長洲定大嶼山好呢？我揀咗大嶼山，可以搭 360 吊車，又可以上大佛。
今次全程由屎塔策劃，我一啲嘢都冇做過......=P
我哋到信和睇吓租渡假屋嘅資料，求其搵咗間就入去睇吓問吓。我哋話要租梅窩，個阿叔就介紹咗一間俾我哋，我哋都覺得 ok，於是個阿叔就打電話問屋主開咩價，對方開 $600(呢刻我同屎塔對望咗一眼......)，個阿叔話，期尾喇喎，仲要咁高價咩？$500 啦，$500 合理啲。
佢收線後就同我哋講 $500，仲話：嗱，你聽到咖啦，我幫你哋講低咗個價咖喇~
我心諗：呢啲扯貓尾把戲，呃得邊個？
我哋嘅預算係 $300~$400，$500 實在太貴！我問個阿叔，唔駛咁多設備，有冇啲平啲？個阿叔就推介貝澳，佢話：貝澳啦，搭車都係八分鐘，梅窩行都要十分鐘，差唔多。佢仲話佢都係住果頭~
關我屁事咩......
佢又重覆咁介紹同打電話，最後 $350 租咗貝澳一個叫德士堡嘅渡假村......屋。
出發前一日，即係 03.22，天氣開始轉差，我哋都好擔心所有室外活動都做唔到，焗住留喺屋入面冇嘢做。我提議帶埋部 PS2 去，好彩屎塔果部要拎走好方便，仲係超薄裝，唔算好重。
出發前，我上網睇吓由東涌地鐵站，點行過去昂平 360，但竟然官方網提都冇提過，有冇搞錯......
不過相信到時都可以行到去嘅~
好，出發喇！
今日 0800 由屎塔家出發，食過早餐，就塔地鐵過東涌，再步行過昂平 360。
其實地鐵內都有好清晰嘅指示，知道點樣行過昂平 360 嘅上車位置。
行到近入口處，有個男仔行埋嚟，問我哋係咪搭吊車，我哋話係，跟住佢就拎咗兩張飛出嚟，先解釋點解會有兩張冇用嘅飛(我都唔係好聽到佢講咩)，搞咗一陣，就話係來回飛，問我哋有冇興趣，我哋一聽到來回飛就拒絕咗佢，因為我哋只係搭單程~
上到去售票處，成人假日單程為 $68，我當然係買兩張啦。
中途見到一個人，原來係疑似藝人谷德昭！XDDD
出奇地，今次我又唔係好驚，我都唔知點解......
(我搭海洋公園果啲，直情好似有等死嘅感覺......)
中途經過幾次轉彎站，每次都會入一入站再出去。
$68 搭咁耐都唔係貴，都幾好。沿途風景唔講得上令人興奮，始終都係香港境內，唔會有咩驚喜嘅~
25 分鐘後就落車，到達昂平市集。
我哋行咗一陣，結論係，360 停駛果陣，真係可以想像到，市集可以有幾死！
市集離巴士站有一段距離，只有兩類人會到，一係搭 360 嘅人，二係特登過嚟行嘅人。
360 停駛，我真係唔覺得有幾多人咁神心會特登過嚟行吓。
不過咁，360 重開，相信人流係多咗，但生意額唔會上升太多，因為呢度絕對係冇嘢行，我哋都只係入過一間賣公仔同手信嘅舖頭，相信都係 360 經營嘅，因為入面有我哋坐吊車嘅相。
我哋直行直過，完全冇興趣走入其他商舖度睇吓嘢......
行完市集(其實只係去大佛必經，只係路過而已)，就向大佛出發，經過地下收費亭，聽到啲姐姐話要入去睇就要喺度買飛，上面冇得賣飛嘅。
真係古怪，點解上面冇得賣呢？有啲人唔知道，上到去先知要喺地下買飛點算呢？@@
我上一次嚟好似係唔駛錢入場嘅，係開放嘅。今次我哋都冇打算買飛~
其實上大佛都唔算辛苦，因為都唔係好高。
上到去行咗個圈，到此一遊就落返嚟，冇咩嘢睇。
跟住要去心經簡林，睇暈都冇指示點去，最後估估吓，終於睇到指示。
左邊嘅指示(邊邊好多人果度)，就連啲牌嘅存在都好難發現！@@
右邊嘅指示夠晒清楚，但只係角度問題，從巴士站行過嚟，係一定睇唔到果塊咁嘅布，只會留意到間茶餐廳！@@
由塊布果度行入去，大約十分鐘到就會到，途中我餓到四肢無力，好慘......
中途嘅所謂指示......
終於都到喇，老實講，冇咩特別，又係到此一遊咁啦~
呢刻，我已經餓過飢，所以已經冇咁辛苦！XDDD
行返出去嘅時候，見到稻草人同埋一架好的式嘅車。
呢區已經遊晒，可以過去梅窩碼頭果邊。
我哋搭 2 號巴士，嘩！好貴呀，成 $25 一個，痴線咖！
(平日 $16，爭好遠......)
等車時，有個大叔係咁同我哋講嘢，又問我哋係咪住梅窩，又問我哋係咪出香港，又話出香港搭船好，快過搭車......
我哋上到車即刻坐後啲，遇著啲咁「健談」又唔識嘅人，都好煩吓......
呢部車係會經我哋會住嘅渡假屋嘅，我哋都好留意每條村嘅環境，係咪吻合租屋時俾我哋嘅果幅簡陋地圖。
終於到咗一處相信係(但唔肯定係)嘅地方，我哋都認住佢。
幾經辛苦(個巴士司機好似跑緊一級方程式咁款......)，終於有命到達梅窩碼頭，我哋首先去食嘢。
途中經過一檔嘢有賣兒時玩意嘅嘢，屎塔話想買嚟玩吓，於是就買咗兩支。
果支嘢係用嚟吹波嘅，喺支嘢度整啲軟膠出嚟，放喺吹筒嘅一邊，再喺另一邊吹，咁就可以將啲膠吹成波狀。
見到個梅窩熟食中心，是但啦，食乜都好。一入去就俾人挾持到佢個舖頭入面，其實都冇咩所謂，間間都差唔多。
我哋叫咗兩個茶餐，其實只係兩碗麵加兩罐可樂。
得喇得喇，冇支裝嘛，得罐裝，駛唔駛咁強調呀？@@
食完嘢，走出去後見到檔嘢，賣啲嘢都幾有創意，屎塔就拎咗部相機出嚟影，我同屎塔講：怕唔怕呀，唔幫襯但走去影人哋檔嘢......
檔主唔知喺邊度飄出嚟，我相信佢係聽唔到我講嘢嘅，但佢都講咗句：影啦影啦，影多幾張。
哈哈！XDDD
跟住我發現有兩滴雨粉，我問屎塔：仲租唔租車？屎塔諗咗一陣，就話咁多人都租，我諗 ok 嘅，租啦！我就笑言：好，一租就落大雨就真係笑 Q 死！XDDD
我哋租嘅係單車，俾完錢($18 一日至 1900 )要去另一度攞車嘅。行過去嘅時候，雨開始大，我真係打從心底裡面笑出嚟！XDDD
好彩，都唔係好大同埋只係落咗一陣。我哋都係周圍踩吓，入吓村去吓海灘咁，都踩咗個幾鐘。
我哋喺海灘旁坐埋一邊，傾吓偈咁，坐咗一陣，雨又開始大，我哋即刻開車走人，途中見到一個公園，裡面有長椅係有頂有得遮嘅，我即刻扭入去，放好兩部單車，同屎塔一齊坐低休息吓。
其實雨又唔係真係好大，同埋好快就停咗，但我哋完全冇意思離開。
就係咁，睇住啲細路仔喺度玩，就咁又坐咗個幾兩個鐘。=)
我哋終於捨得起身去交車，呢個時候，我哋發現咗樣嘢......
先前踩果時覺得部車好擺，好難定喺中間，而家先知道，呢種車係要踩得慢先可以定嘅！@@
屎塔話之前踩得好辛苦！哈哈！=D
交完車，途經一間食 Pizza 嘅食店，我哋都俾佢飄出嚟嘅氣味吸引住，我同屎塔講：如果今晚落雨唔可以燒嘢食，不如出嚟食呢間。
講到食，屎塔當然唔會反對啦~ =P
跟住我哋走入百佳買零食同買嘢飲，當中買咗熱浪，但百佳冇晒 Pizza 味薯片，我哋再行過惠康買。惠康大把貨！仲有蕃茄味，不過兩個人邊食到咁多吖，所以都冇買到蕃茄味。
平時我就唔食嘅，亦唔想屎塔食太多，始終都冇咩益，不過出去玩就唔理咁多，想食就食！=D
買完就走去麥記買嘢返渡假屋食，途經巴士總站。
租屋俾我哋個阿叔話喺梅窩碼頭搭 7 號到總站就可以去到間屋度，又或者搭 1 號，但要中途落車。(佢俾我哋幅地圖都係咁寫，我冇聽錯。)
正常唔熟路嘅，就梗係揀 7 號啦，但睇暈都冇 7 號......@@
我入到麥記買嘢食順便問吓人，個姐姐話呢度冇 7 號，佢仲話去貝澳可以搭 1 號或者 3M。
搞乜咖？係咪路咖，阿叔，仲話住貝澳！@@
買完嘢，唯有等 1 號啦，始終阿叔同麥記姐姐都話 1 號得。
上到車，屎塔請個司機到貝澳提一提，個司機嘅回覆係：第一條村第七個站，你數唔數到吖？
(佢雖然係一個反問，但語氣令人聽落並唔需要你答嘅，只係叫你自己數，數唔到就幫你唔到......@@)
每位 $4.7
上到車等開車時有一段小插曲。
有個女人同其他朋友，大約四個人啦。個女人用背囊裝住隻狗仔，隻狗就冇出過聲，但個女人嘟完八達通後就俾司機發現。司機話唔俾帶狗上車，個女人話佢唔會嘈，咁細隻唔緊要，又話放落袋唔會俾佢走出嚟。個司機就都係官方答案，巴士唔俾帶狗上車，我唔會開車，你只會累咗成車人，一係你問吓主任。雙方講嘅嘢都係差唔多，來來回回都好多次，直至有個職員走埋嚟，又同個女人講咗兩句，個女人完全唔覺得自己有問題，不停指責司機等佢俾咗錢先出聲(其實佢用背囊又冇拉拉鏈，司機等佢俾完錢先發現，都好正常吖，點會係刻意？)。又講咗一輪，個職員又叫佢問吓主任，個女人話：乜你唔係主任咩？個職員話唔係！(真係笑死我，唔係你就咪走埋嚟調停啦！XDDD)
於是個女人落車走去站長室，最後都係退錢唔俾上。執得咁緊，唔知同意外保險有冇關呢？
開車後，我哋好留意啲巴士站(頭幾個站都冇人落，我哋只係數啲站)，數到就嚟第六個，屎塔話，到喇喎！我即刻按鐘，到站後，個司機一樣好粗聲咁講：貝澳
我落車時同佢講唔該，屎塔落車時都有講，個司機一連講咗兩次唔駛，我真係估唔到佢會講返唔駛，哈哈！
明明話第七個站喎，點解係第六個呢？可能個司機計埋個總站卦！？
搵到間渡假屋，做咗啲簡單手續，我哋間房係 2B，即係上一層。
間嘢分1/F, 2/F, 3/F，地下只係辦事處，2/F 同 3/F 各分 ABCD，天台可以燒嘢食，每個單位都有露台。
入房後，食咗麥記，屎塔就隨即休息！XDDD
我就駁好部 PS2 打機！
各自「活動」至 1930，都活動咗幾個鐘，雖然冇落雨，但我哋都唔打算燒嘢食，因為啲地方好污糟，真係唔想搞咁多嘢......
落到街，見隔離有間餐廳，聲稱食葡國嘢嘅，但睇真啲，都唔係好葡，最後決定出去食 Pizza。
等咗好耐巴士，原來夜晚一個鐘得兩班車！@@
每位 $4.7
落咗車後就周圍行咗一圈，都冇咩好食，所以都係走返去果間 Pizza 食店。
去到嘅時候，入面最少有七八個人排緊隊，唉，咪嘞，無謂等，我哋走咗過隔離間茶餐廳就算。
我哋揀咗兩個小菜，都幾貴，成 $40 個！
鹽焗雞、西蘭花花支片
食物質素都係一般啦，冇咩特別。
食完飯就又係等車，等到上車時，好多人，車上坐同企嘅位都滿晒......
呢刻我就好擔心，陣間點落車？@@
(旅遊巴中間企晒人，我哋坐中間位，勁難落車！)
好彩，到站後，有好多人落車，完全冇問題。
(落車後先發現，落遲一個站仲近！)
返到酒店，開著部電視，播緊早熟，我哋一路睇，一路食 Pizza 味薯片。睇完都成 2340，我哋就諗住沖涼瞓覺。
走去試吓個熱水爐，點試都冇熱水！@@
我哋就走落去問吓，點先有熱水？
個男仔一臉尷尬咁話：唔好意思呀，個熱水爐壞咗，又未搵到人整，如果你唔介意，可以落嚟沖。
有冇搞X錯！壞咗唔早通知？壞咗我今朝攞房時唔講我知？
我哋都冇即時發爛，因為仲要喺度過一晚，又有一百蚊按金喺佢度......
我哋當然介意落去沖，唯有喺房沖凍水啦，我不下數十次請骷髏頭堡賜我熱量，但都係冇用咖，唯有死頂啦！嘩！凍到我心臟都差啲停埋！@@
相信屎塔都係啦......
我唔會再幫襯呢間嘢，信和地庫轉右第一間！
第二朝九點幾先起身，梳洗完就去附近一間士多食早餐。
佢叫自己做士多，但其實係一間茶餐廳。我食腸蛋麵，屎塔食餐蛋麵。
我哋食完仲坐咗一陣，有班年青人，十個到同埋十多歲到啦，大大聲聲係咁講粗口，好似好有型咁......
跟住又有一男一女入嚟，問有咩食，個阿姐已經講咗三次未有飯同未有炒嘢食，個女仔仲要問：咁有冇芙蓉蛋飯？
真係激到命都短幾年！@@
我哋坐到 1130 就返上去執嘢，1200 前要交房。
朝早巴士比較密，好快就上到車。出到去就搵街渡搭過去愉景灣。
$10 一個，上到船自然有人走埋嚟問你攞錢，都幾特別~
只係搭咗十分鐘到。
臨埋岸時見到隻船，唔通係海盜船？
落到船就即刻見到愉景灣最常見嘅交通工具：Golf 車
我落船嘅只係街渡馬頭，係唔同愉景灣個碼頭嘅，要行一段路先去到，點行呢？咪就係跟人行囉~ =D
好快就到咗碼頭。
行咗一陣商場，果度啲舖頭寫嘅嘢都係以英文為主嘅，我係咪喺香港？
行完就搵地方坐低食熱浪，其間我見到啲巴士，我都唔知應該話係幾多號......@@
跟住就去咗海灘果邊坐。呢個時候，我哋先發現，擒日喺梅窩買嘅兒時玩意未玩，一於坐低玩咗佢。
哎吔，吹走咗......@@
就係咁，又坐咗個幾鐘，跟住就去碼頭搭船過中環。
成 $27，都幾貴。不過隻船好舒服，又靜，又闊落，唔怪得咁貴啦~
25 分鐘就到中環~
到咗中環，我哋去咗大家樂食下午茶。
食完就送屎塔返屋企，跟住就返自己屋企。
沒有留言:
發佈留言