不過今日時間上嘅緊，係呢八日嚟最勁緊嘅一日！
因為今日要搭 1630 機離開日本返香港，即係話 1430 要到機場。
出發前，旅行社仲同我講，星期日成田機場會勁多人， 千其唔到諗住遲少少冇問題，叫我一定要準時 1430 前到！
好嘞，1430 要到機場，喺新宿去機場，最快嘅方法就係搭 NE'X(屬 JR 一種)，要一個鐘多少少，而且班次唔會好似一般列車咁密。
好好彩，1242 有班車由新宿去成田機場，1350 到達，時間上係早咗少少，但搭遲一班已經遲好多， 差唔多可以肯定趕唔切班機(每位 3110 日元)。
好嘞，咁 Hello Kitty Land 返去新宿市中心又點呢，要搭京王列車(唔知有幾驚惶呢......@@)。
1130 有車，但呢班車要轉一次車先可以到新宿，1203 到達。
1144 有車，呢班車唔駛轉車，但要 1221 先到。
點揀呢？
Hello Kitty Land 1000 先開，搭早一班車，回程預埋步行買飛搵月台嘅時間，只可以玩到 75 分鐘，但又怕轉車時出問題；搭遲一班車，可以玩到 90 分鐘。
以一個咁嘅樂園嚟計，75 分鐘真係太少，儘管 90 分鐘都係太少，但呢十五分鐘相對地變得好重要。但問題係，1221 先到京王線新宿站，21 分鐘內要出閘攞行李，再的住 18 KG 去搵 NE'X 月台，真係有啲冒險。
唉，到時先算~
今日 0600 起身，不過今日早餐唔係喺酒店食，係走在街上，邊行邊睇邊決定。
離開酒店，向 Hello Kitty Land 進發！
由酒店去 JR 新宿站，都有一段距離，我哋發現想搵間食肆入去食早餐都幾難，可能太早喇......
於是我哋就打算去到先算，反正搭車方面唔係咁熟， 早啲出發都好嘅好~
由新宿市中心去 Hello Kitty Land，要搭一條叫京王線嘅鐵路， 由新宿站搭到去京王多摩センター站，每位 330 日元。
要搭京王線，要入咗 JR 閘先，再行去入京王線閘。
呢個站複雜到呢......真係唔識形容！
幸好指示尚算清晰，都唔算太難搵。
喺好亂但又唔太難搵嘅情況下，我哋上咗京王線嘅列車， 並且好順利咁到達目的地。
步行五分鐘就到 Hello Kitty Land。
途中，我哋發覺天氣異常寒冷同好大風，不過都冇咩計， 我哋啲帽同手襪唔喺身邊~
到埗後，我先發現一樣嘢，呢樣嘢令我好震驚！
離遠我哋已經見到好多人，我先醒覺，今日係星期日， 我竟然冇預到會有好多人，我竟然冇諗過，我竟然失策成咁！
呢一刻，我真係好自責，我哋時間上已經緊得無可再緊， 竟然犯下如此不能犯嘅錯！
講乜都冇用，排啦~~~~~~
不幸中之大幸，我哋喺市中心搵唔到嘢食，早咗到， 否則排得隊嚟都夠鐘走！@@
(呢刻係 0845)
一路排，一路都有啲職員維持秩序，並且拎住啲唔知咩係咁講， 係互動嘅，對排隊嘅人有物件上嘅交流，我完全唔知做乜， 到我哋嘅時候，知道我哋唔識日文，佢就 skip 咗我哋~XDDD
咁啱隔離有間哈迪斯，我哋就決定食哈迪斯。
屎塔繼續排，我就去買嘢食。
(其實呢一刻，我哋手同個頭已經凍到痴線......)
我入到哈迪斯，感覺真係彷如隔世，好 warm 呀~~~
買完嘢嗱嗱聲標出去同屎塔一齊食早餐， 同時都希望食完嘢個人可以暖啲~
一路排一路食嘅時候，睇到好多慘劇，真係，聞者心酸，見者流淚， 慘不忍睹！
成條隊都充滿喊聲，啲細路仔凍到喊過不停~
有啲有 BB 車，啲大人都唔放落去擋吓風！
有啲細路更離譜到著住短褲！
父母們，你們是癲的嗎？
我著住件羽絨都凍到死咁滯，你同個細路著短褲？？？
食完嘢，我主動問職員門票種類嘅事情，佢叫咗另一個人嚟， 果個人就叫我到最前嘅售票處買票先，我心諗， 唔通前面排隊果啲人全部都有飛嘅？@@
唔理啦，佢叫到我咪做囉，我帶住接近零度嘅身軀， 好不容易先捱到去最前售票處，點知售票處又未開， 個職員就叫我企喺度等(即係吹)陣......
等等等......呢刻嘅感覺，真係想死......
我必須強調，我真係好&很凍呀......@@
彷彿過咗一個世紀，售票處有人喇！
買完飛我就返去搵屎塔，一齊研究吓場內嘅地圖同設施。
我哋必需要諗清楚方向同遊玩次序，因為我哋實在太少時間！
就嚟到 1000，我心諗，如果可以提早少少放啲人入去就好嘞~
結果真係早咗少少，大約十分鐘到。
老實講，Hello Kitty Land 其實唔多 Hello Kitty，係 Sanrio 嘅 product 系列都有。
我哋首先坐船遊覽一吓小小世界，冇乜特別。
之後就係周圍行吓睇吓嘢咁，比較特別啲嘅可以話係 Hello Kitty House，屎塔咁鍾意 Hello Kitty，佢當然開心啦，即時變成一個可愛嘅小朋友~=)
勉強叫做行晒(只係計最想行果啲咋)，我哋就匆匆咁離開 Hello Kitty Land。
呢一刻係 1115，咦，趕得切早果班車喎！
不過隱憂係要轉車......
點都好，有早就搭早果班！
我哋成功登上 1130 班車，但就好猶豫轉唔轉車好，因為我哋上車時見到班車寫住「新宿方面」，照計我哋唔轉車都去到，咁點解要轉車呢？
到咗"需要"轉車果個站，好多人出，我就伸個頭出去裝吓， 對面線班車都係寫住「新宿方面」，不過，對面線果架係特急列車， 即係話，唔好諗咁多，轉！仲要，快！因為啲車好鬼快就閂門......@@
結果，冇轉錯車，又一次証明我係一個充滿智慧嘅男人~XDDD
特急列車飛好多個站，同本身果架車真係爭好遠，本身果架係第二慢嘅，只有一兩個站會飛。
我哋成功喺 1205 就到咗新宿，要趕 1242 班 NE'X，相信冇問題。
我哋沿住指示行返去 JR 站，記得入閘時係先入 JR 再入京王線，但出閘時就只需出一個閘口，而呢個閘口係屬於 JR 定係京王嘅，我就唔係好知喇~
嚟到整個行程最擔憂嘅時刻，就係搵返行李跟住趕去搭 NE'X。
出咗閘，面對一個咁鬼複雜嘅鐵路站，真係唔知從何入手， 我同屎塔都未能肯定邊個方向先係啱嘅， 我哋又走到站內地圖度研究，喺 60% 肯定嘅情況底下，就向住果邊行，去到都係搵唔到......
我個心真係急死，唔通要我喺行李同搭得切飛機之間揀一個？？？
唔係咁大鑊下嘛......@@
直覺話俾我哋知已經到咗附近，但時間亦開始逼近，個心真係好急， 但我哋知道急係冇用嘅，最緊要冷靜！
基於直覺，我哋唔再考慮其他位置，集中搜索附近， 但我哋唔可以分開，所以冇得分頭行事......
結果，搵到喇！不過而家係 1230，仲有十二分鐘咋！
我哋撗衝直撞咁走走走，我都顧不得隻手可能已經斷咗， 一路的住個篋走，最後喺 1240 趕到！
點知班車遲咗十幾分鐘！
上咗車，真係好攰，檢查吓隻手，好彩未斷。呢一刻， 真係要好好休息吓。
1330 醒咗，無所事事，等到站落車，沿途都冇咩特別，冇耐屎塔都醒咗，我哋發現已經過咗 1350(原定到達機場時間)，但仲未見到任何機場嘅跡象，心又開始急起嚟，會唔會過咗呢？冇理由吖，1330 到而家，架車都未停過，NE'X 一定係去機場嘅，而且個個都有行李跟身。但係根據資料顯示，日本嘅火車可以話係分亳不差嘅......
不過咁，都遲咗十幾分鐘先到同開車，時間上當然會順延，只係我估唔到遲到唔只十幾分鐘嗟，即係話連行車時間都比正常長咗~
大家都咁遲，我相信都冇咩好擔心，繼續睇完全冇變化嘅景......
1420，終於都到喇！
由於我哋喺函館已經在網上辦妥咗登機手續，去到 counter，我哋只需排一條較短嘅隊，不過都有唔少人，我講過啦，淨係你識咩......
不過排還排，最慘係要俾好多人合法打尖，因為佢哋唔能夠再慢慢排，排得嚟就趕唔切上機，冇計啦，呢啲情況，實要讓嘅~
搞好手續後，當然要去食 lunch 啦！
食完嘢行咗一陣就入閘、上機、食飛機餐，預計 2045 會到香港。
每日點滴：
我好唔明白點解啲父母會帶小朋友去玩，但就唔俾佢穿得暖，呢一點真係令我覺得好奇怪。
呢個旅程，真正令我有「慌」嘅感覺係搵唔到行李果刻。新宿站之大，真係有機會喺入面迷路......
沒有留言:
發佈留言