 JR 近江八幡站，環境唔算特別，但感覺舒服，聽到屎塔話呢度都幾靚喎，我嘅成就感即刻標晒出嚟~ =P
今日嘅 lunch 我冇咩點安排，淨係安排咗喺近江八幡呢度，隨心隨意咁揀一間。我哋入咗個商場，發覺冇咩食肆，出返嚟見到間 cafe，但 menu 只有日文，所以都冇揀到~
眼見我哋要搭嘅巴士就開車，諗諗吓，不如過到八幡堀先搵嘢食，反正呢度都冇咩食，又唔駛等車~
根據網上所得資料，喺大杉町落咗車，轉左留意右邊有個鳥居，轉入去就到八幡堀~
成個景象嘅描述同實景完全一樣，好容易就搵到~
過咗鳥居就有樓梯落下一層，真係好似發緊夢咁~
之前做功課見到已經好吸引，但感覺好唔實在，唔好話同香港比距離，就算同大阪市中心比距離，真係一啲都唔近，亦唔係港人必到之地，如今我已經腳踏河邊，身在水鄉~
屎塔仲話呢度真係幾靚，好多謝我帶佢嚟咁話~ =P
不過呢度個環境都幾危險，大石中間有坑，唔小心踢一踢，好易失平衡跌親甚至跌落河~
原本諗住食嘢先嘅，但實在不得不停留一會，感受一下呢度嘅環境，怪不得呢度咁多人喺度寫生啦~
橋底呢兩隻船，究竟係裝飾定係乘托點呢？我行過時感覺上唔太浮，不過當時都冇諗咁多，冇留意到隻船有冇郁~
做功課時，喺 google maps 都見到「喫茶瓦亭」，不過冇咩為意~
嚟到現場，一係食高級勁貴嘢，一係就佢，梗係揀佢啦~
入到去坐低咗，睇吓叫咩食好，原來呢間嘢嘅 menu 亦只得日文，靠佢僅有嘅漢字同牆上嘅圖片知道有「咖喱近江牛」，我哋就點咗呢個~
再睇落去真係唔多知，問一問前來招待嘅女店員(相信係老闆)，老闆即時有點驚惶同錯愕，可能知道我哋係外國人之故。老闆開始語塞，我哋喺言語上溝通唔到，佢除咗識講 beef 之外，其他佢所講嘅都係日文~
又唔怪得嘅，呢度真係冇咩外國人，我哋眼見嘅都係日本人，冇咩遊客，接觸得少就自然學得少~
最後就點咗另一價錢相約嘅餐，其實都冇咩所謂~
兩碟飯到喇，不過唔知邊碟打邊碟，兩碟個樣都係差唔多~ XDDD
一碟偏紅嘅咖喱，只有一舊牛肉~
一碟偏啡嘅咖喱，有兩三舊牛肉~
之前睇雜誌見過，話日本除咗和牛同松板牛，近江牛都係唔錯嘅牛肉，唔怪得咁矜貴啦~ @@
味道方面係一貫日本咖喱嘅味道，一碟偏甜，一碟微辣，唔錯~
食完嘢再到出面影吓相，又行過吓附近一啲神社~
下一站係「大津港」
八幡堀 → 大津港
八幡巴士： 大杉町 →→→ 近江八幡
ＪＲ鉄道： 近江八幡 →→→ 石山
京阪電車： 京阪石山 →→→ 浜大津
大津係琵琶湖咁多城市中嘅其中一個，大津港，固然就係大津市嘅港口~
我哋去呢個港口，唔係坐船，係為咗欣賞一場號稱全球最大嘅幻彩水上噴泉表演~
時間都差唔多，去返巴士站等車返返去 JR 近江八幡駅前~
回程都係一樣，JR 要買票，亦有兩個站可以轉車到京阪電車，我見時間冇咩大分別，就揀返石山轉車~
喺石山站出閘時，屎塔問我有冇袋住果兩張車飛，我印象中先前交咗俾佢影相冇袋返，理論上應該喺佢度，不過為免記錯，就搵吓啦，不過搵過晒都搵唔到，唔駛我叫，屎塔自然都一齊搵緊，一邊搵又一邊回憶返之前嘅景象~
一如我所講，我記得俾佢影完相就冇攞返，我問返佢影完相之後佢放喺邊，佢竟然話放咗喺手~ @@
頭先果程車，佢大半時間都瞓鬼咗，如果放咗喺手又瞓咗，之後又話唔見咗，最有可能嘅梗係跌咗喺車啦~
唉，一張 400 日元，兩張就 800，以當時嘅兌換率計算，要賠償 $76.5 港幣，其實又真係唔算係咩，不過感覺就好唔抵，算啦，冇計~
喺出閘口同果位女職員講我哋唔見咗兩張車飛，佢問我哋喺邊度上車，再計吓數，要我哋俾返 800 日元先可以出閘~
到咗京阪石山站，我入咗閘，慣性咁回頭望一望屎塔，佢喺閘外邊又喺度摷嘢，唔駛問啦，梗係摷緊張 Kansai Thru Pass 啦！我頓時覺得血壓飆升，我真係驚我會爆血管~
冇啦啦俾人罰咗 800 日元，條氣都已經唔係好順，今日只係第一日，如果再唔見埋張 3days 嘅 pass，咁有兩日就煩死~
屎塔係咁摷，搵咗成分幾鐘，我亟希望佢搵得返，接近用祈禱嘅心情去等待，佢突然停咗手望住我，臉上流露出一副闖禍嘅表情，究竟呢個表情代表咩呢？唔似係搵唔到，亦唔似係搵得返咁簡單~
跟住佢鬼鬼馬馬咁拎返張 pass 出嚟入閘，一反常態，小鳥依人，忸忸怩怩，一副做錯事鵪鶉咁嘅樣同我講，話講個秘密俾我知，又話講咗出嚟唔准嬲~
唔駛審你梗係搵返果兩張 JR 車飛啦！屎塔話其實佢喺搵到張 pass 之前已經搵到果兩張飛~
我寧願你唔好話俾我知你搵得返，真係唔見咗俾人罰冇嘢好講，但明明喺身都要俾人罰，真係唔嬲就假，呢次真係佛都有火，嬲到爆炸！
不過咁，識你咁耐，我何曾試過真係從心去嬲你吖，事情已經發生咗，鬧你都無補於事，如果為咗 $76.5 導致傷害大家感情，我豈不是比你嘅行徑更笨？唉，算啦~
上到京阪電車，屎塔繼續做佢嘅小鳥依人，我亦樂得去享受一刻嘅溫馨~
出咗浜大津站，開始覺得凍，著緊嘅衫明顯唔足夠，但都還可以嘅，四圍都係黑漆漆，燈光唔算多~
好快就行到去港口~
而家只係黃昏五點幾，表演時間為 1800~1930，仲有成大半個鐘，我哋就走咗入附近一間精品店行吓，順便避寒~
號稱全球最大型，但點解碼頭呢到數埋都冇十個遊人呢？唔好諗咁多，反正都嚟到，都係果句，山長水遠嚟到，路途本身已經好夠樂趣，何況身在日本，有美相伴，夫复何求~
接近六點鐘，我哋走出碼頭，孭咗成日嘅腳架終於大派用場，附近亦開始多返啲人，不過都係多四五個~
終於等到表演開始，開始時，湖上一排噴咀開始射水，再加上唔同顏色嘅幻彩燈光，靚係靚，不過就平淡咗啲，又單調咗啲~
我一直喺度等，等佢有多啲變化，但佢都只係左右兩邊打斜交替噴水，沒有音樂，沒有擺動，只係一個固定角度，時而左出，時而右出，實在係單調中帶點寂寞，令人失望~
之前上網查資料，都已經發現唔係太多人提，嚟到又冇咩人，原來個表演係咁流嘅，唔怪得啦，真係見面不如聞名~ @@
睇咗大半個鐘，已經唔再期望會有咩變化，未夠七點就離開~
下一站係「道頓堀」
大津港 → 道頓堀
京阪電車： 浜大津 →→→ 京都地鉄三条京阪
京阪電車： 三条 →→→ 北浜
大阪地鉄： 北浜 →→→ 日本橋
由於我原本嘅計劃係 1930 離開，所以鐵路嘅功課亦由 1930 開始，而家早咗咁多，就要靠自己今日累積返嚟嘅經驗去睇吓點搭車好~
正如我之前所講，只要有基本認識，喺日本搭鐵路真係唔算難，我好容易就搵到想搭嘅列車~
今次車程有少少特別，同樣係京阪電車，但中途要借京都地鉄嘅網絡去轉車~
首先由京阪電車嘅浜大津搭到去京都地鉄嘅三条京阪，再喺地鉄入面步行過京阪電車站~
到咗大阪地鉄日本橋站，一出站就發現落緊雨，仲要唔係細，但都算好彩囉，朝早啲重要景點有啲陽光，道頓堀有雨都冇咩問題，反正都唔係第一次嚟~
到咗道頓堀，一種大阪嘅熟悉感覺油然而生~
晚餐安排咗喺道頓堀自由覓食，一係拉麵，一係寿司，我深知屎塔想食寿司咖喇，於是就由街尾行上街頭，轉埋入心齋橋筋，想搵間較為吸引同實惠嘅迴転寿司店~
我哋指定要迴転式嘅，咁樣就唔會有言語上溝通唔到嘅問題~
上次嚟大阪，選擇咗元祿，今次爭啲都係佢，因為符合我哋要求嘅，原來冇乜幾多間，最後搵到間少少貴嘅，喺門口掙扎咗一陣，我又死蠢，屎塔問我呢幾日仲有冇機會食寿司，我果刻個腦空白一片，筨唔到佢，但為咗滿足佢呢刻想食寿司嘅慾望，就呢間啦~
龍宮亭迴転寿司 - 放題中
入到去要俾錢先，寿司任食加送一麵豉湯一酸梅汁，俾完錢坐低咗就知後悔~
後悔我答唔出之後有安排到食寿司~
後悔入咗間服務態度以日本人嚟講算係幾差嘅食店~
後悔入咗間放題但冇咩選擇嘅食店~
後悔入咗間冇選擇冇服務但又唔抵食嘅寿司店~
湯要自己斟，啲服務員就企埋一齊自己吹水，食物選擇非常少，新鮮度只屬一般~
不過咁，話佢貴咩，其實喺當地指數嚟講又唔算太貴，只係我哋啲兌換率高姐~
話佢新鮮度不足咩，其實都比香港迴轉帶上跑咗一百個圈果啲新鮮得多~
服務就真係爭唔落，差差差！我哋一邊食，幾個服務員就喺我右邊唔夠一米距離吹水，我好似俾人望住食嘢咁，非常唔自在~
好唔愉快咁完成第一晚日本晚餐~
個天唔知係咪玩我哋，我出地鉄時見到落雨，地面仲係乾嘅，即係啱啱落啦，好嘞，淋到我濕鬼晒，入去食完嘢出返嚟，仍然落緊雨，但地面比我入去食嘢之前更乾~
即係我哋出嚟就落雨，我哋入去就停雨，真係天意弄人~
喺道頓堀便利店買埋杯麵作為明早早餐就返酒店~
道頓堀 → 酒店
大阪地鉄： 日本橋 →→→ 長堀橋
今日雖然經歷咗下雨嘅晚上同後悔嘅晚餐，其實都冇咩大不了，唔計道頓堀，全日都冇遇過一個香港人，最正就係咁！
沒有留言:
發佈留言