北京，係我同屎塔都想去一次嘅地方。
我差唔多二十年前去過，冇記錯係六四之後。
其實同未去過分別不大，因為印象係接近零。( 我一向冇乜童年回憶......)
當年跟媽媽去，細舅父仲係喺北京工作，當年長城仲修葺緊， 當年長城冇纜車，當年長城冇滑車，當年更加冇水立方、冇鳥巢~
有日，屎塔同我講，$600 來回北京機票，問我有冇興趣~
去旅行，興趣總是有的，但來得太突然，要好短時間內決定， 總唔能夠好似買盒飯咁易決定~
點解佢會知有咁荀嘅優惠呢?
原來係茄話佢知嘅，茄同康仲已經買咗添，係茄問我哋有冇興趣去嘅~
既然係咁，一於一齊去啦~
我要攞假就好容易嘅，係爭屎塔姐~
等屎塔 confirm 攞到假之前，我一路都有上網 check 住平價機位嘅情況。
茄康訂咗嘅係 30/1 ~ 4/2
一路睇一路睇，只係一日，30/1 平價機位已經滿咗......
個心就開始急，唯有改變計劃！
茄康 30/1 係夜晚機，過到北京都差唔多係凌晨，31/1 佢哋會去天津，咁如果我哋 31/1(都係咁夜機)先去，只係去唔到天津，1/2 開始就可以一齊遊北京，我又覺得冇乜所謂，反正我都冇諗住去天津~
好，一於咁話！
第二日又一直 check 住啲機位，一直都話仲有少量，但屎塔未得我又唔敢 book......
屎塔同我講，唔理咁多，book 咗先算~
咁好啦，就郁手搞啦，點知，表面話仲有少量平價機位，實質到 book 嘅時候就要 $4999！有冇搞錯！我經旅行社買早去晚返都唔駛咁貴啦！
跟住我同茄都好努力咁用 e-mail 同電話查詢究竟仲有冇平價機位，e-mail 冇人覆，電話冇人聽，真係冇晒辦法。
咁我唯有諗吓其他方法啦~
我打俾旅行社朋友，有幾個選擇，但無論邊個選擇都太貴， 我知道我唔會揀~
跟住再打俾另一個旅行社朋友，佢話如果跟到團一齊去，可以平啲， 但一定唔會 $600 咁平~
咁我都知嘅，我對 $600 來回已經唔存有任何希望，只求唔好貴太多就可以~
不過佢話要遲多一個月先有答案，同時佢又問我有冇興趣搭火車去， 火車？係喎，點解唔諗吓呢！
跟住我又上網睇吓火車嘅資料，嘩！成廿四個鐘一程，好辛苦姐~~~
平又真係幾平，起碼平過茄康~
而且我相信會係一次好特別嘅旅程~
不過最後都係唔諗火車啦，怕危險又嘥時間，就連假期都未必安排到，又唔係日日有車，假期都係錢啦~
跟住阿茄話打電話搵到航空公司問，但要等航空公司覆， 我嘅希望又返返嚟~
等等等，阿茄打俾我，話 confirm 冇位......
唉，真係煩死人~~~
唯有等一個月，睇睇個朋友果邊點啦~
茄康只訂機票，即係話酒店要另外搞， 佢哋諗住住果啲由四合院改建而成嘅青年旅舍，貪其夠平同有特色。
平同有特色，都令我有興趣試吓。
直至年尾我要續領回鄉卡，去旺角中旅社搞手續， 搞完手續走果時經過旅遊部，不如走過去問吓啦~
由於我未曾睇過酒店資料，而買 package 一定要知住邊間先計到數， 我就叫佢介紹一間近市中心同唔太貴嘅酒店俾我， 佢介紹咗京倫飯店俾我，同埋係搭南方航空嘅~
我又問咗佢港龍價錢，不過個價真係差好遠，但就早去晚返， 南航就午去早返~
南航個價，同我朋友跟團個價只係差好少，但就唔駛自己另 book 酒店，於是我同屎塔商量完就決定買中旅社嘅 package，反正朋友果度都唔一定得~
酒店方面距天安門廣場幾個地鐵站，我認為可以接受，問過啲近啲嘅就貴好多，所以都係維持住京倫飯店。
我哋都未搭過南航，冇咩信心，上網一問，個個都話服務差同成日 delay，又話有時會冇飛機餐，唉，都 book 咗就唔諗咁多，反正親身經驗點都實在啲~
某一日，屎塔突然話我知買咗本旅遊書，我知道，我要開工喇~
睇完本書先發現，成本書冇介紹過鳥巢同水立方，只係地圖上有講而已~
真係令人驚訝！
由於睇書嘅資料唔係好夠，再加上屎塔話想去周口店，又要搵吓鳥巢同水立方嘅資料，我唯有上網搵吓料啦。
結果發現，上網搵料，北海道嘅資料可謂多到睇唔晒，而北京呢？真係有用嘅，就只有好少好少~~~
上網問咩，唔係冇人答就有唔同答案，真係想死~ @@
五日四夜但午去早返，實質只得三日半，果半日仲要係夜晚， 睇過資料，北京係冇乜夜生活嘅，而且景點早收，太陽亦早收，即係話所有必到景點都要朝早同下午 1700 前完成，而且我哋只得三個白天！
最煩係好多景點都收得早......
經過細心思量，唯有放棄路程最遠車程最多換乘最複雜嘅周口店，對唔住呀屎塔，上次一個大阪一個東京我都安排到， 今次同在北京境內我就安排唔到......
茄話過想去滑雪同浸溫泉，呢兩樣我都冇咩興趣嘅( 屎塔就有少少想浸溫泉，但我唔去佢實唔去)，所以我建議茄康喺 31/1 我哋未到之前去滑雪同浸溫泉。
茄又話想去一個藝術區睇吓，老實講，藝術區，如果喺歐洲， 我會有好大興趣，唔係話中國嘅唔得，呢啲好睇人嘅，外國月亮唔一定特別圓，問題係氣氛，去北京睇藝術？我就真係冇咩興趣~
出現分歧點算好？冇問題，難得去旅行， 最緊要去到自己想去嘅地方，分開玩就冇問題~
所以我安排咗第四日嘅下午去啲佢哋冇興趣去嘅地方，咁樣大家分開行都唔會有損失~
後來佢話我知個藝術區星期六日係最多嘢睇嘅~
不過我實在掉唔到，除非某啲景點遊覽時間縮短一半，呢樣連茄都唔想，所以最後都冇掉到~
跟住我哋約咗一日一齊入東涌行，睇吓有咩好買，最後屎塔同康買咗對行山鞋。
去北京真係需要行山鞋咩?答案可以係需要亦可以係唔需要~
根據我搜集返嚟嘅資料，北京市內並冇落雪，長城就只有少許，但呢啲資料講緊係十二月尾至一月頭，相信二月頭落雪機會更微，不過上長城著返對行山鞋都好嘅，平日著又可以保暖，反正呢次旅程多數喺室外同埋日日都係行行行~
晚飯就一齊傾吓有咩要買同邊個負責帶啲咩咁~
其後某日我同屎塔就出咗花園街買護耳罩同帽。
而電話卡同當地用嘅一卡通(用於交通付款)，我有朋友俾我，正！
萬事俱備，只待出發！
茄康一直都未有 book 酒店，又擔心去滑雪要拎住啲行李周圍走好麻煩，經過反覆計劃，最後決定頭一晚 book 一晚酒店 - 凱萊飯店，地點位於京倫飯店(即我哋入住果間)附近，check out 後寄存行李於酒店後先去滑雪。
之後果幾晚就......呢個想法好邪惡，唔係好方便講......=P
我哋約好茄康 31/1 晚喺北京王府井大街等。
突然，我發覺我成個行程裡面缺少咗一樣好重要嘅嘢，就係早餐嘞！
完全冇預時間食早餐，更加唔駛講去邊度食......
但最後都係算數，因為根本唔可能再有時間食早餐，唯有到時邊行邊食~
30/1 晚茄上機前打俾我，佢話唔記得帶泳衣，所以唔會去浸溫泉。
今次旅程雖然貴過茄康，但實際上都唔算貴，合理啦，只係茄康更平而已~
沒有留言:
發佈留言