麥記就喺永安里地鐵站隔離，我哋步行過去就可以~
我以為喺大陸食麥記會平好多，原來唔係，只係比香港平少少~
由於今日係去長城 - 八達嶺段，怕天氣太冷，所以我哋喺衣著方面都做足準備！
由麥記去長城都幾轉折，首先要搭地鐵 1 線到建國門站，跟住轉 2 線到積水潭站，出站步行約五分鐘到德勝門(一個地方名)嘅巴士站搭 919 號巴士往八達嶺~
搭地鐵當然冇問題，點轉車都唔會係一件好難嘅事，但係出咗站口要步行五分鐘，我就唔敢講一定識行，因為從地圖睇，只係見到大約方向，但實際環境必然係複雜得多~
用邊個地鐵出口，都只係估估吓，出咗站之後，猶豫咗一陣，憑環境憑方向，我選定咗一個方向就起行~
越行越對路，最後都嚟到 919 嘅巴士站！
根據我自己嘅資料搜集，919 都有分好多支線，我要搵一部寫住「919 大站快車(下行)《德勝門西 → 延慶路》」嘅車先至最快最方便~
部部都寫住 919 直通車，但就點睇都冇上述所講嘅巴士~
最近有部 919，有個人聲稱即將開出、直通、豪華，就連個票價都一樣豪華，成 $40 蚊一位！
老實講，去得旅行，$40 真係濕濕碎，但冇理由做傻仔咖！
跟住行多個圈，有部 $12 ，車上又坐咗好多人，又冇人硬銷(心理戰乎？)，就戰戰兢兢咁決定上呢部~
好好彩，我哋仲可以坐埋一齊，前後相連座位。坐咗一陣，就有人走埋嚟收錢，佢係拎住部機走埋嚟嘅，我依稀有啲印象，用「一卡通」付款乘公交巴士，有四折優惠！$12 四折即係 $4.8，唔係下化，搭個幾鐘車只需 $4.8？其實就算冇折，$12 都好合理~
付款後睇吓扣咗幾多錢，嘩！冇花冇假，真係 $4.8！正！$40 VS $4.8！(我主觀相信 $40 果部唔會提供任何優惠！)
好嘞，開車喇，開咗車之後，早前收錢果位女仕，拎起咪開始講嘢，原來佢係呢車嘅導遊。實在太過奇幻喇！超低嘅票價，仲要有導遊！我係咪發緊夢？
個導遊講咩，我唔太在意，只係知道落咗車要跟佢行，同埋我哋無啦啦跟咗團......@@?
喺車上佢有佢講，我哋有我哋瞓，其實真係唔應該瞓，但無奈敵唔過睡魔！都唔知瞓咗幾耐，突然俾人嘈醒，嘈醒我嘅人係導遊，佢當然唔係走過嚟嘈醒我，而係用咪講嘢，講到好大聲，當然，佢係故意嘅，因為距離目的地唔到十五分鐘，佢又有嘢要講要交代，只好出招~
落咗車，望吓環境同地圖，出事喇！同我計劃嘅有出入，我計劃好搭吊車上，滑車落，但如今我身在滑車售票處，亦睇唔到有任何吊車相關嘅事物，唯有走去問導遊。遊導答覆如要搭吊車要行好遠，唉，唯有搭滑車啦~
大家都買好票後，導遊就開始帶隊，佢仲話一定要跟好，如果唔係好易走失，其實我就有少少奇怪，點解會走失?照計買完票，跟住要去入口，唔會好遠同埋唔會好難搵又或者冇指示，不過咁，身處中國境內，有時啲嘢真係會意想不到，可以的話，都盡可能跟住佢行~
開始時都跟得到，行行吓就有啲要追而唔係跟，佢講得啱，唔跟住佢真係會走失，因為指示不足，亦因為真係要行好遠，遠到有啲不可思義，仲要好多都係向上嘅斜路，追得好辛苦~
幸好最後都跟(追)得到，不過，正所謂追得到也未必好，就因為趕成咁，可憐嘅笨茄，差點不支倒地，佢面色蒼白，腳步浮浮，我提議大家不如休息吓先繼續行程，笨茄話唔需要，當然，佢唔想掃大家嘅興，先堅持不需休息，我個人亦唔喜歡推翻人家嘅決定，佢自己知自己事，佢決定得，就當佢係得~
去到入口處，人唔太多，但係啲欄放得好密好窄，有少少難行，亦同啲唔識嘅人好 close，好唔自然......
行到上嚟，大家都有啲喘氣，加上成身都係厚衣，又焗又熱，大家都要稍為除返少少外衣，一邊排一邊等，笨茄已經稍有好轉，我哋都安心啲~
終於到我哋上車，但係啲車唔會停定等我哋上，而係以一個好慢嘅速度前進，上呢啲車真係有啲難度，啲工作人員又半拉半扯咁「幫」你上車，其實好易受傷~
滑車，淨係聽個名，覺得車速唔會太高，但原來一啲都唔慢，車速比想中高，同埋有啲位都幾斜~
到咗落車處，又俾啲粗暴嘅工作人員扯返上嚟，唉，可唔可以斯文啲呀~~~
滑車出口係「北四樓」，我哋打算行到上「北八樓」就折返。行長城，其實就冇咩好講，一味行，有啲好平，有啲好斜，我哋都休息咗好多次~
傳說「北八樓」有個碑，叫做「好漢碑」，好自然，上到去一定會拍照留念，以紀念到此一遊~
一路向前行，以為一定唔會行錯路，但原來行長城都可以迷路~
一路向前行嘅結果係，會行到盡頭！
盡頭係一個好似堡壘咁嘅建築，要行樓梯上，上到去再向前行就有樓梯落，我好猶豫落唔落好，因為就咁望，係望唔到落咗去之後仲有冇路行，同埋我亦相信此路不通，原因係好多人落咗去嘅都好快就上返嚟~
除咗相信冇路行之外，呢條所謂嘅樓梯，實在難行，梯面淺，但級距非常高，應該面向前行，還是轉背爬？最後我選擇落去睇睇，只要小心一點，相信不是問題~
接近直立式嘅高梯級，每落一級都對腿及股關節帶來極大考驗，重心要控制得好才不致直墮地面~
落到底，証實已達盡頭，但可以看到外面還有路，但點樣先可以行到眼前看見嘅路呢？憑著我過人嘅智慧，我相信我可以帶大家走出呢個困局~ =P
返返上去比落嚟嘅考驗更大，半行半爬先可以上得返嚟，好彩呢條路係盡頭，否則叫屎塔如何平安著陸？
既然直行去到盡頭都未到我哋要去嘅地方，可以好肯定咁宣佈我哋行錯路！
唯有原路折返，再留意吓有咩分岔路再決定~
折返途中，途經一條樓梯，落到底有一個洞口，從洞口望出去係荒山般嘅沙草地，但由於我哋曾經行錯嘅關係，唔會放過任可一個可能性~
而且有兩點令我覺得呢個洞口就係通向北八樓嘅洞口！
1. 有唔少人進進出出
2. 依照地理環境嚟睇，就連我呢啲方向感唔係特別強嘅人都可以推斷個方向係啱嘅！
其實沿路唔係冇指示，但就一定係容易令人誤解同埋非常唔清楚嘅指示，否則在盡頭處就唔會聚集咗咁多探路嘅人~
我哋好有信心咁走出洞口，越行越對路，終於去到先前盡頭處向下望嘅道路(圖上方為先前之盡頭)，我深信我哋已經行對路~
一路行前去，又去到盡頭，不過今次係到咗北八樓嘅盡頭，我們到了~
第一件事梗係搵「好漢碑」拍照留念啦~
不過，四條友左望右望，點都唔覺有類似嘅物體，冇就算啦~
喺上面逗留咗一陣，搵咗個香港人幫手影相就起程返落去~
其實沿途都好多人，當中不乏外國人~
不過有一點真係令人憤怒，長城牆上佈滿被人用硬物雕上的文字及圖畫，究竟點解要咁做？究竟點可以咁做？
今日認真捉蟲，以為上長城會好凍，咩都著晒上身，點知，今日係最熱嘅一日，根本唔需要著羽絨，我哋就個個著晒厚衫加羽絨，就算除咗羽絨都仲係咁出汗！
中途見到有個狀似管理員嘅人，我哋走去問佢個「好漢碑」去咗邊，原來因為奧運關係，搬咗去南一樓！
不過其實兩者有咩關係？相信係一個謎~
上嚟冇搭到吊車，落去搭返都好，反正茄唔係好想搭滑車落~
不過諗吓好喇，因為山腳吊車站距旅遊巴有一段距離，行唔行到同識唔識行係其中兩個因素，更重要嘅係，時間上比計劃嘅行程遲咗好多，根本唔容許我哋冒險去嘥時間~
即係話，唔會搭吊車唔會搭火車，來回都係旅遊巴同滑車~
笨茄萬般不願意咁行去滑車站，搭車前，我哋一人買咗一條腸食，由於我哋都好肚餓，呢條腸喺當時絕對稱得上人間美食！
口講話好驚嘅笨茄，竟然大膽到唔扣安全帶，我真係佩服到佢五體投地！仲有就係，落嘅速度絕對快過上，呢條粉茄真係唔要命！
落咗車後途經「八達嶺熊樂園」，笨茄對住啲黑熊係咁叫 Gary，唔識佢嘅真係以為佢痴線~
去搵返部車，不過剩返好少位，我哋唯有坐前排打橫嘅座位，打橫坐已經好唔舒服，仲要有少少吊腳~ @@
半睡半醒咁捱到落車，即刻轉的士趕去天壇買飛先！
天壇 1700 就關閉，關閉前一小時停止售票，其實就唔會買唔到票嘅，不過就算買到票，食飯加遊園，時間相當緊迫~
差唔多三點先到天壇，嗱嗱聲走去買飛先~
我哋買嘅係聯票，即係門票 + 祈年殿 + 回音壁 + 圜丘，每位 $30
本來計劃好今日食「郭林家常菜」，睇相同菜名就真係好吸引，蔥爆羊肉、香辣牛筋，真係睇相都食指大動！
不過時間關係，冇得食啦，唯有喺天壇附近賭大細啦~
最近有一間快餐，隔離有一間中菜館，我哋揀咗中菜館，叫「天美苑」，聽名的確麻麻，冇計啦~
坐低嗱嗱聲叫餸，我哋叫咗：
一碟台式牛肉咁嘅嘢
味道合格
清炒西蘭花
冇咩特別，唔錯
豆豉鯪魚油墨菜
我一向都唔食油墨菜，不過碟油墨菜真係好好食，從始我就開始愛上油墨菜~
齋炒飯
睇樣已經可以知道白飯會更美味
湯，唔記得咩湯，只係記得有紫菜
麻麻地，唔算好飲
炸唔知咩魚
呢碟嘢真係全餐嘅精髓，我哋已經唔記得咗佢，後尾先醒起仲有碟魚未嚟，但係大家都食飽晒，諗住同佢講，未整就唔要~
不過太遲喇，想提出要求之際就見到有人托住碟魚出嚟，冇計啦，唯有食埋佢啦~
就咁睇賣相，真係唔覺吸引，可能覺得咁樣整會比較難食到魚嘅質感同味道，再加上食飽後嘅胃口，會直接影響味覺，導致吸引力大減~
但係當我咬上一口之後，果種唔想食嘅感覺即刻冇晒，外面脆就唔駛點講，食到魚肉，又滑又好味，雖然已經好飽，但係我都忍唔住食完一舊又一舊~
食完飯嗱嗱聲俾錢走人入天壇~
入天壇時已經係 1600，只係剩返一個鐘就閉園，要好好控制時間先得！
一入到去就見到地下有條藍線，似係帶領遊人方向咁，但又唔係好似，亦冇任何指示講呢條線嘅作用，所以我哋都冇理到，睇地圖實際啲~
搵咗個京B做模特兒~
第一站直闖「祈年殿」
建築風格真係好特別，點特別我當然講唔出，但我真係覺得好靚~
睇咗一輪，我睇睇時間，真係有啲緊~
我開始用各種方法，好讓佢哋幾個知道時間緊迫，此地不宜久留~
我深深明白去玩果時俾人催住晒果種掃興，但係都冇辦法，錯過咗今次，都唔知仲會唔會再嚟，再講，一生人有幾多時間金錢同機會可到同一地方遊覽？又，一個景點，若干年後，還會如現在的一樣嗎？
當然，呢個只係我個人法，但我亟希望大家想法一致，不過唔理得咁多，佢哋反對先再算~
經我一番催促，終於離開「祈年殿」，往下一站，「回音壁」
「回音壁」呢個字，喺呢 20 年嚟，不定時入侵我嘅腦海，但只限國語，我一直都想不出原因~
呢個「回音壁」，當年我覺得好神奇，兩個人走在直徑的各一端，只需耳語般嘅聲量，對方都可清楚咁聽到另一方講乜嘢~
今日，我再次嚟呢幅「壁」，唔知點解好期待，我究竟期待啲乜呢？
我唯一諗到嘅係，同失憶嘅人一樣~
我對童年嘅印象可以話係接近零，唔知係咪曾經被洗腦，我對童年一啲記憶都冇，我曾經一度以為我由石頭爆出嚟果時已經係十八歲~
當一個人對已失去嘅記憶，依稀仲有丁點印象，總係想重臨舊地，藉此喚醒沉睡了嘅記憶~
我想我大概就是這樣吧~
入到「回音壁」，同當年很不一樣，當年壁旁冇任何阻隔，可貼壁而立~
今天，壁旁多了一圈圍欄，鼻尖碰不到牆壁，會否影響到這個「回音」呢？
經我實測，回音是有的，但不像當年般強，唔知係因為 20 年後嘅結構變化問題，還是鼻尖碰不到牆壁問題~
壁內還有另一建築物，叫「皇穹宇」，我對呢舊嘢完全冇印象，但我估計唔會係我上次嚟之後先有嘅嘢，唉，咁後生就有嚴重嘅記憶力衰退......>_<
喺我呢個凡(煩)人嘅催促底下，好快就到下一站「圜丘」
我對「圜丘」同樣係零印象，「圜丘」上有舊叫「天心石」嘅東西，據說企上去講嘢特別洪亮~
車~~~
塊牌咁講，個個企上去都用力啲講嘢，實洪亮啲啦~
影相就當然係指定動作，但係想影呢個「天心石」嘅全相，難呀~
因為實在太多人企上去影相，呢個影完，後腿仲未離開舊石，第二個就將前腿踏進，根本就冇機會影全相~
四圍嘅人唔係太多，要等一個機會本來唔係咁難，但可惡嘅係，有兩個小朋友輪流企上去，呢個走果個嚟，不停循環！
我揸住部傻瓜機，像個傻瓜般等待兩個傻瓜，只要其中一個有半秒遲緩，我就會即按快門！
我等到喇！
其實「天壇」地方好大，可遊嘅地方唔止咁少，不過我認為遊重點已經夠~
離開時，見到有人喺地下寫大字，好奇停低睇吓，原來有位大叔用巨型毛筆寫緊字，啲字好靚呀~~~
笨茄即係笨茄，佢話支筆應該可以自動泵水~
學黎明咁講，「這世上，誰人像你一樣傻」才會相信~ XDDD
(其實啲墨係水嚟，人哋有帶埋嚟)
果位大叔仲好大方咁俾支筆我哋自己寫，咪嘞，我手字真係......有時啲同事問我啲字係唔係我嘅，我會話：「如果你睇得明，即係代表唔係我嘅~」
作狀影相好了~
真正離開「天壇」，打算搭地鐵到食飯嘅地方，行咗一小段路，我相信，大家諗緊嘅嘢都係一樣：地鐵站真係近？
為免重蹈噚晚嘅覆轍，我亦深知佢哋有懷疑亦難以主動開口提議，就由我去開口提議：不如搭的士~
呢個提議，如我所料，支持率達百份百~
上咗的士，見到一樣嘢令我哋好驚訝~
的士嘅行車哩數為 3xxxxxx，即三百多萬公里！
真定假呀！我肯定冇睇錯，我數咗幾次，唔係三十幾萬，係三百幾萬！@@
今晚我哋到「大董」食嘢~
喺北京食片皮鴨(當地稱烤鴨)，有名而老字號嘅，一定係「全聚德」
但我在網上得到嘅資料顯示，「全聚德」已經過氣，店舊而食品不怎麼樣，反而很多人會攞「大董」嚟同佢比~
「大董」比「全聚德」新得多，烤鴨品質亦較好，價錢亦自然較貴~
旅遊書上，「大董」比「全聚德」所佔版面亦較多，所以我決定到「大董」
一到埗就見到「大董」，門外唔覺得有啲咩，但係一推門就知係非一般~
完全係高級食府嘅格局(再一次強調，自己見識少才這樣大驚小怪)，地下招呼嘅職員有禮但沒笑容，感覺機械~
室內裝潢華麗，主廳設在二樓，經一條寬大嘅樓梯上，主廳唔算大得好誇張，但感覺寬闊，非常舒服~
點菜方面就真係頭痛，樣樣都想叫，但樣樣都貴~ @@
啲職員嘅態度同現場環境格格不入，每位職員都係咁 COOL，木無表情，唔通個個入職時都要打大量 BOTOX？
唔單止木無表情，仲唔用心聽人講嘢，同一問題，問咗三次，三次都答非所問！
唔講格調，唔講價錢，咁嘅態度去到咩級數嘅食店都一定係唔合格！
不過佢哋講嘢又唔算冇禮貌，你又吹佢唔脹......
最後點咗：
醉雞
呢碟係屎塔點嘅，其佢我知係點俾我食，因為佢知我好鍾意食醉雞~
呢碟醉雞真係正！酒味夠濃夠香，以冷盤方式烹製，酒汁凝結成晶狀，但絕不硬身，入口後酒汁開始溶化，滲進雞肉滑進喉嚨，惟雞肉本身不見特出~
多謝屎塔~
一杯有參味嘅飲品，唔錯~
佢哋三個點嘅湯
我都有試少少，幾好~
我點嘅湯
我本來點果個係有海膽，好特別，不過佢哋話海膽賣晒......
呢個呢，用料算珍貴嘅材料(menu 聲稱)，材料名真係未聽過~
碟就大呀，湯嘅份量真係少得驚人~
味道亦唔錯~
宮保雞丁
呢碟係最唔受歡迎嘅，賣相就唔錯，但味道確一般~
油墨菜
都唔知發咩神經，北京啲油墨菜特別好食！
唔記得乜菜
揸機果個好離譜，咁都收貨！
蜜汁燒鰻魚
呢個認真唔錯！通常食鰻魚食幾舊就開始膩，呢碟就唔同，我食咗好多舊仍然有再食嘅衝動，一啲都唔覺得膩，仲幾好食！
烤鴨 (連鴨湯)
最期待嘅烤鴨出場~
師傅推住部車仔嚟到我哋身邊，即場片皮~
老實講，你片完先出嚟同片俾我睇，我個人冇咩感覺，最緊要食果吓嗟~
調味料規定按人頭計，每人一碟，碟碟計錢，咁如果我唔食鴨嘅呢？
品質好好，但味道就以「花家怡園」略勝一籌，但我仍然會話係好食！
甜品及生果
總結呢一餐，雖然略貴，但非常豐富及滿足，惟職員一貫京式態度，實在係美中不足~
下一站到「南鑼鼓巷」閒逛，本來計劃係步行，當然，都係搭的士好了~
離開大門時，門口職員問我哋要唔要的士，跟住佢就主動幫我哋截咗一部~
「南鑼鼓巷」真係一條巷而已，兩旁有各種店舖~
成條巷都好黑好暗，其實幾個人咁樣行，氣氛真係唔錯~
不過呢度比什剎海靜得多，始終只係行街為主，冇咩夜店~
本來要搵一間 MAO 嘅清吧坐吓，不過大家都好攰，就協議唔會刻意去搵，但如果經過見到就會入，最後都係見唔到~
我哋仲買咗杯麵做明早嘅早餐~
仲有另一間食肆要去試吓嘅，呢間嘢叫「文宇奶酪店」
顧名思義，以奶為主，係一間甜品店~
條巷好暗，我哋主要留意有燈嘅舖頭，直至行晒都唔見呢間嘢，再睇吓地址，真係過咗籠，唯有返轉頭以門牌號碼查找~
終於俾我哋搵到！不過好可惜，已經關門，雖然未到關門時間，但呢間嘢一向都係售完即關，冇辦法啦~
行完「南鑼鼓巷」就打的返酒店，今日行程告終~
沒有留言:
發佈留言