木柵動物園 → 深坑老街 → 貓空 → 金峰魯肉飯 → 西門町老天祿 → 良品牛肉麵 → 桃園機場 Hello Kitty 候機室
今日仍然有雨，求神拜佛唔好咁大呀~~~
不過今日未出發已經有個壞消息，屎塔肚痛呀~ >_<
希望佢痛一陣就冇事啦~
晨咁早就走去 check-out 先，再寄存行李~
屎塔真係一隻奇怪嘅動物，最唔舒服果日，竟然有為早餐影相~
由酒店到動物園，搭捷運到動物園站就到~
喺搭車之前，我去咗增值先，增值完先如夢初醒！
其實我點解要走去增值呢？完全係一個迷！增值完先發現入面本身已經有百多元，增乜鬼嘢值呢？仲兩張一齊增......@@
唯一解釋，就係噚晚搭巴士時拍卡失敗之後第一個諗法太根深柢固，搞到個人成日諗住要增值......
今日撞啱人哋返工時間，喺忠孝復興站轉車時非常多人，多人到一架車都上唔晒~
去動物園站果條線叫木柵線，我哋搭果幾個站都係架空嘅，啲列車相信係無人駕駛，兩邊都唔見有駕駛室，但就有工作人員揸住個 remote control 咁嘅嘢，而且列車兩端都望到出邊咖~
去到動物園，又係佢哋，又係佢哋呀！成班小朋友~ @@
Plan 行程時睇到啲人話動物園好大，通常一次玩唔晒，要分兩次去~
但我只有三小時，我就預咗嚟到只睇有興趣嘅動物，選擇性遊覽。但我睇張遊園地圖又真係唔覺得係咁，冇理由一日玩唔晒~
以我嘅判斷，除非每個項目都注足觀賞，俾盡你玩大半日乜都睇晒，就算要同時間競賽，三小時行晒都唔係唔可能，咁當然啦，完成咗能被稱為壯舉就話姐，否則就冇咩意思~
雨勢開始大，我哋又要著返件雨褸先起程~
首先去嘅係昆蟲館，不過去到館外，屎塔坐低咗，因為......佢捱唔住喇~ >_<
我陪佢坐咗一陣，佢就叫我自己入去昆蟲館，佢就坐喺度等我~
屎塔，你唔好死呀~ >_<
其實我知道我陪住佢都冇咩意思，肚痛就係肚痛，旁人又可以幫到啲咩？
我只好聽佢說話去做，自己入去昆蟲館，但我會盡快返返出嚟~
昆蟲館，都係果啲啦，冇咩特別~
話時話，我喺香港或者去旅行時接觸過嘅昆蟲館，都冇見過介紹曱甴嘅？
我遊完昆蟲館出返嚟，唔見咗屎塔，屎塔，你去咗邊呀？其實肚痛一係休息一係洗手間嘅姐，我估佢係去咗洗手間~
等咗佢一陣就見到佢慢慢行緊返嚟，佢話我知佢去咗洗手間，我好希望佢去完會好啲，點知佢話冇，唉~
休息咗一陣，屎塔話好啲喇，可以去行吓~
我知道佢所謂好啲都唔算係真係好，只係可以捱得到嗟~
佢係咁同我講對唔住，話佢破壞晒個行程，我心諗：你知就好啦~ XDDD
呢區都冇咩想睇，諗住去搭小火車，但去到附近，屎塔病情又開始變壞，要坐低休息吓~
屎塔，你唔好死呀~ >_<
我哋就坐喺度，望住搭小火車嘅人，等少人啲先去搭~
不過，一批一批小朋友不停咁進駐車站，我哋都等咗差唔多半個鐘~
其實人多定人少都冇關係，最緊要係俾屎塔休息吓~
眼見車站冇咩人，屎塔情況又可以，我哋就走去搭小火車~
小火車冇咩特別，只係方便由南面到北面嘅遊人，因為南至北係上斜位，可以選擇搭小火車上，由北而下咁遊~
坐到上上面，行咗幾個館，有爬蟲有企鵝，冇咩特別~
又搭返小火車返嚟正門離開~
之前紙上談兵，只係睇地圖就覺得大半日要行晒冇問題，而家都叫做行過吓，大約知道有幾大，我要改口嘞，根本唔駛大半日，半日就夠！
下一站係「深坑老街」，深坑老街又名深坑豆腐街，以豆腐聞名~
Plan 行程時，見佢都幾近動物園，所以決定前往，反正預咁多時間喺動物園我會覺得太悶，去多一個景點似乎比較充實~
由動物園去深坑，有幾架巴士可到，其中一架巴士可以話係點到點，一落車就到，但呢架班次最疏，非常難預算~
其他巴士落車地點唔理想，落咗車要行最少十分鐘先到，今日係最後一日，1900 要到機場，時間要控制得好啲，反正唔遠，我決定搭計程車~
到咗目的地，一落車就見到一檔檔夜市咁款嘅環境，我哋相信已經到咗深坑老街~
的確，差唔多每個檔口舖頭都同豆腐有關，但係由於屎塔今日咁嘅狀態，掃街興致肯定大減，再講，其實啲檔口賣嘅食品真係一啲都唔吸引~
我哋事前已計劃好會到「古早曆」食嘢，坐低睇吓餐牌，打算叫啲細份又冇咁油膩嘅食品，不過就冇咩選擇，好多都係一窩或者一煲咁，兩個人可能食唔晒，更何況好有可能只有我食~
佢又奇怪，臭豆腐又只有辣味提供，就連俾屎塔試一口豆腐都唔得，最後叫咗紅燒豆腐煲，算係最細份，有可能食得晒~
屎塔只係食咗少少，其餘嘅就係我包辦晒，食物品質幾好，但唔係特別出色，有點名過於實，我就唔相信喺台北要食呢種質素嘅豆腐，要嚟到呢度先有~
再加上店員態度麻麻，唔嚟真係冇損失~
繼續行落去，我哋到咗「顏藝德興」，顏藝德興係專賣豆腐冰淇淋嘅，我哋試咗一杯，的確好有豆味，但亦唔算特別，至少雪糕在口腔溶化過後，已經忘記它的味道~
計劃嚟深坑老街，不為豆腐本身，只為那種老街情懷~
下一站係「貓空」，我哋自然係搭返計程車往捷運動物園站，途中我問屎塔不如唔好去貓空，免得舟車勞頓加重屎塔病情~
不過我知道這是廢話，因為屎塔病情睇落稍有好轉，雖實質可能只係身體習慣了或對這種不適麻木，但我知道佢唔會取消，再講，佢本身已經有種無謂嘅歉疚，如果再因為佢取消行程，除非佢好唔舒服啦，否則就應該唔會~
到咗捷運動物園站，再步行二三百米就到達貓空纜車動物園站~
坐貓空纜車可以用遊悠卡，總共有四個站，中途站係可供上落嘅，有中途站嘅纜車真係第一次坐，有趣~
上到貓空，環境一般，計劃好上到嚟除咗觀光，仲會到「美加茶園」食嘢，美加茶園距車站都有一段路，以屎塔嘅胃口同體力，其實去嚟都冇咩意思，我再次建議取消食嘢嘅環節，閒逛貓空便算，屎塔掙扎咗一陣，話一場嚟到，都想去，行到唔想去先折返，我冇異意，一切照佢意思去做。不過行咗二三百米到，屎塔就話唔得喇，唔係好掂，只好取消~
取消景點就好閒，我寧願可以代屎塔受苦，屎塔，你唔好死呀~ >_<
吃不到的葡萄是酸的，既然去唔到美加茶園，我哋打趣說呢間嘢一定唔好食嘅~ =P
我哋隨即離開貓空，搭返纜車落山~
落山時，我哋討論剩返嘅時間去邊好，首先，我要再去一次西門町，因為阿媽指定要我買鴨舌俾佢，但鴨舌唔可以喺室溫存放太耐，所以我要喺最後一日安排時間~
我又記起，屎塔食完良品牛肉麵後講過，希望呢次旅程再有機會食多次，我知道以屎塔而家嘅狀況，冇胃口又唔想周圍去，但我唔想自己諗完就代佢決定埋，所以我提出可以再到一次良品~
又，我自己想食多次金峰魯肉飯，我又提出~
屎塔認為，搭車行路問題不大，但食嘢就真係唔係好得，但其實心理上係想食嘅，只係生理上未必受得到，唔緊要吖，到時你食唔到咪我食晒佢囉，最緊要唔好死頂，真係冇問題至好~
為咗隔開兩餐，我放咗西門町喺第二位，而家先去金峰~
去完金峰就去西門町，屎塔就坐喺月台度等我，我自己去買嘢再同佢會合~
跟住就去捷運台北站退返兩張遊悠卡，再步行去良品~
屎塔都有食少少，我哋想叫杯豆漿，可惜賣晒，我走過對面買咗杯「消除疲勞」，其實係橘子飲料，不過呢杯嘢真係超爆咁難飲，甜到飲一啖都想嘔，但屎塔有少少脫水，佢都唔理得咁多，飲！
食完嘢就返酒店攞返行李，再步行到搭巴士嘅地方~
買完巴士車票，已經有部巴士等緊，上咗車唔係好耐就開車，正！
巴士車程路途漫長，我終於都頂唔住瞓咗，反正時間非常鬆動，再講吖，去到總站，我就唔信我唔知醒都冇人叫，原車車我返台北市中心~ XDDD
不過我都唔係瞓得幾好，瞓吓醒吓咁，到站時我係清醒嘅~
到咗機場，整理一下行李，就去辦登機手續~
我哋去到華航登機處，一個人都冇，不論乘客還是職員，一個都冇~
我哋開始懷疑呢度係咪正確辦登機手續嘅位置，我哋走去詢問處，佢指咗我哋去第二度，都係華航嘅，過到去，又指我哋去第二邊，今次應該啱喇，因為有人排緊隊~
但係啲職員喺櫃檯入面開緊會，完全無視排緊隊嘅顧客，或者真係未夠鐘做嘢啦~
辦完手續，仲有好多時間，我先前喺九份李儀餅店睇到機場好似有分店，諗住嚟到再買少少嘢做手信，不過我哋搵極都搵唔到，後來再問閘入面嘅職員先知機場係冇嘅，只好隨意挑選一啲啦~
今次台灣嘅行程仲未完，仲有下一站，下一站係「Hello Kitty 候機室」
Hello Kitty 候機室位於 C3 位置，直程喺第二邊 tower，步行過去要大約十分鐘，好容易就搵到~
屎塔，你頂唔頂得住呀？ XDDD
屎塔病情時好時壞，但總算比今朝好，距離上機仲有成兩個幾鐘，我哋就留喺度休息吓~
初時嚟到只係有少少人，時間一分一秒咁過去，由少少人變好多人，開始變得嘈吵，再由好多人變到只剩我哋兩個，個個上晒機，變得好靜，感覺好奇妙，世界不停在變，但自己就兩個鐘前同兩個鐘後都冇變過~
眼見時間差唔多，就叫醒屎塔，去埋洗手間就行返過 A9 候機室上機，原來 C3 去 A9 係好遠嘅，我哋全程跑住去都用咗十五分鐘，真係失晒預算！最後去到閘口遲咗六分鐘，不過啲人仲排緊隊作最後檢查，好彩咋，真係急死我，上唔到機就真係大件事~ @@
華機嘅短程飛機餐只得一款，冇得揀~
沒有留言:
發佈留言