今次旅程,源自屎塔一個心願~
佢一直都想為自己影一輯相,但要等到箍完牙先可以實現;等到箍完牙又諗住辭咗職先去,結果就等到十月中~
早在幾個月前就開始計劃,關於影相嘅功課,九成我都冇參與,只係屎塔搵咗好多資料,比較傾向某間先話我知,俾埋資料我,問問我意見。
呢間公司叫 Masalili,其實屎塔覺得 OK 嘅都應該唔會差得去邊,我當然都會認真睇吓~
喺某討論區睇咗超過 600 個帖,絕大多數回覆都係正面,其餘嘅帖就係詢問,換句話說,六百多個帖內沒有一個批評!
得到咁嘅成績,一定係好好好好先做得到~
當然,唔排除有寫手做嘢,我亦唔會相信單一資料來源~
上官網睇吓又 search 吓其他相關資料、其他用家嘅 blog 咁,結果係一面倒嘅正面!
要做到好多正面評價,只要該公司做吓手腳便成,但要做到網上零批評,零負面,呢點就唔係做假行為做得出來~
主要評論係相靚、唔 hard sell、服務好等等~
我哋決定搵呢間~
(由於出發前我向屎塔求婚成功,呢次影相計劃就變成拍攝婚照計劃)
基本婚照溝通事情都係由屎塔去跟,而我就集中火力去計劃行程~
的確,計劃台灣行程,相信難度不高,但係我哋去旅行,係會用有限嘅時間去最多嘅地方,非常幸運地,屎塔同我嘅諗法一樣,唔介意緊湊,亦唔會每個地方都慢嘆,玩夠就走~
但當然唔會夾硬嚟,真係做到而又唔會太過衝忙先得~
所以就算只係台灣,都要好用心去計劃,去到先執生就太浪費時間~
台灣我幾年前去過,講起果次旅程就認真浪費~
果次因為自己大意,護照過咗期唔記得去續領,最後要去辦快証,但其實辦快証都未必得,以官方時間計,根本趕唔切~
俾咗嘅機票酒店錢恐怕要泡湯~
點知就喺出發前一日有得攞証,我咩都冇準備,行李就好易搞,行程呢,就求鬼其,最後梗係去得好少地方,仲要有啲地方去唔到唔知去咗邊~
講返今次,Masalili 位於台中,我哋當然唔會淨係影完相就走啦,決定影完相就過台北玩幾日~
機票係限八日內要回程,一於玩晒八日~
今次對我嚟講係一次挑戰,以往計劃過嘅行程,一日裡面唔會去好多地方,今次就唔同,全部地方都唔遠,即係交通時間短,能花費更多時間喺景點上,事前一定要計劃得好啲先冇咁易出亂子~
開始計劃行程,一本好嘅旅遊書唔少得,好快就買咗書,跟住喺圖書館再借啲嚟睇,睇咗幾多本唔記得,但六七本就肯定有~
由於懶惰嘅關係,我比屎塔遲睇啲書,我都唔明佢點解可以搞婚照事情、睇晒啲旅遊書、計劃行程同時進行,佩服~
佢計劃好行程我就攞嚟睇,睇吓有冇咩自己嘅意見可以加埋入去~
佢做嘅資料搜集同記錄非常充足,我利用佢嘅資料同行程,再加自己嘅意願入去,呢次旅程,係屎塔同我一齊計劃嘅~
佢做頭,我就做尾,一切流程、資料嘅整理,就由我一手包辦~
查一查台中,台中市內冇咩一啲必到而又吸引我哋嘅景點,但我哋就睇中咗日月潭同清境農場~
但係呢兩處地方實在太遠,我哋時間又唔夠,市內冇地方好去,市外又冇時間去,真係頭痛~
喂,點解唔諗吓自己揸車慳返啲時間呀?反正自駕遊一定會帶嚟更多樂趣同回憶~
我哋只有第一日下午幾個鐘時間,但係台中租車冇得好似日本咁租 6 小時或 12 小時,起碼要租一日,冇計啦,去旅行預咗要用錢,最緊要開心~
不過清境農場實在太遠,冇可能去得到,唯有放棄~
台北有好多種 pass,有啲一日內任搭捷運,有啲又五日,有啲又任搭貓空,但我計過全部都唔啱我哋,仲好,唔駛煩~
又要搞國際車牌,又要準備拍婚照嘅嘢,又要計劃台灣行程,仲要計劃十一月日本関西之旅,呢幾個月真係忙到爆炸~
最後將成個行程放上網問下人意見,睇吓有冇啲咩位掉吓會更好,結果就唔係咁愉快......
我深知我個行係緊湊嘅,我亦表明重要景點全部喺朝早,真係失預算玩夜咗,夜晚果啲可以取消,好有彈性,全部喺預計之內~
點知個個走出嚟用諷刺甚或侮辱嘅語氣同言詞去攻擊我~
其實個個人嘅諗法唔同,我唔係要大家認同我,只係想睇吓有冇嘢可以掉吓~
就算真係覺得有啲地方唔能夠接受,大可直接指出,唔需要咁冇教養出言侮辱,更何況絕大多數回應都係空泛冇具體意思嘅~
我自然唔會同佢哋對罵,有損我人格~
雖然態度差,但當中亦有少部份意見值得我去諗諗,我亦有作出修改~
佢哋話我根本唔會聽人意見,遇到反對聲音就唔高興~
我認為佢哋橫蠻無理,佢哋提出意見我有分析,亦有部份我接納而作出修改~
咁已經証明我有聽人講嘢,但冇理由要所有意見都接納先算肯接受意見~
更奇怪嘅批評係,我話過晚間景點,冇時間可以唔去,佢哋竟然覺得咁樣係錯誤嘅諗法~
佢哋認為,plan 少啲,有時間先再諗去邊先係正確嘅~
我真係好唔明,假設我有五個景點,失咗預算,決定取消第四或第五個景點容易,定係有時間多先睇書諗吓去邊容易?
我真係覺得前者容易得多,認為後者容易啲嘅真係好唔合邏輯!!!
晚間可能剩返兩個景點,二減一點會難過即時睇書喺幾十個景點入面再揀???
晚間景點全部可以靠捷運直達,點改點刪都可以好容易去到再後一個景點~
態度惡劣出口傷人仲要毫無邏輯,我唔會同呢啲人一般見識,就算個計劃係唔完善,都係一個經驗~
出發~
標籤
- 2008 日本 ~ 大阪、札幌、小樽、登別、函館、東京 (9)
- 2008 香港 - 大嶼山、愉景灣 (1)
- 2009 中國 ~ 北京 (6)
- 2009 中國 ~ 長隆 (1)
- 2010 中國 ~ 東部華橋城 (1)
- 2010 日本 ~ 滋賀縣、大阪、京都、神戶、和歌山、白濱、奈良 (10)
- 2010 台灣 ~ 台中、台北 (10)
- 2012 歐洲 ~ 意大利、梵蒂岡、瑞士、法國、西班牙 (24)
- 2013 台灣 ~ 台中、清境、高雄、墾丁 (9)
- 2014 日本 ~ 沖繩本島、座間味島 (10)
- 2014 台灣 ~ 台中、南投 (6)
- 2015 日本 ~ 福岡、大分、熊本、宮崎、長崎、佐賀 (9)
- 2015 韓國 ~ 首爾、濟州、釜山、坡州、加平、平昌、旌善、春川 (11)
- 2016 日本 ~ 大阪、神戶、香川、德島、高知、愛媛 (7)
- 2016 歐洲 ~ 德國、奧地利 (17)
- 2017 日本 ~ 東京都、橫浜、江ノ島、箱根、富士五湖、靜岡 (8)
- 2018 日本 ~ 北海道 (道央、道東) (10)
- 2019 日本 ~ 名古屋、白川鄉、高山、金澤、上高地 (13)
- 2019 歐洲 ~ 冰島 (17)
- 2021 United Kingdom ~ Aberdeenshire (3)
- 2021 United Kingdom ~ Edinburgh (3)
- 2021 United Kingdom ~ Edinburgh/Aberdeenshire (4)
- 2022 歐洲 ~ 捷克 (10)
- 2022 歐洲 ~ 瑞士、意大利、列支敦士登、法國 (14)
- 2023 歐洲 ~ 盧森堡、比利時、荷蘭 (9)
- 2023 United Kingdom ~ Isle of Skye (3)
- 2023 United Kingdom ~ London (3)
- 2024 日本 ~ 宮城県、岩手県、秋田県、青森県、山形県、福島県、栃木県、千葉県 (12)
沒有留言:
發佈留言