我自己當然鎖定亞洲區，主要係諗星馬或者泰國，不過屎塔就興趣不大，老實講，我都興趣不大......
後來見到廣告，東歐 11 天都唔駛一萬蚊，好似好吸引咁，不過咁，計埋啲雜費同導遊費，兩個人三四萬走唔甩，而且我哋都唔想跟團~
唔跟團，咁東歐唔駛諗啦，錢同時間都唔容許~
衝唔出亞洲，又有吸引力嘅，唔駛講，梗係日本啦~
又話要去啲唔駛用咁多錢嘅地方，但又諗去日本，真係夠晒矛盾！
好啦好啦，日本就日本啦......
日本咁大，去邊呢？首先剔除咗唔去嘅區域先~
北海道，太貴，上次又去過，今次唔去啦~
沖繩，冇興趣~
東京‧唔算冇興趣，但又未到好雀躍~
仙台，我自己去過，但屎塔就未，其實可以諗吓，但肯定唔係首選~
最後入圍嘅係「京阪神」同「立山黑部」
屎塔呢，只要係日本就得，所以我就自行決定咗去立山黑部~
開始上網睇吓資料，初時都覺得好好彩，因為上立山黑部嘅交通會喺十一月中停止運作，我哋可以安排到十一月初上，仲趕得切~
但越睇得多資料就越唔對路，因為想睇高雪牆的話，要等初春雪未開始溶先有得睇，其餘時間去到只係兩旁好矮嘅雪牆~
立山黑部，呢生人仲會唔會去第二次呢？如果唔會，咁梗係留返初春先去啦~
我唔係好甘心，再睇多啲資料，又去書店同圖書館搵書睇，但係我發現圖書館講立山黑部嘅書好少，書店出售嘅旅遊書就更少！我哋甚至去埋書展搵，一樣徒勞無功。打埋去出版社問，出版社話個多月後有新版~
初時都諗住等吓，但其實事實擺在眼前，所有資料都講緊同一樣嘢，立山黑部唔會終年都大積雪，呢個世界邊有咁多奇蹟，而且冬天落雪至初春恢復交通，成件事合情合理，十一月初都未開始有大雪，何來高雪牆？我諗我都係時候清醒，京阪神成為不二之選~
決定咗去京阪神，發現十一月係當地嘅楓葉季節，但月中打後會好啲，於是我哋就定咗日期在月中打後~
日本嘅櫻花，我都算睇過，但楓葉就真係未見過，而且楓期一般為三星期，唔似得櫻花咁難追，能遇上楓葉機會應該相當大~
開始做功課，梗係去圖書館借返三五七本書先啦~
講講吓京阪神，屎塔話想去埋和歌山探一隻當地好出名嘅貓 - Tama，呢隻貓又點止當地出名，其實喺香港都好出名，好多香港人都係慕名而去，屎塔嘅前上司就去完返嚟唔係好耐，所以今次除咗京阪神，仲會去埋和歌山~
又，屎塔個妹上次去日本，睇返佢啲相，有兩處地方都想去，一處係奈良公園，可以零距離餵鹿；另一處係京都伏見稲荷大社內的千本鳥居~
呢兩個地方唔係本本書都有介紹，就算有介紹嘅都唔及得上睇親友去完返嚟嘅靚咁吸引，所以如果唔係屎塔個妹去過，我哋可能會錯失呢兩個咁好嘅景點~
再上網做吓功課，有網友介紹如果有時間可以去埋琵琶湖，圍繞住琵琶湖有非常多嘅景點，可以就住自己喜好同時間揀啲嚟行吓~
除咗京阪神最中心同第一次到必去嘅景點之外，竟然仲想去咁多地方，其實我估計去唔晒嘅，不過攞晒資料返嚟慢慢做吓功課先算~
除咗睇圖書館借返嚟嘅書，自己當然都要買返本書啦，上次去台灣睇果本都幾好，所以我哋買咗同一出版社出嘅京阪神~
書裡面提到有間博物館叫「発明記念館」The Instant Ramen Museum，其實係講杯麵嘅歷史，屎塔叫佢做「杯麵博物館」，我係唔會忘記呢間嘢......
台北有「李儀餅店」，關西就有「杯麵博物館」，plan 咁耐行程，俾屎塔"提"足咁耐，減咩行程都唔可以減杯麵博物館！真係煩死人喇！
跟住屎塔又 sms 咗一段蔡瀾嘅文章俾我睇，話喺黑門市場飲過一杯豆漿，係佢從未飲過咁濃豆味嘅！蔡瀾喎，梗係跟啦！
和歌山再落就係白濱，果度有個島仔，中間有個窿，據說太陽落山時會跌落個窿度，聽落幾有趣，屎塔又好有興趣喎，好啦，加埋入去啦~
屎塔又唔知喺邊度睇到關西有個垃圾站嘅建築外型好特別，又話想去，我睇過啲相又真係幾靚幾過癮，好啦，安排到就去啦~
京阪神中心以外嘅景點大致定好，再睇吓書，最後決定用盡八日，以上所提到嘅景點，竟然俾我安排到塞晒入行程入面，睇嚟今次又要考驗一下我倆嘅體能~ XDDD
開始做功課時，見到關西嘅鐵路公司，真係頭都痕埋，花多眼亂，有啲又共用鐵路，又啲又唔相通，真係睇到人都癲！不過幸好，睇得多熟習咗都仲可以應付~
和歌山果日，景點與景點之間都好遠，交通又極為不便，決定自駕，反正去台灣申請咗國際車牌有一年限期，正！
近排日元不斷上升，我哋都唔係好捨得唱住，但日子越來越近，唔捨得唔捨得都要唱，結果，等咗幾星期，匯率上落都唔係好大，是旦啦，都要唱咖啦......
唱完之後，由於我個人嘅黑仔指數一直都係高企，個匯率一星期後開始跌，這就是我的命運~ >_<
機票方面，我哋訂咗凌晨機，清晨六點就會到關西機場~ @@
仲可以揀關西機場或者名古屋機場走，但名古屋實在太遠，所以唔會考慮~
酒店方面，第一次唔經旅行社訂，自己上啲日本酒店網訂，真係平好多，留返啲錢去玩去食好過啦~
チサン イン 大阪ほんまち
Chisun Inn Osaka Hommachi
http://www.solarehotels.com/chisun/inn-osaka-hommachi/?nid=KIN_CIHom
地點唔算好好，但可以接受啦，行去鄰近四個地鉄都喺十分鐘內~
早知道日本交通費貴，做功課時就知道有各式各樣嘅交通優惠票，最後我揀咗 Kansai Thru Pass~
http://www.surutto.com/conts/ticket/3daytw/index.html
我哋去八日，每人買兩張三日同一張兩日就掂晒！其實有一日散買車飛會平啲，不過唔理咁多，用埋呢種飛會方便啲，反正唔係爭好多~
雖則話香港都有好幾間旅行社可以買得到，但經我查詢過之後，有啲冇賣兩日票，有啲冇賣三日票，有啲有賣但冇貨......
其實可以去到關西機場先買嘅，但係如果可以出發前做到嘅嘢，我又唔想過到去先搞，適逢屎塔待業中，呢份苦差，非佢莫屬啦~ XDDD
幾年前我去過清水寺，但印象唔深，因為係跟團去嘅，就係因為跟團去，先會出現以下呢句說話：
我同屎塔講：「我去過清水寺，但未去過京都~」 XDDD
跟團跟到渾渾噩噩，連自己去過京都都唔知！真係好離譜！ XDDD
一切都準備好晒，出發~
沒有留言:
發佈留言