Masalili → 逢甲夜市
一早起身，第一件事係揭開窗簾，睇睇天氣如何~
所謂不如意事十常八九，竟然俾我遇到淨返呢件如意事情，窗外陽光普照，yeah!!!
不過噚日市中心一樣冇雨，去到距市中心個半鐘車程嘅日月潭，天氣就惡劣得多，所以呢度陽光普照，都唔代表啲咩，聽天由命啦~
酒店係有包早餐嘅，地點就喺大堂隔離，入到去見到有四個選擇，其中一個唔知係咩，因為被撕去了~
用餐面積好細，只能容納十多人~
呢度早餐以半自助形式招待，四個餐當中選一個，另外仲有少少嘢係任食同飲品任飲~
味道 OK，不過不失，都算滿意~
食完早餐，酒店服務員就幫我哋叫車，連埋等車，唔駛半個鐘就到 Masalili~
主店開十點，約咗九點鐘喺另一舖位，而家係八點八，我過去睇吓另一舖位有人未，但度門推唔入，我估未有人啦，唯有返主店坐住等~
到差唔多九點，有個男仔泊完車走上嚟問我哋係咪影相嘅，叫我哋跟住佢~
其實佢都係去返另一個舖位，原來已經有人喺入面，仲好多人添......
計埋我哋，入面起碼有五對人做緊拍攝前嘅準備工夫，set 頭呀、化妝呀、換衫呀咁~
入面有啲差唔多人咁高嘅 locker，係俾啲客放低隨身嘅物品先去影相，其實駛唔駛咁大個......
我放好晒啲物品，有個女仔就叫我俾條鎖匙佢保管，佢叫 Donna，係幫屎塔化妝 set 頭嘅~
跟住 Donna 即時叫屎塔入去開始化妝 set 頭~
我就冇嘢做，佢哋俾咗杯水我，只好坐低等等~
坐咗一陣，有個男仔叫我，佢就係噚晚介紹我去食嘢果個，佢叫 Sky~
佢問我有冇帶皮鞋，我話有，不過喺 locker 入面，但鎖匙喺 Donna 度，佢叫我唔好攞住，就拎咗我帶嚟嘅衫叫我同佢一齊行~
佢係一個幾健談嘅人，可能係職業需要啦~
佢帶咗我去另一個舖位，有兩層，我哋上咗樓上，原來樓上放咗好多衫，佢開始同我襯衫~
佢一路幫我揀衫，一路同我傾偈，都試過幾套禮服，有黑有白，佢問我鍾意邊套，佢又俾啲意見，搞掂正式服裝就襯輕便服裝，佢好容易就為我襯咗兩套輕便服，一件我自己嘅，一件係佢哋嘅~
跟住就要試白皮鞋，不過最細果隻都係太大，的確，我隻腳唔算大，但又未至於特別細，可能啲鞋俾人著到鬆晒啦~
不過 Sky 話佢有辦法，咁我唔理啦，我有信心佢會搞得掂~
跟住又返返去之前果個舖位，開 locker 攞黑皮鞋同白襪，輪到我化妝整頭~
幫我化妝嘅係女仔，我唔知佢叫咩名：幫我整頭嘅係男仔，我又唔知佢叫咩名~
個男仔問我有冇咩喜好想點整，我話冇所謂，佢就開始動手，兩個都好快手，幾分鐘就搞掂~
佢幫我整個頭幾好睇，我連佢十分一功力都冇......
三樣準備工夫我都做齊，剩下落嚟嘅又係呆坐~
等等等，終於等到屎塔出嚟，嘩嘩嘩！屎塔好靚呀~~~
我同屎塔都準備好，坐咗一陣，見到主任出現~
Sky 帶領我哋上車，一架有 Masalili 拉花嘅七人車，主任就繼續忙佢嘅器材準備，Sky 就走咗去為我哋嘅午餐作準備，一排飲品同三文治~
我以為會有化妝師跟車，點知最後就只有主任、Sky 同我哋共四人出發，我不禁諗，外景咁耐，實要補妝咖喎，仲有個頭呢？散咗點算？
不過佢哋實有對策嘅，唔駛諗咁多啦~
沿途四個人都有傾有講，其中主任問我哋噚日去咗邊度玩，我哋話去咗日月潭，佢又問我哋點去，當佢哋知道我哋係自己揸車去嘅時候，足足 O 咗咀一秒~ @@
其實有咩咁值得驚訝呢？主任仲話「這樣利害呀！」此時，我同屎塔就真係 O 咀喇，好普通嘅事嚟姐......
我哋同樣有討論天氣問題，呢刻嘅天氣非常好，希望目的地都係啦~
我哋嘅目的地係「波瓦萊格莊園」，其實我哋完全唔知喺邊，因為呢個名係 Masalili 自己起嘅，實際嘅名，我哋唔知，所以無從查起~
沿途去都好熟識，因為頭大半段路，我哋噚日都行過~
離開咗高速公路，我哋開始留意啲指示牌，希望可以知道呢個所謂嘅莊園嘅真正名稱~
嘿嘿，我哋見到喇，其實我哋都唔確定係唔係，只係有個指示牌寫住「XXXX城堡」，似係啦，主任真係喺個牌度轉入去，實係佢啦！
(由於合約訂明不許私下拍照，以上照片是在網上隨意找來的)
一轉入去行咗一小段路就泊車，成個城堡就喺面前，心情開始有啲緊張~
其實同噚日有啲相似，越近目的地，天色就越暗，真係好擔心，不過好好彩，冇落雨，只係暗，雖然影相冇陽光一定大打折扣，但係總好過落雨連影都影唔到~
由於我倆出發前已經準備好晒，落咗車行咗幾步就正式開始，其實個心情仲未準備好~ @@
主任係操刀果個，Sky 就係佢助手，主要負責光源同其他雜項~
第一張當然比較生硬，因為未進入狀態，但佢倆個明顯係好有經驗，使出混身解數去令我哋發笑~
攝影過程沒甚特別，惟間中有雨，但雨勢不大，起碼唔需要避雨，可繼續影~
外景總共影咗三套衫，我呢，就一套白禮服、一套黑禮服、一套便服；屎塔就一套白紗、兩套晚禮服~
屎塔每次換衫都會補妝同換過個髮型，兩樣嘢都係佢兩個一手搞掂晒，真係估佢唔到！
不過其中一個髮型搞唔掂，唯有轉第二個~
而我呢，乜都唔駛搞，淨係換衫同等就得~
我同屎塔換衫嘅地方，竟然係廁所！仲要入廁格！
不過個廁所真係非常乾淨，咁都可以接受嘅~
講返主任，佢真係好俾到信心我哋，影咁多張相，要補影嘅情況印象中只得一兩張！
以前用菲林機影就話影一張就多一張成本，而家根本唔需要考慮呢個問題，佢都可以咁有信心唔需要補影，感覺上真係好專業，佢對自己都好有信心~
擺 pose 方面，多數跟足佢意思都唔駛點改，係有時跟足後，佢唔係咁滿意個效果，先要再改，但呢個情況好少~
咁樣証明咗兩樣嘢，佢對指導擺 pose 嘅經驗非常夠；成個過程唔係機械化，唔會人人都咁樣擺，係需要因應主角同環境配合，即係執生~
影到下午三點幾先影完外景，執齊嘢上車，我倆就喺車食三文治，但佢兩個就冇食嘢，主任開車返 Masalili~
返到 Masalili，屎塔即時就要變髮同補妝同換第二套白紗，Donna (髮型師及化妝師)隨即發現佢個髮型唔係佢交待俾主任同 Sky 所要整嘅髮型~
呢一點算係 Masalili 安排不周，但我會體諒，要個髮型師跟車出去大半日只為工作十多二十分鐘，其他時間都唔需要佢，又冇可能叫佢自己返公司，咁樣真係好浪費資源~
而我都需要換返套冇咁正式嘅禮服、補妝同變髮，我真係冇諗過我仲有機會變髮，以為男仕係會簡單啲，一個造型就夠~
不過今次就只有今朝幫我化妝果個女仔，佢同我做埋變髮~
當然，成毎過程我會快好多，搞掂晒又係呆坐~
等到屎塔搞掂晒就去返今朝我揀衫果度~
今朝我去到嘅時候，地下果層係冇開燈，直接走上二樓嘅~
原來地下係用嚟拍內景嘅，當中有一處係半露天，三處係室內，即係有四處內景~
一準備好就開始影相，不過影影吓我發現我條褲爆咗！
不過唔係爆胎，係褲頭調節鬆緊個扣滑咗牙，變咗冇扣，腰間露出褲內嘅恤衫，我吸口氣後再將扣扣上，咁就冇問題，好似拍戲咁~ @@
但係呢口氣可以維持幾耐呢？當然係唔耐，我試著細力呼吸嚟控制腰間嘅膨脹幅度，成功係成功，但成功都冇用，一去到要擺 pose 嘅時候就爆硬，我唯有通知 Sky 同主任，希望佢哋影嘅時候可以留意吓，唔好影到穿崩位~
其實我自己都好留意，好彩穿崩機會好少，接近冇，再加上控制呼吸，已經唔再有問題~
呢套衫又影咗兩個內景，跟住 Sky 就俾咗張菜單我哋，點選晚餐~
晚餐選擇唔多，亦唔算吸引，不過唔重要，Masalili 提供膳食只為滿足生理需要，正常入到口就 OK~
之後屎塔就換內景晚裝，我就換便服，同樣地，我倆都要變髮同補妝，一樣係果個女仔同我搞~
連我都有三個髮型，真係出乎意料之外！
講到我呢套便服，不得不提對鞋，對鞋係 Masalili 提供嘅，類似西部牛仔果種高靴，我真係冇諗過我呢一生人入面會有機會著呢種鞋！
我倆搞掂晒就被調配到食飯嘅地方食飯先，係一間房嚟~
呢間房非常簡單，三張長檯，其中一張貼牆，入到去檯面已經有兩碟飯，就係我哋叫果兩碟飯，食後評語係：唔好食......
用餐過後，Sky 帶我哋返去之前果個內景位置，奇怪嘅係，Sky 揸住部相機嘅!?佢身邊仲有個人跟住佢，但就唔見主任......
原來最後呢套衫同餘下兩個內景，由 Sky 操刀幫我哋影，由於佢冇介紹過助手，助手亦冇介紹過自己，我倆就稱那個助手為「助手的助手」
先講 Sky，佢同主任係有一定距離，分別在於信心~
擺一個 pose，比主任用多好多時間，有時我哋都未擺完佢已經改變主意，就算擺好晒，佢攞嘅角度都經常變換，我深信佢相機嘅設定都係咁變~
的確，我哋冇指定攝影師，但我覺得會換攝影師都應該先交待一聲~
不過呢樣嘢係可批評亦可包容，到現時為止，我對 Masalili 非常滿意，根本就唔願意去批評，無謂咁吹毛求疵~
其實唔只 Masalili，我對主任同 Sky 都相當滿意~
由 Sky 操刀開始，身體各部份肌肉明顯開始支撐唔住，每次擺 pose 都好想快啲影完，究竟係因為影咗成日，定還是 Sky 搞到我哋咁樣，我唔想去深究，因為，我非常樂意俾機會 Sky 去增進經驗，唔想對佢有太多嘅批評~
又講吓助手的助手，打光方面佢似係識少少嘅，但好多時都要 Sky 提，不過佢俾我最深刻嘅印象，唔係呢方面~
Sky 做助手時，扭盡六壬去令我倆發笑，助手的助手都唔例外，但佢好明顯唔識亦唔慣，佢面部沒有半絲笑容，亦睇得出佢唔算多說話嘅人~
一個唔多說話，又沒有半絲笑容嘅人，要引人發笑，太難了吧~
終於等到影晒相，其實我哋有晒心理準備，最尾由 Sky 操刀嘅實驗相未必好理想，只要唔係太差都可以~
影完相同 Sky 傾咗陣偈，佢話佢好鍾意食雞，佢知道我哋會去台北，佢話一定要食雞扒，真係好奇怪，差唔多每一個知道我哋去台北嘅人都推介我哋食雞扒，真係咁好食咩......@@
我同屎塔分別去卸妝同換衫，搞掂晒就輪到派貼紙時間，噚晚用咗一張，仲淨五張，我哋分別派咗俾 Donna、幫我變髮同化妝嘅一男一女，當然唔少得 Sky 同主任，不過主任唔喺度，我托 Sky 轉交俾佢~
今日嘅拍攝工作正式完結，Masalili 嘅工作人員幫我哋叫咗車，我哋返酒店放低晒唔需要再用嘅嘢先~
返到酒店放低晒嘢真係一身都鬆晒，唔單止身體放鬆，連精神都鬆晒，其實都不如想像般疲累，起碼仲有充足嘅體力同精神去行夜市~
酒店去逢甲夜市，步行在十分鐘內，雖然我已經有地圖喺手，不過問櫃檯攞一張佢哋嘅地圖會保險啲~
落到酒店地下望出去，好多人，原來酒店隔離兩旁都有舖頭營業中，點解之前唔覺嘅？
梗係啦，朝早又未開，成條街鬼咁冷清，呢兩晚都係搭計程車返酒店，一落車就直衝入酒店，附近環境係點，根本就冇留意過~
我哋向住啲舖頭方向行去，其實對我哋嚟講就冇咩吸引力，不過都叫行過望吓咁啦~
繼續行出去，成個旺角咁，周圍都係燈同人，明顯呢區係夜間閒逛好去處~
沿途經過逢甲大學，雖然冇咩特別，但影張相就少不得，數碼相機真係正，如果仲用緊菲林相機，夜晚咁嘅環境，根本不值一影，嘥菲林(當然，嘥菲林係同我嘅攝影技術有直接關係)
逢甲大學一個轉角，就到咗逢甲夜市喇~
逢甲夜市，係一個非常典型同普通嘅夜市，但由於心情輕鬆，同埋晚餐唔係食咗好多嘢，呢刻嘅心情好興奮~
行咗一陣，就買咗喺香港唔會食嘅臭豆腐~
豆腐本身皮脆肉滑，連同秘醬同芫茜一齊放入口，更加係畫龍點睛，正！
再嚟就隊咗個胡椒餅~
不過去到啱啱賣晒，要排隊等再出爐，足足等咗十五分鐘，係咪咁值得等呢？
Well......好食係好食，但唔係特別出色，唔食冇損失咁啦~
外皮鬆軟，內裡肉汁非常多，如果唔駛等，值得一試~
好用唔用，咁多名人可以用，你用佢?!!!我唔會幫襯你咖！
跟住就係計劃中指定要食嘅懶人蝦！
所謂懶人蝦，只係原隻蝦燒，成隻放入口唔駛剝殼，但食落都有啲刺口，條尾更加係吞不得~
佢有好多種口味，其實只係燒完灑咩粉，我哋點咗原味~
食得出新鮮，但味道不過不失，唔算出色，惟要讚一讚佢改個名，真係可以吸引到客人前來光顧，至少我係其中一個~
逢甲夜市範圍唔算大，好快就行完，隔一段路就有一堆垃圾袋，係，真係一堆，呢個放膠樽、果個放鋁罐......等等~
可供掉垃圾嘅地點唔多，但成條街都好乾淨，就連竹籤都冇一枝喺地下，台灣人嘅公民意識，由此可見一斑~
離開逢甲夜市，見到橘子工坊，走去買咗杯鮮檸檬愛玉，其實都唔知係咩嚟，一飲，嘩，真係頂你個肺，酸到爆炸~ >_<
途經一間造型蛋糕店~
跟住就行返酒店，完結今日行程~
沒有留言:
發佈留言