《瞬間看地球》Stranger's Blog: 2010.10.23 台中、台北 (台灣第三天)

今日行程：
Masalili → 台北 → 泰福桔子商旅 → 良品牛肉麵 → 台北101 → 華納威秀影城 → 新光三越 → 誠品信義旗艦店 → 南港捷運站 → 五分埔 → 饒河夜市

由於今日要到 Masalili 揀相，時間方面極難控制(其實係不能控制)，晚間景點預咗有機會全部取消，真係有時間先會去~

我預計噚日影咗成日相，今日會非常疲累，故去 Masalili 之前，不作任何遊覽安排，盡量休息，豈料晨早自然起咗身，仲鬼咁精神又唔覺得攰，去旅行即係去旅行，人體潛藏嘅能力終於得以發揮~ XDDD

執好晒行李就落樓下 check-out 先，再慢慢嘆個早餐~
早餐款式同噚日唔同~

慢嘆完個早餐仲有大把時間，我哋放低晒啲行李喺酒店，再周圍行吓~
其實噚日我已經有少少喉嚨痛，好彩冇影響拍攝，今日情況比噚日嚴重，決定過對面便利店買啲藥性喉片~

入到便利店行咗個圈都唔見有藥性喉片，唯有開口問店員，原來台灣只有藥房先可以賣含有藥性嘅產品，冇辦法啦，反正唔係好嚴重，陣間經過見到先買~

行咗出大路無耐就見到有間藥房，向店員說明來意，佢就俾咗排喉片我，呢種喉片我係未見過嘅，唔係我心目中想買果種，但見佢個樣都幾誠懇，信佢啦！

屎塔唔知做乜啲手指生晒倒刺，順便喺度買埋指甲鋏~

漫無目的咁 hea 遊，一啲都唔過癮！
兩隻遊魂野鬼完全冇方向咁行，「喂，不如行吓果邊囉」「哦，好呀」「都冇咩好睇，不如返轉頭行吓果邊囉」「哦，好呀」「不如返酒店坐吓囉......」「哦，好呀」

我哋行嘅呢一邊係住宅區嚟，今日係星期六，而家都成十點鐘，條街非常冷清，人影都唔多隻，仲要好鬼曬，曬到個人好攰，真係行到唔想行，唯有返酒店休息吓~
沿途都有影過吓相~

獨臭之家，究竟係咩嚟呢？有幾臭呢又？

冰火菠蘿油，點冰火法呢？同李小龍又有咩關係呢？

喺台中，經常見到呢種臭臭鍋店舖，唔知係咩嚟，又有幾過癮呢？ @@

行到返酒店，喺大堂坐咗一陣，決定提前到 Masalili~
酒店職員幫我哋叫車，我哋拎埋啲行李就出發去 Masalili~
未夠 11:30 就到達 Masalili，職員安排好我哋坐低，再檢查吓我哋啲相有得睇未~
今日呢位女職員叫 ViVi

我哋早咗半個鐘有多，都預咗未必咁早有得睇~
結果真係未有~
ViVi 話要等，俾咗幾本雜誌我哋睇，都係同結婚相關嘅雜誌，我就冇咩興趣，揭兩揭就再冇睇到~
間中又手痕按吓電腦啲掣，睇吓有得睇未，未有......都係未有......仲係未有......

等到差唔多 12:00，終於都有喇！不過由於唔係 ViVi 開俾我哋睇，當然佢都冇叫過我哋自己試，所以我哋睇得好鬼鼠~
睇咗四五張，屎塔見到 ViVi 嚟緊，我哋即刻將電腦螢幕還原，咩事都冇發生過咁~ =P
ViVi 走埋嚟睇吓有未，當然係有啦，佢就開始教我哋用個軟件，要嘅又點做，唔要嘅又點做~

總共二百多張相，我哋可以擁有 45 張，其實好難揀，所以決定買多一本！
由於影之前已經買多一本，享有八折優惠，拍照過後再買相都可以有八折，而家我哋可以揀 65 張相~

要 foul 百多張相，真係好難，因為必 foul 嘅相真係好少，張張都影得好好~
我哋首先減去一定唔會揀嘅相，繼而喺效果相約嘅相當中選一張，儘管經過兩部份嘅減相過程，都只係減咗好少相......
其實剩下嘅相我哋都好鍾意，決定平均咁分配俾幾套衫~

我係一個有選擇困難症嘅人，喺屎塔嘅帶領下，經歷咗極之痛苦嘅三個小時，決定好六十張入相簿嘅相，五張只要檔案嘅相，放入十二吋相架嘅相，放入八吋相架嘅相~
其實我都唔知幾時送咗個八吋相架俾我哋，package 入面係冇提過嘅，我估計係之前加購 20 組相(即一本相簿)嘅時候送嘅~

睇完晒啲相，之前對 Sky 嘅不信任態度，一掃而空！佢影嘅過程的確唔夠專業，但影咗出嚟嘅相相當有水準，我哋都好鍾意，同樣係好難作出取捨~

跟住 ViVi 埋到嚟，記下所有資料，點知佢話仲有一個十二吋相架送俾我哋，我估計係加購第二本相簿送嘅，我哋即時又揀張相放入第二個十二吋相架~
再嚟 ViVi 就向我哋講解返整個修片(執相)程序，但首先要知道我哋嘅意向~

每張相都會經過基本修(基本修係佢哋嘅用詞)先會俾我哋睇，至於基本修，分四個級別，第一級係最輕微，佢每級都有 sample 俾我哋睇，係同一個女仔嚟，睇到第四級，我同屎塔都不約而同咁發出一吓低呼，相中人假到根本就係動畫人物嚟，ViVi 都話冇人會揀呢種程度嘅修片~
經過基本修後就會經電郵聯絡取第一教嘅相片，睇吓仲有冇咩地方要執，通知返佢，之後又會嚟第二教，直至冇嘢需要修改為止~

十二吋相架有四種款式；八吋相架有兩種款式，ViVi 帶我哋去睇實物，其實款式大同小異，主要係顏色嘅分別~

講解完之後，ViVi 俾咗幾份嘢我哋簽，都係一啲保障相方利益嘅文件，內容比較偏向 Masalili，但我認為合理，一一簽下~

今次台中嘅拍攝過程，已經告一段落，可以毫無顧慮咁正式開始我哋嘅台北之旅~
一如之前兩日，職員幫我哋叫咗計程車，而家係 1530，俾原定遲咗半個鐘，不過都已經好好，起碼餘下嘅行程唔駛減晒~
搭計程車到台中高鐵站，預計要半個鐘，交通非常暢順，差唔多 1600 就到高鐵站~

1600 果班車肯定搭唔到，下一班係十五分鐘後，就搭 1615 果班車啦~
走去售票機買票，有啲擔心唔識用，但眼見個個都自己買票，相信應該唔難用~
兩個大人台中至台北，非常容易就買咗兩張票~

高鐵列車

列車上每邊有三個座位，都幾多人，我哋搵到一排入面有兩個位冇人坐嘅，坐最外面嘅係一位中年男仕~
坐落唔係好耐，個中年男仕開口講嘢，係同我哋講嘢，講國語嘅~
內容係關於屎塔掛於頸上的單鏡反光相機，又問係咪新機嚟，佢話佢都有一部，仲講埋係咩 model，就喺佢個背囊入面~
不過屎塔又未去到發燒友嘅程度，著實冇咩好傾，佢見我哋都唔係好熱情，就冇再講落去，瞓咗覺~

高鐵上有一長方小螢幕，間有顯示現在嘅行車速度，縱使係超過 300km/h，依然非常穩定，感覺唔到好快~
一小時後，我哋到達台北喇！
天氣仲幾好添！

由車站行去飯店，只需五分鐘，識路的話......
車站對開係大馬路，我哋選擇咗由地下街通過最近飯店嘅出口，不過落到地下街，勁多人，同時，我哋亦都喺地下街迷了路~ XDDD
當然，有地圖又點會去唔到丫，問吓人就得啦~
問咗人，好容易就搵到我哋要搵嘅出口，上到地面轉個彎就見到飯店嘅招牌~

咁次呢間飯店，只係一間商旅飯店，冇咩設施，真正純粹租房，地下門口只得一扇門，一部 lift~
接待處設於三樓，對我哋嚟講算係新鮮事~
三樓出 lift 就係微型接待處，check-in 完就嗱嗱聲入房～
間房非常細，不過麻雀雖小，但五臟俱全，比想像中好，冇驚喜冇失望~

嚟到台北第一個景點，係食牛肉麵，我安排咗喺飯店附近一間幾出名嘅牛肉店 - 良品牛肉麵
由飯店步行過去，不用五分鐘就到~
良品門面普通，入面更加係冇裝修可言，啱晒我~

我哋被安排坐喺樓上，坐低睇餐牌，再睇返本旅遊書，未睇完個侍應已經推介紅燒牛肉麵，話最多人叫咁話喎~
咁我同屎塔兩個人，冇理由叫埋同一款咖，最後一人叫一碗牛肉麵，不過口味不同嘅~
- 清燉黃牛肉麵　(原味)
- 紅燒牛肉麵　　(微辣)
- 一杯豆漿

清燉黃牛肉麵，味道認真唔錯，肉質腍滑，不過食到尾的話，感覺較為單調~

紅燒牛肉麵，微微嘅辣味絕對增加食慾，食到尾都仲覺得唔夠，不過對於唔食得辣嘅人來說，唔係微辣喇，算係幾辣~

兩碗牛肉麵用嘅麵都係刀切麵，闊約兩厘米，絕對唔係走彈牙路線，但咬落口感過癮，唔識形容~

杯豆漿都唔錯，幾好味~

跟住落嚟就去傳說中嘅「台北101」
去台北101，只需搭捷運去到市政府站，再轉台北101嘅穿梭巴士就掂，算係好方便~
不過我哋未買悠遊卡，喺台北捷運站買兩張先出發~
悠遊卡係類似香港嘅八達通，不過用途就冇咁廣，主要用於交通工具~

出咗市政府站，要搵穿梭巴士上車地點，唔算好容易，最後我都係要問人，點知一問，就有巴士到，個女仔指住架巴士......

以今日係星期六嚟講，真係唔算多人上車，只係僅僅坐滿，冇咩人要企~
坐咗大約二十分鐘就到，落車後就喺台北101面前~

台北101底層為購物中心，中層係辦公室，頂層自然係觀景台~
我哋嚟呢度自然唔係為咗行購物中心，一心只為上觀景台~

入到商場，指示真係唔多足夠，最後搵到觀景台售票處設於五樓，有獨立 lift 可直達，不過呢部 lift 嘅位置非常唔起眼~
上到五樓就知大鑊，好鬼多人，時間上肯定會失晒預算！
係我嘅疏忽，冇預到星期六上台北101觀景台嘅人一定多！
還幸今晚嘅行程係好有彈性嘅~
即刻走去買飛再走去排隊~

其實排隊主要係排部 lift，由 5/F 直接去到 89/F，以時速 60 公里升上去，只需 37 秒便到，已經被列入世界紀錄！

排隊其間，會經過一個影紀念相嘅地方，基本上會安排每一組人入去影，然後好快就會喺牆上螢幕出現~
構圖係被攝者會同台北101咁上下高，拍埋一齊咁樣，當然係要俾錢買啦，又當然，我哋係唔會買啦~
呢個畫面只係維持咗幾秒，我哋嘅首席學神攝影師當然唔會錯過呢一刻，掂！

等咗差唔多半個鐘先到我哋乘搭呢部世界之最，升上去嘅過程都幾靜同冇咩震盪，感覺上真係眨吓眼就上到 89/F，真係好勁~ @@
當刻大家一齊做緊嘅，除咗呼吸，相信都係不停吞口水，以調節耳仔嘅氣壓~

89/F 係觀景台，360 度都係玻璃圍牆，不過台北市中心夜景實在再普通也沒有，吸引力只屬一般~
再加上啲玻璃勁反光，影出嚟嘅相，張張都有倒影，屎塔都冇咩興趣喺度練習攝影~
不過一場嚟到，我哋都繞咗一圈，睇晒咁多個方向~

上多兩層，就可以到戶外，唔使隔住玻璃，相信影出嚟嘅相會好好多~
上到去一踏出門口，不禁徹底失望！

四圍都有高身圍欄，正常不過，但圍欄外竟然有向外及向上約 45 度圍牆，圍牆高度可以話遮擋了一半嘅景觀！
要影到較大範圍嘅夜景，必需舉機向斜下拍攝，咁樣影相實在係冇咩意思~
環顧四周，唔超過五個人，求其，真係超求其影咗兩張相，等自己有個記憶就算~

再落返 88/F 睇吓一個叫「風阻尼器」嘅物體~
在此之前，要通過一條走廊，呢條走廊地下似係螢光幕嘅東西，影像全是雲層，當有人踏上去，雲層就會在被踏處散開，形成一幅鳥瞰城市嘅圖畫，當然，就算認唔出，都估到係台北市中心~

「風阻尼器」，照字面解讀，或許可以估到大約係啲咩，正確作用為：遇上強風或地震時，能產生反作用力，減低大樓搖晃程度
對我嚟講，只係一件物件，當藝術品嚟睇都幾得意~

台北 101 附近有華納威秀影城、新光三越同誠品信義旗艦店，全部都係喺計劃行程之內~

- 華納威秀影城，原本打算入去行個圈，不過而家冇時間，經過影吓相就算~

- 新光三越，原本都冇打算入去行，經過影吓相就算~

- 誠品信義旗艦店，諗住最少花半小時遊覽，不過而家冇時間，有入去，但只係花咗五至十分鐘，叫做望一望咁啦~
不過都冇咩失望嘅，本身就諗住未必去到，而家最少都經過吓，入過吓~

再落嚟嘅景點就係其中一個捷運站，係，冇錯，就係去觀賞一個捷運站，南港站~
呢個捷運站嘅特色，就係成個站都有壁畫，創作嘅人，好多人都會聽過佢個名，佢就係幾米~

既然係捷運站，交通方面絕對容易~
捷運市政府站同南港站係同一條線，而且相差只係幾個站，唔駛十分鐘車程就到~

一去到個站，已經見到路軌上嘅牆壁全是壁畫，再上大堂、出入口，都搵到壁畫嘅蹤影，不過唔係全部出入口都有~
個站冇咩人，我哋兩個係咁周圍睇係咁狂影相，真係 free 到爆！

跟住落嚟就去五分埔，其實五分埔冇咩特別，佢只係類似旺角嘅花園街或者係女人街咁，不過因為去之後嘅景點都會經過五分埔，不妨順道一遊~
去五分埔，只需搭捷運到後山埤站便可，五分鐘就到~

去到後山埤站，我察覺到有位站務員不停注視我哋，沒甚表情，亦唔覺佢有意走近，究竟咩事呢？
當時我哋睇緊站內提供嘅地圖，我刻意同佢有眼神接觸，佢終於走埋嚟，佢係以一種友善嘅態度走埋嚟~
一埋嚟就問我哋想去邊，我哋自然話佢知我哋嘅目的地~
佢指住地圖教我哋去，又問我哋係咪住近台北車站，跟住仲講咗一句令我哋驚訝嘅說話：「你們去了就不要回來啦~」
@@!!!
發生咩事呀？
不過我哋好快就知佢嘅用意，因為我哋最終站係饒河夜市，由饒河夜市去最近火車站(松山火車站)同最近捷運站分別係五分鐘同十五分鐘，所以佢就叫我哋搭火車走都唔好行多十分鐘搭捷運~

其實事前我有諗過搭火車走，佢講嘅嘢我都知，我冇咁安排，係因為喺台灣搭火車不如搭捷運般方便，好多時要購票夾班次同目的地，我乘機問吓佢，由松山火車站到台北，可否使用悠遊卡入閘而不購票，答案係可以，既然係咁，就試試搭火車返台北站啦~

其實我估佢之前講果句說話係：你們去了就不用回來啦~
當地人講國語講得快，而我又是一個不愔國語的人，相信是我將"用"聽錯成"要"吧~

我哋"射射"完佢一輪，佢問我哋：「你們是從香港來的？」
我哋問：「你是怎麼知道的？」
他說：「我的老婆是香港人呀！」
原來如此！不過咁，一睇就知兩條粉腸係中國人，說話帶有濃厚"國語不流利"口音，都好大機會係香港人啦~
同佢傾咗兩句就繼續我哋嘅行程，向五分埔進發~

步行唔夠五分鐘就到五分埔，同花園街真係冇咩分別，我哋叫做到此一遊，左望右望就穿過咗，實在冇咩吸引到我哋~

穿過五分埔，打算向饒河夜市進發，不過，我哋迷路了~
喺台灣迷路，其實冇咩所謂，同當地人溝通到就得，不過始終唔係母語，難免會說出一個笑話來~

我哋見到三個女仔行緊過嚟，即刻捉住佢哋問吓路~
佢哋互相傾咗幾句，就教我哋搭巴士，我哋原本係打算行過去，就問佢哋行過去點行~
跟住就係幾句有趣嘅交談......
她們：「你們想用走的嗎？」
屎塔：「用跑的！」
她們一陣驚呼：「跑的?!!!」
我同屎塔：XDDD

其實以屎塔嘅國語，絕對唔會唔識走路即是步行，我諗佢只係太集中去聽，又有點緊張先會講咗句咁嘅說話，要屎塔同台灣人溝通，其實絕無問題~
最後佢哋梗係知道我哋只想行去，不過佢哋話都幾遠，但就指咗個方向俾我哋~
根據我做嘅功課，好多網友都係行去，我哋決定跟住個方向行過去~

由五分埔去饒河夜市，我哋經過松山火車站，成段路程大約十分鐘，步行真係冇咩問題~
終於去到饒河夜市嘅入口~

呢度嘅佈局，係左右有舖頭，中間又有攤檔，我哋一入去就由左面上，打算去到尾就由右落~

不過我哋好快就發現，我哋正在逆流而上！唯有搵路返過右邊~
屎塔真係好鐘意食呢種餅(圖)，去到邊見到都嚷著要買要食~

又要讚一讚啲台灣人，其實現場係好多人，通度窄但又勁多人嘅情況，難免會被踩踭、會被輕碰，但喺呢度，係冇咁嘅情況，大家都慢慢咁跟住大隊速度慢慢前進，喺咁嘅環境又冇人管理都可以咁有秩序，呢啲真係人嘅質素問題~!!!

跟住就坐低 share 咗一碗「十全藥燉排骨」，我相信，所謂十全，其實唔係咩十全大補酒個十全，十全只係個店名而已~
都幾有藥材味，算唔錯~