就係為咗食好嘢！去函館朝市食新鮮嘅海鮮！
函館朝市就喺酒店隔離，好方便。
最後求其揀咗一間幫襯。
先嚟海膽刺身！
好鮮甜，好好味！屎塔都因此愛上咗海膽！
跟住就點咗燒帆立貝，因為製作需時，店主叫我哋入去舖頭坐住等。
帆立貝好新鮮，好爽口！
食食吓，店主太太遞上兩顆海膽，示意俾我哋影相。
店內張貼滿由港人留低嘅字條，大意謂好食呀，店主好人呀之類咁。
呢個朝市俾我嘅感覺係普通同有點失望~
失望係因為自己諗多咗，以為可以掃街咁掃，呢檔食呢樣，果檔食果樣咁，其實完全唔係咁樣嘅......
食咁少嘢又點夠吖，好彩錯有錯著......
今朝設計咗早餐食朝市，理應取消酒店早餐，但我又唔醒起，冇取消到。好嘞，而家唔夠飽，順理成章，梗係返酒店食早餐啦！
同樣地係啲極普通嘅早餐......
摩周丸係隻船嘅名，佢嘅歷史我就唔多清楚，淨係知有時間剩又好鬼近(步行只需五分鐘)，書又有介紹，好自然成為咗順手去埋嘅地方。
嘩！悶到呢......@@
跟住就要去函館嘅另一地標：五稜郭
五稜郭係一個呈五角型嘅公園，據說呢個型狀係同國防有關，但點樣有關法，我睇完之後嘅一秒鐘已經唔記得......
由酒店去五稜郭，要搭電車，由函館駅前搭到去五稜郭公園前，每位 220 日元。
落咗車之後要行一段唔短嘅路，上面落緊雨，下面溜緊冰，真係快慢都不是......
離遠已經見到五稜塔~
俾咗入場費就搭 lift 上去，上到去，睇到個公園真係呈五角形嘅。
有個位係玻璃地板嚟嘅，我掙扎咗一陣先夠膽企上去......@@
跟住就去函館市北洋資料館同埋道立函館美術館。
函館市北洋資料館主要係啲海洋資料，入場前有段搞笑嘢......
入場前先知要買入場劵(之前以為免費)，門口個保安教我哋如何購票，最後部售票機出咗兩張飛，個保安攞咗果兩張飛之後，行返埋自己位，我哋以為可以入場，點知原來未得！佢拉住我哋，俾返兩張飛我哋，我哋接咗，佢又示意我哋要俾飛先可以入......@@
佢哋做嘢真係一絲不苟，教你買飛還教你買飛，教完就要自己攞返，親手將兩張飛遞上......
場入面有記錄片又有標本同歷史，最搞鬼嘅係，有間會郁嘅屋，入面扮船艙，係咁前後斜住郁扮航行中，又假又悶......
不過其他海洋歷史都幾有趣嘅......
跟住再過隔離道立函館美術館，又係要錢嘅，我哋對於俾錢入場睇啲悶嘢已經生厭，決定唔睇，到此一遊就算~
跟住就要返轉頭搵嘢食，預定要去嘅食店路程唔遠，但就寸步難行！
地面鋪滿溶緊嘅冰，非常跣！
好奇怪，點解當地人健步如飛咁嘅呢？習慣咗都冇可能會唔跣咖......@@
正當我覺得奇怪之際，有個婆婆四平八穩咁走埋嚟係咁講日文，越講越起勁，仲越講越開心......
講講吓仲起飛腳！
哦，原來佢想俾我睇吓佢對鞋係有機關嘅~
佢對鞋嘅鞋底有一塊 C 型金屬，可以揭嘅，我相信一邊係收埋，一邊係用喺冰上防跣嘅。
婆婆，多謝你嘅心意......
睇住佢如履平地咁喺我哋前面離開，我哋仲係一步一驚心咁行......
好嘞，悶夠跣夠，係時候食吓嘢！
好不容易咁去到間食店，今次我選擇咗食地道嘅函館拉麵，一間經營咗 60 年嘅老舖~~~麵廚房。函館嘅特式拉麵，係鹽拉麵。
上次喺扎幌食唔到地道嘅札幌拉麵(即味噌拉麵)，今次點都要試吓函館嘅鹽拉麵！
麵店同五稜塔只係一街之隔，當然好快就搵到間舖。準備推門而入之際，見到門口掛咗個牌，上面寫住：休日
噢~~~撈~~~！
有冇搞~~~~~~錯！！！
札幌果間摺咗，函館呢間閂咗......
唉，冇計啦，食其他嘢啦~
諗住回程行到電車站之間睇吓有咩好食，條街又冷清清，啲食肆又唔吸引，整個環境都令我哋冇咩食慾，算啦，返去朝市搵嘢食~
都行咗一段路程，先去到電車站，搭返轉頭到朝市。
到咗朝市，主攻室內食肆，間間都差唔多，間間都咁吸引，求其揀咗間，叫咗兩碗飯，都係啲三文魚籽呀、飛魚籽呀、蝦呀、蟹腳呀咁啦，好味到唔識講呀！(人家可能食到厭，我哋就當係寶咁......哈哈！)
拎完行李，屎塔話好攰，想休息一陣，我見仲有時間，梗係冇問題啦~
佢一坐低無耐就瞓著咗，咦咦，真係好攰喎！XDDD
襯佢瞓著，我就喺酒店入面周圍行吓，冇咩特別~
時間差唔多，咁我就叫醒佢，佢半睡半醒咁話要去廁所，咁我就睇行李，佢去廁所啦，跟住發生咩事我就唔係好知喇，因為 ......因為......因為......我都瞓著咗......@@
佢返嚟就叫醒我，咁就一齊出咗酒店搵巴士搭去機場。
果時落緊雨，都唔係話好細果種，我叫屎塔企埋一邊等我，我行出去睇吓邊度搭巴士先。
我好快就搵到巴士站喺邊，諗住返轉頭會合屎塔再攞返啲行李，點知一回頭，見到屎塔幫手拎緊啲行李向我行過嚟。
佢，全副武裝，上身羽絨褸，下身雪褲，加上重 18 KG 嘅篋，一小步一小步咁移動，驟眼睇落，就好似一隻企鵝咁，非常可愛~=D
我當然嗱嗱聲過去幫手拎啦。
我一手就拎起個篋，就係呢一吓，屎塔就覺得我充滿男子氣概！ (我想......)
我哋冒住雨快步走到巴士站，當時已經有十多人排緊隊，等咗一陣就有巴士，到我上嘅時候，個司機指手畫腳，我都唔知佢做乜！
佢唯有落車，將我個篋放入車身中間嘅行李位。
我先前唔明，因為前面上車嘅人冇一個需要咁做，我個篋太大喇......
我哋搭嘅巴士叫帝產，每位 400 日元，大約半個鐘就到函館機場。
我哋搭 1530 班機往東京羽田機場，呢一刻係 1400，因為內陸機關係，只需一個鐘前 check-in 就得，時間上非常鬆動。
於是我哋輪流入洗手間除咗條雪褲，再放入篋。
幾經辛苦，又將啲嘢係咁掉位，先能夠成功將兩條雪褲放入篋，仲要合兩人之力，先成功鎖到個篋......
好嘞，搞掂可以去 check-in 同將行李寄艙，過檢查機時，不獲通過！
咩事呀......@@
個職員指一指個 screen 講：「lighter?」
係喎！火機喎！我個篋入面有部火機......
果一刻我有啲擔心，唔通唔可以帶返香港？
我唯有將個勁爆嘅篋解鎖，搵返部火機出嚟......=(
摷完一輪，終於搵到，又要搞一輪先鎖得返個篋......
我拎住個火機問佢，可唔可以 hand carry，好彩冇問題！
好，走埋去 check-in，佢噏咗一輪嘢，話我知班機要 delay，delay 幾耐唔知......
我又問有冇告示版睇吓，等我可以留意吓幾時上得機，佢又話冇~
我又問會唔會有廣播，佢話有。
咁都 OK 啦。
咪住先，用咩語言先？？？
問咗佢，佢話只有日文，唔會有英文......
死得啦，上得機都唔知啦！
我唯有同佢講(指一指屎塔果邊)：「我哋就坐喺度等，麻煩你有消息通知我哋，唔該。」
就係咁，我哋坐埋咗一邊，等...等...等...
等咗一陣，有個空姐遞咗張紙仔俾我哋，上面寫住「delay 1 hour」。
於是我又走埋去問佢幾點可以入閘，邊個閘口......等等。
OK，可以即刻入閘，我哋梗係入咗閘先啦，起碼可以舒舒服服咁坐吓 ~
呢個時係 1445。
入咗閘，睇到顯示牌顯示太約 1615 起飛。
坐咗一陣，走去掉垃圾之際，我見到有間小食店，於是就走過去行咗個圈。
我發現呢個小食店有軟雪糕賣！於是我就買咗兩杯，再由另一邊行出去 。
屎塔見到我拎住兩杯雪糕，即時兩眼發光~XDDD
享受完最後的北海道雪糕之後，屎塔就開始做佢平時最愛做嘅嘢，佢美其名為「休息」。
本來我都唔係好想瞓，想留意吓身邊嘅人同事物，不過，身邊嘅人同事物冇乜點變過，我實在頂唔住，睡了。
(我係一個充滿智慧嘅男人，瞓前當然有教鬧鐘啦~)
瞓咗一陣，鐘未響我就醒咗，而家係 1545。
跟住屎塔都醒埋，我哋輪流去咗洗手間，出到嚟又坐咗一陣，見到開始有人排隊上機，我哋又排埋一份，再望一望個牌，航機再次 delay，不過今次只係由 1615 延遲至 1625，大家都排緊隊，我哋唯有按兵不動，繼續排。
我哋順利喺 1625 前上到機，今次亦都係冇飛機餐嘅，大約 1800 就到東京羽田機場。
比預計行程遲咗成個鐘！
由羽田機場到新宿，首先要搭京濱急行電鐵至品川站(400 日元一位)，再步行過 JR 品川站轉乘 JR 到新宿站(190 日元一位)。
差唔多 1915 先到 JR 新宿站，第一件事要做嘅，就係了解一吓聽日去 Hello Kitty Land 嘅交通問題。
我搵到一個好熱心嘅職員問，經過一輪雞同鴨講嘅溝通，先發現，我問錯人！佢只係解答到我 JR 嘅問題，其他嘅鐵路問題，佢係唔知嘅，儘管我要問嘅鐵路路線同 JR share 埋同一個站......
不過我冇打算再去第二度問，因為大黑店閂 2000，而家已經 1925！！！
第二樣好重要嘅事，就係要喺呢個勁大嘅 JR 站，搵一個比較近酒店嘅出口嘅 locker！
因為由 JR 站去酒店，都要行十五分鐘，去酒店之前，仲要去大黑店，明早又係咁行返轉頭，更重要嘅係，明早去 Hello Kitty Land，之後回程都經 JR 新宿站，所以我哋決定，到埗後即刻放行李入 JR 嘅 locker，聽日去完 Hello Kitty Land，回程先再返嚟攞。
呢個站實在太大，而我哋嘅時間又實在太少，所以我哋求其搵咗個 locker 近歌舞伎町就算。
放好行李，再影咗一幅相，唔記得個 locker 喺邊都可以憑相問吓人。
好，跟住就依照大黑店官方網站所提供嘅地圖去搵。(買 Hello Kitty Land 入場劵，據說會平啲。)
喺站問咗人，有咗個大方向，一出站，就見到某大廈頂嘅霓虹燈大廣告，我哋就係咁，跟住個方向行。
搵到喇！但係閂咗門嘅，明明未夠 2000......
喺門口有幅地圖，我哋對一對，覺得唔係我哋想去果間，於是又問吓人，條友睇咗好耐，搔晒頭咁款，唉，得喇得喇，唔知咪講囉，hold 咗我哋幾分鐘......@@
我哋走出大街，再睇吓地圖，嘩，好鬼亂呀，新宿同北海道嘅街度，真係差天共地，亂到嘔！(其實都預咗嘅......)
我哋又再問人問咗幾次，都得唔到一個比較好嘅答案，真係有冇搞~~~錯！
唯有靠自己啦......
幾經辛苦，我哋搵到相信係大黑店嘅建築物，我哋喺地下見到水牌，於是就衝上去三樓！呢一刻 2000，好緊張！
上到去，發覺唔係好似，於是又問吓啲職員，啲職員話唔係，但又唔知我哋講嘅大黑店喺邊......@@
究竟我哋係咪喺新宿？冇人知都有嘅？真係好奇怪！
我哋抱住放棄嘅心態離開，落到地下，我哋終於搵到喇 ！原來就喺呢楝大廈隔離，而且仲係地舖添！
哎呀！！！激死人喇！閂咗門呀，閂 2000，而家係 2005......@@
冇計啦，唯有捱貴飛啦......
其實嚟到新宿，我哋發覺咗一樣嘢，新宿嘅 3 度，係凍過北海道嘅 0 度好多！因為新宿好大風，我哋仲收起晒啲帽同手襪(喺篋)，個頭同隻手凍到唔識形容......
本來屎塔話想行陣街嘅，不過條街實在太凍，再加上先前嘅大半個鐘趕得好利害，而家先覺攰，所以都打消咗行街嘅念頭，轉為搵嘢食。
我哋向住歌舞伎町嘅方向行去，當然唔少得呢個必然嘅動作：影相！
途中，我見到好多日本人都著唔夠衫，我見佢哋都好凍 ，但講到最誇嘅，就係我見到有個男仔，裡面著住件恤衫 ，外面加件西裝褸，係咁多咋，佢雙手直插褲袋，表現出極為寒冷嘅動作，認真愛靚唔愛命~
最後，我哋搵到間食店，有正常價錢嘅咖喱飯食，我哋就走咗入去幫襯 。
睇完 menu 照圖叫咗兩碟飯，一碟係滑蛋雞扒飯，一碟係咖喱豬扒飯。
不過，睇住官方網頁嘅地圖，一樣係搵唔到間酒店......
咁啱見到個踩單車嘅差人叔叔，問佢實掂啦！
佢睇咗一輪，指一指，話喺果邊。老實講，從佢嘅言行，我真係冇咩信心，佢都好似唔係好清楚咁，唔通日本嘅地理環境真係咁難用地圖表示咩？個個都唔識嘅？@@
不過咁，佢所指嘅方向，同我相信嘅方向一致，我諗都啱嘅。結果，真係搵到！
呢個時候真係好安慰，因為我哋凍到以為自己會死喺新宿......
呢間酒店細到爆，不過冇計啦，新宿要平又要近 JR 冇得要求咁多~
每日點滴：
一直期待嘅函館朝市，確實令我有少少失望，滿以為可以好似掃街咁掃海鮮食......
但其實可以即食嘅嘢根本唔多，多數賣乾貨或者買走烹調方可以食用嘅海產。
函館真係得個悶字，就連第一晚去大阪嘅心齋橋周圍行吓都比整個函館旅程精采得多！
不過咁，點都唔能夠抹煞親身到達世界三大夜景其中之一嘅經歷嘅~
第一次東京自遊行，認真嚇人！
嚇人在地圖只可以作參考，唔能夠幫到你咩大忙......
嚇人在當地人都唔能夠話到俾你知你想去嘅地方點去......
沒有留言:
發佈留言